Faʼanö Ndraʼugö ba Wanaögö Ngaluo Yehowa

1. Hadia zinangea tafalua enaʼö tola teʼorifi ita ba ngaluo Yehowa?

BA ZURA Niʼamoniʼö, ”ngaluo Yehowa” andrö eluahania inötö khö Yehowa ba wanguhuku udunia ba iʼefaʼö nono mbanuania. Ba götö föna, no hauga kali ifalua wanguhukunia Yehowa. (Yes. 13:1, 6; Hez. 13:5; Zef. 1:8) Ba götöda iadaʼa, tebörögö ”ngaluo Yehowa” ba ginötö muhori Mbabilona Sebua, ba teʼasiwai ia ba wasuwöta Hamagedo. Enaʼö tola teʼorifi ita, moguna tafaʼanö ita iʼotarai iadaʼa. Ifahaʼö ita Yesu wa tenga ha asala tafaʼanö ita ba wanaögö ’famakao sabölö-bölö’, hizaʼi moguna böi tebulö tefaʼanö ita.—Mat. 24:21; Luk. 12:40.

2. Hadia mbua si tola tatema ba 1 Tesalonika?

² Ba zurania si oföna ba niha Desalonika, itutunö ösa Faulo gamaedola si möi fanolo ba niha Keriso enaʼö lö tebulö tefaʼanö ira ba wanaögö ngaluo wanguhuku khö Yehowa. Aboto ba dödö Waulo wa tenga ba ginötö daʼö tohare ngaluo Yehowa andrö. (2 Te. 2:1-3) Hizaʼi, lö tebulö iʼamenesi ndra talifusönia Faulo enaʼö lafaʼanö ira, hulö na iʼanemaiʼö tohare ngaluo daʼö. Tola göi taʼoʼö mene-mene daʼö. Datatutunö hadia niwaʼö Waulo sanandrösa: (1) hewisa waʼatohare ngaluo Yehowa, (2) haniha zi lö teʼorifi ba ngaluo daʼö, ba (3) hewisa wamaʼanöda yaʼita enaʼö tola teʼorifi.

HEWISA DANIA WAʼATOHARE NGALUO YEHOWA?

3. Hadia geluaha waʼatohare ngaluo Yehowa andrö simane feʼaso zanagö ba zi bongi? (Faigi göi gambara.)

³ ”Hulö weʼaso zanagö ba zi bongi.” (1 Te. 5:2) Daʼa zi oföna moroi ba zi tölu gamaedola niʼogunaʼö Waulo ba woʼamaedolagö faʼatohare ngaluo Yehowa. Si toʼölönia, alio sibai zanagö, ba asese mufalua daʼö ba zi bongi ba ginötö si lö mudöna-döna. Simanö göi, tohare ngaluo Yehowa ba zi lö mudöna-döna irege ato niha zi tokea. Tola manö tokea niha Keriso sindruhu me laʼila wa alio sibai waʼalua zi no mufaʼeleʼö andrö. Ba gafuriata, tehori niha si lö sökhi, hizaʼi teʼorifi ita.

4. Hana wa tola mufagölösi ngaluo Yehowa andrö simane faʼafökhö nirasoi ndra alawe sanabina si lö ara tö moʼono?

⁴ ”Hulö waʼafökhö nirasoi ndra alawe sanabina si lö ara tö moʼono.” (1 Te. 5:3) Ira alawe sanabina, lö iʼila sibai hawaʼara moʼono ia. Hizaʼi faduhu dödönia wa hasambalö iʼadonogö nononia andrö. Ba tola manö alua ia ba zi lö mudöna-döna, afökhö sibai, ba tebai mubatogö. Simane daʼö göi, lö aboto sibai ba dödöda hawaʼara tebörögö ngaluo Yehowa andrö. Hizaʼi, faduhu dödöda wa hasambalö tohare daʼö. Hasambalö ifalua wanguhukunia Yehowa ba zi lö mudöna-döna, ba tebai teʼefaʼö niha si lö sökhi.

5. Hana wa tola mufagölösi wamakao sabölö-bölö andrö simane na ibörögö moluo?

⁵ Simane na ibörögö moluo. Ba gamaedola si tölu niʼogunaʼö Waulo, itutunö sanandrösa ba zanagö ba zi bongi. Hizaʼi sakali daʼa, ifagölösi ngaluo Yehowa andrö Faulo simane na ibörögö moluo. (1 Te. 5:4) Simane sanagö ba zi bongi, tola manö olifu ia ginötö ba lö iʼila wa no moluo. Tola manö tokea ia börö me no mohaga ba oroma gamuatania. Simanö göi, ngaluo wamakao sabölö-bölö zangoromaʼö gamuata niha si lö sökhi. Simane sanagö, no so ira ba zogömi-gömi börö me lö tebulö lafalua zi fatuwu khö Lowalangi. Faehu ita khöra, tola tataögö ngaluo Yehowa andrö börö me no tatimbagö gamuata si fatuwu ia, ba lö aetu tafalua ’ngawalö zi sökhi, satulö, ba sindruhu’. (Ef. 5:8-12) Iadaʼa, datatutunö dombua duma-duma tanö böʼö niʼogunaʼö Waulo ba woʼamaedolagö niha si lö teʼorifi.

HANIHA ZI LÖ TEʼORIFI BA NGALUO YEHOWA?

6. Hadia geluahania ato niha si mörö ba wamati? (1 Tesalonika 5:6, 7)

⁶ ʼNiha si mörö.’ (Baso 1 Tesalonika 5:6, 7.) Ifagölösi Faulo niha si lö teʼorifi ba ngaluo Yehowa andrö simane niha si mörö. Hewaʼae oya zalua ba zi fasuira ba numalö manö ginötö, hizaʼi lö aboto ba dödöra daʼö. Lö laʼila na so zi tohude salua, ba no lalau manö zahono. Ato niha iadaʼa zi mörö ba wamati. (Rom. 11:8) Lö laʼameʼegö tödö hewaʼae so dandra-tandra sangoromaʼö wa no so ita ba ”ngaluo safuria” ba lö ara tö alua wamakao sabölö-bölö. Sindruhu sa, börö waʼatebulö sebua salua ba gulidanö andre, hulö möi famasugi ba dödöra daʼö irege so ösa niha zadöni tödö ba wamondrondrongo turia Wamatörö Lowalangi. Hizaʼi, ato ba gotaluara zi fuli mörö. So ösa zi faduhu tödö wa hasambalö tohare ngaluo wanguhuku, hizaʼi lawaʼö tödöra ara alua nasa daʼö. (2 Fe. 3:3, 4) Hewaʼae simanö, aboto ba dödöda wa moguna sibai maoso ita ba wamati börö me taʼila wa no itugu ahatö ngaluo Yehowa.

7. Hana wa tola muʼamaedolagö niha sotema fanguhuku moroi khö Lowalangi simane niha si mabu?

⁷ ʼNiha si mabu.’ Iʼamaedolagö Faulo niha sotema fanguhuku moroi khö Lowalangi simane si mabu. Si toʼölönia, niha si mabu lö laʼila hadia zalua ba zi fasuira, ba lö laʼila lahalö gangetula si sökhi. Simane daʼö göi, niha si lö sökhi lö laʼameʼegö tödö wamangelama moroi khö Lowalangi, lafili lala waʼauri si möi fanguhukura dania. Hizaʼi, muʼamenesi niha Keriso enaʼö lö tebulö maoso ira. (1 Te. 5:6) Itutunö si samösa niha satua-tua ba Zura Niʼamoniʼö, wa niha si maoso hasambalö laʼokhögö waʼahono dödö, laʼila hadia nifaluara ba laʼokhögö wangera-ngera si sökhi irege tola lahalö gangetula satulö. Hana wa moguna sibai daʼö? Na taʼokhögö wangera-ngera si sökhi, lö farahu ita ba gabula dödö soʼamakhaita ba politik hegöi sosial si so iadaʼa. Börö me no ahatö ngaluo Yehowa, itugu abölö wondrönisi dödö enaʼö farahu ita ba gabula dödö simane daʼö. Hizaʼi, lö moguna aombö dödöda. Itolo ita eheha niʼamoniʼö moroi khö Lowalangi enaʼö lö tebulö taʼokhögö waʼahono dödö ba fangera-ngera si sökhi irege tola tahalö gangetula si fao faʼatua-tua.—Luk. 12:11, 12.

HEWISA ENAʼÖ TOLA TAFAʼANÖ ITA?

8. Moloʼö 1 Tesalonika 5:8, hadia manö zi tola manolo yaʼita enaʼö lö mörö ba wamati? (Faigi göi gambara.)

⁸ ”Böi taböhöli wangogunaʼö baru siʼöli . . . simanö göi dakula.” Iʼamaedolagö niha Keriso andrö Faulo simane saradadu si no mamaʼanö yaʼia ba wasuwöta. (Baso 1 Tesalonika 5:8.) Na alua wasuwöta, mutötöna khö zaradadu enaʼö no tefaʼanö ia fasuwö. Simanö göi ita, moguna tefaʼanö ita ba wanaögö ngaluo Yehowa, ba taʼogunaʼö mbaru siʼöli yaʼia daʼö famati ba faʼomasi, simanö daʼö göi dakula ba högö yaʼia daʼö tötönafö ba fangorifi.

9. Hewisa wa möi folumöʼöda wamati?

⁹ Simane baru siʼöli, tola möi folumöʼö dödö zi samösa saradadu. Famati hegöi faʼomasi, tola möi folumöʼö dödöda irege lö tebulö tafosumange Lowalangi ba taʼoʼö Yesu. Famati zamaduhuʼö ba dödöda wa hasambalö ifoluo niha sangalui yaʼia soroi ba dödö Yehowa. (Heb. 11:6) Börö wamati, lö faröi ita khö Yesu si tobali sondröniaʼö yaʼita hewaʼae ba ginötö waʼabasaki. Famati saro göi zanolo yaʼita ba wanaögö faʼabasaki. Enaʼö aro wamatida, moguna tafahaʼö ita khö ndra talifusöda si lö faröi hewaʼae göna ira folohi mazui abula dödö ba wangalui soguna. Tola göi tatimbagö wondrönisi dödö ba wangalui harato sebua na taʼoʼö ndra talifusöda soʼöna-önaiʼö faʼaurira börö me laʼofönaiʼö Wamatörö Lowalangi.b

10. Hadia mbuania na taʼomasiʼö Lowalangi hegöi awöda niha?

¹⁰ Faʼomasi zanolo yaʼita enaʼö lö mörö ba wamati. (Mat. 22:37-39) Börö me taʼomasiʼö Lowalangi lö tebulö manuriaigö ita hewaʼae na alua khöda waʼabasaki. (2 Ti. 1:7, 8) Ba börö me taʼomasiʼö nawöda niha, lö tebulö manuriaigö ita ba daerah dinas nibeʼe khöda, ba taʼogunaʼö telefo mazui sura. Lö göi taya wanötönada wa samuza inötö dania tebulö waʼauri niha ba lafalua zatulö.—Hez. 18:27, 28.

11. Hadia mbuania na taʼomasiʼö ndra talifusöda ba wamati? (1 Tesalonika 5:11)

¹¹ Börö me taʼomasiʼö ndra talifusöda, andrö wa faoma ’taʼaroʼö ba tafarou dödö nawöda’. (Baso 1 Tesalonika 5:11.) Simane ira saradadu si falulu fohalöwö ba samorege ba wasuwöta, simane daʼö göi ita. Sindruhu sa, tola manö ifesokho nawönia si samösa saradadu na möi ira fasuwö, hizaʼi tenga iʼodödögö wamalua daʼö. Simanö göi ita, lö taʼodödögö ba wangafökhöiʼö tödö ndra talifusöda mazui tasulöni khöra na lafalua khöda zi lö atulö. (1 Te. 5:13, 15) Taforomaʼö göi waʼomasi na taʼameʼegö tödö ndra talifusöda sondröniaʼö ba mbanua niha Keriso. (1 Te. 5:12) Me ifaʼoheʼö zurania si oföna Faulo ba mbanua niha Keriso ba Desalonika, ambö döfi nasa me no mufasindro mbanua niha Keriso andrö. Ira talifusö si no mufataro ba daʼö, tola manö lö oya nasa niʼilara ba itaria lafalua zala. Hewaʼae simanö, moguna lafosumange ira. Simanö göi iadaʼa, moguna tafosumange ba taʼoʼö wanuturu lala nibeʼe ndra satua sokubaloi. Moguna sibai daʼö börö me no ahatö ita ba wamakao sabölö-bölö. Ba luo daʼö, tola manö lö tatema wanuturu lala moroi ba gödo sebua mazui ba gödo ndraha. Daʼö mbörö wa taforege ba wangomasiʼö hegöi ba wamosumange ndra satua sokubaloi iʼotarai iadaʼa. Gofu hadia zalua, böi osambuaʼö dödöu ba walömoʼahonoara ba törö tödöu wa Yesu niʼogunaʼö Yehowa ba wameʼe khöra fanuturu lala. Na simane daʼö, lö mörö ita ba wamati.

12. Hewisa wa tola möi folumöʼö wangera-ngerada dötönafö andrö?

¹² Simane takula solumöʼö högö zi samösa saradadu, tötönafö fangorifi göi tola möi folumöʼö wangera-ngerada. Börö me taʼokhögö dötönafö saro, aboto ba dödöda wa si lö eluaha fefu niʼamualagö gulidanö andre iadaʼa. (Fil. 3:8) Tötönafö zanolo yaʼita enaʼö taʼokhögö waʼahono dödö hegöi fangera-ngera si sökhi. Nehegö zi no irai alua khö dalifusöda Wallace hegöi Laurinda me mangai halöwö ira ba Afrika. Ha ba zi tölu migu, mate fazamösa zatuara. Hizaʼi börö COVID-19, Wallace hegöi Laurinda tebai mangawuli ira ba soira ba owulo ba nösi nomora. Hewaʼae simanö, imane Wallace, ”Börö me uʼokhögö dötönafö fanusugi, nikhalaigögu tenga faʼaurira fatua lö mate ira, hizaʼi faʼaurira dania na no mususugi ira ba gulidanö si bohou. Tötönafö fanusugi zondrara tödögu ba ginötö urasoi waʼabu dödö mazui na omasido falukha khöra.”

13. Hadia nifaluada enaʼö tatema waʼabölö geheha niʼamoniʼö?

¹³ ”Böi mibunu waʼabölö geheha niʼamoniʼö.” (1 Te. 5:19) Iʼamaedolagö waʼabölö geheha niʼamoniʼö andrö Faulo simane alitö so hola ba waʼaurida. Na taʼokhögö waʼabölö geheha niʼamoniʼö, owölö-ölö ita ba wamalua satulö ba taforege ba wangai halöwö khö Yehowa. (Rom. 12:11) Hadia nifaluada enaʼö taʼokhögö waʼabölö geheha niʼamoniʼö? Tola taʼandrö khö Yehowa, tafahaʼö ita ba Daromali, ba tatuhini organisasinia nituturu geheha niʼamoniʼö. Na tafalua daʼö, tola tadouʼö ’mbua-bua geheha’.—Gal. 5:22, 23.

14. Hadia zi tebai tafalua na omasi ita enaʼö lö tebulö taʼokhögö waʼabölö geheha niʼamoniʼö? (Faigi göi gambara.)

¹⁴ Na no taʼokhögö waʼabölö geheha niʼamoniʼö, moguna mangelama ita enaʼö ’böi tabunu ia’. Ibeʼe gehehania Lowalangi ha ba niha si lö raʼiö fangera-ngera hegöi amuata, lö ibeʼe na taʼangeragö mazui tafalua zogoro ia. (1 Te. 4:7, 8) Enaʼö lö tebulö taʼokhögö waʼabölö geheha niʼamoniʼö, moguna ’böi taʼaohasi ba dödö zi no mufaʼeleʼö’. (1 Te. 5:20) ’Wamaʼeleʼö’ nitutunö ba daʼa yaʼia daʼö fehede Lowalangi nifaʼema geheha niʼamoniʼö, tefarahu ba daʼö wamangelama sanandrösa wa no ahatö ngaluo Yehowa. Böi so ba wangera-ngerada wa ngaluo Yehowa andrö mazui Hamagedo, ara nasa alua ia mazui tawaʼö lö alua ia ba götöda andre. Hizaʼi, faduhu dödöda wa hasambalö tohare ngaluo daʼö, irege lö tebulö tafalua zatulö ba ’tafosumange Lowalangi soroi ba dödö’ ero maʼökhö.—2 Fe. 3:11, 12.

”HAOGÖ FARESO FEFU HADIA IA”

15. Hadia zinangea tafalua enaʼö böi telimo ita ba wehede famaelungu moroi ba malaʼika si lö sökhi? (1 Tesalonika 5:21)

¹⁵ Ba zi lö ara tö, lamane wangumaʼö udu Lowalangi, ”No atulö, no ahono!” (1 Te. 5:3) Lafazawili walimosa ba zi sagörö ulidanö ira malaʼika si lö sökhi, ba ato zelungu. (Fam. 16:13, 14) Hewisa ita? Lö telimo ita na tafareso mazui tafaigi hezo zindruhu. (Baso 1 Tesalonika 5:21.) Ngawua wehede Yunani ”fareso” laʼogunaʼö ia ba woʼamaedolagö niha samareso loga ba wotatugöi hezo so zindruhu ganaʼa mazui firö. Börö daʼö, moguna tatatugöi hadia sindruhu nibasoda andrö mazui nirongoda. Moguna sibai daʼö ba niha Desalonika mböröta, ba itugu moguna khöda iadaʼa me arakhagö alua wamakao sabölö-bölö. Lö tafaduhusi tödö fefu niwaʼö niha, hizaʼi taʼogunaʼö wangera-ngerada ba wamatimbaisi hadia nibasoda mazui nirongoda ba zi no ifahaʼö Sura Niʼamoniʼö hegöi organisasi Yehowa. Na tafalua daʼö, lö telimo ita ba wehede famaelungu nifazawili malaʼika si lö sökhi.—Amd. 14:15; 1 Ti. 4:1.

16. Hadia dötönafö niʼokhögöda, ba hadia gangetulada?

¹⁶ Aboto ba dödöda wa tola teʼorifi zi sambua ngawawa ono mbanua Yehowa moroi ba wamakao sabölö-bölö. Hizaʼi, yaʼita samösa, lö taʼila hewisa waʼaurida mahemolu. (Yak. 4:14) Hewaʼae teʼorifi ita moroi ba wamakao sabölö-bölö mazui mate ita fatua lö alua daʼö, tola tatema waʼauri si lö aetu na lö faröi ita. Niha nibayoini fao ira khö Yesu ba zorugo, biri-biri tanö böʼö auri ira ba gulidanö faradaiso. Yalötebulö taʼosambuaʼö dödöda ba dötönafö si tohude andre, ba tola tefaʼanö ita ba wanaögö ngaluo Yehowa!