• Hadia Wamatörö Lowalangi Andrö?
    Lala ba Wanöndra Faʼohahau Dödö Sagötö Faʼara!—Famahaʼö ba Zura Niʼamoniʼö

    • Si tobali tuho siföföna ba Zura Niʼamoniʼö yaʼia daʼö soʼamakhaita ba Wamatörö Lowalangi. Iʼogunaʼö Wamatörö daʼö Yehowa ba wamalua ohitö dödönia ba gulidanö simane ba wamobörö. Hadia Wamatörö Lowalangi andrö? Hezo taʼila wa no mamatörö ia iadaʼa? Hadia manö zi no ifalua Famatörö Lowalangi andrö? Ba hadia nifaluania ba zi so miföna? Fanofu-nofu daʼö, tasöndra wanema linia ba wamahaʼö daʼa hegöi ba wamahaʼö si dombua aefa daʼa.

      1. Hadia Wamatörö Lowalangi andrö, ba haniha Razonia?

      Famatörö Lowalangi yaʼia daʼö famatörö nifasindro Lowalangi Yehowa. Yesu Keriso zi tobali Razonia ba mamatörö ia moroi ba zorugo. (Mataiʼo 4:17; Yohane 18:36) Imane Sura Niʼamoniʼö sanandrösa khö Yesu, ”Tobali ia Razo . . . sagötö faʼara.” (Luka 1:32, 33) Börö me Yesu zi tobali Razo ba Wamatörö Lowalangi, yaʼia dania zamatörö fefu niha ba zi sagörö ulidanö.

      2. Haniha zi fao khö Yesu ba wamatörö?

      Tenga ha Yesu zamatörö. Fao khönia niha moroi ba ”ngawalö mado, ba ngawalö li, moroi ba mbanua misa hegöi ngawalö soi. . . . Tobali ira razo ba samatörö ulidanö”. (Famaʼeleʼö 5:9, 10) Hawaʼato zi fao khö Keriso ba wamatörö? Iʼotarai me no möi Yesu ba gulidanö, zuta niha Keriso soloʼö yaʼia. Hizaʼi, ha 144.000 niha nifili sauri ba zorugo, ba fao ira mamatörö awö Yesu. (Baso Wamaʼeleʼö 14:1-4.) Fefu niha Keriso tanö böʼö, lasöndra waʼauri ba gulidanö ba tobali ira ono mbanua barö Wamatörö Lowalangi.—Sinunö 37:29.

      3. Hana wa abölö sökhi Wamatörö Lowalangi moroi ba wamatörö niha gulidanö?

      Hewaʼae so ndra samatörö ba gulidanö samorege ba wamalua ngawalö zi sökhi, hizaʼi lö khöra faʼabölö ba wamalua fefu zomasi ira andrö. Ba gafuriata, so zamatörö si bohou si tobali fangalira ba tola manö lö iʼameʼegö tödö göi zoguna ba nono mbanuania. Hizaʼi, börö me Yesu zi tobali Razo ba Wamatörö Lowalangi, lö irai so niha si tobali fangalinia. Imane Sura Niʼamoniʼö, ”Ifasindro wamatörönia Lowalangi . . . amatöröwa si lö irai adudu.” (Danieli 2:44) Yesu dania zamatörö ba zi sagörö ulidanö, ba lö ifaböʼö-böʼöni waʼomasinia. Yesu andrö sebua faʼomasi, si sökhi tödö, ba ifalua zatulö. Ifahaʼö fefu niha enaʼö faoma laʼomasiʼö nawöra, lafalua waʼasökhi dödö hegöi satulö.—Baso Yesaya 11:9.

      ODÖDÖGÖ NASA WANGALUI

      Tafatunö dania hadia mbörö wa abölö sökhi Wamatörö Lowalangi moroi ba wamatörö niha gulidanö.

      Mamatörö Yesu Keriso moroi ba dadaomania ba zorugo, ifatörö zi sagörö ulidanö. No modadao furinia zi fao khönia ba wamatörö. Ihagaini ira haga moroi khö Yehowa.

      4. Famatörö Lowalangi dania zamatörö ulidanö maʼasagörö

      No tebeʼe khö Yesu Keriso kuaso sebua, faböʼö sibai ia moroi khö ndra samatörö ba gulidanö. Baso Mataiʼo 28:18, ba beʼe wanema li ba wanofu daʼa:

      • Hadia gamaehuta waʼabölö niʼokhögö Yesu moroi khö ndra samatörö ba gulidanö?

      Asese tefalali wamatörö niha, ba ero samösa samatörö ha sambua banua zi tola ifatörö. Hewisa göi Wamatörö Lowalangi? Baso Danieli 7:14, ba beʼe wanema li ba wanofu-nofu daʼa:

      • Moloʼö yaʼugö, börö me ”lö irai adudu” Wamatörö Lowalangi, hadia howu-howu nitemada?

      • Moloʼö yaʼugö, börö me Famatörö Lowalangi dania zamatörö ba zi sagörö ulidanö, hadia howu-howu nitemada?

      5. Sinangea na mugati wamatörö niha

      Hana wa sinangea mugati wamatörö niha tobali Famatörö Lowalangi? Futa VIDEO, ba beʼe wanema li ba wanofu daʼa:

      VIDEO: Hadia Mbanua Lowalangi Andrö?—Famaehagö Sadogo-dogo (1:41)

      • Hadia zalua börö me niha gulidanö zamatörö?

      Baso Zangombakha 8:9, ba beʼe wanema li ba wanofu-nofu daʼa:

      • Moloʼö yaʼugö, hadia moguna igatini wamatörö niha andre Famatörö Lowalangi? Hana wa öwaʼö zimanö?

      6. Aboto ba dödö Yesu ita hegöi awönia si 144.000

      Yesu andrö Razoda, no irai tobali ia niha. Andrö wa ”aboto ba dödönia wa ambö faʼabölöda”. (Heberaiʼo 4:15) Baero daʼö, ira alawe hegöi ira matua si lö faröi si 144.000 niha si fao khö Yesu ba wamatörö, no ifili ira Yehowa moroi ba ”ngawalö mado, ba ngawalö li, moroi ba mbanua misa hegöi ngawalö soi”.—Famaʼeleʼö 5:9.

      • Hadia terara dödöu me no öʼila wa aboto ba dödö Yesu hegöi ira awönia si 144.000 hadia nirasoida hegöi abula dödö salua khöda? Hana wa öwaʼö zimanö?

      Ira matua hegöi ira alawe nibayoini si faböʼö-böʼö döfi hegöi soi.

      Yehowa zamili ira matua hegöi ira alawe moroi ba ngawalö li, ngawalö mado, ngawalö soi si fao khö Yesu ba wamatörö

      7. Abölö sökhi huku hegöi amakhoita ba Wamatörö Lowalangi

      Lafazökhi huku ira samatörö hegöi amakhoita soguna ba niha sato enaʼö telumöʼö nono mbanuara. So göi huku ba Wamatörö Lowalangi awö gamakhoita si lö tola löʼö laʼoʼö iraono mbanuania. Baso 1 Korindro 6:9-11, ba beʼe wanema li ba wanofu-nofu daʼa:

      • Moloʼö yaʼugö, hewisa gulidanö andre na fefu niha laʼoʼö huku hegöi amakhoita nibeʼe Lowalangi?a

      • Moloʼö yaʼugö, hadia sinangea na iʼandrö Yehowa ba nono mbanuania enaʼö laʼoʼö huku hegöi amakhoita nibeʼenia? Hana wa öwaʼö zimanö?

      • Hadia dandra sangoromaʼö wa tola tebulö niha si lö moloʼö huku hegöi amakhoita nibeʼe Lowalangi?—Faigi ayati 11.

      Samösa folisi zombatogö moto ba lala si rami niha. So zatua hegöi iraono sangötö lala.

      Simane famatörö niha gulidanö, so göi huku hegöi amakhoita ba Wamatörö Lowalangi solumöʼö ono mbanuania, ba moguna khöra daʼö. Hizaʼi, abölö sökhi huku hegöi amakhoita ba Wamatörö Lowalangi moroi ba wamatörö niha gulidanö

      SO ZANGUMAʼÖ: ”Bakha ba dödöda so Wamatörö Lowalangi.”

      • Hadia öbeʼe fanema li na so zangumaʼö simane daʼö?

      RAHU-RAHU WAMAHAʼÖ

      Famatörö Lowalangi andrö yaʼia daʼö famatörö si so ba zorugo, ba mamatörö dania ia ba zi sagörö ulidanö.

      Hadia Wamahaʼö si Tola Öhalö?

      • Haniha manö zamatörö ba Wamatörö Lowalangi?

      • Hadia mbörö wa abölö sökhi Wamatörö Lowalangi moroi ba wamatörö niha?

      • Ba Wamatörö Lowalangi dania, hadia manö niʼandrö Yehowa ba nono mbanuania?

      Tandraigö Falua Daʼa

      ALUI NASA DANÖ BÖʼÖ

      Moloʼö famahaʼö Yesu, hezo so Wamatörö Lowalangi andrö?

      ”Hadia Bakha ba Dödöda So Wamatörö Lowalangi Andrö?” (Artikel web)

      Hadia mbörö wa Famatörö Lowalangi nituhini ndra Samaduhuʼö Yehowa? Hana wa tenga famatörö niha gulidanö?

      Molulu Faʼauri ba Wamatörö Lowalangi (1:43)

      Baso hadia niwaʼö Zura Niʼamoniʼö sanandrösa khö ndra niha si 144.000 nifili Lowalangi si fao khö Yesu ba wamatörö.

      ”Haniha zi Möi ba Zorugo?” (Artikel web)

      Hadia mbörö wa faduhu dödö zi samösa ira alawe si so ba gurunga wa lö tanö böʼö baero Lowalangi zi tola mangeheta falöʼatulö ba gulidanö andre?

      ”Ba Gafuriata Uʼila Lala Wangasiwai Falöʼatulö” (Sedarlah! Baŵa si Felezara 2011)

      a So ösa huku hegöi amakhoita nibeʼe Lowalangi ba tafatunö daʼö dania ba Faosatö 3.

  • Hadia Manö Dania Nifalua Wamatörö Lowalangi?
    Lala ba Wanöndra Faʼohahau Dödö Sagötö Faʼara!—Famahaʼö ba Zura Niʼamoniʼö

    • No tefasindro Wamatörö Lowalangi ba zorugo. Ba zi lö ara tö, tohare wamatörönia andrö ba gulidanö ba itugu sökhi zalua. Tatutunö dania hadia manö nifalua Wamatörö Lowalangi andrö.

      1. Hewisa Wamatörö Lowalangi ba wangaʼasogö faʼahono dödö hegöi faʼatulö ba gulidanö?

      Ba wasuwöta Hamagedo dania, Yesu si no tobali Razo moroi ba Wamatörö Lowalangi, ihori fefu niha si lö sökhi hegöi famatörö niha gulidanö. (Famaʼeleʼö 16:14, 16) Ba ginötö daʼö dania, sindruhu-ndruhu alua zi no ifabuʼu Sura Niʼamoniʼö, ”Hatö maʼifu tö ba lö hadöi saʼae niha si lö sökhi.” (Sinunö 37:10) Ba Wamatörö Lowalangi dania, Yesu zangaʼasogö faʼahono dödö hegöi faʼatulö ba zi sagörö ulidanö.—Baso Yesaya 11:4.

      2. Hewisa waʼaurida dania na no alua gohitö dödö Lowalangi ba gulidanö?

      Barö Wamatörö Lowalangi, ”niha satulö tödö dania zokhö tanö, ba mowanua ira ba daʼö sagötö faʼara”. (Sinunö 37:29) Khalaigö dania zalua andrö: Hatö niha satulö tödö zi toröi ba gulidanö, ba fefu ira laʼomasiʼö Yehowa hegöi awöra zamösana! Lö hadöi dania niha sofökhö, ba fefu niha lasöndra waʼauri si lö aetu sagötö faʼara.

      3. Hadia nifalua Wamatörö Lowalangi na no tehori dania niha si lö sökhi?

      Me no aefa tehori niha si lö sökhi, mamatörö Yesu tobali Razo sagötö zi 1.000 fakhe. Sagötö zi saribu fakhe andrö, Yesu hegöi awönia si 144.000 latolo niha gulidanö irege moʼahonoa ira. Me no awai zi saribu fakhe andrö, tebohouni gulidanö tobali faradaiso si sökhi, ba omuso dödö niha fefu börö me laʼoʼö goroisa Yehowa. Aefa daʼö, famatörö si no tebeʼe khö Yesu, ifangawuli khö Namania Yehowa. Ba luo daʼö, sindruhu-ndruhu teʼamoniʼö döi Yehowa. (Mataiʼo 6:9, 10) Ba daʼö oroma wa Yehowa andrö Samatörö fondrege zi sökhi soʼameʼegö tödö ono mbanuania. Aefa daʼö, ihori Zatana Yehowa, ira malaʼika si lö sökhi, ba fefu niha si lö moloʼö amakhoita ba wamatörönia. (Famaʼeleʼö 20:7-10) Fefu zi sökhi niʼasogö Wamatörö Lowalangi, lö tebulö irugi zi lö aetu.

      ODÖDÖGÖ NASA WANGALUI

      Tatutunö dania hadia mbörö wa faduhu dödöda wa iʼogunaʼö Wamatörönia andrö Lowalangi ba wamalua si no ifabuʼu ba Zura Niʼamoniʼö sanandrösa ba zi so miföna.

      4. Famatörö Lowalangi dania zangohori famatörö niha gulidanö

      Iʼotarai me föna, ato ’niha samatörö awönia niha lua-luania teʼala ia’. (Sangombakha 8:9) Iʼogunaʼö dania Wamatörönia Yehowa ba wangohori fefu falöʼatulö.

      Baso Danieli 2:44 hegöi 2 Tesalonika 1:6-8, ba beʼe wanema li ba wanofu-nofu daʼa:

      • Hadia dania nifalua Yehowa hegöi Ononia Yesu khö ndra samatörö ba gulidanö awö zi fao khöra?

      • Me no öfahaʼö ndraʼugö sanandrösa khö Yehowa hegöi khö Yesu, hadia zameʼe khöu faʼafaduhu dödö wa lafalua zatulö?

      Me no tobali Razo Yesu ba zorugo mamatörö ia ba gulidanö faradaiso.

      5. Yesu andrö Razo fondrege zi sökhi

      Börö me Yesu zi tobali Razo ba Wamatörö Lowalangi, oya lala nifaluania ba wanolo ono mbanuania si so ba gulidanö. Futa VIDEO enaʼö öʼila hadia manö zangoromaʼö wa omasi sibai Yesu ba wanolo niha gulidanö ba no itema waʼabölö moroi khö Lowalangi ba wamalua daʼö.

      VIDEO: Iforomaʼö Yesu Hadia Dania Nifalua Wamatörö Lowalangi (1:13)

      Fefu nifalua Yesu me so ia ba gulidanö, daʼö duma-duma nifalua Wamatörö Lowalangi. Faigi hadia manö zi no ifalua Yesu hegöi sedöna ifalua dania, ba fili hadia nidöna-dönamö. Aefa daʼö, baso ayatinia.

      ME SO YESU BA GULIDANÖ . . .

      MOROI BA ZORUGO . . .

      • ifalua dandra sahöli-höli dödö ba wameʼe gö niha si hauga ribu faʼato.—Mataiʼo 14:17-21.

      • moʼahonoa fefu niha ibeʼe, ba lö irai mofökhö ira.—Yesaya 33:24.

      • isusugi niha si no mate ba lö hadöi saʼae faʼamate.—Famaʼeleʼö 21:3, 4.

      6. Famatörö Lowalangi dania zangaʼasogö faʼohahau dödö ba zi so miföna

      Famatörö Lowalangi dania zamalua ohitö dödö Yehowa ba niha gulidanö ba lasöndra waʼauri si lö aetu ba waradaiso sagötö faʼara. Futa VIDEO enaʼö öʼila hewisa Yehowa ba wamalua ohitö dödönia me iʼogunaʼö Nononia Yesu.

      VIDEO: Khili-Khili Zalua Sahöli-höli Dödö ba zi So Miföna (4:38)

      Baso Zinunö 145:16, ba beʼe wanema li ba wanofu daʼa:

      • Hewisa dödöu me no öʼila wa Yehowa dania ’zangabusoiʼö fefu zauri somasi dödöra’?

      SO ZANGUMAʼÖ: ”Na taʼosaraʼö dödöda, tola taʼasiwai gabula dödö salua ba gulidanö andre.”

      • Hadia manö gabula dödö si tola iʼasiwai Famatörö Lowalangi, hizaʼi tebai iʼasiwai daʼö famatörö niha gulidanö?

      RAHU-RAHU WAMAHAʼÖ

      Famatörö Lowalangi dania zamalua ohitö dödö Yehowa. Famatörö daʼö göi zombaliʼö ulidanö tobali faradaiso ba ha niha satulö tödö zi toröi ba daʼö, samosumange Yehowa sagötö faʼara.

      Hadia Wamahaʼö si Tola Öhalö?

      • Hewisa Wamatörö Lowalangi wangamoniʼönia töi Yehowa?

      • Hana wa faduhu dödöda wa Famatörö Lowalangi dania zamalua fefu mbuʼusa li si so ba Zura Niʼamoniʼö?

      • Hadia zabölö ödöna-döna moroi ba ngawalö nifalua Wamatörö Lowalangi dania?

      Tandraigö Falua Daʼa

      ALUI NASA DANÖ BÖʼÖ

      Baso artikel sanutunö hadia geluaha Hamagedo andrö.

      ”Hadia Geluaha Hamagedo Andrö?” (Artikel web)

      Faigi hadia manö zalua sagötö ”wamakao sabölö-bölö” simane niwaʼö Yesu.—Mataiʼo 24:21.

      ”Hadia Geluahania Wamakao Sabölö-bölö Andrö?” (Artikel web)

      Faigi hewisa zongambatö, faoma lakhalaigö waʼaurira ba waradaiso.

      Khalaigö Hewisa Waʼaurimö ba Gulidanö Faradaiso (1:50)

      Ba artikel ”Oya Wanofu-nofu Samawukaisi Era-eragu”, baso hewisa zi samösa samadaö ba politik isöndra wanema li ba wanofu-nofu samawukaisi era-erania.

      ”Sura Niʼamoniʼö Zombulöʼö Faʼauri” (Menara Pengawal, 1 Mbaŵa si Sara 2012)