Hadia Itörö Tödömö?
Hadia no ahori öbaso fefu edisi Manuriaigö ba ndröfi daʼa? Na noa, tandraigö beʼe wanema li ba wanofu-nofu andre:
Hadia manö zi farahu ba ’wombulöʼö era-era’? (Rom. 12:2)
Tenga ha ba wamalua ngawalö zi sökhi. Hizaʼi, moguna göi tafareso hewisa ita zindruhunia ba tafalua wombulöʼö ba waʼaurida enaʼö tola tafalua goi-goi Lowalangi.—w23.01, ngaʼörö 8-9.
Hewisa wangoromaʼöda wa taʼokhögö lala wangera-ngera satulö ba wamaigi salua ba gulidanö?
Adöni dödöda ba wamaigi hewisa zalua ba gulidanö tobali faʼalua moroi ba zi no tefaʼeleʼö. Hizaʼi, böi manahö-nahö dödöda mazui tahalö rahu-rahu samösa, börö me möi famoto wahasara dödöda daʼö. Abölö sökhi na tafahuo-huosi zi no mufaʼanö ba publikasi nifazökhi organisasi Yehowa. (1 Ko. 1:10)—w23.02, ngaʼörö 16.
Hadia gamaehutania wamayagö idanö Yesu faoma ira nifahaʼönia?
Börö me yaʼia andrö ngaʼötö moroi ba soi si no ifili Lowalangi, lö moguna ilulu waʼaurinia khö Yehowa simane nifaluada iadaʼa. Yaʼia andrö niha soʼahonoa, lö irai ifalua zala. Börö daʼö, lö moguna ifalalini gera-erania.—w23.03, ngaʼörö 5.
Hewisa wanoloda niha böʼö ba wameʼe bua gera-era ba gangowuloa?
Taforege enaʼö adogo-dogo mbua gera-erada irege tola labeʼe mbua gera-erara ira talifusöda. Böi oya sibai nitutunöda irege so ginötö khö ndra talifusöda ba wanutunö tohu-tohu moroi ba wanema li daʼö.—w23.04, ngaʼörö 23.
Hadia geluahania ”Lala Niʼamoniʼö” nisura ba Yesaya 35:8?
Ba wamobörö, daʼa lala nitörö ndra niha Yahudi sangawuli moroi ba Mbabilona numalö ba Yeruzalema. Hewisa göi iadaʼa? Ngaotu fakhe fatua lö döfi 1919, oya zi no mufalua ba wangehenaigö lala andrö. Duma-dumania, mufoʼeluaha ba mucetak Zura Niʼamoniʼö. Mofanö nono mbanua Lowalangi latörö ”Lala Niʼamoniʼö” numalö ba waradaiso wamati, solohe yaʼira ba howu-howu Wamatörö Lowalangi.—w23.05, ngaʼörö 15-19.
Hadia zi no amaedola ndra alawe si darua nitutunö ba Gamaedola faza 9?
Itutunö ba faza daʼö sanandrösa khö zi samösa ’ira alawe si bodo’ sogaoni numalö ba ”Lewatö”, ba ira alawe sangokhögö ”faʼatua-tua sindruhu” sogaoni ba ”lala sadölö saekhu ba waʼatua-tua” hegöi faʼauri. (Amd. 9:1, 6, 13, 18)—w23.06, ngaʼörö 22-24.
Moroi ba zalua khö Loti, hezo oroma wa so khö Lowalangi wangide-ngideʼö ba lö fatandro ia?
Ibeʼe wanuturu lala Yehowa khö Loti enaʼö moloi ira moroi ba Zodoma numalö ba hili. Hizaʼi, me iʼandrö Loti enaʼö ba Zoara manö möi ira, itehegö khönia Lowalangi.—w23.07, ngaʼörö 21.
Hadia nifalua woʼomo ira alawe na ifaigi-faigi pornografi foʼomonia?
Moguna itörö tödönia wa tenga salania daʼö. Abölö sökhi na iʼosambuaʼö dödönia ba wahuwusania khö Lowalangi ba iʼangerönusi waö-waö Zura Niʼamoniʼö sanandrösa khö ndra alawe sabu tödö sanema fondrara dödö moroi khö Yehowa. Tola göi itolo woʼomonia enaʼö iʼaröuʼö ia moroi ba zi tola mondrönisi tödönia.— w23.08, ngaʼörö 14-17.
Na so zanandrawaisi nifaduhusida tödö, hewisa wa möi fanoloda waʼaboto ba dödö enaʼö lö alio mofönu ita?
Ogunaʼö ginötö daʼö ba wangila hadia zabölö moguna khönia. Na tafalua daʼö, aoha khöda ba wameʼe fanema li si sökhi ba tahaogö wahuhuosa khönia.—w23.09, ngaʼörö 17.
Hadia wamahaʼö nihalöda moroi khö Maria sanandrösa ba wanema faʼabölö?
Börö me iʼila Maria wa yaʼia dania zi tobali ina Mesia, andrö wa iforege ba wangalui fanolo. Gaberieli hegöi Elizabe, labeʼe wamarou dödö khönia moroi ba Mbuku Niʼamoniʼö. Tola göi tatema waʼabölö moroi khö ndra talifusöda si sara lala wamati.—w23.10, ngaʼörö 15.
Hewisa wameʼe Yehowa fanema li ba wangandröda?
Ifabuʼu wa hasambalö ifondrondrongo wangandröda, ba iʼangeragö göi hadia gohitö dödönia ba niha. (Yer. 29:12) Tola manö faböʼö-böʼö wanema li nibeʼe Yehowa ba wangandrö ndra enoninia hewaʼae fagölö nösi wangandröra. Hizaʼi, si no tatu, hasambalö itolo ita.—w23.11, ngaʼörö 21-22.
Ba Roma 5:2, so ngawua wehede ”dötönafö”. Börö daʼö, hana wa ifuli mutötöi ia ba ayati 4?
Me irongo duria somuso dödö si samösa niha ba ziföföna sibai, te awena iʼila wa so dötönafö faʼauri ba gulidanö faradaiso. Hizaʼi, na no aefa alua khönia gabula dödö, na anau gölönia ba wanaögö daʼö, ba irasoi wa omuso dödö Lowalangi khönia, ba daʼö itugu aro wanötönania ba tetanögö daʼö ba dödönia.—w23.12, ngaʼörö 12-13.