Hana Wa Moguna Enaʼö ’Böi Mörö’ Ita?

1. Beʼe duma-duma hana wa moguna taʼila ginötö hegöi salua ba zi fasuida. (Faigi gambara ba wamobörö wamahaʼö.)

LÖ ARATÖ tebörögö kebaktian. No möi yawa ba panggung ketua ba wangowai fefu niha sangondrasi. Tebörögö mufuta musik. Aboto ba dödö niha wa no inötönia mudadao ba gurusi. Omasi ira lafondro-ndrongo musik si baga ba latötöna khö zolohe huhuo enaʼö möi yawa. Hizaʼi, te so ösa zi lö moʼameʼegö tödö hadia ia niwaʼö ketua hegöi musik si no lafuta. Mowaö-waö ira nasa mazui fahuo-huo ira. Hizaʼi, lö laʼila wa sindruhunia no tebörögö kebaktian. Na alua zimane daʼa, daʼö dandra wa lö taʼila ginötö hegöi hadia zalua ba zi fasuida. Daʼa zi tobali famahaʼö khöda wa moguna tahenaigö ita börö me lö aratö alua luo sahöli-höli dödö. Hadia daʼö?

2. Hana wa ifangelama ndra nifahaʼönia Yesu enaʼö ’böi mörö’ ira?

² Ifangelama ndra nifahaʼönia Yesu wa moguna mangelama ba lafaʼanö ira ba ’dandra waʼatua danö’. Itutunö khöra, ”Andrö, böi miförö, me lö miʼila mbaŵa waʼaso Soʼaya yaʼami.” Aefa daʼö mato hauga kali ifaʼema khöra, ”Böi miförö.” (Mataiʼo 24:3; baso Mareko 13:32-37.) Iforomaʼö khöda Mataiʼo wa ifangelama ndra nifahaʼönia Yesu. Imane, ”Andrö, böi miförö, me lö miʼila mbaŵa waʼaso Soʼaya yaʼami” ba ifangelama ira nasa, ”Mihönagö mifaʼanö ami, me si lö midöna-döna dania Nono Niha, na so ia.” Ba ifuli iwaʼö nasa, ”Andrö böi miförö, me lö miʼila mbaŵa, aŵö ginötö.”​—Mataiʼo 24:42-44; 25:13.

3. Hana wa moguna taʼameʼegö tödö hadia nifangelama Yesu?

³ Ira Samaduhuʼö Yehowa laʼameʼegö tödö hadia nifangelama Yesu. Taʼila iadaʼa auri ita ba ”götö safuria” ba lö aratö alua ”wamakao sabölö-bölö”! (Danieli 12:4; Mataiʼo 24:41) Simane si no ifaʼeleʼö Yesu, ira Samaduhuʼö Yehowa laturiaigö Mbanua Lowalangi ba zi sagörö ulidanö. Ba ginötö daʼö, alua göi wasuwöta, fökhö, duru danö, hegöi baŵa lofo ba mbanua misa. So göi fatitisa agama, itugu oya waʼalösökhi ba famakao. (Mataiʼo 24:7, 11, 12, 14; Luka 21:11) Iadaʼa omasi sibai ita tadöna-döna waʼatohare Yesu hegöi ba wamalua gohitö dödö Namania.​—Mareko 13:26, 27.

ITUGU AHATÖ LUO ANDRÖ!

4. (a) Hana wa faduhu dödöda wa no iʼila Yesu hawaʼara alua Hamagedo andrö? (b) Hewaʼae lö taʼila hawaʼara alua wamakao sabölö-bölö andrö, hadia zi tola tafaduhusi tödö?

⁴ Na möi ita ba kebaktian, taʼila hauga bözi tebörögö ia. Hizaʼi, lö taʼila hawaʼara alua wamakao sabölö-bölö. Me ba gulidanö so Yesu imane, ”Ba baŵa andrö ba inötö, ba lö sangila, he malaʼika ba zorugo, he Ono, ha Ama zangila.” (Mataiʼo 24:36) Hizaʼi, iʼotarai tefili Yesu tobali zondröniaʼö fasuwöta ba Hamagedo, te no iʼila iadaʼa hawaʼara ginötö alua wasuwöta andrö. (Famaʼeleʼö 19:11-16) Hizaʼi, lö taʼila luo mazui bözi hauga tohare waʼatua danö. Andrö, moguna sibai enaʼö böi mörö ita. No itatugöi Yehowa hawaʼara tebörögö wamakao sabölö-bölö, ba no itugu ahatö. ”Lö zi lö alua!” (Baso Habakuki 2:1-3.) Hana wa tola faduhu dödöda ba daʼö?

5. Beʼe sambua duma-duma zangoromaʼö wa fefu zi no ifaʼeleʼö Yehowa hasambalö alua ba ginötö si no itatugöi.

⁵ Hadia zi no ifaʼeleʼö Yehowa, wa hasambalö alua ba ginötö si no itatugöi! Duma-dumania, angeraigö me iʼefaʼö ndraono Gizaraeli Yehowa moroi ba danö Misirai me 14 Nisana 1513 SM. Ba gafuriata, isura Moze sanandrösa ba ngaluo daʼö, imane, ”Ba me no alua zi öfa ngaotu a tölu ngafulu fakhe, me luo daʼö sibai, ba aheta ba danö Misirai ngahönö andrö khö Yehowa.” (II Moze 12:40-42) Me 430 fakhe fatua lö muʼefaʼö ndraono Gizaraʼeli yaʼia daʼö me 14 Nisana 1943 SM, fawuʼu li Yehowa wa ifahowuʼö ngaʼötö Gaberahamo. (Galatia 3:17, 18) Aefa daʼö, itutunö Yehowa khö Gaberahamo, ”Böi zi lö örongo, wa si fatewu ba danö si tenga tanöra maʼuwumö dania ba sawuyu ira ba daʼö ba lafakao sibai ira niha andrö, öfa ngaotu fakhe waʼara.” (I Moze 15:13; Halöwö Zinenge 7:6) Labörögö zi 400 fakhe daʼö me döfi 1913 SM, me ifakao Izaʼaki Zimaʼeli. Ba awai döfi andrö me teʼefaʼö ndraono Gizaraʼeli moroi ba danö Misirai. (I Moze 21:8-10; Galatia 4:22-29) Ngaotu fakhe fatua lö alua daʼö, no itatugöi Yehowa hawaʼara ginötö teʼefaʼö nono mbanuania!

6. Hana wa tola faduhu dödöda wa ilumöʼö nono mbanuania Yehowa?

⁶ Yosua samösa ndraono Gizaraʼeli si no teʼefaʼö moroi ba danö Misirai. Hauga fakhe aefa daʼö, ifangelama soinia imane, ”Sambua lö saekhu ba danö taromali si sökhi andrö, niwaʼö Lowalangimi, Yehowa, ba khömi andrö, no ahori itörö khömi.” (Yosua 23:2, 14) No ifabuʼu Yehowa wa ilumöʼö nono mbanuania moroi ba wamakao sabölö-bölö, ba ibeʼe khöra waʼauri si lö aetu ba gulidanö si bohou. Tola faduhu dödöda wa hasambalö alua zi no ifabuʼu. Andrö, na omasi ita so ba gulidanö si bohou, moguna böi mörö ita.

ENAʼÖ TEʼEFAʼÖ MOGUNA BÖI MIFÖRÖ

7, 8. (a) Hadia halöwö ndra sanaro me götö föna, ba hadia wamahaʼönia khöda? (b) Beʼe sambua duma-duma hadia zalua na mörö zanaro ba ginötö mohalöwö ia.

⁷ Tola tahalö wamahaʼö moroi khö ndra sanaro mbanua me götö föna. Oya mbanua, simane Yeruzalema, ifasui ia göli salawa enaʼö tebai möi bakha nudu. So zanaro ba dete göli, ba moroi ba daʼö tola lafaigi fefu nahia si so ba mbanua andrö. Sanaro tanö böʼö latarogö mbawa göli. Ira matua andrö, moguna lö mörö ira ba zi maʼökhö hegöi ba zi bongi, ba na laʼila so nudu si tohare, moguna lafangelama niha si so ba mbanua andrö. (Yesaya 62:6) Laʼila wa moguna sibai na lö mörö ira, ba lahaogö wamaigi hadia zalua ba daʼö. Na lö lafalua daʼö, tola manö ato niha si mate.​—Hezekieli 33:6.

⁸ Yosefus, ahli sejarah Yahudi, itutunö hewisa wa tola möi bakha niha Romawi ba Yeruzalema me döfi 70 M. So ba gotalua zanaro mbanua andrö si mörö. Lua-luania, möi bakha ndra saradadu Romawi. Latunu nomo Lowalangi andrö, ba ladudugö mbanua Yeruzalema. Daʼö wamakao sabölö-bölö safuria nitaögö niha Yahudi.

9. Hadia zi lö laʼila niha sato iadaʼa?

⁹ Iadaʼa, oya soi sanarogö olara. Laʼogunaʼö ndra saradadu hegöi sistem keamanan si bohou. Nitarogö ndra samatörö andre, ha na so niha ma hadia manö zi tola mamakiko faʼahono dödö ba soira. Hizaʼi, lö laʼila wa so wamatörö sabölö aro ba zorugo nifatörö Yesu Keriso. Ba zi lö aratö isuwö fefu wamatörö si so ba gulidanö. (Yesaya 9:6, 7; 56:10; Danieli 2:44) Tadöna-döna sibai luo daʼö, ba omasi ita na no tahenaigö ita na tohare ia. Andrö, moguna na taʼosisiʼö hadia nifaʼeleʼö Zura Niʼamoniʼö ba lö faröi ita ba wamosumange Yehowa.​—Zinunö 130:6.

BÖI MANGOLOI WANGERA-NGERADA

10, 11. (a) Hadia zinangea taʼangelamaisi, ba hadia mbörö? (b) Hana wa faduhu dödöu wa no idönisi Gafökha wangera-ngera niha enaʼö lö laʼameʼegö tödö nifaʼeleʼö Zura Niʼamoniʼö?

¹⁰ Khalaigö atö, so samösa zanaro si lö mörö sara wongi. Me arakhagö awai ginötönia wanaro, abua khönia enaʼö lö mörö börö me marase sibai ia. Simanö göi iadaʼa, auri ita ba ngaluo safuria. Ba itugu ahatö ngaluo andrö, itugu abua khöda enaʼö böi mörö. Alimagö sibai na mörö ita! Börö daʼö datatutunö 3 ngawalö mbörö wa mörö ita.

¹¹ Ilimo niha Afökha. Yaʼia andre ”zalaŵa gulidanö”. Fatua lö mate Yesu, ifangelama ndra nifahaʼönia sanandrösa ba zi 3 ngawalö andre. (Yohane 12:31; 14:30; 16:11) Iʼogunaʼö agama sofaya Afökha ba wolimo niha. Daʼö mbörö wa ato niha iadaʼa, lö laʼameʼegö tödö hadia ia zi no ifaʼeleʼö Sura Niʼamoniʼö, zangoromaʼö wa no ahatö sibai waʼatua danö. (Zefania 1:14) Sindruhu-ndruhu no ’imbaŵainö Satana wangera-ngera niha si lö mamati’. (II Korindro 4:3-6) Lua-luania, ba ginötö tafatunö ba niha wa no ahatö waʼatua danö andrö ba no mamatörö Keriso ba zorugo, ato zi lö omasi mamondro-ndrongo. Lamane wangumaʼö, ”Lö adöni dödögu.”

12. Hana wa moguna böi ilimo ita Afökha?

¹² Hewaʼae ato niha si lö omasi mamondro-ndrongo hadia nifaʼeleʼö Zura Niamoniʼö, böi ide-ide dödöda. Taʼila hana wa moguna enaʼö böi mörö ita. Imane Faulo khö ndra talifusönia, ”Hulö waʼaso zanagö ba zi bongi, simanö waʼaso mbaŵa Soʼaya andrö dania.” (Baso I Tesalonika 5:1-6.) Ifangelama ita Yesu, ”Mifaʼanö ami, na lö midöna-döna sa dania so Nono Niha.” (Luka 12:39, 40) Ba zi lö aratö, ilimo niha Satana wa so dania ginötö ”no atulö ba no ahono”. Aefa daʼö, ba zi lö tadöna-döna tohare ngaluo Yehowa ba tokea ira fefu. Hewisa ita? Na tahenaigö ita na tohare luo andrö ba lö telimo ita simane yaʼira, moguna ”enaʼö si no maoso ita, si lö mabu-mabu”. Daʼa mbörö wa moguna tabaso Daromali Lowalangi ero maʼökhö ba taʼangerönusi hadia nitutunö Yehowa khöda.

13. Hewisa eheha gulidanö andre idönisi wangera-ngera niha, ba hewisa enaʼö teʼaröuʼö ita moroi ba daʼö?

¹³ Idönisi wangera-ngerada eheha gulidanö. Iadaʼa, ato zangumaʼö wa lö moguna laʼila haniha Lowalangi andrö. (Mataiʼo 5:3) Hizaʼi, oya laʼogunaʼö ginötö hegöi waʼabölöra ba wangokhögö gama-gama soya nihenaigö gulidanö andre. (I Yohane 2:16) Baero daʼö, iadaʼa itugu oya hiburan sondrönisi dödö niha moroi ba zi lalö, samarou yaʼira enaʼö ha faʼomuso dödö ba fofönui gisö-isö dödöra manö niʼomasiʼöra. (II Timoteo 3:4) Fefu daʼa, möi fangoloi wangera-ngera niha moroi ba ngawalö sabölö moguna, ba lö laʼangeraigö wahuwusara khö Lowalangi. Daʼa mbörö wa ifangelama niha Keriso Waulo enaʼö ”maoso moroi ba wemörö”, ba lö arörö ira ba wofönui gisö-isö dödöra.​—Roma 13:11-14.

14. Hadia wamangelama nisura ba Luka 21:34, 35?

¹⁴ Omasi ita na eheha Lowalangi zondrönisi wangera-ngerada tenga eheha gulidanö andre. Eheha Lowalangi zanolo yaʼita enaʼö aboto ba dödöda hadia zalua dania. (I Korindro 2:12)^[1] (Faigi gonönöta.) Hizaʼi, moguna mangelama ita, börö me tola manö mangoloi wangera-ngerada ba wamosumange Yehowa moroi ba zi toʼölö alua ba waʼaurida. (Baso Luka 21:34, 35.) Te so niha sangumaʼö wa bodo sibai ita börö me faduhu dödöda wa no auri ita iadaʼa ba ngaluo safuria. (II Fetero 3:3-7) Hizaʼi, böi tatehegö ide-ide dödöda, me taʼila dandra wa lö aratö alua luo andrö. Na omasi ita eheha Lowalangi zondrönisi wangera-ngerada, moguna möi ita ba gangowuloa ero migu.

15. Hadia zalua khö Wetero, Yakobo, hegöi Yohane ba hewisa tola alua göi daʼö khöda?

¹⁵ Börö me so zoʼamböta ita, andrö wa abua khöda enaʼö böi mörö. Iʼila Yesu wa niha gulidanö andre lö moʼahonoa ba so zoʼamböta ira. Angeraigö hadia zalua ba mbongi fatua lö mate Yesu. Hewaʼae niha soʼahonoa Yesu, iʼila wa enaʼö lö faröi ia moguna iʼandrö wanolo moroi khö Namania. Iʼandrö Yesu khö Wetero, Yakobo ba Yohane enaʼö böi mörö ira ba ginötö mangandrö ia. Hizaʼi, lö laʼila wa moguna sibai na lö mörö ira. Marase ira ba lalau mörö. Marase göi Yesu, hizaʼi lö mörö ia ba ilau mangandrö khö Namania. Sinangeania, ira sinenge andre mangandrö ira göi ba ginötö daʼö.​—Mareko 14:32-41.

16. Moloʼö Luka 21:36, hewisa wameʼe Yesu wanuturu lala enaʼö ”böi mörö”?

¹⁶ Hadia zi tola manolo yaʼita enaʼö ”böi mörö” ba tafaʼanö ita na tohare luo Yehowa? Moguna so khöda waʼomasi saro ba wamalua sindruhu. Hizaʼi, lö ibönö na ha daʼö manö. Hauga hari fatua lö mate Yesu, ifatunö khö ndra nifahaʼönia wa moguna böi mamalö-malö ira mangandrö fanolo khö Yehowa. (Baso Luka 21:36.) Enaʼö böi mörö ita ba ginötö safuria andre, moguna böi taböhöli wangandrö khö Yehowa.​—I Fetero 4:7

BÖI MIFÖRÖ

17. Hadia nifaluada enaʼö tola tafaʼanö ita na tohare luo andrö?

¹⁷ Ifatunö Yesu wa tohare ngaluo safuria andrö ’ba zi lö midöna-döna dania’. (Mataiʼo 24:44) Andrö moguna enaʼö tafaʼanö ita ero inötö. Iadaʼa tenga daʼö ginötönia khöda ba woloʼö lagu waʼauri niha ba gulidanö nifatörö Zatana andre, hewaʼae lamane wa daʼö zi tola mangaʼasogö faʼohahau dödö. Ha fangifi daʼö. Sindruhunia, ba Zura Niʼamoniʼö no ibeʼe wanuturu lala khöda Yehowa hegöi Yesu, hewisa enaʼö böi mörö ita. Andrö, moguna taʼosisiʼö hewisa waʼalua hadia zi no ifaʼeleʼö Sura Niʼamoniʼö. Tola itugu aro wahuwusada khö Yehowa ba taʼofönaiʼö Mbanuania ba waʼaurida. Na tafalua daö, tola tafaʼanö ita na tohare luo andrö. (Famaʼeleʼö 22:20) Daʼa zotatugöi waʼaurida!