Efeso
1 Faulo, sinenge Keriso Yesu ba gohitö dödö Lowalangi zanura sura daʼa ba niha niʼamoniʼö ba Nefeso, si lö faröi ba si ha sambua ba khö Keriso Yesu.
2 Yamitema waʼasökhi dödö sebua ba faʼohahau dödö moroi khö Lowalangi, Amada, ba moroi khö Zoʼaya yaʼita Yesu Keriso.
3 Nisuno Lowalangi, Ama moroi khö Zoʼaya yaʼita Yesu Keriso, sameʼe khöda howu-howu wamati ba zorugo, börö me ha sambua ita ba khö Keriso. 4 Fatua lö tumbu ngaʼötö niha ba gulidanö, no ifili ita Lowalangi enaʼö ha sambua ita ba khö Keriso, irege taforomaʼö waʼomasi, teʼamoniʼö ita, ba lö mosinegu fönania. 5 Iʼotarai ba wamobörö, no ihonogöi enaʼö tobali ita ononia ba khö Yesu Keriso, moloʼö ohitö dödönia ba somasi ia, 6 enaʼö tesuno ia börö waʼasökhi dödönia sebua ba solakhömi, niforomaʼönia ba khö Nono niʼomasiʼönia andrö. 7 Tasöndra wangefa börö waʼafahöna waʼasökhi dödönia sebua me ihöli ita ba ndro Nononia. Teʼefaʼö göi golalöwada.
8 Ihöna wameʼe khöda faʼatua-tua ba faʼaboto ba dödö börö waʼasökhi dödönia sebua andrö, 9 ba iʼombakhaʼö khöda zi tobini niʼamoniʼö andrö ba gohitö dödönia. Moloʼö somasi ia, no ihonogöi 10 sambua wamaʼanö, yaʼia daʼö ba wangowuloi fefu khö Keriso he si so ba zorugo hegöi si so ba gulidanö, na no irugi inötö si no ihonogöi andrö. Fefu dania teʼosambuaʼö ba khö Keriso. 11 Ha sambua ndraʼaga ba khö Keriso, ba no ituyu ndraʼaga tobali sanema ondröita si fao khönia. Iʼotarai ba wamobörö, no ifili ndraʼaga Lowalangi, samalua fefu hadia ia ba zomasi dödönia, 12 enaʼö ba khöma, yaʼaga si oföna manötöna khö Keriso, tola tesuno ba tefolakhömi Lowalangi. 13 Hizaʼi, manötöna ami khö Keriso me no mirongo daromali sindruhu, yaʼia daʼö turia somuso dödö sanandrösa ba wangorifi yaʼami. Me no faduhu dödömi, iʼogunaʼö ia Lowalangi ba wamotandro yaʼami faoma eheha niʼamoniʼö si no ifabuʼu, 14 si tobali weʼe-weʼe dödö* wa yaʼita zanema ondröita. Wa ifalua daʼö Lowalangi enaʼö teʼefaʼö nono mbanuania börö höli irege tesuno ba tefolakhömi ia.
15 Börö daʼö, iʼotarai me urongo wamatimi ba khö Zoʼaya Yesu ba faʼomasimi ba niha niʼamoniʼö, 16 lö uböhöli wangandrö saohagölö börö ami. Lö ubato wolohe yaʼami ba wangandrö 17 enaʼö Ama solakhömi, Lowalangi moroi khö Zoʼaya yaʼita Yesu Keriso, ibeʼe khömi waʼatua-tua ba miʼila zi no ifaʼeleʼö, irege miʼokhögö waʼaboto ba dödö si tefaudu sanandrösa khönia. 18 No ihagaini hörö dödömi irege miʼila hewisa sibai wanötöna nibeʼenia khömi, hawaʼamolakhömi harato si tobali ondröita ba niha niʼamoniʼö, 19 ba hawaʼebua kuasonia ba khöda yaʼita niha samati. Oroma waʼabölönia 20 me isusugi Keriso moroi ba gotalua zi mate ba ifedadao ba gambölönia ba zorugo, 21 ba dadaoma sabölö alawa moroi khö ndra samatörö, sebua kuaso, si so faʼabölö, sondröniaʼö, ba yawa zi so töi fefu, tenga ha ba götö* daʼa, hizaʼi ba götö si so miföna. 22 Ba no ibeʼe fefu barö wamatörönia Lowalangi ba tobali ia högö ba ngawalö hadia ia zoʼamakhaita ba mbanua niha Keriso. 23 Botonia mbanua niha Keriso andrö si no moʼahonoa ba khönia. Yaʼia zamoʼahonoa fefu hadia ia.