Okhögö Wanaha Tödö

1, 2. (a) Hadia lua-lua na ambö fanaha tödö? (b) Hana wa moguna tatutunö sanandrösa ba wanaha tödö?

ITOLO ita Lowalangi Yehowa ba wangokhögö fanaha tödö. (Galatia 5:22, 23) Moʼahonoa wanaha tödö niʼokhögö Yehowa. Hizaʼi, tebai taʼokhögö zimane daʼö börö me lö moʼahonoa ita. Sindruhunia, fefu gabula dödö salua iadaʼa, alua ia börö me ambö fanaha tödö. Daʼa göi mbörö wa itaha-taha ia si samösa niha ba wamalua halöwö si tohude, lö sökhi halöwönia ba zekola mazui ba nahiania wohalöwö. Börö me ambö fanaha tödö, alua waʼalösökhi, femabu, fehede si lö sökhi, fabali auri, moʼömö ba zi lö moguna, faʼasandru, lakuru, fökhö wangera-ngera, fökhö niʼasogö börö wamalua amuata fohorö, hegöi abeto.​—Zinunö 34:12-15.

² Niha si lö fanaha tödö, iʼasogö gabula dödö khönia samösa hegöi ba niha böʼö. Itugu numalö ginötö, ba itugu oroma wa alö wanaha tödö ba niha. Hizaʼi, lö tokea ita ba daʼa börö me no ifaʼeleʼö Taromali Lowalangi wa faʼambö fanaha tödö no sambua tandra wa auri ita ba ”götö safuria”.​—II Timoteo 3:1-3.

3. Hana wa moguna so khöda wanaha tödö?

³ Hana wa moguna so khöda wanaha tödö? So dombua dani si tohude. Si oföna, lö oya gabula dödö nirasoi niha si tola moʼangenanöi hadia nirasoi hegöi niʼangeraigönia. Aoha göi khöra ba wangokhögö fahuwusa si sökhi, ba wanimbagö fönu, faʼaombö dödö mazui faʼafawuka wangera-ngera. Si dua, enaʼö lö mamalö tobali si fahuwu khö Lowalangi, moguna tatimbagö wanandraigö hegöi isö-isö dödö si fasala. Daʼa zi tebai lafalua ira Adamo ba Khawa. (I Moze 3:6) Simane yaʼira, ato niha iadaʼa zanaögö abula dödö börö me lö laʼokhögö wanaha tödö.

4. Hadia zi möi famarou dödö ba niha samorege ba wolawa gisö-isö dödöra si fasala?

⁴ Aboto ba dödö Yehowa wa lö moʼahonoa ita ba abua khöda wangokhögö fanaha tödö. Hizaʼi, omasi ia itolo ita ba wolawa gisö-isö dödöda si fasala. (I Razo 8:46-50) Börö me si Fahuwu safönu faʼomasi ia, andrö wa si fao faʼomasi ibeʼe wamarou dödö ba niha na itaria abua khöra ba woʼangenanöi hadia nirasoi hegöi gisö-isö dödöra. Ba wamahaʼö daʼa, tafahaʼö ita ba duma-duma wanaha tödö niʼokhögö Yehowa. Tatutunö göi duma-duma si sökhi hegöi si lö sökhi moroi ba Zura Niʼamoniʼö hegöi fanuturu lala si sökhi si tola manolo yaʼita.

IBEʼE DUMA-DUMA YEHOWA

5, 6. Hadia duma-duma wanaha tödö nibeʼe Yehowa khöda?

⁵ Moʼahonoa wanaha tödö niʼokhögö Yehowa börö me moʼahonoa ia ba ngawalö nifaluania. (V Moze 32:4) Lö moʼahonoa ita. Hizaʼi, moguna taʼangeraigö duma-duma wanaha tödö moroi khönia enaʼö tola itugu sökhi woloʼöda yaʼia. Daʼa zanolo yaʼita ba wamalua hadia zatulö na tarasoi waʼafatö dödö. Hadia manö duma-duma wanaha tödö moroi khö Yehowa?

⁶ Angeraigö hadia nifalua Yehowa me mamadaö Zatana ba kabu Edena. Fefu zamosumange Lowalangi si lö faröi si so ba zorugo tola manö tokea, mofönu ba lö fao dödöra ba wamadaö nifalua Gafökha. Te örasoi göi zimane daʼö na öʼangeraigö fefu gabula dödö niʼasogö Zatana. Hizaʼi, so waʼebolo dödö khö Yehowa ba atulö lala nifaluania. Lö alio mofönu Yehowa ba so khönia waʼatulö ba wamadaö nifalua Zatana. (II Moze 34:6; Yobi 2:2-6) Hadia mbörö? Itehegö numalö ginötö Yehowa börö me lö omasi ia na so niha si tehori, hizaʼi ”enaʼö ahori falukha ira wamalalini era-era”.​—II Fetero 3:9.

7. Hadia wamahaʼö khöda moroi ba duma-duma Yehowa?

⁷ Moroi ba duma-duma Yehowa, tafahaʼö ita wa moguna tahaogö taʼangeraigö fatua lö tawaʼö ba tafalua hadia ia. Andrö, beʼe ginötömö ba woʼangeraigö fatua lö öhalö gangetula si tohude. Andrö waʼatua-tua ba wangumaʼö mazui ba wamalua hadia zatulö. (Zinunö 141:3) Ba ginötö mofönu mazui afatö dödöda, aoha khöda ba wamalua hadia manö. Daʼa mbörö wa ato niha zaniasa ba wehede mazui ba nifaluara si lö fakhamö laʼangeraigö!​—Gamaedola 14:29; 15:28; 19:2.

DUMA-DUMA SI SÖKHI HEGÖI SI LÖ SÖKHI BA GOTALUA ZAMOSUMANGE LOWALANGI

8. (a) Hezo tola tasöndra duma-duma si sökhi ba wanaha tödö? (b) Hadia zanolo Yosefo ba wotimbagö fondrönisi dödö moroi khö woʼomo Wotifa? (Faigi gambara ba wamobörö wamahaʼö.)

⁸ Haniha duma-duma moroi ba Zura Niʼamoniʼö sangoromaʼö wa moguna wanaha tödö? Duma-dumania, salua khö Yosefo ono Yakobo. Itimbagö wanandraigö ba ginötö mohalöwö ia ba nomo Wotifa, högö wazuri khö Waraʼo. Adöni dödö woʼomo Wotifa khö Yosefo börö me ”sökhi sibai mboto Yosefo ba si sökhi göi mbawania”. No hauga kali itandraigö idönisi dödö Yosefo. Hadia zanolo Yosefo ba wotimbagö fondrönisi dödö andrö? Te no ihaogö iʼangeraigö hadia zalua na ifalua daʼö. Andrö, me idöni nukhania foʼomo Wotifa, ilau moloi Yosefo. Imane, ”Ba hadia, ulau zi lö atulö andrö, sabölö-bölö sibai, wamazökhi horö ba Lowalangi?”​—I Moze 39:6, 7, 9; baso Gamaedola 1:10.

9. Hewisa wamaʼanömö yaʼugö ba wanimbagö fondrönisi dödö?

⁹ Hadia wamahaʼö khöda ba duma-duma Yosefo? Na adöni dödöda ba wamalua hadia zi lö tefaudu ba goi-goi Lowalangi, moguna tatimbagö daʼö. Fatua lö tobali Samaduhuʼö Yehowa, so ösa zamorege ba wolawa faʼarörö dödö ba wemanga-manga, femabu, foroko, fangogunaʼö narkoba, amuata fohorö mazui tanö böʼönia. Ba me no aefa tebayagö idanö, itaria adöni dödöra ba wamalua daʼö. Na daʼa zalua khömö, batogö ba angeraigö wa tola tekiko wahuwusamö khö Yehowa na adöni dödömö ba wamalua daʼö. Angeraigö hadia zalua si tola mondrönisi tödömö, ba alui lala ba wanimbagö yaʼia. (Zinunö 26:4, 5; Gamaedola 22:3) Na no irai tetandraigö ndraʼugö simane daʼö, andrö waʼatua-tua hegöi fanaha tödö khö Yehowa ba wanimbagö fondrönisi dödö andrö.

10, 11. (a) Hadia manö zalua khö ndra si bohou ebua ba zekola? (b) Hadia zanolo niha Keriso si bohou ebua ba wotimbagö fondrönisi dödö ba wolawa goi-goi Lowalangi?

¹⁰ Itaria ato niha Keriso si bohou ebua zanaögö simane salua khö Yosefo. Duma-dumania Kim. Asese lahöni-höni ira awönia ba kelas sanandrösa ba wamalua fohorö barö migu andrö. Lö hadöi si tola itutunö Kim sanandrösa ba daʼö. Börö me faböʼö ia moroi khö ndra awönia, irasoi wa ha yaʼi-yaʼia ba lö si fahuwu khönia. Lawaʼö göi khönia ira awönia wa bodo ia börö me lö ilau fakawa. Hizaʼi, atua-tua Kim. Iʼila wa ebua wondrönisi dödö ba wamalua fohorö ba ginötö awuyu-wuyu ita nasa. (II Timoteo 2:22) Asese lasofu khönia ira awönia hadia ono alawe ia nasa. Daʼa zameʼe khönia ginötö ba wotutunö hadia mbörö wa lö omasi ia ifalua wohorö. Omuso dödöda ba niha Keriso si bohou ebua sanimbagö fondrönisi dödö ba wamalua fohorö, ba omuso göi dödö Yehowa khöra!

¹¹ Ibeʼe göi khöda Sura Niʼamoniʼö duma-duma niha si lö manimbagö fondrönisi dödö ba wamalua fohorö. Iforomaʼö göi lua-lua si lö sökhi na lö khöda fanaha tödö. Na alua khömö simane zalua khö Kim, angeraigö sanandrösa ba zi bohou ebua sambö tödö nitutunö ba Gamaedola faza 7. Angeraigö göi sanandrösa khö Gamoni hegöi lua-lua si lö sökhi ba nifaluania. (II Zamueli 13:1, 2, 10-15, 28-32) Tola latolo ndraonora ira satua ba wangokhögö fanaha tödö hegöi faʼatua-tua na latutunö duma-duma daʼa ba wamahaʼö zi sambua omo.

12. (a) Hewisa wangoromaʼö Yosefo fanaha tödö khö ndra talifusönia? (b) Hezo manö moguna tataha dödöda?

¹² Ba ginötö böʼö, ibeʼe duma-duma si sökhi Yosefo ba wanaha tödö. Alua daʼa me möi ndra talifusönia wowöli gö ba Miserai. Enaʼö iʼila hadia zi so ba wangera-ngerara, lö ifatunö khöra wa yaʼia andre talifusöra. Ba me tebai itaha dödönia, iröi ndra talifusönia ba ilau meʼe ba zi ha yaʼia. (I Moze 43:30, 31; 45:1) Na so ndra talifusöda zangafökhöiʼö tödömö, oʼö duma-duma wanaha tödö nifalua Yosefo enaʼö tola ötimbagö ba wamalua mazui ba wangumaʼö hadia zi tola mangaʼasogö khömö faniasa. (Gamaedola 16:32; 17:27) Mazui, na so zahatö khömö si no laʼefasi ba gangowuloa, moguna ötaha dödömö enaʼö lö fariawö ndraʼugö khöra. Tola manö abua wamalua daʼa. Hizaʼi, tola aoha ia na ötörö tödömö wa öʼoʼö duma-duma Yehowa ba öfalua hadia niʼandrönia.

13. Hadia wamahaʼö khöda ba zalua ba waʼauri Razo Dawido?

¹³ Tola göi tatema mbua moroi ba duma-duma Razo Dawido. Me iʼandrö wönunia Saulo hegöi Simeʼi, lö mofönu Dawido mazui iʼogunaʼö waʼabölönia ba wolawa yaʼira. (I Zamueli 26:9-11; II Zamueli 16:5-10) Hizaʼi, tenga sagötö faʼara so wanaha tödö khö Dawido. Taʼila daʼa na tabaso horö nifaluania khö Mbeseba hegöi nifaluania khö Nabalo, sangalui tana khönia. (I Zamueli 25:10-13; II Zamueli 11:2-4) Tola tahalö wamahaʼö si sökhi moroi khö Dawido. Si oföna, niha sondröniaʼö ono mbanua Lowalangi moguna laʼokhögö wanaha tödö enaʼö lö fasala wangogunaʼöra halöwö nibeʼe khöra. Si dua, böi so niha zi talafo mamaduhusi tödö wa tola aro ia ba wanaögö fanandraigö.​—I Korindro 10:12.

SI SÖKHI SI TOLA ÖFALUA

14. Hadia zalua khö zi samösa dalifusöda ira matua, ba hana wa moguna taʼoʼö nifaluania?

¹⁴ Hadia zi tola öfalua ba wondrouʼö fanaha tödö? Angeraigö hadia zalua khö Luigi. So moto zanandru toyo motonia. Hewaʼae niha daʼö zi sala, hizaʼi ihangöi Luigi ba edöna ilau faʼudu. Ilau mangandrö Luigi khö Yehowa enaʼö so khönia waʼebolo dödö ba lö ifalalawa. Hizaʼi, lö aetu mofönu niha zanandru motonia. Daʼö mbörö wa isura waö-waö asuransi ndra matua daʼö Luigi, ba ilau mofanö hewaʼae lö si tebato wofönu-fönu niha zanandru motonia. Samigu aefa daʼö, möi Luigi ba wamalukhaisi samösa ndra alawe si no irai ifalukhaisi. Foʼomo ndra alawe daʼö zanandru motonia! Ifuli aila ia ba iʼandrö waʼebolo dödö khö Luigi. Ihubungi perusahaan asuransi moto Luigi enaʼö tola mufuli muhaogö moto Luigi. Fao ia ba wamahaʼö Zura Niʼamoniʼö, ba owua-wua dödönia. Börö zalua andre, aboto ba dödö Luigi wa moguna sibai iʼokhögö waʼebolo dödö. Iʼila göi wa lö sökhi zalua na ilau mofönu.​—Baso II Korindro 6:3, 4.

15, 16. Hewisa wamahaʼö ba Zura Niʼamoniʼö möi fanolomö hegöi ösi nomomö ba wondrouʼö fanaha tödö?

¹⁵ Famahaʼö ba Zura Niʼamoniʼö ba ginötö si no mutatugöi hegöi si tefaudu, möi fanolo niha Keriso enaʼö laʼokhögö wanaha tödö. Törö tödö hadia niwaʼö Lowalangi khö Yosua, ”Böi aefa-aefa ba mbeweu nösi zura Goroisa andrö ba öfatou-tou tödöu, bongi maʼökhö, enaʼö öʼalui woloʼö fefu hadia ia nitanö ba zura andrö, ba sökhi lua-lua wolaumö ba falukhaʼö zalöfö.” (Yosua 1:8) Hizaʼi, hewisa wamahaʼö moroi ba Zura Niʼamoniʼö möi fanolomö ba wangokhögö mazui ba wondrouʼö fanaha tödö?

¹⁶ Oya duma-duma si no tafahaʼö ita moroi ba Zura Niʼamoniʼö sangoromaʼö hadia mbua nitemada na so khöda wanaha tödö hegöi abula dödö salua na lö taʼokhögö daʼö. Ibeʼe duma-duma daʼa Yehowa ba Zura Niʼamoniʼö ba wanolo yaʼita. (Roma 15:4) Moguna tabaso, tafahaʼö ita ba tahaogö taʼangerönusi duma-dumara andre. Angeraigö hadia mbuania ba waʼaurimö hegöi ba nösi nomomö. Andrö khö Yehowa ba wanolo yaʼugö ba wamalua mene-mene moroi ba Daromalinia. Na öʼila wa so khöu waʼambö fanaha tödö, faduhuʼö daʼö. Angandrö ba forege ba wondrouʼö yaʼia. (Yakobo 1:5) Falua riset ba publikasida enaʼö tola ösöndra mene-mene si tefaudu si tola manolo yaʼugö.

17. Hadia zi tola lafalua ira satua ba wanolo iraonora ba wangokhögö fanaha tödö?

¹⁷ Hewisa zatua ba wanolo iraonora enaʼö laʼokhögö wanaha tödö? Aboto ba dödö zatua wa tenga iʼotarai me tumbu so mbua-bua daʼa ba ndraonora. Andrö wa moguna lafahaʼö mbua-bua si sökhi andre ba ndraonora moroi ba duma-duma nibeʼera. (Efeso 6:4) Na öʼila wa ambö fanaha tödö ba ndraonomö, sofu khöu samösa hadia no öbeʼe khöra duma-duma si sökhi. Tola tobali ndraʼugö duma-duma si sökhi na asese möiʼö manuriaigö, möi ba gangowuloa, hegöi ba wamalua famahaʼö zi sambua omo. Böi ataʼufi wangumaʼö löʼö ba ndraonomö na moguna daʼö! No ibeʼe Yehowa nola-ola khö Gadamo hegöi Khawa. Nola-ola daʼa zanolo yaʼira enaʼö tola lafahaʼö ira ba woʼameʼegö tödö waʼabölö Yehowa. Simanö göi, na labeʼe degu-degu ira satua ba ndraonora ba labeʼe khöra duma-duma si sökhi, no lafahaʼö ndraonora ba wangokhögö fanaha tödö. Moguna sibai ötolo ndraonomö enaʼö laʼokhögö waʼomasi ba laʼameʼegö tödö goi-goi hegöi faʼabölö Lowalangi.​—Baso Gamaedola 1:5, 7, 8.

18. Hana wa moguna tafili zi fahuwu khöda si fao faʼatua-tua?

¹⁸ Hewaʼae satua ita mazui tenga, fefu ita moguna tafili zi fahuwu khöda si fao faʼatua-tua. Na iʼomasiʼö Yehowa niha si fahuwu khömö, lafarou dödömö ba wotatugöi gohitö dödö si sökhi ba enaʼö lö ötaögö gabula dödö. (Gamaedola 13:20) Duma-duma si sökhi moroi khöra, möi famarou dödömö ba woloʼö fanaha tödö niʼokhögöra. Ba tola göi tefarou dödöra ba duma-duma nibeʼemö. Fanaha tödö niʼokhögöda zanolo yaʼita ba wangokhögö faʼomasi Lowalangi, faʼowua-wua dödö ba waʼauri, ba tabeʼe zi sökhi ba niha niʼomasiʼöda.