1. Haniha Yesu andrö?

Yesu andrö malaʼika sabölö, ba zorugo toröi ia. Yaʼia zi oföna sibai niwöwöi Lowalangi Yehowa fatua lö iwöwöi fefu hadia ia. Börö daʼö, mufotöi ia ’siaʼa moroi ba nifazökhi’. (Kolose 1:15) Börö me Yehowa samösa zamazökhi Yesu, andrö wa mufotöi ia ba Zura Niʼamoniʼö ’Ono si ha sambua’ khö Lowalangi. (Yohane 3:16) Falulu fohalöwö Yesu khö Namania Yehowa ba wamazökhi fefu hadia ia. (Baso Gamaedola 8:30.) Iʼotarai mböröta ofeta iadaʼa, lö tebulö aro wahuwusa Yesu khö Yehowa. Lö faröi ia ba wamaʼema oroisa mazui fanuturu lala moroi khö Lowalangi. Daʼö mbörö wa ifotöi ia Sura Niʼamoniʼö, ”Taromali”.—Yohane 1:14.

Börö me lö moloʼö Gadamo ba Khawa khö Lowalangi, andrö wa aekhu ita ba horö. Lua-luania göna ita famakao hegöi faʼamate.a Hizaʼi, so nasa dötönaföda. No ibeʼe khöda lala Yehowa enaʼö tola aheta ita moroi ba horö hegöi faʼamate, yaʼia me ifatenge Nononia Yesu Keriso ba gulidanö enaʼö mate salahida. Ifahaʼö ita Sura Niʼamoniʼö wa itehegö mate ia Yesu enaʼö tola ihöli ita. Höli eluahania kefe niʼogunaʼö ba wosanu zi samösa niha. Höli nibeʼe Yesu yaʼia daʼö faʼaurinia soʼahonoa ba gulidanö. (Baso Mataiʼo 20:28.) Börö me moʼahonoa Yesu ba lö tebulö iʼoʼö niwaʼö Yehowa, tola auri ia sagötö faʼara ba gulidanö. Hizaʼi, itehegö mate ia salahida, irege tola ifuli taʼokhögö hadia zi no itayaigö Adamo ba Khawa. Iforomaʼö göi khöda Yesu hawaʼebua waʼomasinia hegöi faʼomasi Yehowa khöda. Famahaʼö daʼa dania zanolo yaʼugö ba wangoromaʼö fangandrö saohagölö ba höli si no ibeʼe Yesu.

1. Hadia mbua nitemada iadaʼa börö me no mate Yesu salahida?

Börö me niha si lö moʼahonoa ita, asese tafalua gamuata si lö mangomusoiʼö tödö Yehowa. Hizaʼi, na sindruhu-ndruhu maniasa ita, ba taʼandrö wangefa moroi khö Yehowa ba döi Yesu Keriso ba na lö saʼae tafuli tafalua zala andrö, tola taʼokhögö wahuwusa saro khö Yehowa. (1 Yohane 2:1) Imane Sura Niʼamoniʼö, ”Keriso manö niha satulö, mate ia salahi niha si lö atulö. Ha sakali mate ia irugi zi lö aetu ba wangeheta horö ba solohe yaʼami khö Lowalangi.”—1 Fetero 3:18.

2. Hadia mbua nitemada ba zi so miföna börö me no mate Yesu salahida?

Yehowa zamatenge Yesu ba gulidanö ba wameʼe faʼaurinia soʼahonoa ”enaʼö lö tekiko dozi samati khö [Yesu] ba lasöndra waʼauri si lö aetu”. (Yohane 3:16) Börö me no ifalua daʼö Yesu, ba zi lö ara tö, ihori fefu zi lö sökhi Yehowa si tobali lua-lua ba walömoloʼö Gadamo. Eluahania, na mamati ita ba höli nibeʼe Yesu, tebeʼe khöda ginötö ba wangokhögö faʼauri si lö aetu ba gulidanö faradaiso!—Yesaya 65:21-23.

ODÖDÖGÖ NASA WANGALUI

3. Faʼamate Yesu zangefaʼö yaʼita moroi ba horö ba faʼamate

VIDEO: Hana Wa Itörö Waʼamate Yesu?—Faosatö 1 (2:01)

• Hadia nitayaigö Gadamo me lö iʼoʼö niwaʼö Lowalangi?

Baso Roma 5:12, ba beʼe wanema li ba wanofu daʼa:

• Börö me no ifalua horö Adamo, hadia lua-luania ba waʼaurimö?

Baso Yohane 3:16, ba beʼe wanema li ba wanofu daʼa:

• Hana wa ifatenge Nononia andrö Yehowa ba gulidanö?

1. Adamo andrö niha soʼahonoa, hizaʼi börö me lö iʼoʼö niwaʼö Lowalangi fefu niha gulidanö göna ira horö ba faʼamate

2. Yesu andrö niha soʼahonoa. Börö me iʼoʼö niwaʼö Lowalangi, andrö wa dozi niha tebeʼe khöra ginötö enaʼö moʼahonoa ira ba lasöndra waʼauri si lö aetu sagötö faʼara

4. Fefu niha tola latema mbua ba waʼamate Yesu

VIDEO: Hana Wa Itörö Waʼamate Yesu?—Faosatö 2 (2:00)

• Hewisa wa fefu niha tola latema mbua börö waʼamate zi samösa niha?

Baso 1 Timoteo 2:5, 6, ba beʼe wanema li ba wanofu daʼa:

• Adamo andrö niha soʼahonoa, hizaʼi börö me lö iʼoʼö niwaʼö Lowalangi, lua-luania fefu niha aekhu ira ba horö ba faʼamate. Yesu göi niha soʼahonoa. Börö daʼö, hadia nifalua Yesu irege tobali ia ”höli si tefaudu” ba niha sato?

5. Höli andrö no buala moroi khö Yehowa

Niha si fahuwu khö Yehowa laʼameʼegö tödö höli. Ba wamaigira, no buala daʼö nibeʼe Lowalangi khöra. Duma-dumania baso Galatia 2:20, ba beʼe wanema li ba wanofu daʼa:

• Hewisa wangoromaʼö zinenge sotöi Faulo wa no buala khönia höli andrö?

Me aekhu Gadamo ba horö, mate ia hegöi ngaʼötönia. Hizaʼi, ifatenge Nononia Yehowa enaʼö mate salahida irege tola taʼokhögö waʼauri si lö aetu.

Na öbaso dania ayati daʼa, khalaigö atö hewisa dödö Yehowa me iʼila tefakao Nononia. Baso Yohane 19:1-7, 16-18, ba beʼe wanema li ba wanofu daʼa:

• Me no öʼila hadia nifalua Yehowa hegöi Yesu khöu, hewisa dödömö?

RAHU-RAHU WAMAHAʼÖ

Börö me no mate Yesu salahida, andrö wa tola iʼefaʼö horöda Yehowa ba tebeʼe khöda ginötö ba wanöndra faʼauri si lö aetu sagötö faʼara.

Hadia Wamahaʼö si Tola Öhalö?

• Hana wa mate Yesu?

• Hana wa faʼamate Yesu andrö soʼahonoa tobali höli si tefaudu?

• Hadia gunania khöu waʼamate Yesu?

ALUI NASA DANÖ BÖʼÖ

Hana wa faʼamate Yesu soʼahonoa lafotöi ia höli?

”Hadia Geluahania Zumange Nibeʼe Yesu Tobali ’Höli Zato’?” (Artikel web)

Faigi hadia manö zinangea tafalua enaʼö tola teʼefaʼö ita moroi ba horö hegöi faʼamate.

”Hadia Geluahania Yesu Andrö Sangefaʼö?” (Artikel web)

Hadia tola iʼefaʼö horöda Yehowa hewaʼae na horö sebua daʼö?

”Fanema Li moroi ba Zura Niʼamoniʼö” (Menara Pengawal, 1 Mbaŵa si Lima 2013)

Baso hewisa zi samösa ira matua ba wombulö’ö fa’aurinia börö me ifaha’ö ia ba höli nibe’e Keriso.

”Saya Sudah Tidak Beringas Lagi” (Artikel web)

1. Hadia lala sinangea tafalua ba wangoromaʼö fangandrö saohagölö ba zi no ifalua Lowalangi hegöi Keriso khöda?

Ifabuʼu khöda Sura Niʼamoniʼö wa ”dozi samati khö [Yesu]”, lasöndra waʼauri si lö aetu sagötö faʼara. (Yohane 3:16) Hadia geluahania mamati ita khö Yesu? Tenga ha asala faduhu dödöda khö Yesu, hizaʼi taforomaʼö daʼö ba gangetula hegöi ba nifaluada. (Yakobo 2:17) Na taforomaʼö wamati ba nifaluada hegöi ba wehededa, itugu aro wahuwusada khö Yesu hegöi khö Namania, Yehowa.—Baso Yohane 14:21.