Böi Aetu Wanötönau!

1, 2. Hadia nidöna-döna nono mbanua Yehowa?

NO ARA labalo-baloi ono mbanua Yehowa waʼalua zi no tefaʼeleʼö andrö. Duma-dumania, idöna-döna Yeremia tedudugö mbanua Yehuda ba danga Mbabilona, alua daʼö me döfi 607 SM. (Yeremia 25:8-11) Ifaʼeleʼö Yehowa khö Yesaya wa niha Yehuda si no tetiboʼö ba Mbabilona mangawuli ira dania ba mbanuara. Imane, ”Yaʼahowu dozi sanötöna khönia.” (Yesaya 30:18) Idöna-döna Mikha enaʼö alua nifabuʼu Yehowa. Imane, ”Manötöna ndraʼo khö Lowalangi andrö.” (Mikha 7:7) No ara ladöna-döna ira sawuyu Yehowa me föna waʼatohare Mesia nifabuʼu Lowalangi.​—Luka 3:15; I Fetero 1:10-12.a (Faigi zi no musura ba gahe zura.)

² Iadaʼa tadöna-döna waʼalua nifaʼeleʼö Lowalangi sanandrösa ba waʼatohare mbanuania. Yesu zi tobali Razo, iʼefaʼö nono mbanua Lowalangi moroi ba gulidanö si lö sökhi andre. Ihori niha si lö sökhi ba iheta gabula dödö. (I Yohane 5:19) Börö daʼö, moguna tadöna-döna ba tafaʼanö ita börö me lö taʼila hawaʼara tohare luo Yehowa andrö.

3. Na no ara tabalo-baloi waʼatohare luo Yehowa, hadia zi tola tumbu ba dödöda?

³ Tadöna-döna enaʼö alua gohitö dödö Lowalangi ba gulidanö. (Mataiʼo 6:10) Na no ara tabalo-baloi waʼatohare luo Yehowa, tola manö manofu dödöda, ’Hadia mbörö wa tadöna-döna ba faduhu dödöda waʼatohare luo Lowalangi andrö?’

HANA WA TADÖNA-DÖNA?

4. Hana wa moguna khöda ’wamangelama’?

⁴ Ifangelama Yesu ndra nifahaʼönia ”böi miförö” ba ”miʼangelama.” Daʼö mbörö wa tadöna-döna waʼatohare luo Lowalangi andrö. (Mataiʼo 24:42; Luka 21:34-36) Angowuloa Yehowa ibeʼe wamangelama ba nono mbanuania ”ba wanötöna, enaʼö irugi luo Lowalangi andrö, ba wehulu dödö ba daʼö.” Taʼera-era hadia zi no ifabuʼu sanandrösa ba gulidanö si bohou.​—Baso II Fetero 3:11-13.

5. Hadia mbörö nasa wa tadöna-döna luo Yehowa?

⁵ Ira nifahaʼö Yesu me götö föna ladöna-döna waʼatohare luo Lowalangi andrö, mendrua manö ita ba ginötö iadaʼa. Hadia mbörö? Ibeʼe dandra khöda Yesu wa no tobali Razo ia ba zorugo me döfi 1914 ba so ita ba luo safuria mazui ”waʼatua danö”. Duma-dumania, no ifaʼeleʼö Yesu wa itugu lö sökhi gulidanö andre ba teturiaigö dania mbanua Lowalangi ba gulidanö maʼasagörö. (Mataiʼo 24:3, 7-14) Lö niʼombakhaʼö Yesu haʼuga fakhe waʼara luo safuria andrö, tobali moguna tafaʼanö ita fatua lö tohare luo Yehowa.

6. Hewisa gamuata niha ba ngaluo safuria?

⁶ Hadia daʼö geluahania ”ngaluo safuria” andrö itugu lö sökhi niha ba zi so föna? (II Timoteo 3:1, 13; Mataiʼo 24:21; Famaʼeleʼö 12:12) Sura Niʼamoniʼö zangombakha khöda wa itugu lö sökhi gamuata niha ”ba götö safuria”, faduhu dödöda wa itugu tedou waʼalösökhi ba gulidanö.

7. Hadia nidunö-dunö ba Mataiʼo 24:37-39 sanandrösa ba gamuata niha?

⁷ Moloʼö yaʼugö, fatua lö tohare ”wamakao sabölö-bölö”, hadia manö zalua ba gulidanö? (Famaʼeleʼö 7:14) Duma-dumania, hadia so ba wangera-ngerau wa so dania fasuwöta ero sambua soi, tefakao niha börö wökhö ba faʼolofo? Na alua daʼö, niha si lö omasi mamondro-ndrongo Daromali Lowalangi, awena laʼila wa si ndruhu niwaʼö Zura Niʼamoniʼö. No iwaʼö Yesu ba götö safuria ato niha si ”lö aboto ba dödö” sanandrösa ba zalua andre. No arörö ira ba halöwöra irege lö laʼila waʼatohare luo Yehowa andrö. (Baso Mataiʼo 24:37-39.) Tatu manö, lö omasi ita na itugu lö sökhi gulidanö andre fatua lö tohare ”wamakao sabölö-bölö.”​—Luka 17:20; II Fetero 3:3, 4.

8. Börö me no taʼila dandra nibeʼe Yesu, hadia zi faduhu dödöda?

⁸ Tandra nibeʼe Yesu lö tola löʼö aboto ba dödö niha so loʼö khönia enaʼö ’mangelama’ ira. (Mataiʼo 24:27, 42) No ibörögö alua dandra niwaʼö Yesu me döfi 1914. Faduhu dödöda wa no so ita ba ”ngaluo safuria”. Ba zi lö aratö, ihori Yehowa gulidanö nifatörö Gafökha andre.

9. Hana wa tadöna-döna waʼatohare luo Yehowa andrö?

⁹ Hana wa tadöna-döna waʼatohare luo Yehowa andrö? Börö me taʼoʼö niwaʼö Yesu. Aboto ba dödöda wa no alua dandra niwaʼö Yesu iadaʼa. Faduhu dödöda wa no ahatö luo Yehowa, tenga ha ba zi no tarongo tobali börö me faduhu dödöda wa no alua hadia nifaʼeleʼö Zura Niʼamoniʼö. Moguna mangelama ita irege tohare luo Yehowa andrö.

HAWAʼARA TABASEʼÖ?

10, 11. (a) Hana wa iwaʼö Yesu khö ndra nifahaʼönia ”böi miförö”? (b) Na itaria tumbu ba wangera-ngerada waʼara alua luo Yehowa andrö, hadia niwaʼö Yesu? (Faigi gambara ba ngaʼörö 14.)

¹⁰ Ato ba gotaluada zi lö faröi khö Yehowa ba no ara ladöna-döna waʼatohare luo Yehowa. Hewaʼae no ara tabalo-baloi luo Yehowa andrö, manötöna ita hasambalö alua ia. Moguna tafaʼanö ita ba ginötö tohare Yesu ba wamakiko ulidanö nifatörö Gafökha. Törö tödöu hadia niwaʼö Yesu khö ndra nifahaʼönia, ”Mifaigi, böi miförö; löʼösa miʼila ginötö. Hulö niha sofanö, sondröi omonia, sameʼe ba danga zawuyunia hadia ia khönia, sangumaʼö halöwö zamösana ba sangumaʼö khö zanaro ba mbawa ndruhö, böi mörö ia. Ba böi miförö, löʼö sa miʼila ginötö wa so zatua baomo andrö, na tanö owi, ba ma na talu mbongi, ba ma na miwo manu, ba ma na moluo, faböi mörö ami, iʼila, na so ia lö mudöna-döna. Ba hadia niwaʼögu khömi, ba khömi fefu uwaʼö; böi miförö!”​—Mareko 13:33-37.

¹¹ Me laʼila ira nifahaʼönia wa no mamatörö Yesu me döfi 1914, aboto ba dödöra gofu hawaʼara manö tola alua luo Yehowa. Oya laʼogunaʼö ginötö weʼamöi manuriaigö. Imane Yesu tola manö tohare ia, ”ba ma na miwo manu mazui ba ma na moluo.” Na tohare ia, hadia nifalua ndra nifahaʼönia? Imane Yesu, ”böi miförö”. Börö me no ara tabalo-baloi ginötö andrö, böi tawaʼö tödöda ara nasa alua ginötö andrö mazui lö tohare ia.

12. Hadia nisofu Habakuki, hewisa Lowalangi wanema linia?

¹² Gasa-gasa wombaloi Habakuki ginötö wanguhuku Yehowa, idunö-dunö ba niha wa adudu Yeruzalema. Ba zi haʼuga fakhe si lalö ira samaʼeleʼö khö Yehowa, no laturiaigö wa adudu Yeruzalema. Iʼila Habakuki wa itugu tedou manö waʼalösökhi ba falö atulö. Iʼandrö wanolo khö Yehowa. Manofu Habakuki imane, ”hawaʼara sa uʼandrö tolo khöu yaʼugö Yehowa?” Hewaʼae lö iwaʼö Yehowa hawaʼara alua ginötö andrö, fawuʼuli ia khö Habakuki, ”lö zi lö alua!” iwaʼö khönia ”döna-döna manö.”​—Baso Habakuki 1:1-4; 2:3.

13. Hadia manö zi tola tumbu ba gera-era Habakuki, ba hadia lua-luania?

¹³ Khalaigö atö hewisa na aetu wanötöna Habakuki. Imane wangumaʼö, ’No haʼuga fakhe udöna-döna waʼa tekiko Yeruzalema, lö manö tohare nasa. Lö moguna saʼae uturiaigö ba niha fefu. Akha niha böʼö manö zamalua yaʼia.’ Hadia zalua na tumbu ba gera-erania zimane daʼö? Tola manö lö omasi Yehowa khönia. Na lö hadöi ifaʼanö ia, tola mate ia.

14. Hana wa taʼandrö saohagölö khö Yehowa me no ifangelama ita?

¹⁴ Khalaigö atö no so ita ba gulidanö si bohou. No alua fefu zi no tefaʼeleʼö ba Zura Niʼamoniʼö. Tatu manö, itugu faduhu dödöu khö Yehowa me no ifalua fefu zi no ifabuʼu. (Baso Yosua 23:14.) Taʼandrö saohagölö khö Yehowa me no itatugöi ginötö si tefaudu ba no ifangelama ita enaʼö tarorogö wanötönada.​—Halöwö Zinenge 1:7; I Fetero 4:7.

GASA-GASA WOMBALOI BÖI TABÖHÖLI WANURIAIGÖ

15, 16. Hana wa taforege wamalua fanuriaigö fatua lö tohare luo Yehowa?

¹⁵ Angowuloa Yehowa, lö aetu ifasugi ba dödöda enaʼö taʼogunaʼö waʼaurida ba wangai halöwö khö Yehowa. Börö meʼaösö halöwö fanuriaigö, andrö wa taforege wamalua yaʼia. Faduhu dödöda wa tandra nibeʼe Yesu no alua ba lö aratö tohare luo Yehowa. Börö daʼö, moguna taʼosambuaʼö wangera-ngerada ba wanuriaigö ba tabeʼe fönada Yehowa.​—Mataiʼo 6:33; Mareko 13:10.

¹⁶ Na möi ita manuriaigö ba niha, no sambua lala ba wanoloda yaʼira enaʼö teʼorifi ira ba ginötö tefakiko gulidanö nifatörö Gafökha. Gabula dödö sebua meʼahöndrö göfa Wilhelm Gustloff me döfi 1945. Ngahönö niha si mate. So dalifusöda ira matua faoma foʼomonia sauri me luo daʼö. Itörö tödönia me ahöndrö göfa andrö, so samösa ndra alawe sege-ege. Imane, ”Tasigu! Tasigu! Anaʼagu! No ubeʼe ba nahia wondröi gama-gama. No ahori fefu gokhötagu!” Hizaʼi, niha böʼö si so ba göfa laʼila hadia zabölö moguna lafalua enaʼö tola teʼorifi ira hegöi niha böʼö. Simanö göi ba ginötö si so ita iadaʼa. Lö omasi ita simane ira alawe andrö. Hizaʼi, moguna enaʼö mangaösö ita ba halöwö fanuriaigö. Taʼodödögö sibai wanolo niha enaʼö teʼorifi ira na tohare luo Yehowa.

17. Hana wa faduhu dödöda na alua luo Yehowa andrö alua ba zi lö mudöna-döna?

¹⁷ Aboto ba dödöda, fefu zi no tefaʼeleʼö ba Zura Niʼamoniʼö no alua ba taʼila wa lö aratö tefakiko gulidanö si lö sökhi. Tabalo-baloi ginötö ”tandru andrö si fulu rozi” ba ”saliwa-liwa ba danö” lasuwö agama faya yaʼia daʼö Mbabilona sebua. (Famaʼeleʼö 17:16) Böi tawaʼö tödöda waʼara nasa ginötö andrö. Böi olifu ita wa ”Noa sa ibeʼe ba dödöra Lowalangi wamalua gera-erania” ba wosuwö agama faya. Tola manö alua daʼa ba wa alio ba si lö mudöna-döna. (Famaʼeleʼö 17:17) Lö aratö tekiko gulidanö nifatörö Gafökha andre. Moguna taʼoʼö fareta Yesu, ”ba miʼangelama, fa böi arörö dödömi ba wemanga-manga ba wemabu-mabu ba bawaʼabu dödö ba mbalazo, ba iʼozumagö ikhamö ami baŵa daʼö; hulö dandrawa.” (Luka 21:34, 35; Famaʼeleʼö 16:15) Moguna tafaʼanö ba owölö-ölö ita weʼamöi manuriaigö, faduhu dödöda ba niwaʼönia ”solau-lau hadia ia khö zanötöna khönia!”​—Yesaya 64:4.

18. Hadia nifatunöda aefa daʼa?

¹⁸ Gasa-gasa wombaloi luo Yehowa, moguna taʼoʼö mene-mene Yuda ”Ba yaʼami niʼomasiʼö, ba miʼaʼazökhi ami, ba wamatimi andrö, niʼamoniʼö sibai, ba mi angandrö, balazi Geheha niʼamoniʼö. Miʼaroʼö ami, ba waʼomasi Lowalangi ita, midöna-döna waʼahakhö dödö Zoʼaya yaʼita, Yesu Keriso, ba waʼauri si lö aetu.” (Yuda 20, 21) Hewisa wangoromaʼöda wa tadöna-döna gulidanö si bohou ba faduhu dödöda wa hasambalö alua daʼö? Tafatunö daʼa ba duho fönada.