Hadia No Ahatö Waʼatua Danö Andrö?

Hadia itehegö manö Lowalangi ba niha wamatörö awönia niha, irege so waʼateʼala ba zi so föna? Löʼö. Simane si no tafatunö, iheta fefu wamakao niha Lowalangi si no ara lataögö. Somböi niha awö danö, omasi ia na taʼila wa lö aratö ifalua gohitö dödönia. Hewisa wangombakhania?

Datafaigi duma-duma andre: Na mofanö ita tatörö moto, taʼalui sakali ba internet hezo lala tatörö, ba peta, mazui fanuturu lala tanö böʼö. Na taʼila ba lala nitöröda dandra-tandra moroi ba wanuturu lala andrö, simane omo, ba tanö böʼönia, faduhu dödöda wa no ahatö tarugi zawatöda. Simanö göi, ifatunö khöda Taromali Lowalangi hadia zalua ba gulidanö andre. Na alua daʼö, faduhu dödöda wa no ahatö waʼatua danö.

Iʼombakhaʼö khöda Sura Niʼamoniʼö wa so zalua ba gulidanö sahöli-höli dödö si lö irai alua. Ba ginötö daʼö, tohare ”waʼatua danö”. Datafaigi nisura ba Zura Niʼamoniʼö hadia zalua ba ginötö andre.

1. FAWUKA GULIDANÖ Tesura ba mbuku Mataiʼo faza 24 no lafaʼeleʼö zi tobali tandra waʼatua danö, 24 ngawalö. Alua dandra andre ba ’ngaluo safuria’, aefa daʼö ”faʼatua danö”. (Ayati 3, 14) Salua andre simane fasuwöta, lofo, duru danö, monönö waʼalö sökhi, lö faʼomasi, ba falimo zondröniaʼö ba agama. (Ayati 6-26) Atulö no irai alua zimane daʼa. Hizaʼi, ba ginötö ahatö waʼatua danö, hasamuza waʼalua fefu dandra andrö. So nasa dandra tanö böʼö baero daʼa dandra-tandra si no mutötöi mege.

2. AMUATA NIHA Na no ahatö waʼatua danö lafotöi ia ”ngaluo safuria”. Imane Sura Niʼamoniʼö itugu lö sökhi gamuata niha ba ngaluo safuria. Amuata niha ba daʼö, hatana khöra laʼalui, somasi anaʼa ira, ba sanuno yaʼira, ba si fayawa, ba sanandrawa, ba si lö mamondrongo li ndra amara, ba si tebai mangandrö saohagölö, ba sangoʼaya Lowalangi, ba si lö mangomasiʼö awöra, ba si faröi, ba samöbögö si lö duhu, ba solau-lau manö hadia ia, ba si tebai ahono, ba si lö omasi si sökhi, ba simanga mböli, ba si lö tödö, ba sebua hokha, ba somasi isö-isö dödöra, moroi ba waʼomasira Lowalangi.” (II Timoteo 3:1-4) Atulö, iʼotarai meföna so gamuata simane daʼa. Tobali ”ba ngaluo safuria”, abölö-bölö wa lö sökhi gamuata niha irege lafotöi ia ”baŵa si lö sökhi”. Hadia no öʼila gamuata si lö sökhi simane daʼö ba niha?

3. LAFAKIKO GULIDANÖ Imane Sura Niʼamoniʼö ’ifakiko Lowalangi zamakiko ulidanö’. (Famaʼeleʼö 11:18) Hadia manö nifalua niha ba wamakiko ulidanö? No irai lafalua daʼa ba ginötö Noakhi. Imane Sura Niʼamoniʼö ”Ba no tekiko gulidanö föna Lowalangi, anönö danö horö. Ba iʼila Lowalangi wa no tekiko sibai gulidanö, noa sa tefuyu lala nösi gulidanö fefu.” Andrö imane Lowalangi ba niha si lö sökhi, ”Ba da uhori ira ba gulidanö.” (I Moze 6:11-13) Hadia öʼila wa no afönu gulidanö andre faʼalösökhi? Ba ginötö andre, so fakake ba niha gulidanö si tola möi famunu niha sato. Aefa daʼö, so lala tanö böʼö nifaluara ba wamakiko ulidanö. Simane angi, nahia gurifö, sinanö, ba asi itugu tekiko börö me lö lahaogö.

Angeraigö atö, ’Ba zi otu fakhe si lalö, hadia tola lafakiko niha gulidanö awöra niha?’ Tola lafalua daö niha gulidanö iadaʼa. Lafazökhi fakake wasuwöta ba wamunu niha. Itugu atua-tua niha iadaʼa, ba tebai latenawa zi lö sökhi. Hewaʼae simanö, fozu gulidanö andre lö teʼodaligö nawöda niha. Fatua lö tekiko fefu nösi gulidanö, ifakiko Lowalangi niha samakiko ulidanö. Daʼö zi no ifabuʼu!

4. HALÖWÖ FANURIAIGÖ BA ZI SAGÖRÖ ULIDANÖ Tandra böʼö nifaʼeleʼö yaʼia daʼö so halöwö sebua nifalua, ”Ba teturiaigö dania mbanua Lowalangi andrö, turia somuso dödö, ba gulidanö misa, maʼasagörö, ba wamaduhuʼö ba niha fefu, ba awena dania faʼatua danö.” (Mataiʼo 24:14) Halöwö fanuriaigö andre faböʼö moroi ba halöwö nifalua agama ba gulidanö. Sagötö ngaluo safuria, turia somuso dödö nifaʼema yaʼia daʼö ”famatörö mbanua Lowalangi”. Hadia so agama sanuriaigö turia daʼa? Na so, hadia lö atoto ira, ba hadia lafalua wanuriaigö andre ”ba zi sagörö ulidanö”?

Wa laʼaʼasogö Situs Web jw.org enaʼö teturiaigö duria si sökhi ”banua Lowalangi”. Ba situs daʼa no tehenaigö mbuku sinangea mubaso moroi ba zi töra 700 ngawalö li. Hadia so gangowuloa tanö böʼö sanuriaigö turia si sökhi andre ba zi sagörö ulidanö? Fatua lö hadöi Internet, ira Samaduhuʼö Yehowa ato zangila wa owölö-ölö ira wanuriaigö turia Mbanua Lowalangi ba zi sagörö ulidanö. Iʼoroi me döfi 1939, ba guli mbuku Menara Pengawal so ngawua wehede imane ”Manuriaigö Famatörö Yehowa”. So sambua mbuku sangumaʼö ”lö si tola mamalua halöwö nifalua ndra Samaduhuʼö Yehowa ba wanuriaigö andre”. Na manuriaigö ira lamane, ”lö aratö atua danö” alua ia ba ginötö wamatörö Lowalangi.

INÖTÖ SI TEBAI MUʼOLIFUGÖ SALUA BA GULIDANÖ

Hadia öʼila wa no alua dandra si öfa ngawalö ba ginötö andre si no ifatunö Sura Niʼamoniʼö? Ba zi töra otu fakhe si lalö, no idunö-dunö khöda buku daʼa hadia zalua ba gulidanö andre enaʼö taʼila tafaduhuʼö wa no ahatö waʼatua danö. Hewaʼae no alua dandra. So zangumaʼö wa faya-faya daʼö, mazui nilau-lau niha manö. So göi zangumaʼö simane-mane daʼö manö gulidanö andre. Moloʼö yaʼira wa hulö itugu lö sökhi gulidanö andre, börö me alio tarongo duria salua ba zi sagörö ulidanö. Hewaʼae simanö, itugu oya dandra salua sangoromaö wa no so ita ba ngaluo safuria inötö si tebai mu olifugö salua ba niha gulidanö.

So ösa niha sagatua-tua sangila wa no ahatö wamohouni ba gulidanö andre. Duma-dumania ba ndröfi 2014, sagalawa sekola ifangelama Dewan Keamanan PBB sanandrösa ba zi möi famaʼala niha gulidanö. Lamane wangumaʼö ira sagalawa sekola andrö, ”Me no aefa mahaogö mafareso, aboto ba dödöma wa tola möi famunu niha waʼatua-tua si no lasöndra niha gulidanö.” Itugu ato niha si faduhu tödö wa no so ita ba ngaluo safuria. Samazökhi buku daʼa ba ato niha so mbaso tanö böʼö nasa faduhu dödöra wa no so ita ba ngaluo safuria ba no ahatö waʼatua danö. Böi ataʼufi. No so tanö fönau waʼomuso dödö sabölö sökhi. Hadia mbörö? Börö me teʼorifi ndraʼugö ba ngaluo daʼö!