”So Khögu Wanötöna khö Lowalangi”

1-3. (a) Hadia wamahaʼö si oföna nifaduhusida tödö? (b) Hana wa tohude sibai wanusugi? (Faigi gambara ba wamobörö wamahaʼö.)

HADIA niwaʼömö na so zanofu khömö, hadia wamahaʼö si oföna sibai ba nifaduhusimö tödö? Tatu manö öwaʼö wa Yehowa no Somböi ba sameʼe faʼauri. Tola manö göi öwaʼö wa faduhu dödömö khö Yesu Keriso si no mameʼe faʼaurinia tobali höli. Ötutunö göi wa ba zi so miföna, auri nono mbanua Lowalangi sagötö faʼara ba Waradaiso. Hizaʼi, hadia ötutunö wa fanusugi no sambua nifaduhusimö tödö sabölö öʼomasiʼö?

² Hewaʼae tatötöna enaʼö teʼefaʼö ita na alua wamakao sabölö-bölö ba taʼokhögö waʼauri si lö aetu, hizaʼi moguna tatörö tödöda wa fanusugi no sambua famahaʼö si tohude nifaduhusida tödö. Itutunö sinenge sotöi Faulo hana wa tohude sibai wanusugi. Imane, ”Na lö femaoso zi mate sa, ba löʼö göi mususugi Keriso.” Na lö tesusugi Yesu, tebai mamatörö ia tobali Razo ba zorugo ba lö eluaha wanuriaigö nifaluada. (Baso 1 Korindro 15:12-19.) Hizaʼi, aboto ba dödöda wa no tesusugi Yesu. Börö me faduhu dödöda wa no tesusugi ia, andrö wa tenga simane niha Sadukaiʼo ita si lö faduhu tödö wa tola ifuli auri niha si no mate. Hewaʼae laʼoʼaya ita niha böʼö, hasambalö itugu aro wamatida wa tola isusugi niha si no mate Lowalangi.​—Mareko 12:18; Halöwö Zinenge 4:2, 3; 17:32; 23:6-8.

³ Imane Faulo wa famahaʼö ”ba wemaoso zi mate” no tobali ”wamobörö fangombakha Keriso”. (Heberaiʼo 6:1, 2) Faduhu dödönia wa hasambalö so wanusugi. (Halöwö Zinenge 24:10, 15, 24, 25) Hewaʼae fanusugi andre famahaʼö si oföna si no tafahaʼö ita ba Daromali Lowalangi, hizaʼi moguna tahaogö tafahaʼö ita ba daʼö. (Heberaiʼo 5:12) Hadia mbörö?

4. Hadia wanofu-nofu si tola tumbu ba dödöda sanandrösa ba wanusugi?

⁴ Ba ginötö so niha zamörögö mamahaʼö yaʼira ba Zura Niʼamoniʼö, si toʼölönia lafahaʼö ira ba wanusugi salua ba götö föna, simane fanusugi Lazaro. Lafahaʼö göi ira wa faduhu sibai dödö Gaberahamo, Yobi hegöi Danieli wa ba zi so miföna ifuli auri niha si no mate. Hizaʼi, hadia wanemau li na so niha zanofu khömö, hadia dandra ba Zura Niʼamoniʼö sangoromaʼö wa tola tafaduhusi tödö wanusugi si no mufabuʼu ngaotu fakhe silalö? Ba hadia no itutunö Sura Niʼamoniʼö hawaʼara alua wanusugi ba zi so miföna? Fanema li ba wanofu daʼa, möi fangaʼaroʼö wamatida.

FANUSUGI SI NO MUFAʼELEʼÖ NGAOTU FAKHE SILALÖ

5. Hadia zi oföna tatutunö?

⁵ Te aoha khöda wokhalaigö na iʼanemaiʼö tesusugi zi samösa niha, lö ara me no aefa mate ia. (Yohane 11:11; Halöwö Zinenge 20:9, 10) Hizaʼi, hadia faduhu dödöda wa niha si no mate ngaotu fakhe silalö tola tesusugi ia ba zi so miföna? Hadia faduhu dödöda wa tola alua zi no mufabuʼu andrö ba niha si no ara mate mazui ba niha sawena mate? Sindruhunia, so sambua wanusugi nifaduhusida tödö si no alua ngaotu fakhe me no aefa tefaʼeleʼö ia. Hadia wanusugi daʼö? Ba hadia gamakhaitania ba dötönafö niʼokhögöda sanandrösa ba wanusugi ba zi so miföna?

6. Hewisa Zinunö 118, alua ia khö Yesu?

⁶ Dataʼogunaʼö Zinunö 118, te nisura Dawido, ba wanutunö sambua wanusugi si no mufaʼeleʼö ngaotu fakhe fatua lö alua ia. Ba Zinunö daʼö so ngawua wehede, ”He Yehowa tolo!” ba ”Yaʼahowu zi so andrö ba döi Yehowa.” Daʼa wamaʼeleʼö sanandrösa khö Mesia. Latötöi wehede daʼa niha me möi Yesu ba Yeruzalema me 9 Nisana, hauga hari fatua lö mate ia. (Zinunö 118:25, 26; Mataiʼo 21:7-9) Hizaʼi, hadia gamakhaita Zinunö 118 ba wanusugi salua ngaotu fakhe aefa daʼö? Nehegö nasa hadia niwaʼö zinunö daʼö, ʼGowe andrö, nitiboʼö zotomo andrö, ba no tobali gowe siföföna.’​—Zinunö 118:22.

7. Hewisa wanimbagö niha Yahudi Yesu?

⁷ ’Sotomo’ si lö manemaʼö Mesia yaʼia daʼö ira sondröniaʼö Yahudi. Tenga ha laʼosiwawöi Yesu mazui lö latemaʼö ia tobali Keriso. Hizaʼi, ato niha Yahudi sangandrö khö Wilato enaʼö labunu Yesu. (Luka 23:18-23) Daʼö mbörö wa no fao ira ba wamunu Yesu.

8. Hewisa wa tola tobali ’gowe siföföna’ Yesu?

⁸ Na no labunu ba lö latemaʼö Yesu, hewisa wa tobali ia ’gowe siföföna’? Alua daʼö ha na tesusugi ia. Ba wanutunö daʼö, iʼogunaʼö sambua gamaedola Yesu sanandrösa khö zi samösa zokhö kabu samatenge niha khö ndra sohalöwö ba kabunia. Hizaʼi, lafakao niha nifatengenia andrö ira sohalöwö. Ba gafuriatania, ifatenge nononia ba itötöna enaʼö lafondro-ndrongo ia ira sohalöwö ba kabunia. Hizaʼi, labunu nononia andrö. Me no aefa itutunö gamaedola daʼö Yesu, itötöi wamaʼeleʼö nisura ba Zinunö 118:22. (Luka 20:9-17) Iʼogunaʼö göi ayati daʼö sinenge sotöi Fetero me fahuhuo ia khö ndra ’salawa, satua mbanua niha Yahudi, ba sangila amakhoita khöra, ba Yeruzalema’. Itutunö sanandrösa khö ’Yesu, banua Nazareta, si no labunu, nisusugi Lowalangi, moroi ba ngai zi mate.’ Aefa daʼö imane, ’Daʼö ”gowe andrö, niʼositengagömi, yaʼami sotomo, gowe si no tobali gowe siföföna.”’​—Halöwö Zinenge 3:15; 4:5-11; 1 Fetero 2:5-7.

9. Hadia zalua sahöli-höli dödö nifaʼeleʼö ba Zinunö 118:22?

⁹ Ba daʼö oroma wa Zinunö 118:22, ifaʼeleʼö sanandrösa ba wanusugi salua ngaotu fakhe me no aefa tefaʼeleʼö. Labunu ba lö latemaʼö Mesia. Hizaʼi, ifuli auri ia ba tobali ia gowe siföföna. Me no aefa tesusugi Yesu, itema sambua döi sebua si lö ”nibeʼe ba niha, ba gulidanö, ba wangorifi yaʼita”.​—Halöwö Zinenge 4:12; Efeso 1:20.

10. (a) Hadia nifaʼeleʼö Zinunö 16:10? (b) Hana wa tola faduhu dödöda wa tenga khö Dawido tefanandrösa Zinunö 16:10?

¹⁰ Datatutunö ayati tanö böʼö sanandrösa ba wanusugi. Alua ia töra saribu fakhe me no aefa tefaʼeleʼö. Daʼa zangaʼaroʼö tödöda wa tola alua wanusugi hewaʼae no ara tefaʼeleʼö mazui tefabuʼu ia. Ba Zinunö 16, tabaso hadia wehede Dawido, ”Löʼö sa ölulu ba mbanua tou nosogu ba lö ötehe, iʼila satulö tödö andrö khöu waʼobou barö danö.” (Zinunö 16:10) Tenga daʼö geluaha wehede Dawido wa lö irai mate ba so ia ba Lewatö. No itutunö khöda Taromali Lowalangi wa itugu atua ba ”mate Dawido, itörö lala ndra tuania, ba lakoʼo ia ba Mbanua Dawido andrö”. (1 Razo 2:1, 10) Na simanö, haʼökhö tefanandrösa ayati daʼö?

11. Hamega itutunö Fetero Zinunö 16:10?

¹¹ Töra saribu fakhe me no aefa isura Dawido wehede daʼö, itutunö Fetero haʼökhö tefanandrösa Zinunö 16:10. Hauga migu me no aefa mate ba tesusugi Yesu, fahuhuo Wetero ba ngahönö niha Yahudi hegöi proselit. (Baso Halöwö Zinenge 2:29-32.) Ifasugi ba dödöra wa no mate Dawido ba no lakoʼo ia. Ba lö itutunö Sura Niʼamoniʼö wa so zi lö fao tödö ba wehede Wetero me imane, ’Iʼila Dawido hadia zi so föna, ba itörö linia wemaoso’ Mesia.

12. Hewisa waʼalua Zinunö 16:10, ba hadia zi tola tafaduhusi tödö sanandrösa ba wanusugi?

¹² Ifaduhuʼö Fetero zalua andre me itötöi wehede Dawido nisura ba Zinunö 110:1. (Baso Halöwö Zinenge 2:33-36.) Börö me itutunö daʼö Fetero moroi ba Zura Niʼamoniʼö, teʼaroʼö dödö niha wa Yesu andrö sindruhu-ndruhu ”Soʼaya ba Keriso”. Aboto ba dödö niha wa alua nifaʼeleʼö ba Zinunö 16:10 me tesusugi Yesu. Ba gafuriata, iʼogunaʼö ngawua wehede si fagölö Faulo me fahuhuo ia ba niha Yahudi ba mbanua Gandriokhia ba Wizidia. Adöni dödöra daʼö irege omasi ira nasa enaʼö itugu aboto ba dödöra. (Baso Halöwö Zinenge 13:32-37, 42.) Daʼa göi zangaroʼö tödöda wa tola tafaduhusi tödö wamaʼeleʼö si so ba Zura Niʼamoniʼö sanandrösa ba wanusugi hewaʼae awena alua ia ngaotu fakhe aefa daʼö.

HAWAʼARA ALUA WANUSUGI?

13. Hadia manö zi tola tasofu sanandrösa ba wanusugi?

¹³ Tatu omuso dödöda me taʼila wa tola alua wanusugi ngaotu fakhe me no aefa tefaʼeleʼö ia. Hizaʼi, so ösa zanofu, ’Hadia moguna ara ubaloi enaʼö tola falukhado ba niha niʼomasiʼögu? Hawaʼara alua wanusugi andrö?’ Ifatunö khö ndra sinengenia Yesu wa so zalua si lö laʼila ba si tebai laʼila. So ösa zalua, ha Ama zi tola motatugöi baŵa ba inötönia. (Halöwö Zinenge 1:6, 7; Yohane 16:12) Hizaʼi, so ösa zi tola taʼila sanandrösa hawaʼara alua wanusugi.

14. Hadia gamaehutania wanusugi Yesu ba niha nisusugi fatua lö yaʼia?

¹⁴ Fanusugi si tohude nisura ba Zura Niʼamoniʼö yaʼia daʼö fanusugi Yesu. Na lö tesusugi ia, tebai falukha ita ba niha niʼomasiʼöda si no mate. Niha nisusugi fatua lö Yesu, simane niha nisusugi Elia ba Elisa hasambalö ifuli mate ba tobali ira tambu ba lewatö, tebai auri ira sagötö faʼara. Hizaʼi, no ”tesusugi [Yesu] moroi ba ngai zi mate”. Ba ”löʼö saʼae mate Keriso . . . lö saʼae ilawa ia faʼamate”. Ba zorugo, auri ia ”irugi zi lö aetu”.​—Roma 6:9; Famaʼeleʼö 1:5, 18; Kolose 1:18; 1 Fetero 3:18.

15. Hana wa mufotöi Yesu ”siaʼa”?

¹⁵ Me tesusugi Yesu ba zorugo tobali boto eheha, daʼa wanusugi ba zorugo si oföna ba sabölö tohude. (Halöwö Zinenge 26:23) Hizaʼi, tenga ha yaʼia nisusugi si möi ba zorugo. No ifabuʼu Yesu wa ira sinengenia si lö faröi, fao ira khönia ba wamatörö. (Luka 22:28-30) Hizaʼi, awena latema luora na no aefa mate ira. Simane Yesu, tesusugi ira tobali boto eheha. Aefa daʼö, isura Faulo wa ”no mususugi Keriso, moroi ba ngai zi mate, no siaʼa ia ba zi no mate andrö”. Iwaʼö Faulo wa hasambalö so niha böʼö nisusugi ba zorugo. Imane, ”Ba oi niföföʼö: Siaʼa, ba Keriso, ba fanetenia, ba tana khö Keriso andrö, na so ia.”​—1 Korindro 15:20, 23.

16. Hawaʼara alua wanusugi ba zorugo?

¹⁶ Moroi ba wehede Waulo, tola taʼila hawaʼara alua wanusugi ba zorugo. Alua daʼö sagötö waʼatohare Keriso. No ara lafaduhuʼö ira Samaduhuʼö Yehowa moroi ba Zura Niʼamoniʼö wa tebörögö tohare Keriso me döfi 1914. So ita nasa sagötö waʼatoharenia, ba no itugu ahatö wangohori ulidanö si lö sökhi andre.

17, 18. Hadia zalua ba niha nibayoini sagötö waʼatohare Keriso?

¹⁷ Oya nitutunö Zura Niʼamoniʼö sanandrösa ba wanusugi ba zorugo. ”Lö edöna mabiniʼö khömi, yaʼami ira talifusö, hewisa ba zi no mate andrö . . . Na mamati ita sa, no mate Yesu ba no ifuli auri, ba ba zimanö göi ifatöröʼö khö Yesu Lowalangi zi no mate andrö, awönia . . . Yaʼita andre, sauri, si tosai, irugi waʼaso Zoʼaya andrö, ba tenga föna zi no mate ita dania. Yaʼia dania, Soʼaya, zi möi mitou, moroi ba zorugo, na so weʼao andrö, . . . Ba oföna maoso zi no mate andrö, ba khö Keriso. Awena dania tefazawa ita, yaʼita sauri, si tosai, ba lawuo, fao ita khöra, ba wamaondragö Soʼaya, ba dalu mbanua; ba tobali awö Zoʼaya ita, si lö mamalö-malö.”​—1 Tesalonika 4:13-17.

¹⁸ Alua wanusugi si oföna na no aefa tebörögö waʼatohare Keriso. Niha nibayoini sauri sagötö alua wamakao sabölö-bölö hasambalö ”tefazawa [ira] . . . ba lawuo”. (Mataiʼo 24:31) Hadia geluahania? Yaʼira si no ”tefazawa”, lö ’mörö ira ba waʼamate’. Eluahania, lö ara ginötö waʼamatera. Hizaʼi, na mate ira, ’iʼozumaigö tobali ira, ha mamöʼi hörö waʼara, na telau dorofe safuria andrö’.​—1 Korindro 15:51, 52.

19. Hadia geluahania ”wemaoso zi sökhi”?

¹⁹ Iadaʼa, ato niha Keriso si lö faröi, lö tebayoini ba lö tefili ira tobali samatörö awö Keriso ba zorugo. Hizaʼi, ladöna-döna ”waʼaso mbaŵa Zoʼaya” na ihori dania gulidanö si lö sökhi andre. Lö hadöi niha sangila hawaʼara alua daʼö. Hizaʼi, so dandra sangoromaʼö wa no itugu ahatö ia. (1 Tesalonika 5:1-3) Na tohare gulidanö si bohou khö Lowalangi, alua wanusugi tanö böʼö. Tesusugi niha ba gulidanö ba laʼokhögö dötönafö enaʼö moʼahonoa ba lö irai mate ira saʼae. Daʼa ”wemaoso zi sökhi” moroi ba zi no alua ba götö föna, börö me niha nisusugi ba mböröta ifuli mate ira.​—Heberaiʼo 11:35.

20. Hana wa faduhu dödöda wa toföfö waʼalua wanusugi?

²⁰ Iwaʼö Sura Niʼamoniʼö wa ”oi niföföʼö” wanusugi niha si möi ba zorugo. (1 Korindro 15:23) Andrö wa tola faduhu dödöda wa toföfö wanusugi salua ba gulidanö. Hizaʼi, tola manö manofu ita: Ba Wamatörö Keriso si Saribu Fakhe, hadia oföna lasusugi niha sawena mate, ba latemaʼö ira niha sangila ba sangomasiʼö yaʼira? Hadia oföna lasusugi niha si lö faröi ba götö föna sonekhe ba wondröniaʼö, enaʼö tola latolo ba wamöföʼö ono mbanua Lowalangi ba gulidanö si bohou? Hadia zalua ba niha si lö irai mamosumange Yehowa? Hawaʼara ba hezo tesusugi ira? Oya wanofu-nofu si tumbu ba dödöda. Hizaʼi, lö moguna taʼabusi tödö daʼö. Abölö sökhi na tabaloi ba tafaigi hadia nifalua Yehowa ba ginötö daʼö. Hasambalö owua-wua dödöda.

21. Hadia dötönafö niʼokhögömö?

²¹ Gasa-gasa daʼö, moguna taʼaroʼö wamatida khö Yehowa. Moroi khö Yesu no ifabuʼu wa hasambalö itörö tödönia niha si no mate ba ifuli tesusugi ira. (Yohane 5:28, 29; 11:23) Dandra tanö böʼö sangoromaʼö wa ifuli isusugi niha si no mate Yehowa oroma ba wehede Yesu me iwaʼö wa Aberahamo, Izaʼaki hegöi Yakobo ”aʼoi sa auri ira khönia”. (Luka 20:37, 38) Simane Faulo, taʼokhögö dani si sökhi ba wangumaʼö, ”So khögu wanötöna khö Lowalangi . . . wa so wemaoso zi mate.”​—Halöwö Zinenge 24:15.