Hadia So Sambua Niʼofulu khö Ndra Samaduhuʼö Yehowa?

Lö hadöi sambua niʼofulu niʼandrö khö ndra Samaduhuʼö Yehowa. Fefu lala halöwöma tefalua moroi ba dolo-tolo si no aoha gölö fameʼe. Lö irai latötöi döi zameʼe tolo-tolo. Hadia sindruhunia zi sambua niʼofulu andrö, ba hana wa lö hadöi khö ndra Samaduhuʼö Yehowa?

Oroisa ba wameʼe si sambua niʼofulu moroi ba gokhöta zi samösa niha no tesura ba Goroisa Moze nifatunö ba ndraono Gizaraʼeli. Hizaʼi, no ifatunö ba Zura Niʼamoniʼö wa Oroisa Moze​—simane ”ba wangowuloi si sambua niʼofulu”​—lö saʼae lafalua daʼö ira niha Keriso.​—Heberaiʼo 7:​5, 18; Kolose 2:​13, 14.

Andrö wa si sambua niʼofulu mazui ameʼela lö lafalua ira Samaduhuʼö Yehowa. Hizaʼi, maʼoʼö zi dua ngawalö nifalua niha Keriso siföföna ba wotuhini halöwö ba wamati, lö maʼandrö gefe na mafalua halöwö daʼö, ba mabeʼe dolo-tolo si no aoha gölö fameʼe.

Daʼa zangoromaʼö wa maʼoʼö fanuturu lala si so ba Zura Niʼamoniʼö, ”Dozi niha enaʼö labeʼe balazi dödöra zamösana, böi abua gölö ba tenga nifaso, sameʼe si fao faʼomuso dödö, daʼö sa zomasi Lowalangi.”​—2 Korindro 9:7.