Oʼö Yehowa, Sangosinangegö Nirasoi Niha Böʼö ba si Sökhi Tödö

1. Hewisa wangoromaʼö zamosumange Yehowa wa faoma laʼomasiʼö nawöra?

FEFU zamosumange Yehowa ba zi sagörö ulidanö no amaedola sambua ösi nomo. Faoma laʼomasiʼö nawöra. (1 Yohane 4:16, 21) Itaria oya nitehegöra ba wanolo ndra talifusöra, hizaʼi sasesenia laforomaʼö waʼomasira moroi ba zide-ide. Duma-dumania, lasuno ndra talifusöra mazui laforomaʼö waʼasökhi dödö. Na taʼameʼegö tödö nirasoi niha böʼö, no taʼoʼö Namada si so ba zorugo.​—Efeso 5:1.

2. Hewisa woloʼö Yesu waʼomasi Namania?

² Moʼahonoa woloʼö Yesu Namania. Lö mamalö iforomaʼö waʼasökhi dödö ba niha böʼö. Imane, ”Miʼaine khögu dozi serege tödö awö zonoro sabua, ba ufolombase ami.” (Mataiʼo 11:28, 29) Na taʼoʼö Yesu ba taforomaʼö wa ’so ba dödöda niha si numana’, no taʼomusoiʼö dödö Yehowa, ba tasöndra göi waʼomuso dödö. (Zinunö 41:2) Ba wamahaʼö daʼa, tatutunö hewisa wangoromaʼöda wa taʼosinangegö nirasoi nösi nomoda, ira talifusöda ba gangowuloa hegöi niha nifalukhaisida ba wanuriaigö.

OSINANGEGÖ NIRASOI NÖSI NOMO

3. Hewisa wangosinangegö foʼomo ira matua hadia nirasoi woʼomonia? (Faigi gambara ba wamobörö wamahaʼö.)

³ Foʼomo ira matua moguna labeʼe duma-duma ba laʼameʼegö tödö nösi nomora. (Efeso 5:25; 6:4) Iwaʼö ba Zura Niʼamoniʼö wa foʼomo ira matua moguna iʼosinangegö ba iʼila hadia nirasoi woʼomonia. (1 Fetero 3:7) Na so waʼaboto ba dödö khö woʼomo ira matua, tatu iʼila wa lö tohude ia moroi khö woʼomonia hewaʼae oya gamaehutara. (1 Moze 2:18) Iʼosinangegö nirasoi woʼomonia, ifosumange ba ihaogö-haogö. Imane samösa foʼomo ira alawe moroi ba Kanada sanandrösa khö woʼomonia, ”Lö irai iʼosiwawöi hadia nirasoigu mazui iwaʼö, ’Tebai so khöu wangera-ngera daʼö.’ Tobali ia samondrondrongo si sökhi. Na moguna ibeʼe khögu mene-mene, ifalua daʼö si fao faʼasökhi dödö.”

4. Ba lala nifaluania khö ndra alawe böʼö, hewisa wangoromaʼö foʼomo ira matua wa iʼosinangegö nirasoi woʼomonia?

⁴ Foʼomo ira matua soʼameʼegö tödö woʼomonia, lö igadu mazui ileke-lekeʼö ndra alawe böʼö ba ginötö falukha khönia, ba media sosial mazui ba Internet. (Yobi 31:1) Lö iʼogunaʼö media sosial ba wogadu ira alawe böʼö ba lö ifaigi situs Web si lö moadu. Irorogö waʼalöfaröinia khö woʼomonia börö me iʼomasiʼö woʼomonia, iʼomasiʼö Yehowa ba fatuwu ia ba zi lö sökhi.​—Baso Zinunö 19:15; 97:10.

5. Hewisa woʼomo ira alawe ba wangosinangegö nirasoi woʼomonia?

⁵ Na iʼoʼö foʼomo ira matua duma-duma Yesu Keriso si no tobali högönia, aoha khö woʼomonia ba ’woloʼö linia’. (Efeso 5:22-25, 33) Na foʼomo ira alawe ifosumange woʼomonia ira matua, tatu iforege enaʼö iʼila hadia nirasoi woʼomonia ba iforomaʼö waʼasökhi dödö ba ginötö oya halöwö woʼomonia andrö ba mbanua niha Keriso mazui ba wangasiwai abula dödö tanö böʼö. Imane samösa foʼomo ira matua moroi ba Inggris, ”Sasesenia, na faböʼö gamuatagu, iʼila foʼomogu wa so gabula dödö salua. Aefa daʼö, ifalua goi-goi si so ba Gamaedola 20:5. Na tola ututunö gabula dödö andrö khönia, ibaloi ginötö si tefaudu enaʼö tola ’isou miyawa’ nösi dödögu.”

6. Hewisa fefu ita tola tafarou ndraono enaʼö laʼangeragö niha böʼö ba lafalua zi sökhi, ba hadia mbua nitemara?

⁶ Na satua faoma laʼosinangegö nirasoi nawöra, no labeʼe duma-duma si sökhi ba ndraonora. Moguna göi lafahaʼö ndraonora enaʼö laʼangeragö niha böʼö ba lafalua zi sökhi. Duma-dumania, lafahaʼö ndraonora enaʼö böi fagohi-gohi ba Balai Mbanua Lowalangi. Mazui na acara ramah-tamah, lafahaʼö ndraonora enaʼö laʼofönaiʼö zatua ba ginötö lahalö gö. Tatu manö, fefu niha ba mbanua niha Keriso moguna latolo ndra satua. Andrö, moguna tasuno na so ndraono samalua si sökhi, simane na ibokai khöda bawandruhö. Na tafalua daʼö, tatu omuso dödönia ba daʼö zamahaʼö yaʼia wa abölö ”ohahau dödö ba wameʼe moroi ba wanema”.​—Halöwö Zinenge 20:35.

OSINANGEGÖ NIRASOI NIHA BA MBANUA NIHA KERISO

7. Hewisa wangosinangegö Yesu nirasoi ndra matua safiso andrö, ba hadia wamahaʼö nihalöda ba duma-duma Yesu?

⁷ Samuza maʼökhö, me so Yesu ba mbanua Dekafoli, ”laʼohe khönia ba daʼö samösa ndra matua safiso ba si lö hede”. (Mareko 7:31-35) Ifadöhö ia Yesu, hizaʼi tenga föna niha sato. Hadia mbörö? Börö me afiso ndra matua andrö, te lö ohahau dödönia ba gotalua niha sato. Aboto ba dödö Yesu nirasoinia, andrö wa ”iʼohe niha andrö” ba nahia si lö niha. Ba daʼö ifadöhö ia Yesu. Tatu manö, tebai tafalua dandra sahöli-höli dödö, hizaʼi moguna taʼangeragö zoguna hegöi nirasoi ndra talifusöda ba taforomaʼö khöra waʼasökhi dödö. Isura sinenge sotöi Faulo, ”Yafaoma taʼameʼegö tödö nawöda ba wamarou tödö ba waʼomasi hegöi ba mbua-bua si sökhi.” (Heberaiʼo 10:24) Aboto ba dödö Yesu nirasoi ndra matua safiso andrö, ba iforomaʼö waʼasökhi dödö. No duma-duma si sökhi daʼö khöda!

8, 9. Hewisa wangoromaʼöda wa taʼameʼegö tödö dalifusöda si no alawa döfi hegöi niha si cacat? (Beʼe duma-duma.)

⁸ Osinangegö nirasoi niha si no alawa döfi hegöi niha si cacat. Ba mbanua niha Keriso, bua-bua sabölö moguna yaʼia daʼö faʼomasi, tenga faʼamofozu ba wamalua hadia ia ba zi ha sabata. (Yohane 13:34, 35) Faʼomasi zanolo yaʼita ba wamalua hadia zi tola tafalua ba wanolo ira talifusöda si no alawa döfi mazui si cacat enaʼö tola möi ira ba gangowuloa mazui manuriaigö. Tatolo ira hewaʼae lö aoha khöda wamalua daʼö mazui lö oya zi tola tafalua. (Mataiʼo 13:23) Michael, sangogunaʼö gurusi roda, iʼandrö saohagölö börö wanolo nitemania moroi ba nösi nomonia hegöi ira talifusöda ba mbanua niha Keriso. Imane, ”Börö wanolo nibeʼera, tola uʼondrasi gangowuloa ba asese ulau manuriaigö. Omasido sibai manuriaigö ba nahia sato niha.”

⁹ Ba zi hauga omo Mbetieli, so ndra talifusöda si no alawa döfi mazui si cacat si lö faröi. Pengawas safönu faʼomasi iʼalui lala enaʼö tola fao manuriaigö ndra talifusöda andre, laʼogunaʼö zura hegöi telefo. Bill, si no 86 fakhe, isura zura ba niha si so ba mbanua saröu. Imane, ”Maʼandrö sibai saohagölö me tola fao ndraʼaga ba wanura sura.” Imane Nancy si no arakhagö 90 fakhe, ”Lö ba wangera-ngeragu wa usura zura andre ha si tobali ösi amplop. Daʼa halöwö fanuriaigö. Moguna laʼila niha hadia zindruhu!” Imane Ethel si tumbu ba ndröfi 1921, ”Afönu fökhö waʼaurigu. Ba wamasa nukhagu manö, itaria abua khögu.” Hewaʼae simanö, omuso dödönia wamalua fanuriaigö ba telefo, ba so ösa nifuli nifalukhaisinia sadöni tödö. Itutunö Barbara si no 85 fakhe, ”Börö me mofökhö-fökhö ndraʼodo, tebai asese möido manuriaigö. Hizaʼi, tola uʼogunaʼö telefo ba wamalua fanuriaigö. Saohagölö Yehowa!” Barö zi döfi, sambua ngawawa ndra talifusöda si no alawa döfi, laʼogunaʼö 1.228 za ba wanuriaigö, lasura 6.265 zura, töra 2.000 kali fahuhuo ira ba niha laʼogunaʼö telefo, ba so 6.315 publikasi nibeʼera! Faduhu dödöda wa omuso dödö Yehowa ba nifaluara andre!​—Gamaedola 27:11.

10. Hadia lala nifaluada ba wanolo ira talifusöda enaʼö latema mbua ba wangondrasi angowuloa?

¹⁰ Osinangegö nirasoi niha ba ginötö möi ba gangowuloa. Na taʼosinangegö nirasoi ndra talifusöda, tatolo ira enaʼö lasöndra mbua ba wangondrasi angowuloa. Sambua lala si tola tafalua yaʼia daʼö tafaudugö ginötö waʼatohareda irege lö mangoloi wangera-ngerara. Itaria so zalua si lö tadöna-döna irege alawa luo ita. Hizaʼi, na asese alua daʼö, moguna taʼangeragö hadia lua-luania khö ndra talifusöda ba hadia nifaluada ba wangoromaʼö wa taʼameʼegö tödö ira. Törö tödömö wa sogaoni yaʼita ba gangowuloa yaʼia daʼö Yehowa ba Ononia. (Mataiʼo 18:20) Taforomaʼö wa tafosumange ira na tefaudu ginötö waʼatohareda!

11. Hana wa ira talifusöda ba gangowuloa moguna laʼoʼö wanuturu lala ba 1 Korindro 14:40?

¹¹ Na taʼosinangegö nirasoi ndra talifusöda, no taʼoʼö mene-mene Zura Niʼamoniʼö, ”Fefu hadia ia enaʼö oi sökhi ba toföfö.” (1 Korindro 14:40) Ira talifusöda ira matua sangai halöwö ba gangowuloa, laʼoʼö wanuturu lala andrö na tefaudu wangogunaʼöra inötö. Na lafalua daʼö, no laʼosinangegö dalifusöda si fahuhuo tanö böʼö hegöi ira talifusöda sangondrasi. Angeragö lua-luania na töra ginötö niʼogunaʼö ba gangowuloa. So ösa ndra talifusöda, fandröndröu lala nitöröra ba wangawuli. So göi zanörö bus mazui kereta api. Ba so göi ösa nibalo-baloi woʼomonia si tenga si sara lala wamati ba nomo.

12. Hana wa moguna tafosumange ba taʼomasiʼö ndra satua sokubaloi? (Faigi kotak ”Osinangegö Nirasoi Niha Sondröniaʼö”.)

¹² Laforege wohalöwö ira satua sokubaloi ba mbanua niha Keriso hegöi ba wanuriaigö. Andrö wa moguna tafosumange ba taʼomasiʼö ira. (Baso 1 Tesalonika 5:12, 13.) Tatu öʼandrö sibai saohagölö ba nifaluara salahimö. Tola öforomaʼö daʼö na öʼoʼö ba ötuhini ira, börö ”me yaʼira zondrorogö noso[mö] me khöra tezofu-zofu dania”.​—Heberaiʼo 13:7, 17.

OSINANGEGÖ NIRASOI NIHA BA GINÖTÖ MANURIAIGÖ

13. Hadia wamahaʼö nihalöda ba lala nifalua Yesu ba niha?

¹³ Imane Yesaya me ifaʼeleʼö sanandrösa khö Yesu, ”Sukhu si no mufatöʼö, ba lö ifalua ifatö, ba fandru sanimbonimbo, ba lö ifalua ibunu.” (Yesaya 42:3) Börö me iʼomasiʼö niha, andrö wa irasoi Yesu hadia nirasoira. Iʼila hadia nirasoi niha safatö tödö ba si tebai, simane ”sukhu si no mufatöʼö” mazui ”fandru sanimbo-nimbo”. Iforomaʼö khöra waʼasökhi dödö ba faʼebolo dödö. Omasi göi ndraono fahuwu khö Yesu. (Mareko 10:14) Tatu manö, lala nifaluada ba wamahaʼö mazui ba wangokhögö faʼaboto ba dödö, tenga simane Yesu! Hizaʼi, ba lagu wahuhuosada, hawaʼara tafalua ia, hegöi hawaʼoya ginötö niʼogunaʼöda, tola taforomaʼö wa taʼosinangegö nirasoi niha nifalukhaisida.

14. Hana wa moguna taʼangeragö lagu wahuhuosada ba niha?

¹⁴ Hewisa zinangeania lagu wahuhuosada? Zuta niha iadaʼa, ’lafakao ba latiboʼö’ ira kafalo wohalöwö, sondröniaʼö politik hegöi sondröniaʼö agama si lö sökhi ba safaito. (Mataiʼo 9:36) Lua-luania, ato zi lö mamaduhusi tödö niha böʼö ba lö laʼokhögö wanötöna. Daʼö mbörö wa moguna taʼogunaʼö wehede hegöi lagu wahuhuosa sangoromaʼö wa si sökhi tödö ita ba taʼameʼegö tödö ira! Ato niha somasi mamondrongo turia nifaʼemada tenga ha börö me tahaogö wangogunaʼö Zura Niʼamoniʼö, hizaʼi börö me taforomaʼö wa taʼameʼegö tödö ba tafosumange ira.

15. Hadia manö lala si tola tafalua ba wangosinangegö niha ba mbanuada?

¹⁵ Oya lala si tola tafalua ba wangosinangegö nirasoi niha ba mbanuada. Moguna tabeʼe khöra wanofu si fao faʼasökhi dödö ba famosumange. Samösa perintis sangai halöwö ba mbanua sato niha salawö-lawö, lö iʼogunaʼö wanofu si möi fangailasi yaʼira na lö laʼila wanema linia. Lö isofu, ”Hadia öʼila döi Lowalangi?” mazui ”Öʼila hadia Wamatörö Lowalangi?” Hizaʼi imane, ”No ufahaʼödo ba Zura Niʼamoniʼö wa so döi Lowalangi. Hadia tola uforomaʼö khömö?” Daʼa tenga lala si lö tola löʼö mufalua, börö me faböʼö-böʼö niha nifalukhaisida hegöi si toʼölö lafalua. Hewaʼae simanö, moguna böi mamalö tafosumange ba taforomaʼö waʼasökhi dödö ba niha si so ba mbanuada. Ba wamalua daʼö, moguna taʼila haniha ira.

16, 17. Hewisa wangoromaʼöda waʼasökhi dödö ba ginötö tatatugöi (a) hawaʼara taʼondrasi niha? (b) hawaʼoya ginötö niʼogunaʼöda ba wahuhuosa khöra?

¹⁶ Hawaʼara zinangeania taʼondrasi niha? Na manuriaigö ita ba nomo omo, lö laʼila niha wa tohare ita börö me lö nikaonira. Andrö wa moguna sibai taʼondrasi ira ba ginötö si tefaudu, irege omasi ira fahuhuo. (Mataiʼo 7:12) Duma-dumania, ero hari satu mazui migu, hadia alawa luo maoso niha si so ba mbanuamö? Na simane daʼö, tola öbörögö wamalua fanuriaigö ba lala, ba nahia sato niha, mazui öfuli öfalukhaisi niha niʼilamö somasi fahuhuo.

¹⁷ Hawaʼoya zinangeania ginötö niʼogunaʼöda? Ato niha soya halöwö, andrö wa böi talafo ara ginötö niʼogunaʼöda, mendrua manö na awena falukha. Abölö sökhi na alio taʼasiwai wahuhuosa moroi na taradö-radö. (1 Korindro 9:20-23) Na laʼila niha wa aboto ba dödöda waʼoya halöwöra, tola manö omasi ira fahuhuo khöda na ifuli tafalukhaisi ira. Na taforomaʼö mbua-bua moroi ba geheha Lowalangi, no tobali ita ’si falulu fohalöwö khö Lowalangi’. Tola manö iʼogunaʼö ita Yehowa ba wanolo zi samösa niha enaʼö iʼila zindruhu!​—1 Korindro 3:6, 7, 9.

18. Na taʼosinangegö nirasoi niha böʼö, hadia howu-howu nitötönada?

¹⁸ Andrö, datafalua fefu zi tola tafalua ba wangosinangegö nirasoi nösi nomoda, ira talifusöda hegöi niha nifalukhaisida ba wanuriaigö. Na tafalua daʼö, oya howu-howu nitemada iadaʼa hegöi ba zi so miföna. Imane Zinunö 41:2, 3, ”Yaʼahowu zi so ba dödö niha si numana! Na baŵa wamakao, ba iʼorifi ia Yehowa. Irorogö ia Yehowa ba iʼanauʼö nosonia; ohahau dödönia ba danö.”