Ufahaʼö ndraʼo ba wamosumange ira alawe hegöi botogu samösa

SI NO NUMALÖ:

Tumbu ndraʼo ba Mulhouse ba timur laut Prancis. Toröido ba mbanua si numana ba no tehöngö mbanuama ba waʼamuʼi. Me ide-ide ndraʼodo asese uʼila ba mbanua niha si faʼudu-udu ba zi sambua omo. Ba zi sambua omoma, asese lö laʼameʼegö tödö ba lö toʼölö laʼandrö mbua gera-era ndra alawe. Lafahaʼö ndraʼo wa ira alawe andrö ha sohalöwö ba naha nawu, mondrorogö ira matua hegöi iraono.

Afeto waʼaurigu me iraono. Me fulu fakhe ndraʼo, mate bapagu börö me asese ibadu duo. Lima fakhe aefa daʼö, ibunu samösa ia gaʼagu ono matua. Ba ndröfi daʼö göi uʼila hörögu samösa me alua wabunusa ba nösi nomoma börö waʼudusa. Sindruhu-ndruhu tokea ndraʼo. Lafahaʼö ndraʼo ösi nomoma ba wangogunaʼö rosö, fana, hegöi ba waʼudusa. Afökhö högögu, ubörögö wamake tato ba ulau mamadu tuo.

Me 16 fakhe, ubadu 10 irugi 15 boto-boto bir ero maʼökhö, ba lö ara aefa daʼö ufake narkoba. Ba wamuʼa daʼö fefu, uʼamawa ziʼöli si no atua ba ulau managö. Me 17 fakhe, no irai labeʼedo ba gurunga. Lahuku ndraʼo 18 kali börö wanagö ba faʼudusa ba niha.

Me arakhagö 20 fakhe, itugu lö sökhi waʼaurigu. Ba zi sahari ubadu 20 ganja nitandraölö, ufake heroin, ba dalu-dalu tanö böʼö nitegu ndra famareta. No haʼuga kali arakhagö matedo börö me talafo oya ubadu. Ubörötaigö mamawa narkoba, ba uʼohe-ohe rosö hegöi fana. No irai ufana samösa ndra matua, harazaki wa ba högö mböbö löwinia göna! Me 24 fakhe ndraʼo, mate ninagu ba itugu amuʼi ndraʼo. Na laʼila ndraʼo niha ba ataʼu ira lalau mofanö. Ba börö me asese faʼudu ndraʼo, itaria hari satu ba hari migu laʼohe ndraʼo ba kantor polisi mazui ba ruma saki ba wanagu sokho ba nösigu.

Me 28 fakhe ndröfigu, ulau mangowalu. Hizaʼi amuʼi ndraʼo khö woʼomogu. Asese ulele ba ubözi ia, ba lö irai falulu fohalöwö ndraʼaga. Uwalingagö ibönö na no ubeʼe khönia gama-gama nitagö. Aefa daʼö, so zalua si lö mudöna-döna. Ibörögö ifahaʼö ia foʼomogu ba Zura Niʼamoniʼö khö ndra Samaduhuʼö Yehowa. Me no aefa wamahaʼönia si föföna, ibato woroko, lö itema saʼe gefe nitagö, ba ifuli gama-gama nibeʼegu khönia. Mofönu sibai ndraʼo khönia. Ufakao-kao ia na ifahaʼö ia ba Zura Niʼamoniʼö ba uwuwusi zimbo rokogu ba mbawania. Uʼoʼaya-aya ia föna niha sato.

Samuza inötö me mabu ndraʼo ba zi bongi, utunu nomoma. Iheta ndraʼo foʼomogu hegöi onogu si ide-ide si lima fakhe moroi ba galitö. Me no döhö waʼamabugu maniasa sibai ndraʼo. Umane tödögu lö tola iʼefaʼö horögu Lowalangi. Lö olifudo me fahuhuo samösa wandrita imane, niha si lö sökhi möi ba narako. Imane göi khögu dokter jiwa, ”Lö fanötöna khöu saʼae! Lö teʼefaʼö horöu.”

HEWISA ZURA NIʼAMONIʼÖ WOMBULÖʼÖ FAʼAURIGU:

Me no akhozi nomoma, toröiga ba nomo ninagu matuagu. Me möi ndra Samaduhuʼö Yehowa ba wamalukhaisi foʼomogu, usofu khöra, ”Hadia tola iʼefaʼö horögu Lowalangi?” Labaso khögu I Korindro 6:9-11 moroi ba Zura Niʼamoniʼö. Ba ayati daʼa idunö-dunö gamuata sogoro Lowalangi. Ba ayati daʼö göi iwaʼö, ”Ba no simanö ösa ami föna.” Moroi ba ayati daʼa faduhu dödögu wa tola ubulöʼö gamuatagu. Aefa daʼö, labokai khögu I Yohane 4:8 ba lafaduhuʼö wa iʼomasiʼö ndraʼo Lowalangi. Börö me terara dödögu, uʼandrö khö ndra Samaduhuʼö Yehowa enaʼö lafahaʼö ndraʼo ba Zura Niʼamoniʼö dua kali samigu. Ubörögö weʼamöi ba gangowuloa niha Keriso khöra, ba lö ubato wangandrö khö Yehowa.

Me no aefa sara waŵa, uhalö gangetula ubato wamake narkoba ba uböhöli wamadu tuo. Hizaʼi, urasoi so zi faʼudu ba mbotogu! Asese uʼangifigö zi lö sökhi, afökhö högögu, agakandro nösigu, ba oya danö böʼö nirasoigu me no ubato wamalua daʼö. Hizaʼi, urasoi wa igogohe dangagu Yehowa ba wangabölöʼö yaʼo. Urasoi simane Faulo me itema wanolo moroi khö Lowalangi. Imane Faulo, ”Ulawa manö fefu, börö zangaʼabölö yaʼo andrö.” (Filifi 4:13) Ba gafuriata tola uböhöli woroko.​—II Korindro 7:1.

Sura Niʼamoniʼö zangaʼazökhi faʼaurigu hegöi ösi nomogu. Tebulö gamuatagu khö woʼomogu. Ibörögö uʼosinangegö ia ba na so niwaʼögu asese uwaʼö wehede ”tolo” ba ”saohagölö”. Ibörögö göi tobali ndraʼo satua si sökhi khö nonoma alawe. Me no irugi döfi ufahaʼö ndraʼo ba Zura Niʼamoniʼö, fawuʼu li ndraʼo khö Yehowa ba tebayagö idanö simane nifalua woʼomogu.

HOWU-HOWU NITEMAGU:

Faduhu dödögu wa goi-goi Zura Niʼamoniʼö zangefaʼö yaʼo. Talifusöma si tenga Samaduhuʼö Yehowa lamane te no mate ndraʼo börö wamake narkoba mazui börö waʼudusa.

Tebulö fefu waʼaurima yaʼaga si sambua omo. Famahaʼö Zura Niʼamoniʼö zanolo yaʼo ba wamalua foʼömögu tobali satua ba foʼomo si sökhi. (Efeso 5:25; 6:4) Ibörögö fao ndraʼaga ba wamalua halöwö. Iadaʼa, lö ufaso woʼomogu ba naha nawu. Hizaʼi, omuso dödögu ba watuhini foʼomogu me ihalö halöwö fanuriaigö safönu inötö. Fao göi dödönia khögu me no tobali ndraʼo satua sokubaloi ba mbanua niha Keriso.

Faʼomasi ba faʼahakhö dödö Yehowa daʼö zombulöʼö faʼaurigu. Omasi ndraʼo udunö-dunö gamuatania ba niha si lö fanötöna, simane famaigi niha faʼaurigu mböröta. Aboto ba dödögu wa Sura Niʼamoniʼö tola tobali fanolo gofu haniha ia ba wangokhögö faʼauri si sökhi si so tötönafö. Ifahaʼö ndraʼo Sura Niʼamoniʼö ba wangomasiʼö hegöi ba wangosinangegö niha böʼö, ira matua ba ira alawe, hegöi botogu samösa.