Hana Wa Möi Ndra Samaduhu’ö Yehowa ba Niha si So Agama?

Börö me ato niha sangokhögö agama, omasi ira fahuhuo sanandrösa ba nösi Zura Niamoniʼö. Maʼila wa dozi niha sinangea na latatugöi samösa agamara, ba mafusumange gangetulara andrö, ba lö mafaso niha böʼö ba wanemaʼö turia niʼohema.

Ba ginötö matutunö sanandrösa ba agama, maforege ba woloʼö mene-mene Zura Niʼamoniʼö, yaʼia daʼö ’mahaogö wameʼe fanema li si fao sumange’ ba ginötö mafatunö ia ba niha böʼö. (1 Fetero 3:15) Maʼila sa wa so niha si lö omasi ba duria niʼohema. (Mataiʼo 10:14) Hizaʼi, lö maʼila hewisa dödö niha na lö si fahuhuo ndraʼaga khöra. Maʼila göi wa tola manö tebulö zalua ba zi samösa-mösa niha.

Duma-dumania, tola manö so niha sawena mafalukhaisi oya sibai halöwönia, hizaʼi ba ginötö tanö böʼö omasi ia fahuhuo. So göi niha sawena göna abula dödö mazui salua tanö böʼö sinangea iʼasiwai, irege terou dödönia wamondrongo turia moroi ba Zura Niʼamoniʼö. Andrö, wa maforege fahuhuo ba niha tenga ha sakali.