2. Hadia manö howu-howu nibeʼe Yehowa ba nono mbanuania si no tebayagö idanö?

Me tebayagö idanö ndraʼugö, no tobali ndraʼugö ösi nomo Yehowa sowua-wua tödö. Öʼila samösa dania hadia dandra sangoromaʼö wa Yehowa andrö Ama sangomasiʼö yaʼugö, ba itugu aro wahuwusamö khönia. (Baso Maleakhi 3:16-18.) Baero daʼö, öʼokhögö göi nösi nomo ba wamati, yaʼia daʼö ira talifusöda ba zi sagörö ulidanö, sangomasiʼö Lowalangi ba sangomasiʼö yaʼugö. (Baso Mareko 10:29, 30.) Hizaʼi, so zinangea öfalua enaʼö tola tebayagö ndraʼugö idanö. Moguna öfahaʼö ndraʼugö sanandrösa khö Yehowa, öʼomasiʼö ia ba mamati ndraʼugö khö Nononia. Aefa daʼö, lö tola löʼö ölulu waʼaurimö khö Yehowa. Na öfalua daʼö fefu ba tebayagö ndraʼugö idanö, tebeʼe khöu ginötö ba wanöndra faʼohahau dödö sagötö faʼara. Imane Taromali Lowalangi, ’Famayagö idanö zangorifi yaʼami.’—1 Fetero 3:21.

Iʼila Yesu wa so ösa nösi nomoda si lö omasi na tahalö gangetula ba wamosumange Yehowa. Baso Mataiʼo 10:34-36, ba beʼe wanema li ba wanofu daʼa:

• Na ihalö gangetula si samösa niha ba wamosumange Yehowa, hadia niwaʼö nösi nomonia mazui hadia nifaluara khönia?

VIDEO: Yehowa Zogaoni Yaʼaga (5:13)

• Hadia nifaluamö na so nösi nomomö mazui si fahuwu khömö sangalui lala enaʼö öböhöli wamosumange Yehowa?

Baso Zinunö 27:10 hegöi Mareko 10:29, 30. Aefa daʼö, beʼe wanema li ba wanofu daʼa na no öbaso ero sambua ayati:

• Hewisa wa möi fanolomö nifabuʼu ba ayati daʼa ba wanaögö folohi moroi ba nösi nomomö hegöi si fahuwu khöu?