’Tuhi Danö ba Angalulu Khögu Sakali Manö’

8. Ba wanandraigö si medölu, hadia sindruhunia zomasi Zatana ba hewisa wamaluania daʼö?

⁸ Baso Mataiʼo 4:8-11. Ba wanandraigö si medölu, tenga saʼae fanandraigö si lö oroma niʼogunaʼönia. Ifaʼema hadia zomasi ia. Iforomaʼö khö Yesu (te ba gangilata) ”fefu wamatörö ba gulidanö awö lakhöminia”, hizaʼi lö iforomaʼö zi lö sökhi si so ba daʼö. Imane khö Yesu, ”Ubeʼe khöu daʼa fefu asala ötuhi danö ba mangalulu ndraʼugö khögu hewaʼae ha sakali manö.”b Ba daʼö oroma wa omasi Zatana na yaʼia nifosumange! Omasi ia na faröi Yesu khö Namania ba ifaduhuʼö wa Satana andrö lowalanginia. Hulö lala foto nibeʼenia andrö. Hulö na imane khö Yesu wa tola iʼokhögö wamatörö hegöi faʼakayo ba gulidanö daʼa ba lö moguna itörö wamakao. Eluahania, lö labeʼe ba högönia dakula sodoi, laleasi mazui labunu ia ba döla geu. Tola ibeʼe daʼö Satana börö me khönia fefu wamatörö ba gulidanö andre. Lö fabuʼa Yesu ba daʼö. (Yoh. 12:31; 1 Yo. 5:19) Ibeʼe fefu hadia ia khö Yesu asala iröi wamosumange satulö, si lö tola löʼö mubeʼe khö Namania.

9. (a) Hadia sindruhunia niʼandrö Zatana ba niha samosumange satulö, ba hewisa wanandraigönia yaʼira? (b) Hadia zi farahu ba wamosumangeda Lowalangi? (Faigi kotak ”Hadia Wamosumange Andrö?”)

⁹ Iadaʼa, omasi Zatana na tafosumange ia mazui na tafalua hadia zi lö tefaudu ba zomasi Yehowa. Börö me yaʼia andrö ”lowalangi si sagötö tanö”, yaʼia lowalangi nifosumange agama faya nifotöi Babilona Sebua ba Zura Niʼamoniʼö. (2 Ko. 4:4) Hizaʼi, hewaʼae miliaran waʼato niha si fao ba agama faya, lö nasa ahono dödö Zatana. Omasi ia na fao niha samosumange satulö ba wolawa ohitö dödö Lowalangi. Iforege ba wondrönisi tödöda ba wangalui harato hegöi kuaso, tenga enaʼö tobali niha Keriso sindruhu si tola manö göna ’famakao börö wamalua satulö’. (1 Fe. 3:14) Na tedönisi dödöda ba wondröi famosumange satulö ba tobali ösi gulidanö Zatana, no amaedola ’tatuhi danö ba mangalulu’ ita khö Zatana, ba no tabaliʼö ia lowalangida. Hewisa enaʼö lö tedönisi dödöda?

10. Hewisa dödö Yesu ba wanandraigö si medölu, ba hadia mbörö?

¹⁰ Nehegö hadia nifalua Yesu ba wanandraigö si medölu. Iforomaʼö waʼalöfaröinia khö Yehowa, iʼanemaiʼö ifofanö Zatana ba imane, ”Betaʼögö Satana!” Simane si no irai ifalua, itötöi nösi ayati sangogunaʼö töi Lowalangi ba mbuku 5 Moze. Imane, ”So ba zura, ’Ha khö Yehowa Lowalangiu mangalulu ndraʼugö ba öfosumange ia, ba ha khönia öbeʼe halöwö niʼamoniʼö.’” (Mat. 4:10; 5 Mo. 6:13) Lö tedönisi dödö Yesu ba wamili lala waʼauri si lö abula dödö. Lö adöni dödönia ba wangokhögö töi si sökhi ba gulidanö si lö arara andre. Aboto ba dödönia wa ha Amania zinangea mufosumange, ba na ’ituhi danö ba wamosumange’ Satana, hewaʼae ha sakali, eluahania daʼö no mangalulu ia khö Zatana. Lö omasi ia na Satana zi tobali lowalanginia. Itimbagö daʼö ba ”iröi ia Afökha”.c​—Mat. 4:11.

11. Hewisa wolawada Satana hegöi fondrönisi dödö nifaluania?

¹¹ Simane Yesu, tola tafili ba talawa wanandraigö moroi khö Zatana hegöi fondrönisi dödö moroi ba gulidanönia si lö sökhi. No ibeʼe Yehowa khöda mbuala sebua böli ba wamili somasi ita. Börö daʼö, lö hadöi si tola mamaso yaʼita ba wondröi famosumange satulö. Tebai ifalua daʼö Satana hewaʼae abölö ia. Na lö faröi ita ba ’talawa ia si fao famati saro’, no tamane, ”Betaʼögö Satana!” (1 Fe. 5:9) Törö tödöu wa mofanö Zatana me no aefa itimbagö ia Yesu si fao faʼaro dödö. Ifaduhuʼö göi ba dödöda Sura Niʼamoniʼö, ”Milawa Gafökha ba iröi ami.”​—Yak. 4:7.

Soʼuduni Famosumange Satulö

12. Ba Kabu Edena, hezo taʼila wa Satana andrö tobali udu wamosumange satulö?

¹² Fanandraigö si medölu zangoromaʼö wa Satana zi tobali udu siföföna ba wamosumange satulö. Me hauga ribu fakhe silalö, ba Kabu Edena, ibörögö iforomaʼö wa lö omasi ia na Yehowa nifosumange. Itandraigö Khawa, ba ifaweʼe woʼomonia Adamo ba wolawa oroisa Yehowa. Me lafalua daʼö, Satana zamatörö yaʼira. (Baso 1 Moze 3:1-5; 2 Ko. 11:3; Fam. 12:9) Satana saʼae zi tobali lowalangira, ba tobali samosumange Satana ira, hewaʼae na lö laʼila haniha zindruhunia zamaelungu yaʼira. Me ibörögö Satana wamadaö ba Gedena, tenga saʼae ha faʼasinangea Yehowa ba wamatörö nitandrawaisinia, hizaʼi ilawa göi wamosumange satulö. Hana wa tola tawaʼö zimanö?