”No Ahatö Wangefaʼö Yaʼami!”

1. Hadia zalua me döfi 66 M? (Faigi gambara ba ngaʼörö 16.)

KHALAIGÖ atö na yaʼugö zi toröi ba Yeruzalema me döfi 66 M. Oya zalua me luo daʼö. Samösa zamatörö moroi ba Roma sotöi Florus, itagö 17 fakake si so bakha ba gosali. Mofönu ndra niha Yehuda. Ato ni bunura saradadu Roma ba lafaduhuʼö waʼamönara moroi ba Roma. Hizaʼi, alio sibai lahalö gangetula niha Roma. Ha tölu waŵa aefa daʼö, gafalo zaradadu sotöi Cestius Gallus iʼohe 30.000 zaradadunia ba wamasui Yeruzalema. Niha solawa moroi ba niha Yehuda labiniʼö ira bakha ba gosali mbaʼali, tobali no göi larugi zinga gosali mbaʼali andrö saradadu Roma ba molombase ira. Fefu niha meluo daʼö agataʼu. Hewisa dödöu meʼalua zimane daʼö?

2. Hadia nifalua niha keriso me laʼila no lafasui mbanuara ndra saradadu Roma, ba hewisa tola alua daʼö?

² No haʼuga fakhe ba zi lalö, ifangelama ndra nifahaʼönia Yesu sanandrösa ba zalua andre, ”Na miʼila no lafasui Yerusalema sanuwö, ba yaʼaboto ba dödömi, no ahatö mbaŵa wanudugö yaʼia ba ndramoloi ba hili zi so ba Yudaia ba ndramuheta ira si so yomo ba mbanua; ba si so ba halama, ba böi ndramöi miyomo.” (Luka 21:20, 21) Hewisa wa tola laʼoʼö niwaʼö Yesu enaʼö laröi Yeruzalema ba so göi ndra saradadu Romawi samasui mbanuara? So zalua sahöli-höli dödö. Lö taʼila hadia mbörö ira saradadu Romawi laröi Yeruzalema! Simane niwaʼö Yesu, ”niʼönaigö luo daʼö.” (Mataiʼo 24:22) Me no mofanö zaradadu Romawi, daʼö ginötö ba niha Yehuda woloʼö niwaʼö Yesu enaʼö moloi ira ba hili.a (Faigi nisura ba gahe zura.) Aefa daʼö, me döfi 70, so zaradadu Romawi sibohou, lafuli lasuwö Yeruzalema ba ahori ladudugö fefu hadia ia. Hizaʼi, niha soloʼö niwaʼö Yesu teʼefaʼö ira ba zalua andrö.

3. Hadia zi lö aratö alua ba niha keriso iadaʼa simane salua ba niha Yehuda, ba hadia manö nitutunö ba duho daʼa?

³ Famangelama hegöi famarou dödö nibeʼe Yesu moguna khöda ba ginötö daʼa. Lö aratö göi tatörö zimane daʼö. Iʼogunaʼö Yesu zi no irai alua andrö ba wangombakhaʼö khöda hadia zalua na inötö tebörögö ”wamakao sabölö-bölö.” (Mataiʼo 24:3, 21, 29) Simane niha keriso si lö faröi teʼorifi ira ba ginötö ladudugö Yeruzalema, ba luo daʼö dania so niha ”sato sibai” si lö faröi irege alua Hamagedo. (Baso Famaʼeleʼö 7:9, 13, 14.) Moguna so khöda waʼaboto ba dödö ba Zura Niʼamoniʼö sanandrösa ba zi lö aratö alua andre. Hadia mbörö? Börö me faʼaboto ba dödö andrö zi tola mangorifi yaʼita. Datatutunö hewisa zalua andre so amakhaitania ba waʼaurida zamösana.

BÖRÖTA WAMAKAO SABÖLÖ-BÖLÖ

4. Hewisa na tebörögö wamakao sabölö-bölö andrö?

⁴ Hewisa na tebörögö wamakao sabölö-bölö andrö? Tehori fefu agama faya. Ba Zura Niʼamoniʼö, agama faya lafotöi ”Mbabilona Sebua, ina zohorö.” (Famaʼeleʼö 17:5-7) Hana wa agama faya andrö lafotöi ia ina zohorö? Börö me sondröniaʼö ba agama no faröi ira khö Lowalangi. Lö laʼoʼö hadia niwaʼö Yesu hegöi famatörönia, hizaʼi famatörö niha gulidanö niʼoʼöra, famahaʼö moroi ba Zura Niʼamoniʼö laʼosilöʼögö börö dadaomara. (II Korindro 11:2; Yakobo 1:27; Famaʼeleʼö 14:4) Tobali, haniha zi tola mangohori Mbabilona Sebua andrö? Iʼogunaʼö Yehowa ”fulu rozi dandru” moroi ba ”zaliŵaliŵa ba danö, soyo kirimisi” ba ”wamalua geraʼerania.” ”Zaliŵaliŵa ba danö, soyo kirimisi” amaedola PBB, ba ”fulu rozi dandru” amaedola razo-razo samatörö si fao khönia.​—Baso Famaʼeleʼö 17:3, 16-18.

5, 6. Hana wa tawaʼö famakiko Mbabilona Sebua tenga eluahania mate fefu zoloʼö khönia?

⁵ Hadia fefu niha si fao ba agama faya mate ba ginötö tehori Mbabilona Sebua? Löʼö. Ibeʼe Yehowa gangilata khö Zakharia enaʼö isura hadia zi lö aratö alua. Samösa niha si no irai fao ba agama faya andre imane, ”Tenga samaʼeleʼö ndraʼodo, no sangahalö ndraʼo; me iraono sibai na ndraʼo, ba no la höli sawuyu ndraʼodo. Ba na tamanö dania; ba hadia laheto andrö, ba dötöʼamö? ba imane; Me no la böbözido yomo ba nomo zomasi yaʼodo!” (Zakharia 13:4-6) Ira sondröniaʼö ba agama, laʼosi lö agama ira ba lamane wangumaʼö lö irai so ira ba agama faya.

⁶ Hadia zalua ba nono mbanua Lowalangi ba luo daʼö? Imane Yesu, ”Ba na tenga niʼönaigö luo daʼö enaʼö, ba samösa lö auri niha. Ba börö nitutuyu andrö, wa teʼönaigö luo andrö.” (Mataiʼo 24:22) Ba götö föna, famakao ba Yeruzalema ”niʼönaigö luo.” Daʼö zangoromaʼö wa ”niha nitutuyu” mazui niha keriso si no tebayoini, tola moloi ira. Simanö göi, siʼoföna alua ba wamakao sabölö-bölö, ’muʼönaigö luo’ börö ”niha nitutuyu” andrö. Faʼabölö zamatörö ulidanö si ”fulu rozi dandru” lö tetehegö khönia ba wamakiko mbanua Lowalangi. Hizaʼi, so ginötö sahono si lö arara nano aefa böröta wamakao si oföna.

INÖTÖ WANANDRAIGÖ BA FANGUHUKU

7, 8. Hadia ginötö khöda na no tehori agama faya, ba hewisa nono mbanua Lowalangi faböʼö ira moroi ba nifalua niha böʼö ba luo daʼö?

⁷ Hadia zalua na no tehori Mbabilona sebua? Daʼa ginötö zangoromaʼö hadia zi ndruhunia nösi dödöda. Ba ginötö daʼö, ato niha laʼalui wanolo moroi ba wamatörö niha gulidanö ba, ”hili ba bagara.” (Famaʼeleʼö 6:15-17) Hizaʼi, ono mbanua Lowalangi laʼalui wolumöʼö yaʼira khö Yehowa. Ba ginötö ”niʼönaigö luo” wamakao sabölö-bölö ba götö föna, tenga daʼö ginötö ba niha Yehuda enaʼö tobali ira niha keriso. Hizaʼi, daʼö ginötö ba niha keriso enaʼö laröi Yeruzalema simane niwaʼö Yesu. Simanö göi dania zalua ba zi so föna, ba ginötö tefakiko Mbabilona Sebua, ”niʼönaigö luo.” Böi tadöna-döna waʼato niha si möi ba mbanua niha keriso si ndruhu ba luo daʼö. Si ndruhunia, daʼö ginötö ba nono mbanua Lowalangi wangoromaʼö wa si ndruhu-ndruhu laʼomasiʼö Yehowa ba falulu fohalöwö ira khö zawuyu si lö faröi.​—Mataiʼo 25:34-40.

⁸ Lö taʼila hadia zalua ba ginötö fanandraigö ba luo daʼö. Hizaʼi, lö aoha ba wanaögö yaʼia, ba so zinangea tatehegö. Me götö föna, niha keriso si ndruhu laröi nomora ba lataögö wamakao enaʼö tola auri ira. (Mareko 13:15-18) Moguna tasofu khöda samösa: ’Hadia utehegö ubeʼe woʼölögu? Hadia ufalua fefu niwaʼö Yehowa enaʼö lö faröi ndraʼo khönia?’ Haogö angeraigö! Ba luo daʼö, ha yaʼita zamosumange Yehowa gofu hadia ia zalua, simane nifalua Danieli—Danieli 6:10, 11.

9, 10. (a) Hadia niʼombakhaʼö nono mbanua Lowalangi ba ginötö wamakao sabölö-bölö? (b) Hadia nifalua zi faʼudu khö nono mbanua Lowalangi?

⁹ Naʼalua wamakao sabölö-bölö tenga daʼö ginötö wangombakha ”turia mbanua Lowalangi.” Inötö wangombakha turia si sökhi no awai. Inötö ”waʼatua danö” lö aratö tohare! (Mataiʼo 24:14) Lö ataʼu nono mbanua Lowalangi wangombakha fanguhuku si göna ba niha fefu. La ombakhaʼö wa ulidanö nifatörö Gafökha lö aratö tehori. Fanguhuku daʼa iʼamaedolagö Sura Niʼamoniʼö, ”Ba aekhu ba danö deu kara, so safiku zambua ngawua, göna ba niha, ba latandraŵaisi Lowalangi niha, ba wamakao andrö, teu kara, me no abölö-bölö sibai wamakao andrö, khönia.”​—Famaʼeleʼö 16:21.

¹⁰ Si faʼudu khöda larongo duria wanguhuku andre. Ifaʼeleʼö Yehowa khö Yehezekieli wangombakha hewisa angorudua zi sambua soi, nifotöi ba Zura Niʼamoniʼö yaʼia daʼö Gogi moroi ba danö Magogi, ”Daʼö niwaʼö Zoʼaya, Yehowa: Na luo daʼö, ba so zi tesao ba dödöu ba si lö sökhi nikhoi dödöu, ba ömane: ”Daʼusuwö zi fahalama, niha sahono-hono uhawui, niha si lö hadia ia; lö muʼöli nahiara, lö bawa göli ba lö lazi!” Ba wamaigi sahulu ndraʼugö, ba baworabu, ba wolau ba gadudula andrö, si so niha zui, ba baniha niʼozaragö ba niha baero, niha sangalui anaʼa, sowanua ba wusö danö.” (Yehezekieli 38:10-12) Tohude nono mbanua Lowalangi Yehowa moroi ba niha böʼö, hulö no so ira ba ”wusö danö.” Tebai itaha dödönia Gogi ba wanuwö sawuyu si lö faröi hegöi ono mbanua Lowalangi tanö böʼö.

11. (a) Hadia zi lö olifu ita ba waʼalua wamakao sabölö-bölö? (b) Hewisa niha sato me laʼila dandra salua moroi ba dalu mbanua?

¹¹ Hadia zalua aefa daʼö? Lö hadöi izara-zara Sura Niʼamoniʼö wangombakha khöda hadia zalua, hizaʼi so zi fendronga alua dania ba luo daʼö. Imane Yesu ba zi lö aratö alua andre, ”Ba so dania dandra ba luo ba bambaŵa ba bandröfi, ba faʼatosasa niha ba gulidanö, ba waʼabu dödö ba weʼugu-ugu nasi ba bandrulu. Tekiko niha ba waʼataʼu ba bawombaloi si göna ulidanö andre dania, humeuheu sa wangero mbanua si yawa dania. Ba laʼila dania Nono Niha, si so moroi sa ba lawuo, si no aʼoi so faʼabölö awö lakhömi.” (Luka 21:25-27; baso Mareko 13:24-26.) Hadia ha nifoamaedola daʼa mazui si ndruhu-ndruhu alua si yawa ba dalu mbanua? Tola manö. Tabaloi ginötö irege taʼila. Aboto ba dödöda na laʼila dandra salua andrö si faʼudu khö Lowalangi, ataʼu ira.

12, 13. (a) Hadia zalua na tohare Yesu si ”fao waʼabölö ba lakhöminia”? (b) Hadia nifalua nono mbanua Lowalangi ba luo daʼö?

¹² Hadia zalua na tohare Yesu si ”fao waʼabölö ba lakhöminia”? Ibeʼe luo ba niha si lö faröi ba ihuku niha si faröi. (Mataiʼo 24:46, 47, 50, 51; 25:19, 28-30) Iʼogunaʼö duma-duma Yesu ba wangombakha ngawalö zalua andre. Imane, ”Ba na so Nono Niha, na si so lakhömi ia, na fao khönia malaʼika andrö fefu, ba daʼö dania dumadao ia ba dadaoma lakhöminia andrö. Ba teʼowuloi dania fönania fefu soi, ba iföföʼö ira, simane na iföföʼö ira mbiri-biri si alawe mbiri-biri si matua kubalo. Ba ifaʼaso ba gambölönia mbiri-biri si alawe, ba bagaberania mbiri-biri si matua.” (Mataiʼo 25:31-33) Hadia zalua ba mbiri-biri si alawe hegöi mbiri-biri si matua? Laföfögö ira. Mbiri-biri si matua, yaʼira andre niha si faröi ba alua khöra ’waʼamate götö-götö waʼara.’ Ba mbiri-biri si alawe, yaʼira andre niha si lö faroi, lasöndra waʼauri si lö aetu.​—Mataiʼo 25:46.

¹³ Hadia nifalua mbiri-biri si matua me laʼila wa tehori ira dania? ”Megeʼege” ira. (Mataiʼo 24:30) Hadia nifalua zawuyu si lö faröi hegöi ono mbanua Lowalangi tanö böʼö? Lafalua hadia niwaʼö Yesu, ba ”Na ibörögö daʼö, ba mifaoso, ba mifaöga mbawami, me no ahatö wangefaʼö yaʼami andrö.”​—Luka 21:28.

YAMUHAGA AMI BA MBANUA LOWALANGI

14, 15. Hadia halöwö fangowuloi nifalua me no ibörögö wanuwö nono mbanua Lowalangi andrö Gogi moroi ba danö Magogi? Ba hewisa wa tola alua daʼa?

¹⁴ Hadia zalua na ibörögö isuwö nono mbanua Lowalangi Gogi moroi ba danö Magogi? Iʼombakhaʼö Sura Niʼamoniʼö wa Ono Lowalangi, ”Ifatenge dania malaʼikania andrö, ba iʼowuloi nitutuyu andrö, moroi ba zi fasui, iʼotarai wondrege danö, irugi gahe mbanua ba wondrege tanö sa.” (Mareko 13:27; Mataiʼo 24:31) Fangowuloi andrö tenga daʼö geluahania awena latutuyu niha nibayoini. Tenga göi eluahania afuriata wamotandro niha nibayoini si so nasa ba gulidanö. (Mataiʼo 13:37, 38) Awena alua wamotandro dania fatua lö alua wamakao sabölö-bölö. (Famaʼeleʼö 7:1-4) Tobali, hadia zi ndruhunia geluaha wangowuloi andre? Eluahania yaʼia daʼö, ba ginötö latema luora niha nibayoini si toröi nasa ba gulidanö, ba möi ira ba zorugo. (I Tesalonika 4:15-17; Famaʼeleʼö 14:1) Fangowuloi andre alua ia na no aefa isuwö nono mbanua Lowalangi Gogi moroi ba Magogi. (Yehezekieli 38:11) Aefa daʼö, simane niwaʼö Yesu, ”Ba muhaga dania zatulö andrö, hulö luo, ba mbanua namara andrö.”​—Mataiʼo 13:43.b (Faigi zi no musura ba gahe zura.)

¹⁵ Ato niha keriso iadaʼa zi faduhu tödö wa lafazawa dania mbotora ba zorugo. Lamane göi tödöra laʼila Yesu na ifuli mangawuli ia ba gulidanö. Hizaʼi, imane Sura Niʼamoniʼö ”Ba oroma dandra Nono Niha andrö ba mbanua si yawa,” ba tohare Yesu dania ”ba dete lawuo.” (Mataiʼo 24:30) Eluahania lö oroma ba höröda waʼatohare Yesu. Imane Sura Niʼamoniʼö, ”tebai isöndra mbanua Lowalangi ösi niha andrö.” Tobali, yaʼira ni ohe ba zorugo moguna ”iʼogomuzaʼö, ha mamöʼi hörö waʼara, na telau dorofe safuria andrö.”c (Baso I Korindro 15:50-53.) Hizaʼi, niha keriso nibayoini sauri si so ba gulidanö nasa, fagölö-gölö teʼowuloi ira ha mamöʼi hörö.

16, 17. Hadia zalua fatua lö mangowalu nono mbiri-biri?

¹⁶ Na no teʼowuloi ba zorugo fefu niha nibayoini si 144.000, awena tebörögö wamaʼanö walöŵa Nono mbiri-biri andrö. (Famaʼeleʼö 19:9) Aefa daʼö fatua lö alua daʼa, so zalua tanö böʼönia. Törö tödöu ba ginötö lasuwö nono mbanua Lowalangi Gogi ba danö Magogi, so nasa zi toröi niha nibayoini ba gulidanö. (Hezekieli 38:16) Hewisa nono mbanua Lowalangi ba luo daʼö? Laʼoʼö wanuturu lala si no labeʼe, ”Tenga yaʼami zi fasöndra zi samuza andre; miʼagö daʼö, ba miʼila wangorifi andrö, fangorifi Yehowa yaʼami . . . Böi miʼataʼufi ba böi tokea ami.” (II Ngaʼötö 20:17) Na no tebörögö wasuwöta Gogi ba danö Magogi, fefu niha niboyoini si so ba gulidanö laʼohe ira ba zorugo. Aefa daʼö, iʼombakha khöda Sura Niʼamoniʼö simane niwaʼönia ba Wamaʼeleʼö 17:14 hewisa nösi zorugo me ifalua wanuwö Gogi. Si faʼudu khö nono mbanua Lowalangi, ”Yaʼira zi fasuwö dania ba nono mbiri-biri andrö, ba abölö nono mbiri-biri moroi khöra, me no Soʼaya sokhö ia, ba me razo-razo, ba awönia andrö, ba no nikaoni ba nitutuyu ba si lö faröi.” Yesu ba si 144.000 si no tebayoini ba zorugo, fao ira ba wangefaʼö ono mbanua Lowalangi si so ba gulidanö.

¹⁷ Fangefaʼö andrö iʼaʼasogö wasuwöta sabölö-bölö ba Hamagedo, töi Yehowa ba luo daʼö tefolakhömi. (Famaʼeleʼö 16:16) Fefu nifotöi mbiri-biri si matua, mazui niha si faröi tehori ira dania. Lö hadöi si lö sökhi ba gulidanö, fefu ”niha sato” ba luo daʼö tola teʼorifi ira na alua Hamagedo. Sadöni dödöda safuria alua ba zura Wamaʼeleʼö yaʼia daʼö, fangowalu nono mbiri-biri! (Famaʼeleʼö 21:1-4)d Fefu niha sauri ba gulidanö tola lasöndra howu-howu moroi khö Lowalangi, faʼomasinia hegöi faʼoböwönia. Tadöna-döna si fao faʼomuso dödö ba zalua andre dania. Fangowalu ba nono mbiri-biri!​—Baso II Fetero 3:13.

18. Hadia zinangea tafalua zamösana fatua lö alua zahöli-höli dödö si no lafaʼeleʼö andrö?

¹⁸ Hadia zinangea tafalua zamösana fatua lö alua zahöli-höli dödö andrö? Ibeʼe Yehowa gangilata khö Wetero enaʼö isura, ”Ba me sadudu daʼö fefu, ba hadia lö miforege wanörö lala satulö andrö, awö wangataʼufi Lowalangi? Ba wanötöna, enaʼö irugi luo Lowalangi andrö, . . . ba wehulu dödö ba daʼö yaʼia mbörö waʼadudu mbanua si yawa, ba galitö, ba börö waʼalua mbörötania andrö, ba waʼakhozi. Andrö, yaʼami niʼomasiʼö, me midöna-döna zimanö, ba miʼowölö-ölögö, enaʼö lö hadia ia zi tokana ba sinegu khömi, fönania, na ifaigi, ba waʼatulö.” (II Fetero 3:11, 12, 14) Tahalö gangetula enaʼö tarorogö wamatida ba tafosumange Lowalangi, böi so khai-khaida ba agama faya ba fao ita khö Razo Waʼatulö, Yesu Keriso.