Ba zi lö ara tö, iʼogunaʼö Wamatörönia Yehowa ba wangeheta fefu abula dödöda. Fefu niha moguna larongo duria somuso dödö andre. No iwaʼö Yesu khö ndra nifahaʼönia enaʼö laturiaigö duria somuso dödö andre ba niha fefu! (Mataiʼo 28:19, 20) Iadaʼa, hewisa wamalua ndra Samaduhuʼö Yehowa halöwö nibeʼe Yesu andre?

1. Hewisa wa tola alua nisura ba Mataiʼo 24:14 iadaʼa?

No ifaʼeleʼö Yesu: ”Teturiaigö dania Wamatörö Lowalangi andrö, turia somuso dödö ba zi sagörö ulidanö misa.” (Mataiʼo 24:14) Omuso dödö ndra Samaduhuʼö Yehowa ba wamalua halöwö sabölö sökhi andre. Ba zi sagörö ulidanö, maturiaigö duria somuso dödö ba zi töra 1.000 ngawalö li! Börö me halöwö sebua daʼa, oya zinangea mufalua ba moguna muföföʼö wamalua daʼö. Tola mafalua ia börö wanolo moroi khö Yehowa.

2. Hadia nifaluama enaʼö abölö ato niha nifalukhaisima?

Gofu hezo manö so niha, maturiaigö khöra duria somuso dödö. Simane niha Keriso ba götö siföföna, maturiaigö duria somuso dödö andre ”ba nomo-omo misa”. (Halöwö Zinenge 5:42) Börö me möiga ba nomo-omo misa, andrö wa zuta niha si tola mafalukhaisi ero röfi. Hizaʼi, börö me itaria lö hadöi niha ba nomora, andrö wa maturiaigö duria somuso dödö andre ba nahia sato niha. Maʼalui lala enaʼö tola mafatunö ba niha böʼö sanandrösa khö Yehowa hegöi ohitö dödönia.

3. Haʼökhö tebeʼe halöwö ba wanuriaigö turia somuso dödö?

Fefu niha Keriso sindruhu, moguna laturiaigö duria somuso dödö ba niha böʼö. Moloʼö yaʼaga, moguna sibai halöwö andre. Daʼö mbörö wa maforege ba wanuriaigö turia somuso dödö ba niha fefu börö me maʼila wa möi fangorifira duria andre. (Baso 1 Timoteo 4:16.) Lö lagazi ndraʼaga ba wamalua halöwö daʼa börö me imane Sura Niʼamoniʼö, ”Lö nibeʼemi böli me mitema, andrö na mibeʼe göi böi miʼandrö mböli.” (Mataiʼo 10:7, 8) Lö fefu niha omasi ira wanema turia si sökhi andre. Hewaʼae simanö, lö maböhöli wanuriaigö turia somuso dödö andre börö me omasiga maʼoʼö niwaʼö Yehowa ba maʼomusoiʼö dödönia.

ODÖDÖGÖ NASA WANGALUI

4. Maforege ba wamalukhaisi niha fefu

VIDEO: Manuriaigö ”Irugi Wondrege Danö” (7:33)

• Hadia zadöni dödöu ba nifalua ndra Samaduhuʼö Yehowa ba wanuriaigö turia somuso dödö?

Baso Mataiʼo 22:39 hegöi Roma 10:13-15, ba beʼe wanema li ba wanofu-nofu daʼa:

• Hewisa halöwö nifaluama tobali tandra wa maʼomasiʼö niha böʼö?

• Hewisa dödö Yehowa me iʼila niha si möi manuriaigö turia somuso dödö?—Faigi ayati 15.

5. Si falulu fohalöwö ndraʼaga khö Lowalangi

Oya duma-duma sangoromaʼö wa Yehowa zameʼe fanuturu lala khöma ba wanuriaigö turia somuso dödö. Duma-dumania, faigi zalua khö dalifusöda Paul si toröi ba Selandia Baru. Ba zi laluo, me möi ia manuriaigö ba nomo-omo misa, falukha ia khö zi samösa ira alawe. Sihulö wongi daʼö mangandrö ndra alawe andrö khö Lowalangi, itötöi döi Yehowa. Iʼandrö enaʼö so niha sanolo yaʼia ba wangokhögö faʼaboto ba dödö. Imane Paul, ”Tölu za aefa daʼö, utoko mbawandruhö nomonia.”

Baso 1 Korindro 3:9, ba beʼe wanema li ba wanofu daʼa:

• Hadia zalua ba Selandia Baru sangoromaʼö wa Yehowa zameʼe khöma fanuturu lala ba halöwö nifaluama?

Baso Halöwö Zinenge 1:8, ba beʼe wanema li ba wanofu daʼa:

• Hana wa moguna khöma wanolo moroi khö Yehowa ba wamalua halöwö daʼa?

Hadia öʼila?

Ba gangowuloa barö migu, lafahaʼö ndraʼaga enaʼö monönö waʼonekhema ba wanuriaigö turia somuso dödö. Na no irai möiʼö ba gangowuloa andrö, hewisa dödöu me öʼila duma-duma wamadumaisi nifalua ba daʼö?

6. Maʼoʼö goroisa Lowalangi ba wanuriaigö turia somuso dödö

Ba götö siföföna, laforege ira niha si fatuwu ba duria somuso dödö enaʼö laböhöli wamalua halöwö daʼö ira nifahaʼö Yesu. Hizaʼi, laforege ira niha Keriso ba wangogunaʼö ”huku ba wamaduhuʼö turia somuso dödö”. (Filifi 1:7) Daʼö göi nifalua ndra Samaduhuʼö Yehowa irugi iadaʼa.a

VIDEO: Muʼogunaʼö Huku ba Wamaduhuʼö Turia Somuso Dödö (2:28)

Baso Halöwö Zinenge 5:27-42, ba beʼe wanema li ba wanofu daʼa:

• Hadia mbörö wa lö maböhöli wanuriaigö turia somuso dödö?—Faigi ayati 29, 38 ba 39.

RAHU-RAHU WAMAHAʼÖ

Ibeʼe goroisania Yesu khö ndra nifahaʼönia ba wanuriaigö turia somuso dödö ba ngawalö soi. Itolo nono mbanuania Yehowa ba wamalua halöwö daʼa.

Hadia Wamahaʼö si Tola Öhalö?

• Hewisa wa tola teturiaigö duria somuso dödö ba zi sagörö ulidanö?

• Hewisa halöwö nifaluama tobali tandra wa maʼomasiʼö niha böʼö?

• Moloʼö yaʼugö, hadia tola tasöndra waʼomuso dödö na tafalua halöwö fanuriaigö? Hadia mbörö wa öwaʼö zimanö?

ALUI NASA DANÖ BÖʼÖ

Enaʼö öʼila hadia nifalua ndra Samaduhuʼö Yehowa ba wanuriaigö turia somuso dödö ba mbanua segebua, faigi video daʼa.

Fanuriaigö ba Nahia Sato Niha ba Paris (5:11)

Hadia nifalua ndra Samaduhuʼö Yehowa ba wanuriaigö turia somuso dödö ba niha si fatewu?

Manolo Niha Sowökhi Tödö ba Wamati ba Gotalua Ndra Pengungsi (5:59)

Faigi zi no irai alua khö dalifusöda ira alawe sorasoi faʼomuso dödö börö me tobali ia sanuriaigö safönu inötö.

Lö Maniasa Ndraʼo ba Wamili Halöwö Daʼa (6:29)

Baso duma-duma sebua nihalö ndra sangetuʼö huku irege lö si tobali taha-tahama ba wanuriaigö turia somuso dödö.

”Laʼohe Farakarora Ira Sanuriaigö Föna Zanguhuku” (Mamatörö Mbanua Lowalangi!, faza 13)

Iwaʼö Yesu wa fefu niha Keriso moguna tebayagö idanö. (Baso Mataiʼo 28:19, 20.) Hadia geluaha wamayagö idanö? Hadia nifalua zi samösa niha enaʼö tebayagö ia idanö?

1. Hadia geluaha wamayagö idanö?

Ngawua wehede ”famayagö idanö” tehalö moroi ba li Yunani, eluahania ”mangöhöndrögö” ba nidanö. Me tebayagö idanö Yesu, tehöndrögö ia ba Nungo Nidanö Yoridano aefa daʼö ”kalua ia moroi ba nidanö”. (Mareko 1:9, 10) Simanö göi na tebayagö idanö niha Keriso sindruhu, moguna tehöndrögö ira ba nidanö.

2. Ba ginötö tebayagö idanö zi samösa niha, hadia niforomaʼönia föna niha sato?

Na tebayagö idanö zi samösa niha, no iforomaʼö föna niha sato wa no ilulu waʼaurinia khö Lowalangi Yehowa. Hadia nifalua zi samösa niha ba wolulu faʼaurinia khö Lowalangi? Fatua lö tebayagö ia idanö, mangandrö ia ua sakali khö Yehowa, ifatunö khö Yehowa wa omasi ia ifosumange Yehowa sagötö faʼara. Ifabuʼu wa ha khö Yehowa mangalulu ia ba iʼofönaiʼö gohitö dödö Lowalangi ba waʼaurinia. Ihalö gangetula ba ’wolawa gisö-isö dödönia ba iʼoʼö’ wamahaʼö hegöi duma-duma nibeʼe Yesu. (Mataiʼo 16:24, nisura ba gahe zura) Me ilulu waʼaurinia ba tebayagö ia idanö, tola iʼokhögö wahuwusa saro khö Yehowa hegöi khö ndra talifusönia si sara lala wamati.

3. Hadia nifalua zi samösa niha enaʼö tola tebayagö ia idanö?

Enaʼö tola tebayagö ndraʼugö idanö, moguna öforege wamahaʼö yaʼugö sanandrösa khö Yehowa ba öʼodödögö enaʼö sindruhu-ndruhu mamati ndraʼugö khönia. (Baso Heberaiʼo 11:6.) Na monönö waʼaboto ba dödöu sanandrösa khö Yehowa ba itugu mamati ndraʼugö khönia, tatu itugu öʼomasiʼö ia. Daʼö zamarou tödömö enaʼö öfatunö ba niha böʼö sanandrösa khönia ba öfaudugö waʼaurimö moloʼö goi-goinia. (2 Timoteo 4:2; 1 Yohane 5:3) Na no ifaudugö ’gamuatania si samösa niha ba iʼomusoiʼö dödö Yehowa’, daʼö zamarou tödönia enaʼö ilulu waʼaurinia ba ifabayagöʼö ia idanö.—Kolose 1:9, 10.a

ODÖDÖGÖ NASA WANGALUI

4. Tola tafahaʼö ita me tebayagö idanö Yesu

Baso Mataiʼo 3:13-17 sanutunö hewisa me tebayagö idanö Yesu. Aefa daʼö, beʼe wanema li ba wanofu-nofu daʼa:

• Hadia ono sawuyu nasa Yesu me tebayagö ia idanö?

• Hewisa me tebayagö ia idanö? Hadia ha asala mutefe?

Me no aefa tebayagö idanö Yesu, ibörögö ifalua halöwö si tohude nibeʼe Lowalangi khönia. Baso Luka 3:21-23 hegöi Yohane 6:38, ba beʼe wanema li ba wanofu daʼa:

• Me no aefa tebayagö idanö Yesu, hadia halöwö sabölö iʼofönaiʼö ba waʼaurinia?

5. Hasambalö wa tola tebayagö ndraʼugö idanö

Ba wamobörö, te ömane tödöu, ’Tebai ululu waʼaurigu khö Lowalangi ba tebayagö ndraʼo idanö.’ Hizaʼi, na lö öböhöli wamahaʼö yaʼugö sanandrösa khö Yehowa ba önönö nasa waʼaboto ba dödöu sanandrösa khönia, awena dania aro dödöu ba wangai angetula fondrege zi sökhi andrö. Enaʼö öʼila waö-waö niha si no mangai angetula sanandrösa ba daʼö, futa VIDEO.

VIDEO: Lala Enaʼö Tobali si Fahuwu khö Yehowa (1:11)

Baso Yohane 17:3 hegöi Yakobo 1:5, ba beʼe wanema li ba wanofu daʼa:

• Hadia zanolo si samösa niha enaʼö tebayagö ia idanö?

1. Taforomaʼö wa talulu waʼaurida khö Yehowa yaʼia na tafatunö khönia wa omasi ita tafosumange ia sagötö faʼara

2. Me tebayagö ita idanö, taforomaʼö föna niha sato wa no talulu waʼaurida khö Lowalangi

6. Ba ginötö tebayagö idanö, ba daʼö faböbö ita tobali ösi nomo Yehowa

Ba ginötö tebayagö ita idanö, ba daʼö faböbö ita tobali ösi nomo sebua si hasara tödö ba zi sagörö ulidanö. Gofu hezo moroi mbanuada ba gofu hewisa lala waʼaurida ba zilalö, fagölö waʼafaduhu dödö niʼokhögöda ba tafaudugö waʼaurida moloʼö goi-goi Lowalangi. Baso Zinunö 25:14 hegöi 1 Fetero 2:17, ba beʼe wanema li ba wanofu daʼa:

• Me no tebayagö idanö zi samösa niha, hewisa gamakhaitania khö Yehowa hegöi ba niha tanö böʼö samosumange Yehowa?

RAHU-RAHU WAMAHAʼÖ

Yesu zangumaʼö wa fefu niha Keriso, moguna tebayagö idanö. Enaʼö tola tebayagö idanö zi samösa niha, moguna aro wamatinia khö Yehowa, ifalua goi-goinia ba ilulu waʼaurinia khö Yehowa.

Hadia Wamahaʼö si Tola Öhalö?

• Hadia geluaha wamayagö idanö, ba hana wa moguna sibai daʼö?

• Na tebayagö idanö zi samösa niha, hadia niforomaʼönia föna niha sato?

• Hadia zinangea ifalua si samösa niha enaʼö tola ilulu waʼaurinia ba tebayagö ia idanö?

ALUI NASA DANÖ BÖʼÖ

Nehegö hadia nasa nifahaʼö Zura Niʼamoniʼö sanandrösa ba wamayagö idanö.

”Hadia Geluaha Wamayagö Idanö Andrö?” (Artikel web)

Baso hadia manö zinangea öfalua enaʼö tola tebayagö ndraʼugö idanö.

”Faʼomasi khö Yehowa Zamarou Tödömö Enaʼö Tebayagö Idanö” (Manuriaigö, Baŵa si Tölu 2020)

Baso atö hadia zamarou tödö zi samösa ira matua irege omasi ia tebayagö idanö.

”Utandraigö Samösa Hezo Zatulö” (Menara Pengawal, 1 Mbaŵa si Dua 2013)

Hana wa moguna öforege enaʼö tola tebayagö ndraʼugö idanö? Hadia zinangea öfalua enaʼö tola tebayagö idanö ndraʼugö?

”Hadia Moguna Tebayagö Idanö Ndraʼo?” (Pertanyaan Kaum Muda—Jawaban yang Praktis, Jilid 2, faza 37)