• No Tohare Wamatörö Lowalangi Iadaʼa!
    Lala ba Wanöndra Faʼohahau Dödö Sagötö Faʼara!—Famahaʼö ba Zura Niʼamoniʼö

    • 2. Hadia zalua ba gulidanö ba hewisa gamuata niha iʼotarai me döfi 1914?

      Manofu ndra nifahaʼö Yesu, ”Hadia dandra weʼasomö hegöi tandra gamozua götö daʼa?” (Mataiʼo 24:3) Ibeʼe wanema li Yesu yaʼia me ifaʼeleʼö ngawalö zalua na no ibörögö mamatörö ia ba zorugo tobali Razo ba Wamatörö Lowalangi. Duma-dumania, alua wasuwöta, faʼolofo hegöi duru danö. (Baso Mataiʼo 24:7.) Itutunö khöda Sura Niʼamoniʼö wa ’abua wanaögö’ salua iadaʼa börö gamuata niha ba ”ngaluo safuria andre”. (2 Timoteo 3:1-5) Iʼotarai me döfi 1914, itugu lö sökhi zalua ba gulidanö hegöi amuata niha simane si no tefaʼeleʼö.

      3. Hana wa itugu lö sökhi gulidanö me tebörögö Wamatörö Lowalangi?

      Lö ara me no mamatörö Yesu tobali Razo ba Wamatörö Lowalangi, ibörögö wasuwöta ba zorugo ba wolawa Satana hegöi ira malaʼika si lö sökhi. Kala Zatana, ba imane Sura Niʼamoniʼö, ”Tetiboʼö [ia] ba gulidanö. . . . Tetiboʼö göi ndra malaʼikania awönia.” (Famaʼeleʼö 12:9, 10, 12) Mofönu sibai Zatana börö me iʼila wa lö ara tö tehori ia irege iʼasogö gabula dödö hegöi famakao ba gulidanö. Daʼö mbörö wa itugu lö sökhi zalua ba gulidanö. Hewaʼae simanö, Famatörö Lowalangi dania zangeheta abula dödö andrö.