Hadia Öʼila?

Hana wa iʼelifi Yesu zi möi ba hölu?

BA Huku Moze, tola möi ba hölu niha na lawaʼö, ”Fahölu ndraʼo khöu föna Lowalangi” mazui ”Fahöludo ba döi Yehowa”. Hizaʼi, ba götö Yesu, asese sibai fahölu niha Yahudi irege arakhagö fefu hadia niwaʼöra hasambalö lalau fahölu. Lafalua daʼö enaʼö abölö faduhu dödö niha böʼö ba niwaʼöra. Hizaʼi, dua kali iʼelifi niha samalua daʼa Yesu. Ifahaʼö ita Yesu, ”Daʼö wehedemi: ’Yaʼia’, na yaʼia ba ’Löʼö’, na löʼö.”​—Mataiʼo 5:33-37; 23:16-22.

Moloʼö Theological Dictionary of the New Testament, itolo ita kitab Talmud enaʼö taʼila hawaʼasese fahölu niha Yahudi wa atulö wehede niwaʼöra. Taʼila daʼö börö me no itutunö Talmud hadia manö hölu si lö tola löʼö mufalua hegöi hölu si tola musawö.

Tenga ha Yesu zi lö fao tödö ba zi toʼölö mufalua andrö. Duma-dumania, isura sejarawan Yahudi sotöi Flavius Josephus sanandrösa ba zi sambua sekte Yahudi si lö manehegö nono mbanuania ba wangumaʼö hölu. Faduhu dödöra wa fahölu abölö lö sökhi ia moroi ba walimosa. Ba wamaigira, na so niha si fahölu enaʼö faduhu dödö niha böʼö ba niwaʼönia, hasambalö wa lö itörö zindruhu niha daʼö. Iwaʼö göi wehede si fagölö apokrifa Yahudi, kitab Kebijaksanaan Sirakh mazui Eklesiastikus, (23:11). Lamane, ”Niha somasi fahölu, lö iʼokhögö dödö si sökhi.” Iwaʼö Yesu wa lö moguna fahölu ita ba ngawalö zi lö moguna. Na lö mamalö tawaʼö zindruhu, lö moguna fahölu ita ha enaʼö lafaduhusi tödö hadia niwaʼöda.