Yaʼami Satua, Hadia Mitolo Ndraonomi Irege Tebayagö Ira Idanö?

1. Hadia zinangea lanehegö ira satua si no tobali niha Keriso fatua lö tebayagö idanö ndraonora?

IMANE talifusöda ira alawe sotöi Blossom Brandt, ”No hauga waŵa ufatunö khö ndra satuagu wa omasido tebayagö idanö ba no asese lafatunöisi khögu daʼö. Lahaogö lanehegö hadia no aboto ba dödögu wa tenga si famai-mai gangetula daʼö. Tebayagö ndraʼo idanö me 31 mbaŵa si Felendrua 1934. Daʼö ngaluo sabölö sökhi ba waʼaurigu.” Iadaʼa, omasi zatua ba wanolo iraonora ba wangai angetula si sökhi. Na itaha-taha ia si samösa iraono ba wamayagö idanö baero na so dani si tefaudu, tola awuwu wahuwusania khö Yehowa. (Yakobo 4:17) Hizaʼi, fatua lö tebayagö idanö ndraonora, moguna lanehegö ira satua hadia no tola tobali nifahaʼö Keriso ndraonora mazui löʼö.

2. (a) Hadia gabula dödö niʼila ndra satua samasui? (b) Hadia nitutunöda ba wamahaʼö daʼa?

² So ösa ndra satua samasui sangila wa ato ndra si bohou ebua sarakhagö 20 mazui sawena 20 fakhe si lö mubayagö idanö, hewaʼae no teʼebuaʼö ira ba zindruhu. Si toʼölönia, asese möi ira ba gangowuloa, manuriaigö, ba lawaʼö wa yaʼira andre Samaduhuʼö Yehowa. Hizaʼi, lö nilulura faʼaurira khö Yehowa ba tebayagö idanö. Tola alua daʼö börö me so ösa zatua sangumaʼö wa tebai nasa tebayagö ira idanö. Ba wamahaʼö daʼa, tatutunö öfa ngawalö zameʼe faʼaombö dödö khö zatua irege lö lafarou ndraonora ba wamayagö idanö.

HADIA AWUYU-WUYU SIBAI NASA NDRAONOGU?

3. Hadia waʼaombö dödö nirasoi zatua Blossom?

³ Satua Blossom nitutunö ba ngenoli si oföna, so khöra waʼaombö dödö hadia no ibönö ndröfi nonora andrö ba wangokhögö faʼaboto ba dödö sanandrösa ba wamayagö idanö ba iʼila wa tenga si famai-mai daʼö. Hewisa enaʼö laʼila ira satua wa iraonora andre no tola lalulu waʼaurira khö Yehowa?

4. Hewisa wa tola möi fanolo khö ndra satua fareta Yesu si so ba Mataiʼo 28:19, 20?

⁴ Baso Mataiʼo 28:19, 20. Lö nitutunö Zura Niʼamoniʼö wa no mutatugöi ndröfi niha sedöna mubayagö idanö. Hizaʼi, moguna aboto ba dödö zatua hadia geluaha mubaliʼö nifahaʼö. Ba li Yunani ngawua wehede ’mibaliʼö nifahaʼö’ si so ba Mataiʼo 28:19, eluahania tafahaʼö zi samösa niha enaʼö tobali ia nifahaʼö. Niha nifahaʼö yaʼia daʼö niha sangokhögö faʼaboto ba dödö sanandrösa ba wamahaʼö Yesu ba somasi moloʼö yaʼia. Börö daʼö, moguna lafahaʼö ndraonora ira satua iʼotarai me tumbu enaʼö tola lalulu waʼaurira khö Yehowa ba tobali ira nifahaʼö Keriso. Tatu manö, tebai nasa mubayagö idanö ndraono sawuyu. Hewaʼae simanö, iforomaʼö Sura Niʼamoniʼö wa iraono side-ide tola so khöra waʼaboto ba dödö ba laʼomasiʼö zindruhu si so ba Zura Niʼamoniʼö.

5, 6. (a) Moloʼö nitutunö Zura Niʼamoniʼö, hamega tebayagö idanö Dimoteo? (b) Hadia lala si sökhi si tola lafalua ira satua ba wanolo iraonora?

⁵ Samösa nifahaʼö sotöi Timoteo, ihalö gangetula ba wolulu faʼaurinia khö Yehowa me awuyu-wuyu ia. Itutunö sinenge sotöi Faulo wa iʼotarai me ”ono sawuyu” Dimoteo, no ifahaʼö ia ba zindruhu moroi ba Daromali Lowalangi. Tenga samosumange Yehowa namania, hizaʼi itolo ia inania hegöi nenenia ba wangomasiʼö Taromali Lowalangi. Buania, iʼokhögö wamati saro. (2 Timoteo 1:5; 3:14, 15) Tola manö me arakhagö 20 fakhe ndröfinia, itema halöwö si tohude ba mbanua niha Keriso.​—Halöwö Zinenge 16:1-3.

⁶ No faböʼö-böʼö ndraono ero samösa. Lö fagölö lala wangera-ngerara hewaʼae fagölö ndröfira. So ösa zangila sindruhu iʼotarai ba waʼide-ide, lahalö gangetula si sökhi ba tebayagö ira idanö ba waʼawuyu-wuyu. Tanö böʼönia, awena omasi ira tebayagö idanö na no alawa ndröfira. Satua si so faʼaboto ba dödö, lö lafaso ndraonora enaʼö tebayagö ira idanö. Hizaʼi, latolo ndraonora enaʼö tedou ira ba wamati moloʼö si sagu ba ndraono. Omuso dödö zatua na lafalua iraonora mene-mene si so ba Gamaedola 27:11. (Baso.) Hizaʼi, moguna latöngöni wa ohitö dödöra yaʼia daʼö ba wanolo iraonora enaʼö tobali nifahaʼö. Andrö, moguna lasofu khöra samösa, ’Hadia no iʼokhögö waʼaboto ba dödö onogu irege tola ilulu waʼaurinia khö Lowalangi ba tebayagö ia idanö?’

HADIA SO WAʼATUA-TUA BA NDRAONOGU?

7. Hadia moguna iʼila fefu wamahaʼö Zura Niʼamoniʼö si samösa niha fatua lö tebayagö ia idanö? Tutunö.

⁷ Moguna lafahaʼö ndraonora ira satua enaʼö laʼokhögö waʼaboto ba dödö sanandrösa ba zindruhu. Faʼaboto ba dödö andre zamarou tödöra enaʼö lalulu waʼaurira khö Lowalangi. Hizaʼi, tenga daʼö geluahania wa moguna iʼila fefu hadia ia nifahaʼö Zura Niʼamoniʼö fatua lö ilulu waʼaurinia ba tebayagö ia idanö. Niha nifahaʼö Keriso, moguna nasa lafahaʼö ira hewaʼae no tebayagö idanö. (Baso Kolose 1:9, 10.) Börö daʼö, hawaʼoya waʼaboto ba dödö niʼokhögö zi samösa niha fatua lö tebayagö ia idanö?

8, 9. Hadia zalua khö zi samösa sozago gurunga ba Wilifi, ba hadia wamahaʼö si tola tahalö ba daʼö?

⁸ Salua ba zi sambua fongambatö ba götö föna, tola möi fanolo khö ndra satua iadaʼa. (Halöwö Zinenge 16:25-33) Me döfi 50 M, möi Waulo ba mbanua Wilifi ba wofanönia si mendrua tobali utusan injil. Me so ia ba daʼö, yaʼia hegöi Sila laböbögö khöra zi lö duhu, laraʼu ba labeʼe ira ba gurunga. Ba zi talu mbongi, alua ndruru danö sabölö-bölö irege teboka fefu mbawandruhö gurunga. So ba dödö zozago gurunga wa no moloi fefu niha gurunga irege edöna ibunu ia samösa. Hizaʼi, itaha ia Faulo. Aefa daʼö, Faulo hegöi Sila lafahaʼö zozago gurunga andrö hegöi ösi nomonia sanandrösa khö Yesu. Faduhu dödöra ba wamahaʼö si no latema ba aboto ba dödöra wa moguna moloʼö ira khö Yesu. Daʼö mbörö wa iʼanemaiʼö tebayagö ira idanö. Hadia wamahaʼö si tola tahalö ba zalua khöra andre?

⁹ Sozago gurunga andrö te saradadu Romawi si no fasiu. Lö iʼila Daromali Lowalangi. Enaʼö tobali ia niha Keriso, moguna ifahaʼö ia ba dane-dane wamahaʼö Zura Niʼamoniʼö, aboto ba dödönia hadia niʼandrö Yehowa ba nono mbanuania ba iʼoʼö fefu wamahaʼö Yesu. Famahaʼö nitemania ba zi lö arara andre zamarou tödönia irege tebayagö ia idanö. Tatu manö, lö aetu ifahaʼö ia hewaʼae no tebayagö ia idanö. Andrö, hadia zinangea öfalua na so ndraonomö sangumaʼö khöu wa omasi ia tebayagö idanö börö me iʼomasiʼö Yehowa ba omasi iʼoʼö niwaʼönia? Fatunö khönia enaʼö iʼombakhaʼö khö ndra satua sokubaloi enaʼö yaʼira zangai angetula hadia tola tebayagö ia idanö mazui löʼö.a (Faigi nisura ba gahe zura.) Simane niha Keriso tanö böʼö si no tebayagö idanö, moguna nasa ifahaʼö ia sanandrösa khö Yehowa sandrohu faʼaurinia.​—Roma 11:33, 34.

HADIA ZEKOLA SABÖLÖ SÖKHI BA NDRAONOGU?

10, 11. (a) Hadia manö zi tola tumbu ba wangera-ngera zatua? (b) Hadia zi tola molumöʼö iraono?

¹⁰ So ösa zatua sangumaʼö wa abölö sökhi na möi ba zekola salawa ndraonora ba laʼokhögö halöwö si sökhi awena tebayagö ira idanö. Lö fasala wangera-ngera simane daʼö. Hizaʼi, moguna lasofu khöra samösa, ’Hadia sindruhu-ndruhu mofozu waʼauri nonogu ba daʼö? Hadia tefaudu daʼö moloʼö Sura Niʼamoniʼö? Hewisa zomasi Yehowa wangogunaʼöda faʼaurida?’—Baso Zangombakha 12:1.

¹¹ Moguna tatörö tödöda wa fefu hadia ia zoʼamakhaita ba gulidanö andre lö tefaudu ba zomasi Yehowa hegöi ba lala wangera-ngerania. (Yakobo 4:7, 8; 1 Yohane 2:15-17; 5:19) Fahuwusa si sökhi khö Yehowa sindruhu-ndruhu möi folumöʼö ndraono moroi khö Zatana, ulidanönia hegöi lala wangera-ngera si lö sökhi ba gulidanö daʼa. Na laʼofönaiʼö sekola salawa hegöi halöwö si sökhi ira satua, tola so ba wangera-ngera ndraonora wa abölö sökhi ngawalö zi so ba gulidanö andre moroi ba wahuwusara khö Yehowa. No sambua teʼala daʼa. Satua si so faʼomasi, hadia ötehegö ifahaʼö ndraonomö ulidanö andre sanandrösa ba lala wanöndrania faʼohahau dödö? Ha sambua lala enaʼö mofozu waʼaurida ba tasöndra waʼowua-wua dödö sindruhu yaʼia daʼö taʼofönaiʼö Yehowa ba waʼaurida.​—Baso Zinunö 1:2, 3.

HEWISA NA IFALUA HORÖ ONOGU?

12. Hana wa so ösa zatua sangumaʼö wa abölö sökhi na lö tebayagö idanö ndraonora ba waʼawuyu-wuyu?

¹² Itutunö si samösa ina hana wa lö omasi ia na tebayagö idanö nononia alawe. Imane, ”Ataʼudo na laʼefasi ia ba gangowuloa, sindruhunia ailado wangumaʼö daʼa.” Simane talifusöda andrö, so ösa zatua sangumaʼö wa abölö sökhi na awena tebayagö idanö ndraonora na no ibönö ndröfira irege tola latimbagö wamalua horö. (1 Moze 8:21; Gamaedola 22:15) Lawaʼö, na lö tebayagö idanö ndraonora lö laʼefasi ira ba gangowuloa. Hizaʼi, hana wa fasala wangera-ngera simane daʼö?​—Yakobo 1:22.

13. Na lö mubayagö idanö zi samösa niha, hadia daʼö geluahania wa lö iʼonorogö tödö horö si no ifalua föna Yehowa? Tutunö.

¹³ Tatu manö, lö omasi zatua na tebayagö idanö ndraonora na tebai nasa lalulu waʼaurira khö Yehowa. Hizaʼi, böi so ba wangera-ngera zatua wa lö laʼonorogö tödö iraonora horö si no lafalua föna Yehowa börö me lö mubayagö ira idanö. Iʼonorogö tödö horö si no ifalua föna Lowalangi si samösa iraono na no aboto ba dödönia hadia zatulö ba si lö atulö ba wamaigi Yehowa. (Baso Yakobo 4:17.) Satua si so faʼaboto ba dödö, lö itaha ndraononia ba wamayagö idanö. Iʼotarai ba waʼide-ide lafahaʼö ba labeʼe khönia duma-duma ba wangomasiʼö somasi Yehowa hegöi ba wangogorofi niʼogorofinia. (Luka 6:40) Faʼomasinia khö Yehowa zolumöʼö yaʼia enaʼö lö ifalua horö sebua börö me omasi ia ifalua zatulö föna Yehowa.​—Yesaya 35:8.

FANOLO MOROI BA NIHA BÖʼÖ

14. Hewisa ndra satua sokubaloi ba wanolo ira satua?

¹⁴ Ira satua sokubaloi tola latolo zatua. Duma-dumania, labeʼe wamarou dödö ba ndraono enaʼö lahalö halöwö khö Yehowa. Itörö tödö zi samösa talifusöda ira alawe me fahuhuo khönia dalifusöda Russell me önö fakhe ndröfinia. Imane, ”Fahuhuo ia khögu 15 menit ba wanutunö ohitö dödögu sanandrösa ba wamati.” Buania, no töra 70 fakhe merintis ia! Ba daʼa oroma wa fehede si sökhi hegöi famarou tödö tola so mbuania ba zi samösa niha. (Gamaedola 25:11) Ira satua sokubaloi, tola laʼandrö khö ndra satua hegöi ba ndraono enaʼö lalului na so halöwö ba Balai Mbanua Lowalangi. Tola labeʼe halöwö ba ndraono moloʼö döfi hegöi si sagu khöra.

15. Hewisa ndra talifusöda ba mbanua niha Keriso ba wameʼe fanolo ba zi bohou ebua?

¹⁵ Hewisa ndra talifusöda ba mbanua niha Keriso ba wameʼe fanolo? Tola laforomaʼö wa laʼameʼegö tödö zi bohou ebua. Duma-dumania, nehegö hadia dandra-tandra sangoromaʼö wa itugu ahatö zi bohou ebua khö Yehowa. Hadia sökhi wameʼenia bua gera-era ba gangowuloa mazui ba wamaʼema halöwö si no tebeʼe khönia ba gangowuloa barö migu? Hadia manuriaigö ia ba zekola mazui ifalua zatulö ba ginötö tedönisi dödönia ba wamalua sala? Na no ifalua daʼö, suno ia! Tola fahuhuo ita khö ndra si bohou ebua sanandrösa ba gohitö dödö ba wamati fatua lö mubörögö hegöi na no awai gangowuloa. Na tafalua daʼö, tola larasoi wa no tefarahu ira ba ”gowuloa sebua”.​—Zinunö 35:18.

TOLO NDRAONOU ENAʼÖ TEBAYAGÖ IRA IDANÖ

16, 17. (a) Hana wa moguna tebayagö idanö ndraono? (b) Hadia waʼowua-wua dödö nirasoi zatua si no tobali niha Keriso? (Faigi gambara ba wamobörö wamahaʼö.)

¹⁶ No halöwö fondrege zi sökhi ba zatua ba wamahaʼö iraonora ba wangomasiʼö Yehowa. (Zinunö 127:3; Efeso 6:4) Ba götö ndraono Gizaraʼeli, no lalulu waʼauri ndraonora khö Yehowa iʼotarai me tumbu. Hizaʼi, tenga simane daʼö ndraonoda iadaʼa. Hewaʼae laʼomasiʼö Yehowa hegöi sindruhu ira satua, tenga daʼö geluahania wa lafalua göi daʼö iraonora. Hizaʼi, moguna latolo ndraonora iʼotarai me tumbu enaʼö tola tobali nifahaʼö, lalulu waʼaurira khö Lowalangi ba tebayagö idanö. Hana wa moguna sibai daʼö? Folulu faʼauri zi samösa niha, famayagö idanö hegöi faʼalöfaröinia ba wamosumange Yehowa, tola möi folumöʼönia na alua wamakao sabölö-bölö.​—Mataiʼo 24:13.

¹⁷ Me omasi Blossom Brandt tebayagö idanö, lahaogö lanehegö ira satuania hadia no tola ilulu waʼaurinia. Me laʼila wa no tola tebayagö ia idanö, latuhini gangetulania. Itutunö Blossom hadia nifalua bapania ba mbongi fatua lö tebayagö ia idanö. Imane, ”Iʼandrö khöma enaʼö matuhi danö, ba ilau mangandrö. Iwaʼö khö Yehowa wa omuso sibai dödönia börö me no ihalö gangetula ononia alawe side-ide ba wolulu faʼaurinia khö Yehowa.” Töra 60 fakhe aefa daʼö imane Blossom, ”Gofu hawaʼara, lö irai uʼolifugö mbongi daʼö!” Yaʼami satua, te no irai mirasoi waʼowua-wua dödö simane daʼö me miʼila wa no lalulu waʼaurira iraonomi ba tebayagö ira idanö tobali samosumange Yehowa.