”Miʼaeʼe, Mibaliʼö Nifahaʼö Fefu Soi”

1, 2. Hadia wanofuda sanandrösa ba wehede Yesu nisura ba Mataiʼo 24:14?

NO IFAʼELEʼÖ Yesu wa ba ginötö safuria andre, teturiaigö duria somusö dödö sanandrösa ba Mbanua Lowalangi ba niha fefu. (Mataiʼo 24:14) Laʼila niha ba zi sagörö ulidanö wa yaʼita andre Samaduhuʼö Yehowa börö halöwö fanuriaigö nifaluada. So zomasi mamondrongo duria nifaʼemada, so göi zi löʼö. Hewaʼae so zi lö omasi manema, hizaʼi laʼosinangegö zui saʼatö halöwö nifaluada. Tola tawaʼö wa ha yaʼita zamalua halöwö nibeʼe Yesu. Hadia sinangea tawaʼö zimane daʼö? Hewisa wa tola faduhu dödöda wa halöwö fanuriaigö nifaluada andre no halöwö nifaʼeleʼö Yesu?

² Oya agama sangumaʼö wa no laturiaigö niwaʼö Yesu. Hizaʼi, fanuriaigö nifaluara lafalua na lafaʼema huhuo ba gereja, ba TV mazui ba Internet ba latutunö maʼifu hewisa wa tola lafahaʼö ira sanandrösa khö Yesu. So göi zangumaʼö, no lafalua halöwö fanuriaigö na latolo niha soʼamböta mazui tobali ira doto, matiri hegöi guru ba wanolo niha böʼö. Hadia simane daʼa halöwö fanuriaigö niwaʼö Yesu?

3. Hadia zi öfa ngawalö zinangea lafalua ira soloʼö khö Yesu moloʼö Mataiʼo 28:19?

³ Hadia daʼö zomasi Yesu khö ndra nifahaʼönia enaʼö ladöna-döna wa laʼondrasi ira niha? Tenga! Me no aefa tesusugi Yesu, iwaʼö khö ndra soloʼö khönia si ngaotu waʼato, ”Miʼaeʼe, mibaliʼö nifahaʼö fefu soi, wamayagö idanö yaʼira . . . , mifahaʼö ira ba woloʼö fefu hadia ia niwaʼögu khömi.” (Mataiʼo 28:19, 20) Tobali, börö me soloʼö khö Yesu ita, so öfa ngawalö zinangea tafalua. Moguna tafahaʼö niha, tafabayagöʼö ira idanö ba tafahaʼö ira. Hizaʼi, si oföna tafalua moguna möi ita khöra. Imane samösa niha satua-tua ba Zura Niʼamoniʼö, ”Ngawua wehede ’miʼaeʼe’ no sambua noro dödö niha si faduhu tödö, laʼötö lala mazui asi sebolo.”​—Mataiʼo 10:7; Luka 10:3.

4. Hadia geluahania ”samaʼuʼu niha”?

⁴ Hadia niʼandrö Yesu khö ndra nifahaʼönia? Hadia omasi ia na manuriaigö ira moloʼö somasi dödöra mazui hadia omasi ia na teʼowuloi ira ba zi sambua gorahua? Börö me lö ikhamö ölö zi samösa niha na manuriaigö ia ba ”fefu soi”, andrö wa moguna teʼowuloi ira ba zi sambua gorahua. Daʼö geluaha niwaʼö Yesu me ikaoni ndra nifahaʼönia tobali ”samaʼuʼu niha”. (Baso Mataiʼo 4:18-22.) Lö mohalöwö samösa zamaʼuʼu iʼa. Lö iʼogunaʼö gai hegöi lakhö. Lö göi ibalo-baloi hawaʼara idou lakhö andrö iʼa. Simanö göi ba wamaʼuʼu niha, moguna laforege wohalöwö, moguna teʼosambuaʼö ira ba moguna ato zohalöwö.​—Luka 5:1-11.

5. Hadia zi öfa ngawalö wanofu sinangea taʼila wanema li, ba hadia mbörö?

⁵ Enaʼö taʼila haniha zanuriaigö turia somuso dödö ba ginötö andre, moguna taʼila wanema li moroi ba zi öfa ngawalö wanofu andre:

• Hadia duria sinangea laʼombakhaʼö niha soloʼö khö Yesu?

• Hadia gohitö dödö wa mufalua ia?

• Hadia lala sinangea lafalua?

• Hezo manö ba hawaʼara tabato weʼamöi manuriaigö?

Moroi ba wanema linia tola taʼila haniha zamalua halöwö fangorifi andre. Daʼa zi tola mangaʼaroʼö tödöda ba wanohugö halöwö fanuriaigö.​—I Timoteo 4:16.

HADIA DURIA SINANGEA MUʼOMBAKHAʼÖ?

6. Hana wa tola faduhu dödöu wa sindruhu duria nifaʼema ndra Samaduhuʼö Yehowa?

⁶ Baso Luka 4:43. Ituriaigö Yesu ”turia Mbanua Lowalangi” ba omasi ia göi na lafalua zimane daʼö ira nifahaʼönia. Orahua haniha zanuriaigö duria andre ba niha misa? Ha ira Samaduhuʼö Yehowa! Niha si lö omasi khöda manö lafaduhuʼö daʼa. Duma-dumania, faigi hadia niwaʼö samösa wandrita si no mangai halöwö ba soi si faböʼö-böʼö. Ero sambu-sambua soi, isofu khö ndra Samaduhuʼö Yehowa hadia duria nifaʼemara. Imane fandrita andrö, ”Bodo sibai ira andrö fefu, no fagölö-gölö wanema lira: ’Turia somuso dödö sanandrösa ba Mbanua Lowalangi.’” Fehede wandrita andrö zangoromaʼö wa sindruhunia yaʼita andre tenga niha si bodo. Tobali, niha Keriso sindruhu si no teʼosambuaʼö. (I Korindro 1:10) Tuho moroi ba majalah Manuriaigö Famatörö Yehowa, yaʼia daʼö Banua Lowalangi. No tehenaigö majalah daʼa ba zi 254 ngawalö li ba arakhagö 59.000.000 ngawua nifazökhi ero waŵa. Daʼa majalah sabölö oya tefazaewe ba zi sagörö ulidanö!

7. Hezo taʼila wa lö laturiaigö duria sindruhu ira fandrita?

⁷ Lö laturiaigö Mbanua Lowalangi ira fandrita. Na fahuhuo ira sanandrösa ba Mbanua Lowalangi, ato zangumaʼö wa daʼö moloʼö dödöra zamösana. (Luka 17:21) Lö lafahaʼö niha wa sindruhu-ndruhu so wamatörö Mbanua Lowalangi si no mosindro ba zorugo barö wamatörö Yesu. Ha ba ginötö Wanunu Fandru mazui ba gowasa Fasa fahuhuo ira sanandrösa khö Yesu. Lö latutunö wa Banua Lowalangi zi tola mangeheta abula dödö niha ba sangohori si lö sökhi ba gulidanö. (Famaʼeleʼö 19:11-21) Lö laʼila ira fandrita hadia nifalua Yesu na no tobali ia Razo ba Mbanua Lowalangi. Börö me lö laʼila duria nifaʼema Yesu, andrö wa lö aboto ba dödöra hana wa moguna sibai möi ira manuriaigö.

HADIA GOHITÖ DÖDÖ WA TAFALUA HALÖWÖ ANDRÖ?

8. Hadia zi fasala ba wamalua halöwö fanuriaigö?

⁸ Tenga börö gefe mazui ba wamazökhi tomosa sebua wa manuriaigö ndra nifahaʼö Yesu. Imane Yesu, ”Lö nibeʼemi böli, ba böi göi mihalö mböli.” (Mataiʼo 10:8) Börö daʼö, halöwö fanuriaigö tenga fangalui kefe. (II Korindro 2:17) Lö laʼandrö gazira ira nifahaʼö Yesu na möi ira manuriaigö. (Baso Halöwö Zinenge 20:33-35.) Hewaʼae aboto ba dödöra hadia niwaʼö Yesu, oya gereja si lö moloʼö börö me laʼowuloi gefe ba wangehaogö gerejara mazui ba wogazi ndra fandrita hegöi ira sohalöwö tanö böʼö. Lua-luania, ato zi kayo ndra fandrita.​—Famaʼeleʼö 17:4, 5.

9. Hewisa wangoromaʼö ndra Samaduhuʼö Yehowa wa lö fasala gohitö dödöra ba wamalua halöwö fanuriaigö?

⁹ Hadia laʼandrö gameʼela ira Samaduhuʼö Yehowa ba Balai Mbanua Lowalangi mazui ba kebaktian nifaluara? Löʼö! Tetuhini halöwöra börö dolo-tolo si no aoha gölö fameʼe. (II Korindro 9:7) Me ndröfia, arakhagö dua miliar za ginötö nibeʼe ndra Samaduhuʼö Yehowa ba wanuriaigö turia somuso dödö, ba töra siwa zuta wamahaʼö ba Zura Niʼamoniʼö nifaluara ero waŵa. Lö lagazi ira ba wanuriaigö, hizaʼi omuso dödöra ba wangogunaʼö gefera samösa ba wamalua halöwö daʼa. Imane samösa peneliti sanandrösa ba halöwö ndra Samaduhuʼö Yehowa, ”Tuho halöwöra yaʼia daʼö manuriaigö ba mamahaʼö.” Imane nasa wa lö fandrita nigazi khö ndra Samaduhuʼö Yehowa. Tobali, na tenga börö gefe manuriaigö ita, hadia mbörö wa tafalua ia? Aoha gölöda ba wamalua halöwö daʼa börö me taʼomasiʼö Yehowa hegöi niha böʼö. Tefaudu daʼa ba zi no tefaʼeleʼö ba zura Zinunö 110:3. (Baso.)

HADIA LALA SINANGEA LAFALUA?

10. Hadia lala nifalua Yesu hegöi ndra nifahaʼönia ba wanuriaigö?

¹⁰ Hadia lala nifalua Yesu hegöi ndra nifahaʼönia ba wanuriaigö? Möi ira gofu hezo falukha ira niha. Duma-dumania, manuriaigö ira ba lala, ba fasa hegöi ba nomo-omo misa. (Mataiʼo 10:11; Luka 8:1; Halöwö Zinenge 5:42; 20:20) Fanuriaigö ba nomo-omo misa no sambua lala si sökhi ba wamalukhaisi fefu niha.

11, 12. Hadia gamaehuta gereja faoma ono mbanua Yehowa sanandrösa ba wanuriaigö turia somuso dödö?

¹¹ Hadia laturiaigö duria somuso dödö gereja-gereja simane nifalua Yesu? Si toʼölönia, lagazi ndra fandrita na lafaʼema huhuo ba nono mbanuara. Lö labaliʼö nifahaʼö niha ira fandrita, hizaʼi niʼodödögöra yaʼia daʼö enaʼö lö alö nösi gerejara. Itaria lafarou nono mbanuara weʼamöi manuriaigö. Duma-dumania, me döfi 2001, ifaʼoheʼö zurania Paus John Paul II ba nösi gereja enaʼö laturiaigö Injil ba enaʼö terou dödöra simane Faulo, me imane, ”Alai sa ndraʼo, na lö uʼombakhaʼö Injil andrö.” Imane nasa wa tenga ha niha si no tefahaʼö zi möi manuriaigö, hizaʼi fefu nösi gereja. Hewaʼae simanö, lö ato zoloʼö niwaʼönia.

¹² Hewisa göi ndra Samaduhuʼö Yehowa? Ha yaʼira zanuriaigö wa no mamatörö Yesu tobali Razo iʼotarai döfi 1914. Laʼoʼö niwaʼö Yesu ba laʼofönaiʼö wamalua halöwö fanuriaigö ba waʼaurira. (Mareko 13:10) Imane buku Pillars of Faith—American Congregations and Their Partners wa moguna sibai halöwö fanuriaigö khö ndra Samaduhuʼö Yehowa. Imane nasa wa latandraigö latolo niha solofo si falukha khöra, si lö hadöi awö, hegöi sofökhö. Hizaʼi, lö irai olifu ira wa ohitö dödöra si oföna yaʼia daʼö wanuriaigö faʼatua danö hegöi ba wamahaʼö niha sanandrösa ba wangorifi. Lö labato wanuriaigö duria andrö ira Samaduhuʼö Yehowa ba laʼoʼö lala nifalua Yesu hegöi ndra nifahaʼönia ba wanuriaigö.

HEZO MANÖ BA HAWAʼARA TABATO WEʼAMÖI MANURIAIGÖ?

13. Hezo manö manuriaigö ita?

¹³ Imane Yesu wa manuriaigö ba mamahaʼö turia somuso dödö ndra nifahaʼönia ”ba gulidanö misa”. Lafarou ira ba wombaliʼö nifahaʼö ”fefu soi”. (Mataiʼo 24:14; 28:19, 20) Eluahania, moguna laturiaigö duria somuso dödö ba zi sagörö ulidanö.

14, 15. Hadia zangoromaʼö wa no lafalua ira Samaduhuʼö Yehowa halöwö sebua simane nifaʼeleʼö Yesu? (Faigi gambara ba wamobörö wamahaʼö.)

¹⁴ Ha ira Samaduhuʼö Yehowa zamalua nifaʼeleʼö Yesu sanandrösa ba wanuriaigö turia somuso dödö ba zi sagörö ulidanö. Hana wa tola tawaʼö daʼö? Ba Amerika Serikat, so 600.000 wandrita ba töra 1.200.000 ndra Samaduhuʼö Yehowa sanuriaigö turia somuso dödö ba soi andrö. So 400.000 zondröniaʼö agama Katolik ba zi sagörö ulidanö, hizaʼi töra walu zuta ndra Samaduhuʼö Yehowa sanuriaigö turia somuso dödö ba zi 240 soi. Ba daʼa oroma wa laturiaigö duria somuso dödö ira Samaduhuʼö Yehowa ba zi sagörö ulidanö irege tefolakhömi ba tesuno döi Yehowa!​—Zinunö 34:2; 51:17.

¹⁵ Börö me yaʼita Samaduhuʼö Yehowa, ohitö dödöda yaʼia daʼö manuriaigö turia somuso dödö ba niha fefu fatua lö atua danö. Enaʼö tola mufalua daʼa, tafoʼeluaha ba tafazökhi hauga zuta mbuku, majalah, risalah, undranga kebaktian hegöi Fanörö Tödö ba zi töra 700 ngawalö li. Lö taʼandrö mböli na tabeʼe ba niha. Me ndröfia, no tafazökhi 4,5 miliar lektur Zura Niʼamoniʼö. No göi tafazökhi töra 200 zuta Kitab Suci Terjemahan Dunia Baru ba zi töra 130 ngawalö li. Situs Web khöda no tehenaigö ba zi töra 750 ngawalö li. Ha ira Samaduhuʼö Yehowa zamalua halöwö sebua simane daʼa.

16. Hezo taʼila wa fao geheha Lowalangi khö ndra Samaduhuʼö Yehowa?

¹⁶ Hawaʼara tabato weʼamöi manuriaigö? Imane Yesu wa teturiaigö duria somuso dödö andre irugi waʼatua danö. Börö me yaʼita Samaduhuʼö Yehowa, tola anau gölöda wanuriaigö ba ginötö safuria andre ha börö wanolo moroi ba geheha Yehowa. (Halöwö Zinenge 1:8; I Fetero 4:14) So niha samati ba agama sangumaʼö, ”So khöma geheha niʼamoniʼö.” Tobali, hadia tola lafalua halöwö simane nifalua ndra Samaduhuʼö Yehowa ba ginötö safuria andre? So gorahua zi möi manuriaigö simane nifaluada, hizaʼi lö mofozu. Tanö böʼö, omasi ira manuriaigö hizaʼi lö arara. Aefa daʼö, so göi zanuriaigö ba nomo-omo misa, hizaʼi lö laturiaigö duria somuso dödö sanandrösa ba Mbanua Lowalangi. Tobali, lö laʼila lafalua halöwö si no ibörögö Yesu andre.

HANIHA ZINDRUHUNIA SANURIAIGÖ TURIA SOMUSO DÖDÖ BA GINÖTÖ ANDRE?

17, 18. (a) Hana wa tola faduhu dödöda wa ha ira Samaduhuʼö Yehowa zanuriaigö turia somuso dödö sanandrösa ba Mbanua Lowalangi ba ginötö andre? (b) Hewisa wa tola tatohugö wamalua halöwö daʼa?

¹⁷ Haniha zanuriaigö turia somuso dödö sanandrösa ba Mbanua Lowalangi ba ginötö andre? Ha Samaduhuʼö Yehowa! Hana wa taʼila daʼö? Börö me taturiaigö duria sindruhu, turia somuso dödö sanandrösa ba Mbanua Lowalangi. Taʼalui fefu niha ba wanuriaigö, tobali taʼogunaʼö lala si tefaudu. Atulö gohitö dödöda ba wanuriaigö, yaʼia daʼö börö me taʼomasiʼö Yehowa hegöi niha böʼö. Oya mbanua nitöröida ba wanuriaigö ba ngawalö soi hegöi ba ngawalö li. Ba lö tabato wanuriaigö turia somuso dödö sanandrösa ba Mbanua Lowalangi irugi waʼatua danö!

¹⁸ Ahöli-höli dödöda wamaigi halöwö fanuriaigö turia somuso dödö nifalua nono mbanua Yehowa ba ginötö safuria andre. Hizaʼi, hana wa tola lafalua ia? Imane Faulo, ”Faoma sa Lowalangi zangaʼasogö ba dödömi, he faʼedöna, ba he famalua, börö waʼebua dödönia andrö.” (Filifi 2:13) Yaʼibeʼe khöda waʼabölö Yehowa enaʼö taʼodödögö ba wanuriaigö turia somuso dödö!​—II Timoteo 4:5.