Hadia So Khöu Waʼedöna ba Wombaloi si Fao Faʼebolo Dödö?

1, 2. (a) Hadia manö mbörö wa manofu ita, ”Hawaʼara?” (b) Hana wa möi famarou dödöda iadaʼa duma-duma niha si lö faröi ba götö föna?

”HAWAʼARA?” Daʼa wanofu ndra samaʼeleʼö si lö faröi sotöi Yesaya hegöi Habakuki. (Yesaya 6:11; Habakuki 1:2) Me isura Zinunö 13 Razo Dawido, ibeʼe wanofu simane daʼö öfa kali. (Zinunö 13:1, 2) Ba ginötö lafasui Yesu Keriso ira niha si lö famati, isofu khöra, ”Hawaʼaragu na khömi enaʼö?” (Mataiʼo 17:17) Tola manö göi tabeʼe wanofu simane daʼö iadaʼa.

² Hana wa tola tumbu ba dödöda ba wanofu, ”Hawaʼara?” Tola manö börö walöʼatulö salua khöda, fökhö mazui börö me itugu alawa ndröfida. Tola göi fawuka wangera-ngerada börö me so ita ba ”mbaŵa si lö sökhi, ba götö safuria”. (II Timoteo 3:1) Mazui, alua daʼö börö gamuata si fasala nifalua niha si so ba zi fasuida irege marase ba afatö dödöda. Gofu hadia mbörönia, tefarou dödöda börö me taʼila wa lö mofönu Yehowa ba niha samosumange yaʼia si lö faröi sameʼe fanofu daʼö ba götö föna.

3. Hadia zanolo yaʼita ba ginötö tataögö wamakao?

³ Hadia zanolo yaʼita enaʼö anau gölöda ba ginötö tataögö wamakao? Ifarou dödöda Yakobo, talifusö tiri Yesu ira matua, ”Ba mibologö dödömi, wombase, yaʼami ira talifusö, irugi waʼaso Zoʼaya.” (Yakobo 5:7) Andrö wa fefu ita moguna so khöda waʼebolo dödö. Hizaʼi, hadia geluaha waʼebolo dödö, ba hewisa wangoromaʼöda mbua-bua si sökhi andre?

HADIA GELUAHA WAʼEBOLO DÖDÖ?

4, 5. (a) Hadia waʼebolo dödö andrö, ba hewisa enaʼö so khöda waʼebolo dödö? (b) Hewisa wanutunö Yakobo sanandrösa ba waʼebolo dödö? (Faigi gambara ba wamobörö wamahaʼö.)

⁴ Iwaʼö Sura Niʼamoniʼö wa moroi ba geheha niʼamoniʼö Lowalangi so waʼebolo dödö. Na lö fanolo moroi khö Lowalangi, abua ba niha si lö moʼahonoa ba wangokhögö faʼebolo dödö ba ginötö si basaki. Faʼebolo dödö no buala moroi khö Lowalangi, ba na tafalua daʼö no taforomaʼö waʼomasida khö Yehowa hegöi ba niha böʼö. Na lö khöda faʼebolo dödö, awuwu waʼomasi si so ba gotaluada hegöi ba niha böʼö. (I Korindro 13:4; Galatia 5:22) Hadia manö zi tefarahu ba waʼebolo dödö? Duma-dumania, faʼanau gölö ba wanaögö fanandraigö hegöi ba wangokhögö mbua-bua si sökhi. (Kolose 1:11; Yakobo 1:3, 4) Faʼebolo dödö zanolo yaʼita enaʼö lö faröi khö Yehowa gofu hadia gabula dödöda. Daʼa zanolo yaʼita enaʼö lö tasulöni zi lö sökhi ba ginötö tataögö wanandraigö. Imane Sura Niʼamoniʼö wa moguna so khöda waʼedöna ba wombaloi. Daʼa wamahaʼö si tohude nihalöda moroi ba Yakobo 5:7, 8. (Baso.)

⁵ Hana wa moguna edöna ita ba wombaloi hadia nifalua Yehowa? Ifagölöisi zalua khöda Yakobo hulö simane samösa sonowi. Hewaʼae iforege wohalöwö ba wananö sinanö, tebai ifatörö deu, lökhö mazui faʼatedou zinanö. Moguna so khönia waʼebolo dödö ba wombaloi ”mbua danö, sebua böli”. Simanö göi iadaʼa, oya zi tebai tafatörö gasa-gasa wombaloida waʼalua hadia zi no ifabuʼu Yehowa. (Mareko 13:32, 33; Halöwö Zinenge 1:7) Simane sonowi, moguna so khöda waʼebolo dödö ba wombaloi.

6. Hadia wamahaʼö khöda ba duma-duma zamaʼeleʼö sotöi Mikha?

⁶ Anau gölö zamaʼeleʼö sotöi Mikha ba wanaögö fanandraigö salua khönia, simane salua khöda iadaʼa. Auri ia ba götö mamatörö Razo Gahasi. Gahasi andre razo fondrege waʼalösökhi. Lua-luania, oya waʼalösökhi salua ba mbanua daʼö. Sindruhu-ndruhu lö sökhi zalua irege iwaʼö Sura Niʼamoniʼö wa niha si so ba daʼö ’onekhe ira ba wamalua si lö sökhi’. (Baso Mikha 7:1-3.) Iʼila Mikha wa tebai ibulöʼö zalua andrö. Andrö, hadia nifaluania? Imane khöda, ”Ba yaʼodo, ba utöngö-töngöni khö Yehowa, manötöna ndraʼo khö Lowalangi andrö, sangorifi yaʼodo. Ifondro-ndrongo sa ligu Lowalangigu.” (Mikha 7:7) Simane Mikha, moguna so khöda ’mbua-bua fombaloi’.

7. Hana wa tenga ha asala tabaloi manö waʼalua hadia zi no ifabuʼu Yehowa?

⁷ Na taʼokhögö wamati simane Mikha, hasambalö edöna ita ba wombaloi Yehowa. Salua khöda tenga simane niha gurunga sombalo-baloi hawaʼara ginötö lahuku mate ia. Lafaso ia ba wombaloi, ba lö hadöi saʼae dötönafönia. Sindruhu-ndruhu no aröu faehu ia ba zalua khöda! Edöna ita ba wombaloi Yehowa börö me taʼila wa alua hadia zi no ifabuʼu ba wameʼe khöda faʼauri si lö aetu ba ginötö si tefaudu! Andrö wa ’so khöda wanaha tödö, awö waʼebolo dödö ba faʼomuso dödö’. (Kolose 1:11, 12) Ba ginötö tabaloi, moguna taʼangenanöi enaʼö lö mokökö-kökö ita hana wa lö alio ifalua daʼö Yehowa. Na tafalua daʼö, lö omuso dödönia.​—Kolose 3:12.

DUMA-DUMA NIHA SI LÖ FARÖI BA WAʼEBOLO DÖDÖ

8. Hadia wamahaʼö khöda moroi ba duma-duma nifalua ndra matua hegöi ira alawe si lö faröi sauri ba götö föna?

⁸ Hadia zanolo yaʼita enaʼö abölö edöna ita ba wombaloi? Tola taʼangeraigö sanandrösa khö ndra matua hegöi ira alawe si lö faröi sauri ba götö föna. Laʼokhögö waʼebolo dödö ba wombaloi ginötö waʼalua hadia zi no ifabuʼu Yehowa. (Roma 15:4) Na taʼangeraigö duma-dumara, sökhi na tatörö tödöda hawaʼara ginötö niʼogunaʼöra ba wombaloi, hana wa edöna ira ba wombaloi, ba hewisa wamahowuʼö Yehowa ira börö me so khöra waʼebolo dödö.

9, 10. Hawaʼara ginötö niʼogunaʼö Gaberahamo hegöi Sara ba wombaloi Yehowa?

⁹ Angeraigö duma-duma Gaberahamo hegöi Sara. Börö me laforomaʼö ’wamati ba faʼebolo dödö’, laʼokhögö ’gamabuʼula li’ andrö. Imane khöda Sura Niʼamoniʼö wa ”me no imanö wamologö tödönia, wombaloi”, ifabuʼu Yehowa wa ifahowuʼö Gaberahamo ba ibaliʼö ia ama ba mbanua sebua. (Heberaiʼo 6:12, 15) Hana wa moguna iforomaʼö waʼebolo dödö Aberahamo? Börö me tola manö ara ginötö irege alua zi no tefabuʼu andrö. Me 14 Nisana 1943 SM, Aberahamo, Sara hegöi fefu zoroi yomora, laʼötö Nidanö Oiferati ba ofeta ira ba Danö Gamabuʼula. Hizaʼi, moguna ibaloi 25 fakhe Aberahamo fatua lö tumbu nononia Izaʼaki ba 60 fakhe fatua lö tumbu maʼuwunia Gezau ba Yakobo.​—Heberaiʼo 11:9.

¹⁰ Hawaʼebolo Danö Gamabuʼula niʼokhögö Gaberahamo? Imane Sura Niʼamoniʼö wa Yehowa ”lö ibeʼe khönia ba daʼe tanö ondröita, mitou dania, sambalahe löʼö. Ba ifabuʼu linia, ibeʼe khönia dania, ba khö maʼuwunia mitou; hewaʼae lö ono na khönia”. (Halöwö Zinenge 7:5) Lö ikhamö 430 fakhe me no aefa iʼötö Nidanö Oiferati Aberahamo, tobali sambua soi ngaʼötönia ba toröi ira ba danö daʼö.​—II Moze 12:40-42; Galatia 3:17.

11. Hana wa edöna Gaberahamo ba wombaloi ba hadia howu-howu si tobali mbua börö waʼebolo dödönia?

¹¹ Edöna Gaberahamo ba wombaloi börö me faduhu dödönia wa hasambalö ifalua Yehowa hadia zi no ifabuʼu. Mamati ia khö Yehowa. (Baso Heberaiʼo 11:8-12.) Omuso dödö Gaberahamo ba wombaloi hewaʼae lö iʼila hewisa waʼalua fefu hadia zi no ifabuʼu Lowalangi fatua lö mate ia. Hizaʼi, khalaigö hewisa waʼowua-wua dödö Gaberahamo ba ginötö tesusugi ia ba gulidanö faradaiso. Ahöli-höli dödönia na ibaso waö-waö waʼaurinia hegöi ösi nomonia si so ba zi hauga faosatö Zura Niʼamoniʼö.a (Faigi nisura ba gahe zura.) Khalaigö hewisa waʼomuso dödönia me iʼila wa moroi ba ngaʼötönia alua gohitö dödö Yehowa sanandrösa khö Mesia si no tefabuʼu! Faduhu dödöda wa lö maniasa Gaberahamo hewaʼae ara ginötö wombaloinia howu-howu andrö.

12, 13. Hana wa moguna ebolo dödö Yosefo, ba hadia mbua-bua si sökhi niʼokhögönia?

¹² Maʼuwu Gaberahamo sotöi Yosefo, edöna göi ia ba wangokhögö faʼebolo dödö. Oya wanandraigö si lö atulö nitaögönia. Si oföna, lafamawa ia ira talifusönia tobali sawuyu me 17 fakhe ndröfinia. Aefa daʼö, laböbögö khönia zi lö duhu wa omasi ia ihoröni woʼomo zokhö yaʼia irege labeʼe ia ba gurunga. (I Moze 39:11-20; Zinunö 105:17, 18) Hewaʼae samosumange Lowalangi si lö faröi Yosefo, ba wamaigida hulö hukuma nitemania tenga howu-howu. Me no aefa 13 fakhe, tebulö fefu zalua. Aheta Yosefo moroi ba gurunga ba tobali ia samatörö numero dua ba Miserai.​—I Moze 41:14, 37-43; Halöwö Zinenge 7:9, 10.

¹³ Hadia afökhö dödö Yosefo ba walöʼatulö si göna yaʼia? Hadia so ba dödönia wa no iröi ia Yehowa? Löʼö. Ibaloi Yosefo si fao faʼebolo dödö. Hadia zanolo yaʼia? Famatinia khö Yehowa. Aboto ba dödö Yosefo wa tola ifatörö fefu hadia ia Yehowa. Taʼila daʼö moroi ba wehedenia khö ndra talifusönia, ”Böi mibusi dödömi! Hadia sa, no salahi Lowalangi ndraʼodo? Si lö sökhi sa nifakhaimi khögu, ba no iʼohe ba zi sökhi Lowalangi, ba wamalua niʼilada maʼökhö fangorifi niha si no ato.” (I Moze 50:19, 20) Iʼila Yosefo wa tenga zaya-zaya gölö zi no idöna-döna börö howu-howu moroi khö Yehowa.

14, 15. (a) Hana wa adöni dödöda ba waʼebolo dödö Dawido? (b) Hadia zanolo Dawido enaʼö so khönia wombaloi si fao faʼebolo dödö?

¹⁴ Oya göi walöʼatulö nitaögö Razo Dawido. No ibayoini Dawido Yehowa tobali razo ndraono Gizaraʼeli me awuyu-wuyu ia. Hizaʼi, moguna ibaloi 15 fakhe fatua lö tobali ia razo ba mbanuania samösa. (II Zamueli 2:3, 4) Ba götö daʼö, moloi Dawido ba ibiniʼö ia moroi khö Razo Saulo, somasi mamunu yaʼia.b (Faigi nisura ba gahe zura.) Lua-luania, lö hadöi omonia. Toröi ia ba soi niha baero mazui ba dögi narö hili ba danö si mate. Ba gafuriata, mate Zaulo ba wasuwöta. Hizaʼi, moguna nasa ibaloi Dawido töra fitu fakhe fatua lö tobali ia razo ndraono Gizaraʼeli.​—II Zamueli 5:4, 5.

¹⁵ Hana wa edöna Dawido ba wombaloi si fao faʼebolo dödö? Ibeʼe khöda wanema linia ba zinunö si fagölö me öfa kali manofu ia, ”Hawaʼara?” Imane, ”Ba yaʼo, ba udöna-döna waʼebua dödöu; maʼiki dödögu, ba wanolomö andrö. Usuno Yehowa, me no ebua dödönia khögu.” (Zinunö 13:6) Iʼila Dawido wa iʼomasiʼö ba lö irai faröi khönia Yehowa. Iʼangeraigö hewisa wanolo Yehowa yaʼia ba götö silalö, ba idöna-döna wa iʼasiwaisi wanandraigö nitaögönia andrö Yehowa. Iʼila Dawido wa tenga zaya-zaya gölö zi no idöna-döna börö howu-howu moroi khö Yehowa.

16, 17. Hewisa wameʼe Lowalangi Yehowa hegöi Yesu duma-duma si sökhi ba waʼedöna wombaloi?

¹⁶ Lö iʼandrö khöda Yehowa ba wamalua hadia zi lö omasi ia ifalua. Ibeʼe khöda duma-duma sebua ba waʼedöna wombaloi. (Baso II Fetero 3:9.) Duma-dumania, ngahönö fakhe silalö ba kabu Edena, iböbögö zi lö duhu Satana wa lö atulö Yehowa. ’Ibaloi si fao faʼebolo dödö’ Yehowa ginötö ba wangamoniʼö töinia. Buania, niha ’sanötöna khönia’ latema howu-howu sahöli-höli dödö.​—Yesaya 30:18.

¹⁷ Edöna göi Yesu ba wombaloi. Me so ia ba gulidanö, lö faröi ia irugi waʼamatenia. Me döfi 33 M, ibeʼe zumangenia sebua böli khö Yehowa ba zorugo. Hizaʼi, moguna ibaloi irugi ndröfi 1914 ba wamörögö famatörönia tobali Razo. (Halöwö Zinenge 2:33-35; Heberaiʼo 10:12, 13) Aefa daʼö, moguna nasa ibaloi Yesu irege ahori zi Saribu Fakhe Wamatörönia awena dania tehori fefu nudunia. (I Korindro 15:25) Ara sibai ginötö daʼa ba wombaloi. Hizaʼi, tenga zaya-zaya gölö fefu daʼö börö howu-howu niʼasogönia.

HADIA ZANOLO YAʼITA?

18, 19. Hadia zanolo yaʼita enaʼö so khöda waʼedöna ba wombaloi si fao faʼebolo dödö?

¹⁸ Taʼila wa omasi Yehowa na so khöda waʼebolo dödö, faʼedöna ba wombaloi. Hadia zanolo yaʼita ba wamalua daʼö? Moguna taʼandrö geheha niʼamoniʼö moroi khö Lowalangi. Törö tödömö wa moroi ba geheha niʼamoniʼö so waʼebolo dödö. (Efeso 3:16; 6:18; I Tesalonika 5:17-19) Börö daʼö, andrö wanolo moroi khö Yehowa enaʼö tola anau gölömö ba waʼebolo dödö!

¹⁹ Törö göi tödömö hadia zanolo Gaberahamo, Yosefo, hegöi Dawido ba wombaloi si fao faʼebolo dödö irege alua fefu zi no ifabuʼu Yehowa. Alua daʼö börö wamati hegöi faʼafaduhu dödöra khö Yehowa. Tenga ha yaʼira samösa hegöi hadia zomasi dödöra niʼangeraigöra. Na taʼangeraigö hewisa mbua si sökhi nitemara, tefarou göi ita ba wangoromaʼö mbua-bua fombaloi.

20. Hadia zi lö mamalö tafalua?

²⁰ Andrö, hewaʼae tataögö wanandraigö, lö mamalö taforomaʼö ’mbua-bua fombaloi’. Te itaria manofu ita, ’Hawaʼara na Yehowa?’ (Yesaya 6:11) Hizaʼi, börö wanolo geheha niʼamoniʼö moroi khö Lowalangi, tola taʼoʼö zamaʼeleʼö sotöi Yeremia ba tamane, ”Tana khögu Yehowa, . . .  andrö wa khönia udöna-döna.”​—Ngenu-ngenu Yeremia 3:21, 24.