Osambuaʼö Dödömö ba Girö-Girö ba Wamati Niʼokhögömö

1, 2. (a) So tölu girö-girö ba wamati moroi khö Yehowa, hadia daʼö? (b) Hadia nitutunöda ba wamahaʼö daʼa?

HA YEHOWA zabölö kayo ba mbanua si yawa awö danö. Lö khönia faʼambö. (I Ngaʼötö 29:11, 12) Hizaʼi, oböwö sibai Yehowa. Taʼandrö sibai saohagölö börö me oya girö-girö ba wamati nibeʼenia khöda! Simane (1) Banua Lowalangi, (2) halöwö fanuriaigö, hegöi (3) sindruhu sebua böli si so ba Daromalinia. Hizaʼi, na lö tahaogö taʼangelamaisi, tola manö olifu ita hewisa waʼamoguna girö-girö andre. Moguna böi mamalö-malö tatörö tödöda wa moguna sibai girö-girö andrö ba moguna itugu taʼomasiʼö ia börö me imane Yesu, ”Ba zi so girö-girömi sa, ba daʼö göi so dödömi dania.”​—Luka 12:34.

² Iadaʼa, datatutunö hewisa wondrorogöda enaʼö lö mamalö aro waʼomasi hegöi fangandröda saohagölö ba Mbanua Lowalangi, halöwö fanuriaigö hegöi ba zindruhu. Ba angerönusi hadia zi tola öfalua enaʼö tola itugu öʼomasiʼö girö-girö ba wamati.

BANUA LOWALANGI NO AMAEDOLA MUTIARA

3. Hadia nifalua ndra matua si so ba gamaedola Yesu ba wowöli mutiara andrö? (Faigi gambara ba wamobörö wamahaʼö.)

³ Baso Mataiʼo 13:45, 46. Itutunö Yesu gamaedola sanandrösa ba niha saniaga, sowöli ba samawa mutiara. Samuza inötö, isöndra mutiara sabölö tohude moroi ba mutiara tanö böʼö si no irai iʼila. Omasi sibai ia mutiara andrö irege ifamawa fefu zi so khönia ba wowöli daʼö. Hadia tola ökhalaigö hewisa waʼomasinia ba mutiara andrö?

4. Hadia nifaluada ba wangoromaʼö wa taʼomasiʼö Mbanua Lowalangi?

⁴ Hadia wamahaʼö si tola tahalö moroi ba gamaedola Yesu? Sindruhu sanandrösa ba Mbanua Lowalangi no amaedola mutiara. Na taʼomasiʼö Mbanua Lowalangi simane faʼomasi niha saniaga andrö ba mutiara nisöndrania, taröi gofu hadia ia enaʼö tola taʼosa-mbuaʼö dödöda ba Mbanua Lowalangi. (Baso Mareko 10:28-30.) Datatutunö darua niha si no mamalua daʼa.

5. Hadia nifalua Zakaiʼo ba wangoromaʼö wa iʼomasiʼö Mbanua Lowalangi?

⁵ Sakaiʼo andre samösa sanema beo. Kayo ia börö me ilimo gefe niha böʼö. (Luka 19:1-9, Terjemahan Dunia Baru) Samuza inötö, irongo hewisa wodunö-dunö Yesu sanandrösa ba Mbanua Lowalangi. Omasi sibai ia hadia nirongonia andrö ba sindruhu-ndruhu ibulöʼö waʼaurinia. Imane, ”Hiza! No ubeʼe ba zi numana zi matonga zi so khögu, Tua, ba fefu gofu hadia ia zi no ulimo niha, ufuli khöra öfa kali winaeta.” Ifangawuli gefe si no ihalö ba niha ba lö mangisö dödönia saʼae ba ganaʼa.

6. Hadia nibulöʼö zi samösa ira alawe ba waʼaurinia, ba hadia mbörö wa ifalua daʼö?

⁶ Ba zi hauga fakhe silalö so samösa ndra alawe samondro-ndrongo turia sanandrösa ba Mbanua Lowalangi. Yaʼia andre lesbian, hegöi kafalo ba organisasi sotuhini homoseksual. Hizaʼi, me no ifahaʼö ia ba Zura Niʼamoniʼö ba me no aboto ba dödönia wa moguna sibai Mbanua Lowalangi, iʼila wa oya zinangea ibulöʼö ba waʼaurinia. (I Korindro 6:9, 10) Börö me iʼomasiʼö Yehowa, iröi organisasi daʼö ba lö saʼae ilau waʼorudu ba ndra alawe. Tebayagö ia idanö me döfi 2009, ba ndröfi aefa daʼö tobali ia perintis biasa. Oya zi no ibulöʼö ba waʼaurinia börö me iʼomasiʼö sibai Yehowa moroi ba gamuata si lö tefaudu si no ifalua.​—Mareko 12:29, 30.

7. Hadia nifaluada enaʼö lö mamalö aro waʼomasida ba Mbanua Lowalangi?

⁷ Enaʼö tola tobali ono Mbanua Lowalangi, ato ba gotaluada zi no mo-mbulöʼö lala waʼauri. (Roma 12:2) Lö mamalö taforege ba wamalua daʼö. Böi tatehegö awuwu waʼomasida ba Mbanua Lowalangi gofu hadia zalua, simane faʼomasi ba ganaʼa mazui ngawalö hadia ia soʼamakhaita ba gamuata fohorö. (Gamaedola 4:23; Mataiʼo 5:27-29) Ibeʼe khöda girö-girö tanö böʼö sebua böli Yehowa enaʼö lö mamalö aro waʼomasida ba Mbanua Lowalangi.

TEʼORIFI NIHA BÖRÖ WANURIAIGÖ NIFALUADA

8. (a) Hana wa iʼamaedolagö Faulo halöwö fanuriaigö nifaluada simane ’girö-girö si so ba nahia niʼehaogö moroi ba danö’? (b) Hewisa wangoromaʼö Waulo faʼomasinia ba wanuriaigö?

⁸ No ibeʼe khöda halöwö Yesu ba wanuriaigö hegöi ba wamahaʼö turia somuso dödö sanandrösa ba Mbanua Lowalangi. (Mataiʼo 28:19, 20) Itutunö sinenge sotöi Faulo wa halöwö fanuriaigö no amaedola girö-girö si so ba nahia niʼehaogö moroi danö mazui si so ba mbowoa tanö. (II Korindro 4:7; I Timoteo 1:12) Börö me lö moʼahonoa, hulö simane mbowoa tanö ita. Hizaʼi, turia nifaʼemada no amaedola girö-girö sebua böli börö me daʼö zangaʼasogö faʼauri si lö aetu ba niha samondro-ndrongo nifaʼemada hegöi khöda samösa. Andrö wa imane Faulo, ”Börö duria somuso dödö andrö, wa ulau daʼö fefu, enaʼö moʼurakha göi ndraʼo ba daʼö.” (I Korindro 9:23) Iforege sibai Faulo ba wamahaʼö niha böʼö sanandrösa ba Mbanua Lowalangi. (Baso Roma 1:14, 15; II Timoteo 4:2.) Börö me iʼomasiʼö sibai duria somuso dödö, daʼö zanolo yaʼia irege lö iböhöli weʼamöi manuriaigö hewaʼae göna ia folohi sabölö-bölö. (I Tesalonika 2:2) Hewisa woloʼöda faʼomasi Waulo ba wanuriaigö?

9. Hadia manö lala si tola tafalua ba wangoromaʼö wa taʼomasiʼö halöwö fanuriaigö?

⁹ Sambua lala nifalua Waulo ba wangoromaʼö wa iʼomasiʼö halöwö fanuriaigö yaʼia daʼö fahuhuo ia ba niha böʼö ero so ginötö. Simane Faulo hegöi niha Keriso ba götö siföföna, omasi ita tafaʼema duria somuso dödö ba niha, he ba nomo-omo misa, ba nahia sato niha, ba gofu hezoso falukha ita khöra. (Halöwö Zinenge 5:42; 20:20) Tafalua gofu hadia ia zi tola tafalua ba wanuriaigö ba niha sato. Duma-dumania, tola tobali ita perintis ekstra mazui perintis biasa. Tola tafahaʼö ita ba li tanö böʼö, findra ba mbanua böʼö si so ba soida, mazui findra ba soi böʼö.​—Halöwö Zinenge 16:9, 10.

10. Hadia mbua nitema Irene börö me iforege wanuriaigö turia somuso dödö?

¹⁰ Irene, samösa talifusöda ira alawe si lö sangowalu si so ba Amerika Serikat, omasi ia ituriaigö duria somuso dödö ba niha sangogunaʼö li Rusia. Andrö, me döfi 1993, fao ia ba ngawawa zangogunaʼö li Rusia ba New York City. Me luo daʼö, ha 20 zanuriaigö si so ba daʼö. Me no aefa 20 fakhe imane Irene, ”Lö nasa sonekhe sibai ndraʼo fahuhuo ba li Rusia.” Hizaʼi, itolo ira Yehowa ba wanuriaigö ba niha sangogunaʼö li Rusia. Buania, iadaʼa so önö ngawua mbanua niha Keriso sangogunaʼö li Rusia ba New York City. Ato niha nifahaʼö Irene ba Zura Niʼamoniʼö, ba 15 niha zi no tebayagö idanö. So ösa ba gotaluara zi no mohalöwö ba Mbetieli, tobali perintis, hegöi satua sokubaloi. Imane nasa Irene, ”Moroi ba ngawalö gohitö dödö si tola ugohi, ha daʼa zameʼe khögu faʼowua-wua dödö.” Sindruhu-ndruhu iʼomasiʼö halöwö fanuriaigö nifaluania andre Irene!

11. Hadia manö mbua nitemada na lö tabato weʼamöi manuriaigö hewaʼae göna ita folohi?

¹¹ Na taʼomasiʼö halöwö fanuriaigö, omasi ita taʼoʼö Waulo ba lö tabato wanuriaigö hewaʼae göna ita folohi. (Halöwö Zinenge 14:19-22) Duma-dumania, ba gotalua ndröfi 1930 ba 1944, göna folohi sabölö-bölö ndra talifusöda si so ba Amerika Serikat. Hizaʼi, lö labato weʼamöi manuriaigö. Me lö latehegö khöra ira samatörö ba wamalua halöwö fanuriaigö, laʼohe daʼa föna zanguhuku ba sasesenia yaʼira zi möna. Me döfi 1943, itutunö talifusöda Knorr sambua waʼamöna nitemada ba Mahkamah Agung AS. Iwaʼö wa lö ofeta ba Gödo Zanguhuku zalua andre na no labato ira talifusöda ba wamalua halöwö fanuriaigö. Iwaʼö göi wa börö zalua andre, ato ndra talifusöda ba zi sagörö ulidanö zi lö mamalö manuriaigö ba lafaduhuʼö wa lö tobali daha-tahara wolohi andre. Möna göi ndra talifusöda si göna folohi ba soi böʼö simane salua andre. Börö me taʼomasiʼö halöwö fanuriaigö, lö tabato ba weʼamöi manuriaigö hewaʼae göna ita folohi.

12. Hadia zi lö mamalö öfalua?

¹² Na taʼomasiʼö halöwö fanuriaigö, tenga ha hauga za niʼombakhaʼöda niʼangeraigöda. Hizaʼi, tafalua gofu hadia manö zi tola tafalua ba ’wamaduhuʼö turia somuso dödö’. (Halöwö Zinenge 20:24; II Timoteo 4:5) Hizaʼi, hadia nifahaʼöda ba niha böʼö? Datatutunö girö-girö tanö böʼö moroi khö Lowalangi.

SINDRUHU SEBUA BÖLI SI NO TAFAHAʼÖ ITA

13, 14. Hadia geluaha wehede Yesu ba Mataiʼo 13:52 sanandrösa ba ’nahia girö-girö’, ba hewisa wamoʼösida daʼö?

¹³ Girö-girö si tölu nibeʼe Yehowa khöda yaʼia daʼö fefu zindruhu si no tafahaʼö ita. Yehowa andrö no Umbu zi- ndruhu. (II Zamueli 7:28; Yohane 17:17) Börö me Amada soböwö ia, omasi ia ibeʼe khöda zindruhu. Tola tafahaʼö ita ba daʼö na tabaso Daromalinia, publikasida, na möi ita ba kebaktian regional, kebaktian wilayah hegöi ba gangowuloa ero migu. Imane Yesu, na lö taböhöli wamahaʼö yaʼita ba zindruhu, tola taʼokhögö ’nahia girö-girö’, ösinia yaʼia daʼö sindruhu ”si bohou, awö zi no ara”. (Baso Mataiʼo 13:52.) Itolo ita Yehowa ba wamoʼösi ’nahia girö-giröda’ na taʼalui zindruhu simane fangalui girö-girö si tobini. (Baso Gamaedola 2:4-7.) Hewisa wamaluada daʼö?

¹⁴ Moguna asese tafahaʼö ita ba Zura Niʼamoniʼö, ba publikasida hegöi ba wamalua riset. Daʼa zanolo yaʼita ba wanöndra sindruhu ”si bohou” si lö niʼokhögöda ba zilalö. (Yosua 1:8, 9; Zinunö 1:2, 3) Ba Watch Tower si oföna nifazökhi me baŵa si Fitu 1879, iʼamaedolagö zindruhu andre hulö simane bunga si tobini ba gotalua goʼo. Enaʼö tola isöndra mbunga andrö zi samösa niha, moguna iforege ba wangalui yaʼia. Me no isöndra, lö iʼanemaiʼö omuso dödönia na ha sambua nisöndrania. Moguna nasa iforege ba wangalui enaʼö oya isöndra. Simanö göi, böi tawaʼö wa no ibönö khöda na so sambua zindruhu si no tasöndra. Moguna taforege nasa ba wangalui sindruhu tanö böʼö.

15. Hana wa tola lawaʼö wa so ösa zindruhu ’si no ara’, ba hadia zabölö öʼomasiʼö?

¹⁵ Me awena tafahaʼö ita ba Zura Niʼamoniʼö, so ösa zindruhu sadöni dödöda. Tola tafotöi ia sindruhu ’si no ara’ börö me no oföna tafahaʼö ita ba daʼö. Hadia duma-dumania? Ba wamobörö, tafahaʼö ita wa Yehowa andrö Somböi yaʼita ba so gohitö dödönia ba niha gulidanö. No tafahaʼö ita göi wa ifatenge Nononia Lowalangi ba gulida-nö tobali höli enaʼö tola teʼefaʼö ita moroi ba horö hegöi faʼamate. No tafahaʼö ita göi wa Banua Lowalangi zangohori fefu gabula dödö si so iadaʼa, ba tola taʼokhögö waʼauri si lö aetu ba gulidanö safönu faʼatulö hegöi faʼowua-wua dödö.​—Yohane 3:16; Famaʼeleʼö 4:11; 21:3, 4.

16. Hadia zinangea tafalua na so wamohouni sanandrösa ba waʼaboto ba dödö niʼokhögöda ba zindruhu ba Zura Niʼamoniʼö?

¹⁶ Itaria, tebohouni waʼaboto ba dödöda sanandrösa ba wamaʼeleʼö hegöi ba ayati Zura Niʼamoniʼö. Na alua daʼö, moguna tabeʼe ginötöda ba wamahaʼö yaʼita sanandrösa ba wamohouni andrö hegöi ba woʼangerönusi yaʼia. (Halöwö Zinenge 17:11; I Timoteo 4:15) Moguna aboto ba dödöda hadia gamaehuta moroi ba waʼaboto ba dödö niʼokhögöda ba zilalö hegöi faʼaboto ba dödö si bohou tatema, ba moguna göi taʼila waö-waö moroi ba waʼaboto ba dödö si bohou andrö. Na tafalua daʼö, tola tobali ia sindruhu si bohou niʼokhögöda moroi ba zindruhu ba Zura Niʼamoniʼö. Hadia mbuania khöda na taforege ba wamalua daʼa?

17, 18. Hewisa wanolo geheha niʼamoniʼö yaʼita?

¹⁷ Ifahaʼö ita Yesu wa tola itolo ita eheha niʼamoniʼö enaʼö tatörö tödöda hadia zi no tafahaʼö ita ba zilalö. (Yohane 14:25, 26) Hadia mbuania daʼa na möi ita manuriaigö? Angeraigö hadia zalua khö dalifusöda sotöi Peter. Me döfi 1970 mohalöwö ia ba Mbetieli Inggris me 19 fakhe ndröfinia. Me möi ia manuriaigö ba nomo-omo misa, falukha ia khö zi samösa ira matua si so gambi salawa dröfi moroi khönia. Isofu khö ndra matua andrö hadia omasi ifahaʼö ia ba Zura Niʼamoniʼö. Ira matua andrö samösa rabi Yahudi, ba tokea ia börö me so nono matua sawuyu-wuyu somasi mamahaʼö yaʼia ba Zura Niʼamoniʼö. Itandraigö Peter ba isofu, ”Lau nogu, na simanö hadia li niʼogunaʼö ba wanura mbuku Danieli?” Imane Peter, ”’So ösa nisura ba li ndrawa Garamo.’ Tokea Rabi andrö, ba abölö tokea ndraʼodo börö me uʼila hadia wanema linia! Hana wa uʼila wanema linia? Me mangawulido ba nomo, ufuli ufaigi majalah Manuriaigö hegöi Sedarlah! ba zi hauga waŵa silalö. Ba uʼila wamahaʼö zanutunö wa tesura mbuku Danieli ba li ndrawa Garamo.” (Danieli 2:4) Sindruhusa wa tola itolo ita eheha niʼamoniʼö enaʼö tatörö tödöda hadia zi no irai tabaso ba taʼiröʼö daʼö ba nahia girö-giröda.​—Luka 12:11, 12; 21:13-15.

¹⁸ Na taʼomasiʼö hegöi na taʼandrö saohagölö ba zindruhu si no tafahaʼö ita moroi khö Yehowa, tola terou dödöda ba wonönö girö-girö ba nahia wangiröʼöda. Na asese tafalua daʼa, tola itugu atua-tua ita ba wamahaʼö niha böʼö.

ROROGÖ GIRÖ-GIRÖMÖ

19. Hana wa moguna tarorogö girö-girö ba wamati niʼokhögöda?

¹⁹ Ba wamahaʼö daʼa, no tafahaʼö ita wa moguna sibai taʼomasiʼö girö-girö ba wamati. Hizaʼi, moguna taʼangenanöi enaʼö böi awuwu waʼomasida ba girö-girö niʼokhögöda ibeʼe Satana hegöi ulidanönia. Na lö mangelama ita, tola manö adöni dödöda ba mbuʼusa li sanandrösa ba halöwö sebua gazi, fangera-ngera enaʼö itugu sökhi waʼaurida mazui faʼomasi ba wangoromaʼö gokhötada. Ifasugi ba dödöda sinenge sotöi Yohane wa lö aratö tehori fefu hadia ia zi so ba gulidanö andre. (I Yohane 2:15-17) Daʼa mbörö wa moguna sibai taʼandrö saohagölö ba tarorogö girö-girö ba wamati niʼokhögöda.

20. Hadia zi lö mamalö öfalua ba wondrorogö girö-girö ba wamati niʼokhögömö?

²⁰ Moguna öröi fefu ngawalö hadia ia zi tola mowuwu faʼomasimö ba Mbanua Lowalangi. Böi mamalö owölö-ölö ndraʼugö ba wanuriaigö ba böi tehegö taya waʼomasimö ba wanuriaigö. Böi bato wangalui sindruhu ba Zura Niʼamoniʼö. Na öfalua daʼa, tola öʼokhögö ’girö-girö ba zorugo, si tebai irugi sanagö ba si lö ifakiko hama. Ba zi so girö-girömi sa, ba daʼö göi so dödömi dania’.​—Luka 12:33, 34.