Timbagö Lala Wangera-ngera Gulidanö

1. Hadia nisura Waulo ba niha Keriso si so ba Kolose? (Faigi gambara ba wamobörö wamahaʼö.)

ISURA zura sinenge sotöi Faulo ba niha Keriso ba Kolose, me tobali ia niha gurunga ba Roma te me döfi 60-61 M. Itutunö khöra hana wa moguna laʼokhögö ”ngawalö wangila fefu”, yaʼia daʼö faʼabölö ba wamaigi fefu hadia ia simane famaigi Yehowa. (Kolose 1:9) Imane Faulo, ”Andrö uwaʼö daʼö, faböi ilimo ami niha, haniha ia, ba huhuo famowöhö. Mifaigi, faböi ilimo ami niha, haniha ia, ba waʼatua-tua niha gulidanö andrö, ba ba waya-faya andrö, woloʼö nifaʼema niha, huku ba niha gulidanö; si tenga foloʼö khö Keriso.” (Kolose 2:4, 8) Aefa daʼö, itutunö Faulo hana wa so ösa mbua gera-era si tehöngö si sala ba hana wa ato niha somasi. Duma-dumania, so ösa lala wangera-ngera sameʼe ba dödö niha wa abölö sökhi mazui atua-tua ira moroi ba niha böʼö. Daʼö mbörö wa isura zurania Faulo ba wanolo ndra talifusöda ba wanimbagö lala wangera-ngera gulidanö hegöi gamuata si fasala.​—Kolose 2:16, 17, 23.

2. Hana wa moguna tatutunö duma-duma moroi ba lala wangera-ngera gulidanö?

² Niha sangokhögö lala wangera-ngera gulidanö, laʼositengagö goi-goi Yehowa. Na lö taʼangenanöi, daʼö zi möi fangawuwu waʼafaduhu dödöda ba waʼatua-tua Lowalangi. Iadaʼa, oya lala wangera-ngera gulidanö niforomaʼö ba TV, ba Internet, ba nahia wohalöwö mazui ba zekola. Hadia nifaluada ba wanimbagö fondröni dödö si lö sökhi andre? Ba wamahaʼö daʼa, tatutunö lima ngawua duma-duma lala wangera-ngera gulidanö ba hewisa wanimbagö yaʼia.

HADIA MOGUNA FADUHU DÖDÖDA WA SO LOWALANGI?

3. Hadia manö lala wangera-ngera niʼokhögö niha iadaʼa? Hadia mbörö?

³ ”Tola tobalido niha si sökhi hewaʼae lö faduhu dödögu khö Lowalangi.” Ba zi hauga soi iadaʼa, no tehöngö lala wangera-ngera daʼö. Niha sangumaʼö daʼö, te lö ibe dödöra hadia so Lowalangi ma löʼö. So ba dödöra wa tola lafalua fefu zomasi ira. (Baso Zinunö 10:4.) Tanö böʼönia, lawaʼö wa atua-tua ira na lawaʼö, ”Tola uʼokhögö mbua-bua si sökhi hewaʼae lö faduhu dödögu khö Lowalangi.”

4. Hadia zi tola tawaʼö ba wanolo zi samösa niha si lö faduhu tödö wa so Zomböi?

⁴ Hadia tefaudu na faduhu dödöda wa lö hadöi Somböi? So ösa niha sangalui fanema linia ba sains, hizaʼi lö laʼila geluahania. Sindruhunia, lö abua wangiʼila yaʼia. Hadia so manö nomo ba zi sambua nahia ba zi lö mudöna-döna? Tatu manö löʼö! So zangotomosi yaʼia. Hizaʼi, abölö abua wangehaogö fefu waʼauri si so ba gulidanö moroi ba nomo. Na mesokho dangada, tola döhö samösa daʼö, hizaʼi nomo si no agasila tebai ifuli iʼehaogö samösa ia. Daʼa zanolo yaʼita irege faduhu dödöda wa Yehowa no Somböi yaʼita. Imane Sura Niʼamoniʼö, ”Fefu nomo sa, ba so zotomo, ba samazökhi fefu, hadia ia, ba yaʼia Lowalangi.”​—Heberaiʼo 3:4.

5. Hadia niwaʼöda na so zangumaʼö wa tola taʼila zi sökhi hewaʼae lö faduhu dödöda khö Lowalangi?

⁵ Hadia niwaʼöda na so zangumaʼö wa tola taʼila zi sökhi hewaʼae lö faduhu dödöda khö Lowalangi? Atulösa wa no iwaʼö Taromali Lowalangi wa niha si lö faduhu tödö khö Lowalangi tola lafalua zi sökhi. (Roma 2:14, 15) Duma-dumania, tola ifosumange ba iʼomasiʼö zatuania niha. Hizaʼi, na lö iʼoʼö goi-goi Yehowa, tola ihalö gangetula si lö sökhi. (Yesaya 33:22) Ato göi niha sagatua-tua iadaʼa samaduhuʼö wa moguna khöda wanolo moroi khö Lowalangi ba wangaʼasiwai fefu gabula dödö salua ba gulidanö. (Baso Yeremia 10:23.) Andrö, böi so khöda wangera-ngera wa tola taʼila zi sökhi hewaʼae lö faduhu dödöda khö Lowalangi ba lö taʼoʼö goi-goinia.​—Zinunö 146:3.

HADIA MOGUNA KHÖDA AGAMA?

6. Hadia lala wangera-ngera niha sato sanandrösa ba agama?

⁶ ”Tola owua-wua dödömö hewaʼae lö hadöi agama.” Ato niha sangumaʼö wa lö moguna agama ba aföli ita ibeʼe. Oya göi agama zamahaʼö sanandrösa ba galitö narako, lafaso niha ba wameʼe gameʼela mazui ba wanuhini politik. Lö tokea ita na itugu monönö niha sangumaʼö wa ohahau dödöra na lö hadöi agama! Te lawaʼö, ”Adöni dödögu khö Lowalangi, hizaʼi lö omasido fao ba agama.”

7. Hana wa tola ohahau dödömö ba agama satulö?

⁷ Hadia sindruhu owua-wua dödöda hewaʼae lö agama? Atulösa wa tola owua-wua dödö zi samösa niha na lö hadöi agama faya. Hizaʼi, lö niha sowua-wua tödö na lö iʼokhögö wahuwusa khö Yehowa, ”Lowalangi sohahau tödö”. (1 Timoteo 1:11) Fefu nifalua Yehowa no si möi fanolo niha. Börö me yaʼita enoninia, owua-wua dödöda me taforege ba wanolo niha böʼö. (Halöwö Zinenge 20:35) Duma-dumania, angeraigö hewisa wamosumange satulö möi fanolo ba zi sambua omo ba wangokhögö faʼowua-wua dödö. Tafahaʼö ita ba woʼameʼegö tödö hegöi enaʼö lö faröi ita khö ngambatöda, ba wangebuaʼö iraono ba woʼameʼegö tödö niha böʼö hegöi ba wangokhögö faʼomasi ba gotalua nösi nomo. Famosumange satulö zanolo nono mbanua Yehowa enaʼö falulu fohalöwö ira si fao faʼatulö hegöi ba wangoromaʼö faʼomasi khö ndra talifusö ba mbanua niha Keriso.​—Baso Yesaya 65:13, 14.

8. Hewisa Luka 11:28 möi fanoloda enaʼö aboto ba dödöda lala ba wanöndra faʼowua-wua dödö sindruhu?

⁸ Andrö, hadia sindruhu-ndruhu owua-wua dödö zi samösa niha na lö ifosumange Lowalangi? Hadia zameʼe faʼowua-wua dödö ba niha? So zohahau tödö ba olahraga, ba hobi hegöi ba halöwö sebua niʼokhögöra. Tanö böʼönia, ohahau dödöra börö me larorogö nösi nomo mazui awöra. Hewaʼae owua-wua dödöda ba daʼö, hizaʼi tenga ha daʼö gohitö dödö ba waʼauri. Faehu ita moroi ba gurifö. Tola taʼokhögö waʼaboto ba dödö sanandrösa khö Zomböi ba tafosumange ia. Iwöwöi ita enaʼö tola tarasoi waʼowua-wua dödö na tafalua daʼö. (Baso Luka 11:28.) Duma-dumania, tola owua-wua ba tefarou dödöda na fao ita khö ndra talifusöda ba wamosumange Yehowa. (Zinunö 133:1) Owua-wua göi dödöda börö me fao ita ba waʼafatalifusöta ba zi sagörö ulidanö, taʼokhögö lala waʼauri si sökhi hegöi fanötöna sahöli-höli dödö ba zi so miföna.

HADIA MOGUNA KHÖDA GOI-GOI SANANDRÖSA BA GAMUATA?

9. (a) Hadia mbua gera-era si tehöngö sanandrösa ba wohorö? (b) Moloʼö Daromali Lowalangi, hana wa fasala na mohorö ita ba zi tenga ngambatöda?

⁹ ”Hana wa fasala na mohorö ita ba zi tenga ngambatöda?” Tola manö manofu niha, ”Hana wa mamati sibai ndraʼugö? Owua-wuaʼö dödömö ba waʼauri andre.” Hizaʼi, lö itehe Taromali Lowalangi gamuata fohorö.a (Faigi nisura ba gahe zura.) (Baso 1 Tesalonika 4:3-8.) No sinangea ibeʼe khöda huku Yehowa börö me yaʼia zomböi yaʼita. Iwaʼö wa niha si tola mamalua faʼorudu, ha ira matua ba ira alawe si no mangowalu. Ibeʼe khöda huku Yehowa börö me iʼomasiʼö ita. Iʼila wa na taʼoʼö daʼö, tola itugu sökhi waʼaurida. Ösi nomo soloʼö huku Lowalangi, tola itugu laʼomasiʼö, laʼameʼegö tödö ba lalumöʼö nawöra. Hizaʼi, ihuku niha sangodödögö wanawö hukunia.​—Heberaiʼo 13:4.

10. Hewisa enaʼö lö ifalua wohorö si samösa niha Keriso?

¹⁰ Ifahaʼö ita Sura Niʼamoniʼö lala enaʼö lö tafalua wohorö. Moguna taʼangenanöi hadia nifaigida. Imane Yesu, ”Dozi haniha zamaigi ira alawe, wangisö yaʼia, ba no ihoröni tödönia. Ba na iʼalani ndraʼugö höröu kambölö, ba tema koe ia ba tiboʼö.” (Mataiʼo 5:28, 29) Andrö, moguna taʼaröuʼö ita ba pornografi hegöi musik soʼamakhaita ba daʼö. Isura Faulo, ʼMibunu saʼae ndroto-ndroto andrö, si so ba gulidanö sanandrösa ba wohorö.’ (Kolose 3:5) Moguna göi taʼangenanöi hadia niʼera-era hegöi nitutunöda.​—Efeso 5:3-5.

HADIA TAʼOSAMBUAʼÖ DÖDÖDA BA WOLOHI HALÖWÖ SEBUA BA GULIDANÖ?

11. Hana wa omasi ita taʼokhögö halöwö si sökhi?

¹¹ ”Tola owua-wua dödömö na öʼokhögö halöwö si sökhi.” Te so niha samarou yaʼita ba wangogunaʼö inötö hegöi faʼabölöda ba wolohi halöwö si sökhi ba gulidanö daʼa. Mendrua manö na halöwö daʼö zameʼe khöda faʼatehöngö, faʼakayo mazui faʼatohude. Börö me ato niha sangumaʼö wa halöwö si sökhi no lala ba wanöndra faʼomuso dödö, tola manö taʼokhögö göi lala wangera-ngera simane daʼö.

12. Hadia sindruhu-ndruhu tola iʼasogö waʼowua-wua dödö halöwö si sökhi?

¹² Hadia tola örasoi waʼowua-wua dödö börö halöwö sangaʼasogö khömö faʼatohude hegöi faʼatehöngö? Löʼö. Angeraigö daʼa. Omasi Zatana ba wangokhögö faʼatohude hegöi faʼatehöngö. Tola tawaʼö wa no aʼozu daʼö. Hizaʼi, ha sofönu-fönu manö ia, lö khönia faʼowua-wua dödö. (Mataiʼo 4:8, 9; Famaʼeleʼö 12:12) No aröu faehu daʼö ba waʼowua-wua dödö nirasoida ba ginötö tatolo niha enaʼö lafahaʼö ira sanandrösa khö Lowalangi hegöi ba dötönafö si sökhi ba zi so miföna si no ifabuʼu. Lö hadöi halöwö ba gulidanö andre sameʼe khöu faʼowua-wua dödö simanö daʼö. Aefa daʼö, ba wanöndra halöwö si sökhi, so niha sasese fahindri, fahulö mazui fatiu dödöra ba niha böʼö. Hizaʼi, hulö zaya-zaya gölö fefu daʼö ba worasoira. Imane Sura Niʼamoniʼö wa yaʼira andre ’solohi angi’.​—Zangombakha 4:4.

13. (a) Hewisa zinangeania wamaigida halöwö? (b) Hadia zameʼe faʼowua-wua dödö khö Waulo?

¹³ Tatu manö, moguna taʼalui zoguna khöda, ba lö fasala na tafili halöwö somasi ita. Hizaʼi, böi taʼofönaiʼö daʼö ba waʼaurida. Imane Yesu, ”Tebai enoni zi darua niha, ma faʼudu ia ba zi samösa ba iʼomasiʼö zi samösa, ba ma zui molemba ia ba zi samösa, ba iʼositengagö zi samösa. Tebai enoni Lowalangi ami ba enoni Ganaʼa göi.” (Mataiʼo 6:24) Si tola mameʼe khöda faʼowua-wua dödö sebua yaʼia daʼö famosumange Yehowa hegöi famahaʼö niha böʼö ba Zura Niʼamoniʼö. Daʼa nirasoi Waulo. Me awuyu-wuyu ia, iʼosambuaʼö dödönia ba wolohi halöwö si sökhi. Hizaʼi, ba gafuriata sindruhu-ndruhu omuso dödönia me iʼila wa tebulö waʼauri niha nituriaigönia ba duria moroi khö Lowalangi. (Baso 1 Tesalonika 2:13, 19, 20.) Lö hadöi halöwö si sökhi ba gulidanö andre sangaʼasogö khöda faʼowua-wua dödö baero ba wamosumange Yehowa hegöi ba wamahaʼö niha böʼö sanandrösa khönia!

HADIA TOLA TAʼASIWAISI GABULA DÖDÖ SALUA BA GULIDANÖ?

14. Hana wa ato niha somasi ba lala wangera-ngera sangumaʼö wa tola iʼasiwaisi samösa gabula dödönia niha?

¹⁴ ”Tola laʼasiwaisi samösa gabula dödöra niha gulidanö.” Ato niha somasi lala wangera-ngera daʼa. Hadia mbörö? Na atulö daʼa, eluahania lö moguna saʼae khöda wanuturu lala moroi khö Lowalangi ba tola tafalua gofu hadia ia zomasi ita. Te no irai örongo so niha zangumaʼö wa itugu alö gabula dödö simane fasuwöta, faʼalösökhi, fökhö, ba faʼanumana. Imane sambua laporan, ”Itugu sökhi waʼauri niha iadaʼa börö me no laforege ba wangehaogö salua ba gulidanö andre.” Hadia atulö daʼö? Ba gafuriata, hadia laʼila niha lala ba wangasiwaisi gabula dödö si so ba gulidanö andre? Datafaigi zindruhunia.

15. Hana wa tola tawaʼö wa itugu lö sökhi zalua ba gulidanö andre?

¹⁵ Hadia no mofozu niha ba wangasiwaisi fasuwöta? Sagötö Wasuwöta Gulidanö I ba II, töra 60 zuta niha si mate. Sagötö 2015 manö, so 12,4 zuta niha si lö tola löʼö mondröi omora börö wasuwöta mazui folohi. Lua-luania, so 65 zuta niha si lö omo. Hewisa waʼalösökhi? Ba zi hauga nahia, so ösa waʼalösökhi si no alö. Hizaʼi, itugu monönö waʼalösökhi tanö böʼö. Duma-dumania, faʼalösökhi ba Internet, yomo ba wongambatö, teroris hegöi korupsi. Hewisa wökhö? Atulösa wa so ösa wökhö si no lasöndra dalu-dalu. Hizaʼi, me döfi 2013, itutunö sambua gangombakhata wa ero röfi so siwa zuta niha sambö 60 fakhe, si mate börö wökhö tödö, stroke, kanker, fökhö mbadu hegöi fökhö gulo. Ba hewisa waʼanumana? Iʼombakhaʼö Bank Dunia wa ba Afrika manö monönö waʼato niha si numana, iʼotarai ba zi 280 zuta ba ndröfi 1990 tobali 330 zuta ba ndröfi 2012.

16. (a) Hana wa ha Banua Lowalangi zi tola mangasiwaisi gabula dödö ba gulidanö andre? (b) Hadia niwaʼö Yesaya hegöi sanura zinunö sanandrösa ba nifalua Mbanua Lowalangi?

¹⁶ Lö tokea ita ba zalua andre. Iadaʼa, niha sangalui tana khöra samösa zondröniaʼö organisasi ekonomi hegöi politik. Lö laʼila laʼasiwaisi wasuwöta, faʼalösökhi, fökhö hegöi faʼanumana. Ha Banua Lowalangi zi tola mamalua daʼö. Angeraigö howu-howu nibeʼe Yehowa ba niha gulidanö. Famatörönia zangohori fefu ngawalö zangaʼasogö fasuwöta, simane fakhögusa, korupsi, fangoʼawögö soi si tumbu yaʼira, agama faya, hegöi Satana. (Zinunö 46:9, 10) Ihori göi dania waʼalösökhi. Iadaʼa, ifahaʼö göi zuta niha faʼato enaʼö faoma laʼomasiʼö ba lafaduhusi tödö nawöra. Lö hadöi famatörö tanö böʼö zi tola mamalua daʼa. (Yesaya 11:9) Lö aratö, ihori ngawalö wökhö Yehowa ba lö saʼae fökhö ba niha. (Yesaya 35:5, 6) Ihori waʼanumana ba iʼasogö fahöna howu-howu ba niha enaʼö owua-wua dödöra ba waʼauri ba tola itugu ahatö ira khönia. No howu-howu sebua daʼa, töra moroi ba gefe sebua.​—Zinunö 72:12, 13.

”FAMIʼILA, HEMIWISA WANEMA LI”

17. Hewisa wanimbagömö lala wangera-ngera gulidanö?

¹⁷ Andrö, na örongo lala wangera-ngera si tehöngö si möi fangawuwu wamatimö, fahaʼö ndraʼugö hadia niwaʼö Zura Niʼamoniʼö sanandrösa ba daʼö. Fatunöisi daʼa khö ndra talifusöda si no aro ba wamati. Angeraigö hana wa omasi niha lala wangera-ngera daʼö, hana wa fasala ba hewisa enaʼö tola ötimbagö ia. Tola talumöʼö waʼaurida moroi ba lala wangera-ngera gulidanö na taʼoʼö hadia niwaʼö Waulo me imane, ”Böi zi lö atua-tua ami, ba wolau nilaumi, ba zi so baero andrö . . . Famiʼila, hemiwisa wanema li zamösana.”​—Kolose 4:5, 6.