Hadia Zalua Na Tohare Wamatörö Mbanua Lowalangi?
”Ba si taya nösi gulidanö, awö waʼomasinia andrö, ba soloʼö somasi Lowalangi, ba lö tebulö, irugi zi lö aetu.”—I YOHANE 2:17.
1, 2. (a) Hadia zi fagölö nifalua ba gulidanö si lö sökhi hegöi ba niha nibeʼe hukuma faʼamate? (Faigi gambara ba wamobörö wamahaʼö.) (b) Hadia nirasoi fefu zi so ba zorugo hegöi ba gulidanö na no tedudugö fefu zi lö sökhi si so ba gulidanö?
KHALAIGÖ zalua andre. So samösa niha si lö sökhi si no tebeʼe hukuma faʼamate. Iadaʼa, laʼohe ia ira safi gurunga ba wanemaʼö hukuma. Hewaʼae na auri ia nasa ba lö fökhö, hizaʼi ba zi lö aratö mate ia.
2 Ulidanö si lö sökhi niʼiagöda iadaʼa fagölö ia simane niha si lö sökhi nihuku mate. Imane Sura Niʼamoniʼö, ”Si taya nösi gulidanö.” (I Yohane 2:17) No ihalö gangetula Yehowa wa ifakiko gulidanö si lö sökhi andre, ba hasambalö alua daʼö. Hizaʼi, so sambua gamaehuta gamozua götö danö faoma wamalua fanguhuku faʼamate ba niha si lö sökhi. So ösa zangumaʼö wa lö atulö lala wanguhuku niha si lö sökhi andrö ba so göi zi lö manemaʼö, ba latötöna wa lö labeʼe khönia hukuma faʼamate. Hizaʼi, Yehowa andre sanguhuku soʼahonoa, ba atulö gangetula nihalönia ba wangohori si lö sökhi salua ba gulidanö andre. (V Moze 32:4) Lö tetaha wamaluania daʼö. Na no tedudugö wamatörö gulidanö andre, fefu zi so ba zorugo hegöi ba gulidanö fao dödöra ba wangumaʼö wa sindruhu wanguhuku moroi khö Yehowa. No fangefa sebua daʼa!
3. Hadia manö zi öfa ngawalö gabula dödö si taya na no tohare Mbanua Lowalangi?
3 Hadia manö zi tefarahu ba ’nösi gulidanö si taya’? Fefu hadia zi lö sökhi nirasoida ba waʼauri si ero maʼökhö. Lö aratö tehori daʼö fefu. Daʼa sindruhu-ndruhu ’turia somuso dödö sanandrösa ba Mbanua Lowalangi’. (Mataiʼo 24:14) Ba wamahaʼö daʼa, tatutunö öfa ngawalö gabula dödö si taya na no tohare Mbanua Lowalangi: niha si lö sökhi, organisasi si lö sökhi, halöwö si fasala, ba abula dödö salua. Moroi ba daʼö dania tafahaʼö ita (1) hewisa wa molua-lua ia khöda iadaʼa, (2) hadia nifalua Yehowa khöra, ba (3) hadia ibeʼe wangalira.
NIHA SI LÖ SÖKHI
4. Hadia lua-lua nifalua niha si lö sökhi khöda iadaʼa?
4 Hewisa wa molua-lua hadia nifalua niha si lö sökhi khöda iadaʼa? Imane sinenge sotöi Faulo wa ”so dania mbaŵa si lö sökhi” ba ginötö safuria. Aefa daʼö imane, ”Niha si lö sökhi, samowöhö niha böʼö, ba tedou-dou manö walösökhi.” (II Timoteo 3:1-5, 13) Hadia no alua khöu daʼö? Ato moroi ba gotaluada zanaögö famakao börö nifalua niha si lö sökhi, simane foʼuduni soi böʼö, amuta si lö sökhi, ba famakao-makaora niha. So ösa moroi ba gotaluara zi lö maminiʼö amuata si lö sökhi nifaluara. So zombaliʼö yaʼia sanolo niha hizaʼi sindruhunia yaʼira andre niha si lö sökhi. Hewaʼae lö lafalua khöda zi lö sökhi, hizaʼi hasambalö tarasoi lua-lua moroi ba nifalua niha si lö sökhi. Afökhö dödöda na tarongo sanandrösa ba lala nifaluara ba wamakao iraono, niha si no atua, hegöi niha si lö faʼabölö. Nifaluara andre hulö nifalua gurifö mazui bekhu. (Yakobo 3:15) Hizaʼi, omuso dödöda börö dötönafö nibeʼe Daromali Yehowa khöda.
5. (a) Hadia ginötö niʼokhögö niha si lö sökhi? (b) Hadia zalua ba niha si lö mamalalini era-era?
5 Hadia nifalua Yehowa? Iadaʼa, ibeʼe Yehowa ginötö ba niha si lö sökhi ba wamalalini era-era. (Yesaya 55:7) Hewaʼae ba zi lö aratö tedudugö gulidanö si lö sökhi andre, hizaʼi lö nihalö gangetula hadia tehuku ira mazui löʼö. Hadia zalua ba niha si lö mamalalini era-era hegöi ba niha sanuhini famatörö gulidanö andre irugi waʼatohare wamakao sabölö-bölö? No ifabuʼu Yehowa wa ihori fefu niha si lö sökhi ba gulidanö. (Baso Zinunö 37:10.) Iadaʼa, ato niha samomaha yaʼira ba wombiniʼö amuata si lö sökhi nifaluara, ba sasesenia lö lahuku ira. (Yobi 21:7, 9) Hizaʼi, ifangelama ita Sura Niʼamoniʼö, ”Anehe sa ia lala zamösana, fefu mbekania, ba iʼila. Lö si bongi ba lö sogömi-gömi sibai, ba nibiniʼö zamazökhi si lö sökhi yaʼira enaʼö.” (Yobi 34:21, 22) Andrö wa lö tobini daʼö föna Yehowa. Tola iʼila fefu hadia ia nifalua niha si lö sökhi. Na no aefa Hamagedo, tola tafaigi hezoso nahiara hizaʼi lö hadöi yaʼira saʼae. No tehori ira sagötö faʼara!—Zinunö 37:12-15.
6. Haniha zi toröi na no tehori niha si lö sökhi, ba hana wa no turia si sökhi daʼa?
6 Haniha zi toröi na no tehori niha si lö sökhi? No ifabuʼu Yehowa: ”Ba sebolo tödö andrö zokhö tanö dania, ba owua-wua dödöra ba waʼafahöna wangorifi.” Aefa daʼö, tabaso göi ba zinunö daʼö, ”Satulö tödö zokhö tanö dania, yaʼira zowanua ba danö, si lö mamalö-malö.” (Zinunö 37:11, 29) Haniha ’zebolo tödö’ ba ”satulö tödö”? Sebolo tödö yaʼia daʼö niha si so fangide-ngideʼö ba wamahaʼö yaʼia hegöi soloʼö khö Yehowa. Satulö tödö yaʼia daʼö niha somasi mamalua hadia zatulö niwaʼö Lowalangi. Ba gulidanö iadaʼa, ato niha si lö sökhi moroi ba niha satulö tödö. Hizaʼi, ba gulidanö si bohou, ha niha sebolo tödö ba satulö tödö zi so ba daʼö, ba labaliʼö faradaiso gulidanö andre!
ORGANISASI SI LÖ SÖKHI
7. Hewisa wa molua-lua hadia nifalua organisasi si lö sökhi khöda iadaʼa?
7 Hewisa wa molua-lua hadia nifalua organisasi si lö sökhi khöda iadaʼa? Oya zi lö sökhi salua ba gulidanö andre, tenga ha börö nifalua zi samösa niha, hizaʼi börö zi sambua organisasi. Zuta niha faʼato nilimo organisasi agama. Duma-dumania, falimo ira sanandrösa khö Lowalangi, lawaʼö wa tebai tafaduhusi tödö Zura Niʼamoniʼö, ba lalimo niha sanandrösa ba dötönafö ba zi so miföna ba gulidanö hegöi ba niha. Famatörö si lö sökhi fao dödöra ba wasuwöta, foʼuduni soi böʼö, ba lafakao niha si numana hegöi niha si tosasa. Tola kayo ba aro wamatörö ndra samatörö na so khöra wamaigi bawa mazui na latema zölö-sölö. Lataʼunöisi zi fasuida ira perusahaan, lafakiko gumbu wangalui ba gulidanö, ba lahalö harera ba niha böʼö irege tola kayo ira. Ba daʼa oroma wa organisasi si lö sökhi andre zonorögö tödö fefu abula dödö ba gulidanö iadaʼa.
8. Hadia niwaʼö Zura Niʼamoniʼö salua ba organisasi sabölö ba wamaigi niha sato iadaʼa?
8 Hadia nifalua Yehowa? Tebörögö wamakao sabölö-bölö na lahori fefu organisasi agama faya ira samatörö ulidanö, si no iʼamaedolagö Sura Niʼamoniʼö simane ira alawe sohorö-horö töinia Mbabilona Sebua. (Famaʼeleʼö 17:1, 2, 16; 18:1-4) Sindruhu-ndruhu wa tedudugö fefu organisasi agama. Hizaʼi, hadia zalua ba organisasi si lö sökhi tano böʼö? Iʼamaedolagö ira Sura Niʼamoniʼö simane hili ba hulo, börö me hulö zabölö ira ba saro. (Baso Famaʼeleʼö 6:14.) Aefa daʼö, famatörö hegöi fefu organisasi si lö manuhini Mbanua Lowalangi hasambalö tedudugö. Daʼa gamozua moroi ba wamakao sabölö-bölö. (Yeremia 25:31-33) Na no aefa daʼö fefu, lö hadöi saʼae organisasi si lö sökhi!
9. Hana wa tola faduhu dödöda wa tola toföfö wamatörö tanö si bohou?
9 Hadia zamalalini organisasi si lö sökhi? Na no aefa Hamagedo, hadia so organisasi ba gulidanö? Imane Sura Niʼamoniʼö, ”Tadöna-döna mbanua si yawa, si bohou, ba tanö si bohou, dali gamabuʼula linia andrö, ba zahono faʼatulö dödö.” (II Fetero 3:13) Mbanua si yawa hegöi ulidanö satua yaʼia daʼö famatörö si lö sökhi hegöi niha samatörö yaʼia. Na no aefa tehori ira, hadia wangalira? ”Mbanua si yawa, si bohou, ba tanö si bohou.” Banua si yawa si bohou eluahania sambua famatörö si bohou, Mbanua Lowalangi nifatörö Yesu Keriso hegöi si 144.000 si fao khönia ba wamatorö. Ulidanö si bohou eluahania niha si so barö wamatörö Mbanua Lowalangi. Yesu hegöi niha si fao khönia ba wamatorö, sindruhu-ndruhu laʼoʼö Lowalangi Yehowa, Lowalangi si toföfö. (I Korindro 14:33) Andrö wa toföfö wamatörö ”tanö si bohou”. So niha si sökhi sangehaogö daʼa. (Zinunö 45:17) Latema wanuturu lala moroi khö Keriso hegöi si 144.000. Khalaigö hewisa na fefu organisasi si lö sökhi andre tefalalini ia tobali sambua organisasi saro si lö irai mamalua si lö sökhi!
HALÖWÖ SI FASALA
10. Hadia manö halöwö si fasala si no asese alua ba zi toröi yaʼugö, ba hewisa wa molua-lua ia ba waʼaurimö hegöi ba nösi nomomö?
10 Hewisa wa molua-lua khöda iadaʼa halöwö si fasala? Toröi ita ba gulidanö samalua amuata fohorö, falimosa, hegöi faʼafaito si lö sökhi si no toʼölö alua. Goi-goi Yehowa sanandrösa ba zatulö hegöi si sala, labaliʼö famaʼiki mazui hiburan ba gulidanö iadaʼa. (Yesaya 5:20) Moguna laforege ira satua ba wolumöʼö iraonora ba gisö-isö dödö si lö sökhi. Sindruhunia, fefu niha Keriso sindruhu laforege ba wolumöʼö fahuwusara khö Yehowa ba gulidanö si lö moʼameʼegö tödö goi-goi Lowalangi andre.
11. Hadia wamahaʼö si tola tahalö moroi ba lala wanguhuku Yehowa Zodoma hegöi Gomora?
11 Hadia nifalua Yehowa sanandrösa ba halöwö si fasala? Angeraigö hadia nifalua Yehowa sanandrösa ba zi lö sökhi salua ba mbanua Zodoma hegöi Gomora. (Baso II Fetero 2:6-8.) Loti, samösa niha satulö tödö. Yaʼia hegöi ösi nomonia tefakao sibai waʼaurira börö me ato niha samalua si lö sökhi ba zi fasuira. Idudugö mbanua daʼö Yehowa ba wangasiwaisi si lö sökhi salua ba daʼö. Hizaʼi, ”ibeʼe famaedo” daʼö ba niha si lö sökhi iadaʼa. Simane me ihori fefu zi lö sökhi Yehowa ba götö daʼö, hasambalö ifalua zimane daʼö ba ginötö ihori fefu zalua ba gulidanö andre.
12. Hadia halöwö somasi öfalua na no aefa tehori fefu zalua ba gulidanö andre?
12 Hadia zamalalini halöwö si fasala andre? Ba gulidanö si bohou, oya halöwö nifaluada si tola mangomusoiʼö tödöda. Duma-dumania, tabaliʼö faradaiso gulidanö andre ba tahaogö nomoda samösa hegöi niha niʼomasiʼöda. Tola tafalukhaisi zuta niha faʼato si no tesusugi ba tafahaʼö ira sanandrösa khö Yehowa ba fefu hadia ia nifaluania ba niha. (Yesaya 65:21, 22; Halöwö Zinenge 24:15) Ba ginötö daʼö, oya halöwö nifaluada si tola möi fangomusoiʼö dödöda ba famolakhömi Yehowa!
ABULA DÖDÖ SALUA
13. Hadia lua-lua wamadaö ba kabu Edena?
13 Hewisa wa molua-lua khöda gabula dödö salua andre iadaʼa? Ulidanö andre afönu niha si lö sökhi, organisasi si lö sökhi, hegöi halöwö si fasala sangaʼasogö lua-lua si lö sökhi ba waʼaurida. Fefu ita tarasoi lua-lua moroi ba wasuwöta, faʼanumana, foʼuduni soi böʼö, fökhö, ba faʼamate. Fefu zi lö sökhi andre tebörötaigö ia börö wamadaö nifalua Zatana, Adamo, ba Khawa khö Yehowa. Ba fefu ita tarasoi lua-lua moroi ba wamadaöra.
14. Hadia nifalua Yehowa ba gabula dödö salua andre?
14 Hadia nifalua Yehowa ba gabula dödö salua andre? Angeraigö duma-duma daʼa. No ifabuʼu Yehowa wa ihori fefu wasuwöta. (Baso Zinunö 46:9, 10.) Iheta fefu wökhö. (Yesaya 33:24) Iheta waʼamate sagötö faʼara. (Yesaya 25:8) Iheta waʼanumana. (Zinunö 72:12-16) Ihori fefu gabula dödö Yehowa sangaʼasogö abula dödö ba waʼaurida iadaʼa. Ihori fefu gisö-isö dödö moroi khö Zatana hegöi bekhu si fao khönia!—Efeso 2:2.
Khalaigö gulidanö si lö hadöi fasuwöta, fökhö mazui faʼamate! (Faigi ngenoli si-15)
15. Hadia manö zi taya sagötö faʼara na no tohare Hamagedo?
15 Khalaigö hewisa waʼaurida na toröi ita ba gulidanö si lö hadöi fasuwöta, fökhö mazui faʼamate! Lö hadöi saʼae saradadu, fakake wasuwöta, ruma saki, doto, matiri, mazui lewatö. Lö hadöi faʼalösökhi ba daʼö, ba lö moguna folisi, alarm keamanan mazui lö tafake mbuarate mazui onokusi! Fefu ngawalö zi lö sökhi sangaʼasogö abula dödö, no ahori taya sagötö faʼara.
16, 17. (a) Hewisa dödö niha sauri na no aefa Hamagedo? Beʼe duma-duma. (b) Hewisa wa tola faduhu dödöda wa tola auri ita na no aefa tehori gulidanö satua andre?
16 Hewisa waʼauri nirasoida na no tehori fefu ngawalö zi lö sökhi? Abua wokhalaigö yaʼia. No ara toröi ita ba nahia si so abula dödö irege lö taʼila taʼerai hawaʼoya gabula dödö nirasoida ba ngawalö nifaluara. Si tobali duma-duma, niha si toröi ba zinga lala sebua, te lö saʼae irasoi hewisa waʼaföli salua ba daʼö. Niha si toröi sahatö ba nahia waniboʼö zasao te lö saʼae taraso khöra waʼaböu. Hizaʼi, na ihori fefu gabula dödö Yehowa, daʼa sambua fangefa sebua!
17 Hadia zi tobali fangali moroi ba gabula dödö nirasoida iadaʼa? Imane Zinunö 37:11, ”Owua-wua dödöra ba waʼafahöna wangorifi.” Omuso sibai dödöda me taʼila wa daʼa zomasi Yehowa khöda! Ba ginötö so gabula dödö, falua hadia manö zi tola mangahatöʼö ndraʼugö khö Yehowa hegöi ba organisasinia. Sökhi sibai dötönafö si tola öʼokhögö ba zi so miföna, andrö wa moguna öhaogö öʼangerönusi ia, falua enaʼö sindruhu-ndruhu alua ia khöu, ba tutunö ba niha böʼö. (I Timoteo 4:15, 16; I Fetero 3:15) Daʼa zi tola manolo yaʼugö enaʼö tola faduhu dödömö wa lö aratö tedudugö fefu hadia zalua ba gulidanö andre, ba tola auri ndraʼugö ba owua-wua dödömö sagötö faʼara!