Hadia No Sinangea Fao Agama ba Politik?

Ba zi sagörö ulidanö, ato niha sangotöigö wa ya’ira andrö solo’ö khö Yesu Keriso ba fao ira ba ngawalö zo’amakhaita ba politik. So zotuhini si sambua partai mazui niha si fao ba da’ö. Lafalua ia ena’ö tehöngö agamara mazui amakhoita nifazökhira sanandrösa ba gamuata, ba ena’ö fatema da’ö ba dödö niha sato. Börö da’ö, niha si fao ba politik, asese latutunö gabula dödö sanandrösa ba gamuata mazui sosial ena’ö fa’awö khöra niha si faduhu tödö khö lowalangi. Baero da’ö, ira sondrönia’ö ba agama, laforege sibai ena’ö so dadaomara ba politik. Ba soi bö’ö, sambua ngawawa agama niha Keriso tola tobali da’ö agama ba zi sambua soi.

Hewisa molo’ö ya’ugö? Hadia sinangea na fao zolo’ö khö Yesu ba politik? Tola ö’ila wanema linia moroi ba duma-duma nibe’e Yesu. Imane Yesu, ”No ubeʼe khömi duma-duma enaʼö mifalua göi zi no ufalua khömi.” (Yohane 13:15) Hadia duma-duma nibe’e Yesu?

Hadia fao Yesu ba politik?

Lö’ö. Me so Yesu ba gulidanö, lö irai fao ia ba ngawalö zo’amakhaita ba politik si so ba gulidanö andre.

Lö omasi Yesu itema dadaoma ba politik. No irai iforege Afökha Satana ba wombali’ö Yesu tobali samatörö ba gulidanö. Iwa’ö wa tebe’e khö Yesu ”fefu wamatörö ba gulidanö”. Hiza’i itimbagö da’ö Yesu. (Matai’o 4:8-10)a No göi irai lafaso Yesu wefao ba politik. Me luo da’ö, ato niha sanguma’ö wa Yesu andrö tola tobali samatörö si sökhi. Hiza’i imane Sura Ni’amoni’ö, ”Börö me i’ila Yesu wa lafaso ia tobali razo, andrö mofanö ia zui ba hili, ha ya’ia.” (Yohane 6:15) Lö i’o’ö Yesu hadia ni’andrö niha sato. Lö omasi ia fa’awö ba politik.

Lö fa’awö dambai Yesu ba politik. Duma-dumania, me ba götö Yesu lö omasi niha Yahudi wamu’a pajak khö ndra samatörö Romawi. Lamane tödöra wa lö atulö ba no tobali noro dödö. So ösa niha Yahudi samorege khö Yesu ena’ö i’o’awögö ira. Hiza’i, lö ibe’e mbua gera-erania Yesu sanandrösa hadia atulö mazui lö’ö na labua pajak. Imane khöra Yesu, ”Mibe’e khö Kaisaro tana khö Kaisaro, ba khö Lowalangi tana khö Lowalangi.” (Mareko 12:13-17) Lö fa’awö dambai Yesu ba ngawalö zo’amakhaita ba politik. Hiza’i, iwa’ö wa no sinangea mubu’a pajak ni’andrö ndra samatörö Romawi. Hewa’ae simanö, tenga da’ö geluahania wa moguna khö zi samösa niha ba wolo’ö fefu ni’andrö ndra samatörö. Itutunö göi Yesu wa so zinangea mube’e si tobali tana khö Lowalangi. Na i’andrö samatörö hadia zinangea itema Lowalangi, duma-dumania simane fa’alöfaröi hegöi famosumange, tebai i’o’ö da’ö si samösa niha.—Matai’o 4:10; 22:37, 38.

Ituhini wamatörö si so ba zorugo Yesu ya’ia da’ö Famatörö Lowalangi. Ifaha’ö göi niha bö’ö sanandrösa ba Wamatörö Lowalangi. (Luka 4:43) Aboto göi ba dödö Yesu wa lö mofozu wamatörö niha gulidanö ba wamalua ohitö dödö Lowalangi. Ha Famatörö Lowalangi zi tola mamalua da’ö. (Matai’o 6:10) Aboto ba dödö Yesu wa Famatörö Lowalangi andrö lö i’oguna’ö wamatörö niha gulidanö ba wamalua ohitö dödönia. Hiza’i, Famatörö andrö dania zogati famatörö niha gulidanö. Da’ö mbörö wa lö fao Yesu ba ngawalö zo’amakhaita ba politik.—Danieli 2:44.

Hadia fao niha Keriso me götö siföföna ba ngawalö zo’amakhaita ba politik?

Lö’ö. Imane Yesu khö ndra solo’ö khönia wa tenga ’moroi ba gulidanö ira’. (Yohane 15:19) Ira solo’ö khö Yesu me götö siföföna la’o’ö fareta da’ö. La’o’ö duma-duma nibe’e Yesu ba lö omasi ira farahu ba ngawalö zo’amakhaita ba politik si so ba gulidanö andre. (Yohane 17:16; 18:36) Hiza’i, lafalua halöwö nibe’e Yesu khöra ya’ia da’ö ba wanuriaigö Famatörö Lowalangi ba lafaha’ö niha bö’ö sanandrösa ba Wamatörö andrö.—Matai’o 28:18-20; Halöwö Zinenge 10:42.

Niha Keriso me götö siföföna, abölö la’ofönai’ö wolo’ö khö Lowalangi. Hiza’i, aboto göi ba dödöra wa lö tola lö’ö lafosumange göi ndra samatörö. (Halöwö Zinenge 5:29; 1 Fetero 2:13, 17) La’o’ö huku ba labu’a pajak. (Roma 13:1, 7) Hewa’ae na lö fao ira ba politik, hiza’i la’oguna’ö fefu nihenaigö ndra samatörö. Duma-dumania, laforege ena’ö ilumö’ö ira huku ba la’oguna’ö ngawalö zi sökhi nibe’e ndra samatörö.—Halöwö Zinenge 25:10, 11; Filifi 1:7.

Hadia niwa’ö niha sogonekhe ba sejarah sanandrösa ba lala wangera-ngera niha Keriso me götö siföföna ba politik?

”Lö fefu la’o’ö nifakhoi zamatörö Romawi ira niha Keriso. . . . Lö omasi ira na so halöwöra so’amakhaita ba politik.”—On the Road to Civilization—A World History, nga’örö 238.
”Lö hadöi dandra sangoroma’ö wa omasi Yesu dadaoma ba politik mazui militer, ba . . . simane da’ö göi lala wangera-ngera ndra nifaha’önia.”—Jesus and Judaism, nga’örö 231.
”Ba niha Keriso, tefasafi agama moroi ba politik, ba abölö tohude da’ö moroi ba politik. Abölö i’ofönai’ö wa’alöfaröinia khö Keriso moroi khö Kaisaro.”—Caesar and Christ, nga’örö 647.
”I’oguna’ö zi tola ifalua [sinenge] sotöi Faulo me ya’ia niha Romawi ena’ö tola ilumö’ö ia huku. Hiza’i, so gamakhoita politik si lö omasi i’o’ö Faulo ba lö göi idönisi dödö niha bö’ö ba wamalua da’ö. . . . Aboto ba dödö niha Keriso me götö siföföna wa moguna lafosumange ndra samatörö. Hiza’i, la’ila göi wa tebai fao ira ba ngawalö zo’amakhaita ba politik.”—Beyond Good Intentions—A Biblical View of Politics, nga’örö 122-123.
”Ato niha Keriso si faduhu tödö wa tebai la’okhögö dadaoma ba politik . . . Ba wamobörö abad si tölu imane Hipolitus, ’Na so samösa niha somasi tobali niha Keriso, lö tola lö’ö iheta ia moroi ba dadaoma politik’.”—A History of Christianity, Volume I, nga’örö 253.

Lö fa’awö dambai niha Keriso ba politik iada’a

No itutunö Sura Ni’amoni’ö wa Yesu hegöi niha Keriso me götö siföföna lö latuhini ngawalö zo’amakhaita ba politik. Börö da’ö, ira Samaduhu’ö Yehowa ba zi sagörö ulidanö, lö fa’awö dambai ira ba politik. Simane niha Keriso me götö siföföna, lafalua halöwö nibe’e Yesu khöra, ya’ia da’ö ba wanuriaigö ’turia somuso dödö sanandrösa ba Wamatörö Lowalangi’.—Matai’o 24:14.

a Lö irai iwa’ö Yesu wa tenga sinangea ibe’e khönia wamatörö andrö Satana. Ba gafuriata, ifotöi Zatana andrö ’samatörö ulidanö’.—Yohane 14:30