Oʼö Waʼahakhö Dödö Yehowa

1. Hewisa wanutunö Yehowa yaʼia khö Moze? Ba hana wa moguna daʼa?

BA ZI sambua inötö, ifatunö haniha ia Lowalangi khö Moze me iʼombakhaʼö döinia hegöi bua-buania. Tola manö itandrösaigö waʼabölönia Yehowa mazui faʼatua-tuania. Hizaʼi, si oföna itutunö yaʼia daʼö faʼebua dödönia hegöi faʼahakhö dödönia. (Baso II Moze 34:5-7.) Moguna iʼila Moze hadia ituhini ia Yehowa. Daʼö mbörö wa itutunö mbua-buania Yehowa ba wangoromaʼö wa omasi ia itolo zamosumange yaʼia. (II Moze 33:13) Hewisa dödöda börö me taʼila wa irorogö ita Yehowa? Ba wamahaʼö daʼa, tatutunö sanandrösa ba waʼahakhö dödö, yaʼia daʼö tarasoi hadia gabula dödö nirasoi niha böʼö ba tatolo ira.

2, 3. (a) Hadia zangoromaʼö wa no sinangea laʼokhögö waʼahakhö dödö niha gulidanö? (b) Hana wa adöni dödömö ba niwaʼö Zura Niʼamoniʼö sanandrösa ba waʼahakhö dödö?

² Yehowa no sahakhö tödö, ba tefazökhi niha si fakhili-khili khönia. Daʼö mbörö wa no sinangea na fefu niha laʼameʼegö tödö niha böʼö. Hewaʼae lö laʼokhögö waʼaboto ba dödö khö Yehowa, hizaʼi asese laforomaʼö waʼahakhö dödö. (I Moze 1:27) Ba Zura Niʼamoniʼö, oya duma-duma niʼilada sanandrösa ba niha sangoromaʼö faʼahakhö dödö. Duma-dumania, ba götö Razo Zelomo, so darua ndra alawe samadöni ono sawuyu. Enaʼö iʼila haniha zindruhunia nina nono sawuyu andrö, iwaʼö Zelomo enaʼö labagi dalu nono andrö. Iʼomasiʼö sibai nono sawuyu andrö inania sindruhu. Andrö wa iʼandrö khö razo enaʼö labeʼe manö nono daʼö khö ndra alawe si samösa. (I Razo 3:23-27) Duma-duma tanö böʼö yaʼia daʼö ono Waraʼo alawe. Me isöndra Moze me ono sawuyu, iʼila wa ono niha Heberaiʼo daʼö ba no sinangea labunu. Hizaʼi, ”ahakhö dödönia” ba ihalö tobali ononia.​—II Moze 2:5, 6.

³ Hana wa moguna tafahaʼö ita nasa ba waʼahakhö dödö? Börö me omasi Yehowa na taʼoʼö ia. (Efeso 5:1) Hewaʼae tefazökhi ita enaʼö taʼokhögö daʼö, hizaʼi lö moʼahonoa ita ba so khöda wakhögusa. Itaria abua khöda ba wotatugöi hadia tatolo niha böʼö mazui taʼosambuaʼö dödöda ba waʼaurida samösa. Hadia zanolo yaʼita enaʼö itugu taʼameʼegö tödö niha böʼö? Si oföna, datatutunö hewisa wangoromaʼö Yehowa hegöi niha böʼö faʼahakhö dödö. Si dua, datafaigi hewisa woloʼöda waʼahakhö dödö Lowalangi ba hadia mbuania khöda na tafalua daʼö.

YEHOWA—DUMA-DUMA SOʼAHONOA BA WAʼAHAKHÖ DÖDÖ

4. (a) Hana wa ifatenge malaʼikania Yehowa ba Zodoma? (b) Hadia wamahaʼö khöda ba zalua ba nösi nomo Loti?

⁴ Ba Zura Niʼamoniʼö, oya duma-duma sanandrösa ba waʼahakhö dödö Yehowa. Duma-dumania, simane salua khö Loti. Yaʼia andre niha satulö tödö ”nifakao-kao” börö waʼalösökhi nifalua niha Zodoma ba Gomora. Niha si so ba daʼö lö lafosumange Lowalangi, ba ihalö gangetula Yehowa ba wangohori yaʼira. (II Fetero 2:7, 8) Ifatenge malaʼikania Yehowa ba wamatunö khö Loti wa idudugö Zodoma hegöi Gomora, ba moguna iröi mbanua daʼö. Imane Sura Niʼamoniʼö, ”Ba me arörö-rörö [Loti] na, ba latuyu daʼionia [malaʼika] andrö, fabaya foʼomonia ba ononia andrö si dombua, me no edöna iʼorifi ia Yehowa, laʼohe baero ba laröi ia ba daʼö baero mbanua.” (I Moze 19:16) Iʼila Yehowa hadia zalua khö Loti. Andrö wa tola faduhu dödöda wa iʼila fefu gabula dödö nitaögöda.​—Yesaya 63:7-9; Yakobo 5:11; II Fetero 2:9.

5. Hewisa wamahaʼö Daromali Lowalangi ita ba wangoromaʼö faʼahakhö dödö?

⁵ Ifahaʼö göi nono mbanuania Yehowa ba wangoromaʼö faʼahakhö dödö. Angeraigö sambua huku nibeʼenia ba ndraono Gizaraʼeli. Na so niha samiza kefe, niha sameʼe nifiza tola ihalö mbaru niha samiza si tobali gade irege ifuli gefe nifizania andrö. (Baso II Moze 22:26, 27.) Hizaʼi, moguna ifuli mbaru daʼö sameʼe nifiza fatua lö aekhu luo enaʼö lö okafu niha samiza andrö ba zi bongi. Niha si lö faʼahakhö dödö tola manö lö ifuli mbaru andrö. Hizaʼi, ifahaʼö nono mbanuania Yehowa ba wangoromaʼö faʼahakhö dödö. Hadia goi-goi si tola tafahaʼö ita ba huku andre? Böi taʼosiwawöi zoguna khö ndra talifusöda niha Keriso. Na tola tatolo ndra talifusöda si so abula dödö, moguna tafalua ia.​—Kolose 3:12; Yakobo 2:15, 16; baso I Yohane 3:17.

6. Hadia wamahaʼö khöda moroi ba waʼahakhö dödö Yehowa ba zala nifalua ndraono Gizaraʼeli?

⁶ Ahakhö dödö Yehowa ndraono Gizaraʼeli hewaʼae no lafalua zala khönia. Imane Sura Niʼamoniʼö, ”Ba lö adage-dage Yehowa, Lowalangi ndra tuara, lö ibato wamatenge khöra sinengenia; me no ahakhö dödönia mbanuania ba he nahiania andrö.” (II Ngaʼötö 36:15) Simanö göi, moguna taforomaʼö waʼahakhö dödö ba niha si lö mangokhögö faʼaboto ba dödö sanandrösa khö Yehowa si tola manö mamalalini era-era ba tobali si fahuwu khönia. Lö omasi Yehowa na so niha nihori na alua wanguhukunia. (II Fetero 3:9) Andrö, fatua so ginötö omasi ita taturiaigö duria famangelama ba niha sato ba tatolo ira enaʼö latema mbua moroi ba waʼahakhö dödö Lowalangi.

7, 8. Hana wa faduhu dödö zi sambua ösi nomo wa iforomaʼö waʼahakhö dödö khöra Yehowa?

⁷ Iadaʼa, ato zamosumange Yehowa zorasoi faʼahakhö dödönia. Duma-dumania, me 1990-an ba Bosnia, fasuwö ngawalö soi ba lalau fabunu. Milan, ono matua si 12 fakhe hegöi ösi nomonia toröi ira ba daʼö. Milan, akhinia ono matua, ira satuania hegöi ira Samaduhuʼö tanö böʼö latörö bus moroi ba Bosnia möi ira ba Serbia ba wangondrasi kebaktian. Ba daʼö menaʼö labayagö idanö zatuania. Hizaʼi, ba perbatasan so ösa zaradadu sangila wa faböʼö soi nösi nomonia. Andrö wa lawaʼö khöra weʼamöi tou ba bus, hizaʼi tola mofanö danö böʼö. Lataha ira dua hari. Ba gafuriata, niha sohalöwö ba daʼö itelefo kafalonia ba isofu hadia zinangea lafalua ba nösi nomo andrö. Lö aröu moroi ba daʼö, no muzizio nösi nomo Milan ba larongo me imane kafalo andrö, ”Ohe ira baero ba fana manö!”

⁸ Me fahuhuo zohalöwö andrö khö zaradadu tanö böʼö, so darua niha sangondrasi nösi nomo Milan. Lafatunö wa yaʼira andre Samaduhuʼö Yehowa ba no lafatunö khöra ira talifusöda si so ba bus hadia zalua. Laʼandrö khö Milan hegöi akhinia enaʼö möi ira yawa ba motora enaʼö tola lalalöi perbatasan, börö me lö lafareso zura-sura ndraono. Aefa daʼö, lawaʼö ira talifusöda andrö khö zatua Milan enaʼö latörö furi gödo pos ba perbatasan irege tola ifuli falukha ira zui. Ataʼu sibai Milan irege lö iʼila hadia maʼiki mazui meʼe ia. Lamane ira satuania, ”Hadia tola mofanöga simane daʼö?” Hizaʼi, me ibörögö lalau mofanö, hulö zi lö oroma ira föna zaradadu. Milan hegöi akhinia tola ifuli falukha ira khö zatuara me no aefa lalalöi perbatasan daʼö. Ba latohugö weʼamöi ba kebaktian. Faduhu dödöra wa ifondro-ndrongo wangandröra Yehowa! Taʼila ba Zura Niʼamoniʼö wa tenga ha daʼö lala niʼogunaʼö Yehowa ba wolumöʼö nono mbanuania. (Halöwö Zinenge 7:58-60) Hizaʼi, ba zalua andre, imane Milan, ”Hulö zi no labalunöisi hörö ndra saradadu andrö ira malaʼika, ba iʼorifiga Yehowa.”​—Zinunö 97:10.

9. Hewisa dödö Yesu ba niha soloʼö yaʼia? (Faigi gambara ba wamobörö wamahaʼö.)

⁹ No ibeʼe göi duma-duma si sökhi Yesu ba wangoromaʼö faʼahakhö dödö. Ahakhö dödönia niha soloʼö yaʼia börö me hulö ”nifakao ira, nifazaewe, hulö mbiri-biri, si lö kubalo”. Andrö, hadia nifaluania? ”Ibörötaigö ifahaʼö ira, oya ngawalö.” (Mataiʼo 9:36; baso Mareko 6:34.) No aröu faehu ia ba niha Farizaiʼo si lö faʼahakhö dödö ba si lö omasi manolo niha böʼö. (Mataiʼo 12:9-14; 23:4; Yohane 7:49) Simane Yesu, hadia sindruhu-ndruhu omasiʼö ötolo niha ba öfahaʼö ira sanandrösa khö Yehowa?

10, 11. Hadia hasambalö tefaudu ba wangoromaʼö faʼahakhö dödö ero inötö? Tutunö.

¹⁰ Tenga daʼö geluahania wa tefaudu ba wangoromaʼö faʼahakhö dödö ero inötö. Duma-dumania, te so ba wangera-ngera Razo Saulo wa no iforomaʼö waʼahakhö dödö me lö ibunu Agagi, razo ndraono Gamaleki ba udu nono mbanua Lowalangi. Lö ibunu göi fefu gurifö ndraono Gamaleki. Hizaʼi, sindruhunia no iwaʼö khö Zaulo Yehowa ba wamunu fefu niha Gamaleki hegöi uriföra. Börö me lö moloʼö Zaulo, itimba ia Yehowa tobali razo. (I Zamueli 15:3, 9, 15) Yehowa andre Sanguhuku satulö ba tola iʼila hadia zi so ba dödö niha ba iʼila hawaʼara lö moguna iforomaʼö waʼahakhö dödö. (Ngenu-ngenu Yeremia 2:17; Hezekieli 5:11) Lö aratö ihuku fefu niha si lö moloʼö khönia. (II Tesalonika 1:6-10) Tenga daʼö ginötönia khö Yehowa ba wangoromaʼö faʼahakhö dödö ba niha si lö sökhi. Sindruhunia, na ihori niha si lö sökhi, no iforomaʼö waʼahakhö dödö ba niha satulö tödö niʼorifinia.

¹¹ Tatu manö, tenga halöwöda ba wotatugöi hadia teʼorifi ira mazui löʼö. Hizaʼi, moguna tafalua hadia zi tola tafalua ba wanolo niha. Hadia manö lala si tefaudu si tola tafalua ba wangoromaʼö faʼahakhö dödö ba niha böʼö? So ösa lala si tola tafalua.

LALA WANGOROMAʼÖDA FAʼAHAKHÖ DÖDÖ

12. Hewisa wangoromaʼöda faʼahakhö dödö ba niha böʼö?

¹² Tobali niha somasi manolo. Iʼandrö Yehowa ba niha Keriso enaʼö laforomaʼö waʼahakhö dödö ba niha böʼö hegöi khö ndra talifusöra ba wamati. (Yohane 13:34, 35; I Fetero 3:8) Sambua geluaha faʼahakhö dödö yaʼia daʼö ”fao ba wanaögö famakao”. Niha sangokhögö faʼahakhö dödö, iforege ba wanolo niha si göna abula dödö. Andrö, moguna taʼalui ginötö ba wanolo niha böʼö. Tabeʼe ginötöda ba wamalua halöwöra.​—Mataiʼo 7:12.

13. Hadia nifalua nono mbanua Lowalangi na alua bencana alam?

¹³ Fao ba wanolo si göna bencana alam. Omasi ita taforomaʼö waʼahakhö dödö ba niha si göna abula dödö börö bencana alam. Ato niha sangila wa ono mbanua Yehowa omasi ira latolo niha böʼö ero inötö. (I Fetero 2:17) Duma-dumania, samösa dalifusöda ira alawe ba Jepang si göna ndruru danö hegöi tsunami me döfi 2011. Iwaʼö wa ”teʼaroʼö ba terara dödönia” me ato ndra talifusöda si tohare moroi ba mbanua böʼö si so ba Jepang hegöi moroi ba soi böʼö sanolo ba wangehaogö omo hegöi Balai Mbanua Lowalangi. Imane, ”Ba zalua andre, aboto ba dödögu wa irorogö ndraʼaga Yehowa. Ira talifusöda tanö böʼö faoma göi laʼameʼegö tödö nawöra. Ba uʼila wa ato ndra talifusöda ba zi sagörö ulidanö zangandrö salahima.”

14. Hewisa wanolomö niha sofökhö hegöi salawa ndröfi?

¹⁴ Tolo niha sofökhö hegöi salawa döfi. Ahakhö dödöda na taʼila niha si göna famakao börö wökhö mazui faʼalawa ndröfi. Tabalo-baloi ginötönia dania lö hadöi saʼae abula dödö simane daʼö. Daʼö mbörö wa taʼangandröi enaʼö tohare Mbanua Lowalangi. Fatua lö alua daʼö, taforege ba wanolo niha sofökhö hegöi si no alawa döfi. Imane samösa sanura wa itaögö wökhö Alzheimer inania si no atua. Samuza inötö ikiöni nukhania, ba me iʼosi daʼö inania, moli bel nomora. Tohare darua ndra talifusöda ira alawe sasese mamalukhaisi yaʼia. Lasofu khönia hadia tola latolo ia. Imane ina andrö, ”Ailado sindruhunia, hizaʼi lau bale.” Latolo ia ira talifusöda ba latukari nukhania. Lahaogö sambua galasi tesi ba lalau fahuhuo. Iʼandrö sibai saohagölö ononia matua ba iwaʼö wa ira Samaduhuʼö ”lafalua hadia nituriaigöra”. Börö me so khöu waʼahakhö dödö, hadia öforege ba wanolo niha sofökhö hegöi si no alawa ndröfi?​—Filifi 2:3, 4.

15. Hewisa halöwö fanuriaigöda möi fanolo niha böʼö?

¹⁵ Tolo niha enaʼö aboto ba dödöra Yehowa. Lala sabölö sökhi si tola tafalua ba wanolo niha yaʼia daʼö tafahaʼö ira sanandrösa khö Lowalangi hegöi Mbanuania. Lala tanö böʼö yaʼia daʼö tatolo ira enaʼö laʼila hadia gunania khöra na laʼoʼö goi-goi Yehowa. (Yesaya 48:17, 18) Halöwö fanuriaigö no lala sabölö sökhi ba wamolakhömi Yehowa hegöi ba wangoromaʼö faʼahakhö dödö ba niha. Hadia tola ödouʼö halöwö fanuriaigö nifaluamö?​—I Timoteo 2:3, 4.

BUA NA TAFOROMAʼÖ WAʼAHAKHÖ DÖDÖ!

16. Hadia mbua nitemada na taforomaʼö waʼahakhö dödö?

¹⁶ Imane pakar kesehatan mental wa na so waʼahakhö dödö lö oya wökhö nitaögöda ba sökhi wahuwusada ba niha böʼö. Na ötolo niha si so abula dödö, tola itugu owua-wua dödömö, öʼokhögö dötönafö, so zi fahuwu khömö, ba sökhi lala wangera-ngeramö. So mbuania khömö na öforomaʼö waʼahakhö dödö. (Efeso 4:31, 32) Na tatolo niha böʼö börö waʼomasi, taʼokhögö dödö side-ide si lö sinegu börö me taʼila wa no tafalua hadia niʼandrö Yehowa khöda. Faʼahakhö dödö zanolo yaʼita enaʼö tobali ita satua, foʼomo hegöi si fahuwu si sökhi. Aefa daʼö, niha sangoromaʼö faʼahakhö dödö tola itema wanolo ba ginötö moguna khönia daʼö.​—Baso Mataiʼo 5:7; Luka 6:38.

17. Hana wa omasiʼö öforomaʼö waʼahakhö dödö?

¹⁷ Hewaʼae tatema mbua na taforomaʼö waʼahakhö dödö, hizaʼi dani siföföna wa tafalua ia yaʼia daʼö börö me omasi ita taʼoʼö ba tafolakhömi Yehowa. Yaʼia Gumbu waʼomasi hegöi faʼahakhö dödö. (Gamaedola 14:31) No ibeʼe khöda duma-duma soʼahonoa. Börö daʼö, dataforege ba woloʼö Lowalangi ba wangoromaʼö faʼahakhö dödö. Buania, tola itugu ahatö ita khö ndra talifusöda ba taʼokhögö wahuwusa si sökhi ba niha böʼö.​—Galatia 6:10; I Yohane 4:16.