Degu-Degu No Tandra Waʼomasi moroi khö Lowalangi

1. Hewisa wanutunö Sura Niʼamoniʼö sanandrösa ba degu-degu?

HADIA zi so ba wangera-ngeramö na örongo ngawua wehede degu-degu? Ato niha sangumaʼö wa degu-degu andre hukuma, hizaʼi tenga ha daʼö manö geluahania. Iwaʼö Sura Niʼamoniʼö wa si sökhi khöda na tatema degu-degu ba itaria ifaogö wanötöi yaʼia ba waʼaboto ba dödö, faʼatua-tua, faʼomasi hegöi faʼauri. (Gamaedola 1:2-7; 4:11-13) Na ibeʼe khöda degu-degu Lowalangi, no sambua tandra daʼö wa iʼomasiʼö ita ba omasi ia na auri ita sagötö faʼara. (Heberaiʼo 12:6) Itaria, na ibeʼe degu-degu Lowalangi, ibeʼe göi hukuma. Hizaʼi, tenga ifakao ita mazui lö khönia faʼahakhö dödö. Eluaha siföföna moroi ba ngawua wehede degu-degu, yaʼia daʼö mameʼe famahaʼö, hulö simane famahaʼö nibeʼe zatua khö nono niʼomasiʼönia.

2, 3. Hadia zi tefarahu ba wameʼe degu-degu? (Faigi gambara ba wamobörö wamahaʼö.)

² Angeragö duma-duma daʼa. So samösa nono matua sotöi Johnny fabola ia yomo ba nomo. Imane mamania, ”He Johnny, böi fabola ba nomo! Tola aboto hadia ia.” Hizaʼi, lö ifondrondrongo niwaʼö mamania ba itohugö fabola. Lua-luania göna bola andrö ba naha mbunga ba aboto! Hadia nifalua mamania ba wanegu yaʼia? Ifatunö khö nononia wa fasala nifaluania. Omasi ia na aboto ba dödö nononia wa no si sökhi woloʼö li zatua ba moguna mubeʼe nola-ola si tefaudu. Enaʼö tola ifahaʼö ia ba daʼö Johnny, ihuku ia mamania, ihalö bola andrö ba ibeʼe yawa sabata. Tola manö lö omasi Johnny ba nifalua mamania andrö, hizaʼi möi fanolonia daʼö enaʼö itörö tödönia wa so lua-luania na lö khönia foloʼö.

³ Yaʼita niha Keriso, no tobali ita ösi nomo Lowalangi. (1 Timoteo 3:15) No sinangea itatugöi Amada Yehowa hadia zatulö ba si sala ba ibeʼe khöda degu-degu na lö moloʼö ita khönia. Ba ginötö tafalua zala, degu-degu si fao faʼomasi moroi khö Yehowa andre möi fanoloda enaʼö tatörö tödöda wa moguna sibai moloʼö ita khönia. (Galatia 6:7) Iʼomasiʼö ita Lowalangi ba lö omasi ia na tefakao ita.​—1 Fetero 5:6, 7.

4. (a) Hewisa lalada ba wamahaʼö niha böʼö moloʼö somasi Yehowa? (b) Hadia nitutunöda ba wamahaʼö daʼa?

⁴ Ba ginötö tabeʼe degu-degu si teʼodane-dane ba Zura Niʼamoniʼö, tola tatolo ndraonoda hegöi niha nifahaʼö enaʼö tobali ira soloʼö khö Keriso. Taʼogunaʼö Zura Niʼamoniʼö ba wamahaʼö niha nifahaʼöda enaʼö laʼila hadia zatulö ba aboto ba dödöra daʼö ba ’laʼoʼö fefu niwaʼö Yesu’. (Mataiʼo 28:19, 20; 2 Timoteo 3:16) Omasi Yehowa na tafahaʼö ira enaʼö tola göi latolo niha böʼö tobali soloʼö khö Keriso. (Baso Tito 2:11-14.) Iadaʼa, datatutunö tölu wonofu-nofu andre, (1) Hadia mbörö wa degu-degu moroi khö Lowalangi no tandra wa iʼomasiʼö ita? (2) Hadia wamahaʼö nihalöda ba niha si no göna degu-degu moroi khö Lowalangi? (3) Hewisa woloʼöda Yehowa hegöi Ononia ba ginötö tabeʼe degu-degu?

IBEʼE DEGU-DEGU LOWALANGI SI FAO FAʼOMASI

5. Hewisa degu-degu moroi khö Yehowa no tobali tandra wa iʼomasiʼö ita?

⁵ Ibeʼe khöda mene-mene Yehowa, famahaʼö hegöi ba wangaʼazökhi börö me iʼomasiʼö ita. Omasi ia na lö mamalö ahatö ita khönia ba tasöndra waʼauri si lö aetu. (1 Yohane 4:16) Lö irai iʼailasi mazui iʼosilöʼögö ita. (Gamaedola 12:18) Hizaʼi, iʼosambuaʼö dödönia ba mbua-bua si sökhi niʼokhögöda ba itehegö khöda ba wangai angetula samösa. Hadia tola öʼila wa degu-degu nitemada moroi ba Zura Niʼamoniʼö, publikasi, hegöi khö ndra satua mazui khö ndra satua sokubaloi, no tandra wa iʼomasiʼö ita Yehowa? Sindruhunia, fatua lö taʼila wa fasala nifaluada, laʼodödögö ira satua sokubaloi ba wameʼe khöda degu-degu si sökhi ba si fao faʼomasi. Na lafalua daʼö no laʼoʼö waʼomasi Yehowa.​—Galatia 6:1.

6. Hewisa degu-degu moroi khö Lowalangi no tobali tandra waʼomasinia, hewaʼae aheta ba zi samösa niha halöwö niʼokhögönia ba mbanua niha Keriso?

⁶ Itaria, tenga ha asala labeʼe mene-mene ba niha si göna degu-degu. Na no ifalua horö sebua, so ösa halöwö ba mbanua niha Keriso si tebai ifalua. Degu-degu andre zangoromaʼö wa iʼomasiʼö ia Lowalangi. Tola möi fanolonia daʼö enaʼö iʼila wa moguna asese ifahaʼö ia ba Zura Niʼamoniʼö, iʼangerönusi daʼö ba ilau mangandrö. Na ifalua daʼa tola itugu aro wahuwusania khö Yehowa. (Zinunö 19:8) Na no ara ginötö, tola mufuli mubeʼe khönia noro dödö mazui halöwö si no irai mubeʼe khönia ba zilalö. Hewaʼae na muʼefasi zi samösa niha ba mbanua niha Keriso, no tandra waʼomasi moroi khö Yehowa daʼö, börö me ilumöʼö mbanua niha Keriso moroi ba zi lö sökhi. (1 Korindro 5:6, 7, 11) Börö me atulö degu-degu moroi khö Lowalangi, möi fanolo ba niha niʼefasi enaʼö aboto ba dödönia hawaʼebua horö si no ifalua. Buania, tola ifalalini gera-erania.​—Halöwö Zinenge 3:19.

SO MBUANIA KHÖDA DEGU-DEGU MOROI KHÖ YEHOWA

7. Haniha Sebena andrö ba hadia gamuata si lö sökhi niʼokhögönia?

⁷ Enaʼö aboto ba dödöda wa moguna sibai degu-degu, datatutunö darua niha si no irai göna degu-degu moroi khö Yehowa. Si oföna yaʼia daʼö samösa ndraono Gizaraʼeli sotöi Sebena, sauri ba götö Razo Hizikia, ba si dua samösa dalifusöda ira matua sauri ba götöda andre sotöi Graham. Sebena andre ”mandru yomo” ba gödo Razo Hizikia ba iʼokhögö dadaoma salawa. (Yesaya 22:15) Hizaʼi, so khönia waʼasiliyawa ba omasi ia na tohude ia ba wamaigi niha. Ifazökhi lewatönia si sökhi ba möi ia yawa ba ’gureta andrö, si sökhi sibai’.​—Yesaya 22:16-18.

8. Hewisa wameʼe Yehowa degu-degu khö Zebena ba hadia mbuania?

⁸ Börö me omasi Sebena na tefolakhömi ia, iheta halöwönia Lowalangi ba ibeʼe khö Geliaki. (Yesaya 22:19-21) Alua daʼö me edöna Razo Saneribi ba wanuwö Yeruzalema. Ba gafuriata, ifatenge zohalöwö khönia hegöi saradadunia sato ba Yeruzalema ba wametaʼu niha Yahudi ba enaʼö mangalulu Razo Hizikia. (2 Razo 18:17-25) Ifatenge Eliaki Hizikia ba darua ndra awönia ba wamalukhaisi yaʼira. Samösa ba gotaluara yaʼia daʼö Sebena si no tobali sekretaris. Moroi ba daʼö, tola taʼila wa no ifalalini gera-erania Sebena ba so khönia wangide-ngideʼö. Lö afökhö dödönia ma ihakhösi tödö ia samösa. Itema halöwö daʼö hewaʼae tenga simane halöwönia ba zilalö. So tölu wamahaʼö nihalöda moroi ba zalua khö Zebena.

9-11. (a) Hadia wamahaʼö si sökhi nihalöda moroi khö Zebena? (b) Hadia wamahaʼö nihalöda khö Yehowa moroi ba nifaluania khö Zebena?

⁹ Si oföna, aheta khö Zebena dadaoma salawa. Daʼa zamasugi ba dödöda wa no ”föna waʼatekiko mowaö-waö wayawasa”. (Gamaedola 16:18) Te so halöwö niʼokhögöda ba mbanua niha Keriso ba tola manö so ba wangera-ngera niha wa tohude ita. Na simanö, hadia lö mamalö so khöda wangide-ngideʼö? Hadia tatörö tödöda wa fefu waʼatua-tua hegöi ngawalö zi sökhi niʼokhögöda no moroi khö Yehowa? (1 Korindro 4:7) Ifangelama ita sinenge sotöi Faulo imane, ”Ufatunö khömi fefu enaʼö böi so zangumaʼö ba gotaluami wa abölö ebua ia moroi ba zindruhunia, hizaʼi ndrohu-ndrohu zinangeania.”​—Roma 12:3.

¹⁰ Si dua, moroi ba degu-degu nibeʼe Yehowa khö Zebena, daʼö zangoromaʼö wa faduhu dödönia wa tola ifalalini gera-erania Sebena. (Gamaedola 3:11, 12) Na no laheta khöu halöwö ba mbanua niha Keriso, törö tödöu Sebena. Moroi na mofönu ndraʼugö ba abao dödöu, böi aetu beʼe zabölö sökhi khö Yehowa. Moguna öʼila wa degu-degu nibeʼe Yehowa no tandra waʼomasinia khöu. Törö tödöu wa ifahowuʼö niha si so fangide-ngideʼö Amada, Yehowa. (Baso 1 Fetero 5:6, 7.) Degu-degu si fao faʼomasi moroi khö Yehowa tola iʼazökhi ita na so khöda wangide-ngideʼö ba tobali ita simane tambu laʼuri sombuyu.

¹¹ Si tölu, tola tahalö wamahaʼö si sökhi khö Yehowa moroi ba nifaluania khö Zebena. Hewaʼae fatuwu khö Yehowa horö, hizaʼi iʼomasiʼö niha samalua horö andrö ba ifaigi zi sökhi nifalua niha daʼö. Na yaʼugö samösa satua mazui satua sokubaloi, hadia öʼoʼö lala Yehowa ba wameʼe degu-degu?​—Yuda 22, 23.

12-14. (a) Hadia nifalua niha si no irai manema degu-degu moroi khö Yehowa? (b) Hewisa wanolo Daromali Lowalangi zi samösa talifusöda irege ibulöʼö gamuatania ba hadia mbuania?

¹² Hizaʼi, so ösa niha safökhö tödö na labeʼe khöra degu-degu irege aröu ira khö Lowalangi hegöi ba mbanua niha Keriso. (Heberaiʼo 3:12, 13) Hadia daʼö geluahania wa lö hadöi niha si tola manolo yaʼira? Tenga! Duma-dumania Graham si no irai laʼefasi ba mbanua niha Keriso ba no mufuli mutema ia. Hizaʼi, lö ara aefa daʼö lö möi ia saʼae manuriaigö hegöi ba gangowuloa. Hewaʼae simanö, so samösa zatua sokubaloi iʼalui lala enaʼö tola fahuwu ia khö Graham. Buania, iʼandrö khönia Graham enaʼö ifahaʼö ia ba Zura Niʼamoniʼö.

¹³ Itutunö satua sokubaloi andrö, ”Ba zilalö, so waʼasiliyawa khö Graham. Lö fao dödönia khö ndra satua sokubaloi sangefasi yaʼia. Hizaʼi, asese matutunö ayati soʼamakhaita ba waʼasiliyawa hegöi lua-luania. Ibörötaigö iʼogunaʼö Daromali Lowalangi Graham ba wamareso yaʼia ba iʼila wa so zinangea ibulöʼö! Sökhi sibai mbuania! Aboto ba dödönia wa amuata faʼasiliyawa hegöi falömoloʼö no amaedola ’mboto geu’ sombawainö hörönia. Iʼanemaiʼö ibulöʼö gamuatania. Ibörögö asese möi ia ba gangowuloa, iforege wamahaʼö yaʼia ba Daromali Lowalangi ba mangandrö ia ero maʼökhö. Börö me yaʼia högö yomo ba nomo, idöniaʼö nösi nomonia ba wamati. Omuso dödö woʼomonia hegöi iraononia.”​—Luka 6:41, 42; Yakobo 1:23-25.

¹⁴ Imane nasa satua sokubaloi andrö, ”Samuza inötö, so niwaʼö Graham si tofakha ba dödögu. Imane, ’No hauga fakhe aboto ba dödögu zindruhu ba no irai merintis ndraʼo. Hizaʼi, awena sindruhu-ndruhu tola uwaʼö wa uʼomasiʼö Yehowa.’” Lö ara aefa daʼö, labeʼe halöwö khö Graham ba wamaʼema mikrofon ba gangowuloa, ba omasi ia halöwö daʼö. Imane satua sokubaloi andrö, ”Duma-dumania andrö zamahaʼö yaʼo wa niha sanema degu-degu moroi khö Lowalangi si fao fangide-ngideʼö hasambalö tefahowuʼö!”

OʼÖ LOWALANGI HEGÖI KERISO BA GINÖTÖ ÖBEʼE DEGU-DEGU

15. Hadia nifaluada enaʼö aoha ba niha böʼö wanemaʼö degu-degu nibeʼeda?

¹⁵ Enaʼö tobali ita samahaʼö si sökhi, moguna ua tobali ita nifahaʼö si sökhi. (1 Timoteo 4:15, 16) Simanö göi, na iʼogunaʼö ndraʼugö Yehowa ba wameʼe degu-degu ba niha böʼö, moguna so khöu wangide-ngideʼö ba oʼö wanuturu lala moroi khö Yehowa. Na laʼila niha böʼö wa so khöu wangide-ngideʼö, tola lafosumange ndraʼugö ba aoha khöra wanema mene-mene nibeʼemö. Datafahaʼö ita ba duma-duma nibeʼe Yesu.

16. Hadia wamahaʼö nihalöda moroi khö Yesu sanandrösa ba wameʼenia degu-degu hegöi famahaʼö?

¹⁶ Lö mamalö moloʼö Yesu khö Namania hewaʼae ba ginötö abua khönia wamalua daʼö. (Mataiʼo 26:39) Ifaduhuʼö wa famahaʼö hegöi faʼatua-tua niʼokhögönia no moroi khö Namania. (Yohane 5:19, 30) So wangide-ngideʼö khö Yesu irege daʼa zanolo yaʼia ba wangokhögö faʼahakhö dödö. Omuso dödö niha si so ba zi fasuinia. (Baso Mataiʼo 11:29.) Fehede si sökhi niwaʼö Yesu möi famarou dödö niha safatö tödö ba serege tödö. (Mataiʼo 12:20) Iʼamenesi ndra sinengenia si fao faʼasökhi ba faʼomasi ba ginötö lafadöni haniha zebua ba gotaluara ba lö abao dödönia.​—Mareko 9:33-37; Luka 22:24-27.

17. Hadia mbua-bua si tola manolo ira satua sokubaloi enaʼö sökhi wondrorogöra banua niha Keriso?

¹⁷ Moguna laʼoʼö duma-duma Keriso ira satua sokubaloi ero labeʼe degu-degu si teʼodane-dane moroi ba goi-goi Zura Niʼamoniʼö. Na lafalua daʼö, no laforomaʼö wa omasi ira laʼoʼö wanuturu lala moroi khö Lowalangi hegöi Ononia. Imane sinenge sotöi Fetero, ”Mikubaloi mbiri-biri Lowalangi si no labeʼe ba dangami. Yatobali ami sondröniaʼö ba wondrorogö yaʼira, tenga nifaso hizaʼi si fao faʼaoha gölö föna Lowalangi ba faʼowölö-ölö, tenga ba wangalui hare si lö atulö, tenga samatörö ono mbanua Lowalangi, hizaʼi si tobali duma-duma ba nikubaloi.” (1 Fetero 5:2-4) Na moloʼö ndra satua sokubaloi khö Lowalangi hegöi khö Keriso tola latema mbuania hegöi niha sanema degu-degu.​—Yesaya 32:1, 2, 17, 18.

18. (a) Hadia halöwö nibeʼe Yehowa ba zatua? (b) Hewisa wanolo Lowalangi ira satua?

¹⁸ Hewisa wameʼe degu-degu hegöi famahaʼö ba zi sambua omo? Ibeʼe mene-mene Yehowa ba niha si tobali högö yomo ba nomo ”böi miʼandrö wönu ndraonomi. Miʼebuaʼö ira ba mibeʼe wotu si fao fanuturu lala moroi khö Yehowa”. (Efeso 6:4) Hadia moguna mubeʼe wamahaʼö hegöi degu-degu? Imane ba Gamaedola 19:18, ”Otuʼö nonou; so na sa wanötöna; ba böi fonumalö dödöu ba wamunu yaʼia.” Ibeʼe Yehowa halöwö ba zatua enaʼö lafahaʼö ndraonora! Na lö lafalua daʼö, hasambalö isugi ira Yehowa! (1 Zamueli 3:12-14) Hizaʼi, tola ibeʼe khöra waʼatua-tua Yehowa hegöi faʼabölö na laʼandrö khönia daʼö ba laʼoʼö wanuturu lala moroi ba Daromalinia hegöi eheha niʼamoniʼö.​—Baso Yakobo 1:5.

LALA ENAʼÖ AURI ITA SI FAO FAʼAHONO DÖDÖ SAGÖTÖ FAʼARA

19, 20. (a) Hadia howu-howu nirasoida na tatemaʼö degu-degu moroi khö Lowalangi? (b) Hadia wamahaʼö nitutunöda aefa daʼa?

¹⁹ Na tatema degu-degu moroi khö Lowalangi ba taʼoʼö Yehowa hegöi Yesu ba wameʼe mene-mene, hasambalö oya mbua nitemada! So waʼahono dödö ba nösi nomo hegöi ba mbanua niha Keriso. Fefu ita tarasoi waʼomasi, lö khöda faʼataʼu ba laʼameʼegö tödö ita. Ba zi so föna, tola tarasoi waʼahono dödö hegöi faʼomuso dödö sabölö ebua. (Zinunö 72:7) Degu-degu nibeʼe Yehowa andre zanolo yaʼita enaʼö tola auri ita sagötö faʼara si fao faʼomuso dödö ba tobali ita ösi nomo Namada Yehowa. (Baso Yesaya 11:9.) Na tatörö tödöda daʼö, tola taʼila wa degu-degu nibeʼe Lowalangi andre no tandra wa iʼomasiʼö ita.

²⁰ Ba wamahaʼö aefa daʼa, tafahaʼö ita nasa sanandrösa ba wameʼe degu-degu yomo ba nomo hegöi ba mbanua niha Keriso. Tatutunö göi lala ba wangokhögö fanaha tödö. Aefa daʼö, tatutunö göi hadia zabölö afökhö nitemada moroi ba degu-degu ba hewisa wotimbagö yaʼia.