-
Hadia Geluahania Lö Faʼawö Dambai?Lala ba Wanöndra Faʼohahau Dödö Sagötö Faʼara!—Famahaʼö ba Zura Niʼamoniʼö
-
-
FAMAHAʼÖ 45
Hadia Geluahania Lö Faʼawö Dambai?
Ifahaʼö ndra soloʼö khönia Yesu wa tebai tobali ira ”tana khö niha gulidanö”. (Yohane 15:19) Eluahania, tebai faʼawö dambai ira. Lö faʼawö dambai ira ba politik hegöi ba wasuwöta. Atulö wa itaria abua wamalua daʼö. Te laʼoʼaya-aya ita niha börö me lö faʼawö dambai ita. Hewisa enaʼö lö faʼawö dambai ita ba lö faröi ita khö Lowalangi Yehowa?
1. Hewisa dödö niha Keriso sindruhu khö ndra samatörö?
Ira niha Keriso sindruhu lafosumange ndra samatörö. Taʼoʼö niwaʼö Yesu me imane, ”Mibeʼe khö Kaisaro tana khö Kaisaro.” Börö daʼö, taʼoʼö gamakhoita nibeʼe ba soida. Duma-dumania, tabuʼa pajak. (Mareko 12:17) Hizaʼi, ifatunö khöda Sura Niʼamoniʼö wa tola mamatörö niha gulidanö börö me no itehegö khöra Yehowa. (Roma 13:1) Eluahania, famatöröra andrö so nolania. Faduhu dödöda wa ha Lowalangi hegöi Famatörönia zi tola mangeheta abula dödö niha gulidanö.
2. Hewisa wangoromaʼöda wa lö faʼawö dambai ita?
Simane Yesu lö fao ita ba politik. Me ato niha zangila tandra sahöli-höli dödö nifalua Yesu ba laforege enaʼö tobali ia razora ba gulidanö, lö omasi Yesu. (Yohane 6:15) Hadia mbörö? Ba gafuriata imane, ”Tenga moroi ba gulidanö andre Wamatörögu.” (Yohane 18:36) Börö me nifahaʼö Yesu ita, oya zi tola tafalua ba wangoromaʼö wa lö faʼawö dambai ita. Duma-dumania, lö fao ita ba wasuwöta. (Baso Mikha 4:3.) Baero daʼö, hewaʼae taʼameʼegö tödö lambang negara simane mandrera, hizaʼi lö tabeʼe yawa dangada, börö me no amaedola zi no tafosumange gama-gama andrö na tafalua daʼö. (1 Yohane 5:21) Lö faʼawö ita mazui talawa zi sambua partai hegöi niha si fao khöra. Na tafalua daʼö ba oya nasa lala tanö böʼönia, no taforomaʼö wa sindruhu-ndruhu lö faröi ita ba Wamatörö Lowalangi.
ODÖDÖGÖ NASA WANGALUI
Tatutunö dania hadia manö zalua irege abua khöda ba wondrorogö enaʼö lö faʼawö dambai ita. Tafatunö göi hewisa enaʼö tola tahalö gangetula si tefaudu si möi fangomuso dödö Yehowa.
3. Lö faʼawö dambai niha Keriso sindruhu
Yesu hegöi ira nifahaʼönia, no labeʼe khöda duma-duma hewisa lala enaʼö lö faʼawö dambai. Baso Roma 13:1, 5-7 hegöi 1 Fetero 2:13, 14. Aefa daʼö, futa VIDEO, ba beʼe wanema li ba wanofu-nofu daʼa:
Hana wa moguna tafosumange ndra samatörö?
Hadia manö zi tola tafalua sangoromaʼö wa taʼoʼö nifakhoi ndra samatörö?
Ba ginötö alua wasuwöta, oya soi sangumaʼö wa lö faʼawö dambai ira. Hizaʼi, faoma labeʼe wanolo ba mbanua si fasuwö. Hewisa sindruhunia gamuata niha si lö faʼawö dambai? Baso Yohane 17:16. Aefa daʼö, futa VIDEO ba beʼe wanema li ba wanofu daʼa:
Hadia geluahania lö faʼawö dambai?
Hewisa na lafaso ita ira samatörö ba wamalua si lö tefaudu ba goroisa Lowalangi? Baso Halöwö Zinenge 5:28, 29. Aefa daʼö, futa VIDEO ba beʼe wanema li ba wanofu-nofu daʼa:
Na lö tefaudu huku nifazökhi niha ba goroisa Lowalangi, hezo zabölö taʼoʼö?
Moloʼö yaʼugö, hadia duma-dumania irege lahalö gangetula ira niha Keriso, lö laʼoʼö niwaʼö ndra samatörö?
4. Lö faʼawö dambai ba wangera-ngera hegöi ba nifaluada
Baso 1 Yohane 5:21. Aefa daʼö, futa VIDEO ba beʼe wanema li ba wanofu-nofu daʼa:
Ba video andrö mege, hadia mbörö wa lö omasi faʼawö Ayenge ba partai politik mazui fao ia ba upacara nasional, duma-dumania mameʼe tanga yawa ba mandrera?
Moloʼö yaʼugö, hadia tefaudu gangetula Ayenge?
Hadia nasa zalua irege abua khöda wangai angetula enaʼö lö faʼawö dambai? Futa VIDEO, ba beʼe wanema li ba wanofu-nofu daʼa:
Hewisa enaʼö lö faʼawö dambai ita ba ginötö mufalua olahraga internasional?
Hewisa enaʼö lö faʼawö dambai ita hewaʼae na mohare mazui rugi ita ba gangetula nihalö zi samösa niha si fao ba politik?
Hana wa abua khöda enaʼö lö faʼawö dambai börö berita nifaigi-faigida hegöi awöda si fariawö?
Hezo manö laforomaʼö ira niha Keriso wa lö faʼawö dambai ira ba wangera-ngera hegöi ba nifaluara?
TE SO ZANOFU: ”Hana wa lö öbeʼe yawa dangamö ba mandrera mazui öʼanunöisi lagu kebangsaan?”
Hadia öbeʼe fanema li?
RAHU-RAHU WAMAHAʼÖ
Laforege ira niha Keriso enaʼö lö faʼawö ira ba politik, he ba wangera-ngera, ba wehede hegöi ba nifaluara.
Hadia Wamahaʼö si Tola Öhalö?
Hewisa zinangeania gamuatada khö ndra samatörö ba gulidanö andre?
Hana wa tebai faʼawö dambai ita ba politik?
Hadia manö zalua irege abua khöda wangai angetula enaʼö lö faʼawö dambai?
ALUI NASA DANÖ BÖʼÖ
Hadia manö zinangea tatehegö enaʼö lö faʼawö dambai ita?
Hewisa zi sambu-sambua omo wamaʼanöra yaʼira na alua wanandraigö wamati enaʼö lö faʼawö dambai?
Hana wa tenga töi sebua na taʼoʼawögö soida?
Ba ginötö öfili halöwö, hewisa enaʼö lö tobali ndraʼugö tana khö niha gulidanö?
”Iluʼi-luʼi Sa Horönia Zamösana” (Menara Pengawal, 15 Mbaŵa si Tölu 2006)
-
-
Böi Faröi Hewaʼae göna FolohiLala ba Wanöndra Faʼohahau Dödö Sagötö Faʼara!—Famahaʼö ba Zura Niʼamoniʼö
-
-
Alio ara, fefu niha Keriso hasambalö göna ira folohi ba famakao. Hadia ataʼu ita?
1. Hana wa lö ahöli dödöda na göna ita folohi?
Imane Sura Niʼamoniʼö, ”Dozi sedöna moloʼö Keriso ba wamosumange Lowalangi soroi ba dödö, hasambalö göna ira folohi.” (2 Timoteo 3:12) Me föna, göna folohi Yesu börö me yaʼia andrö tenga tana khö gulidanö nifatörö Zatana. Simanö göi ita, tenga tana khö niha gulidanö. Andrö wa lö tokea ita na göna ita folohi moroi khö ndra samatörö hegöi organisasi agama.—Yohane 15:18, 19.
2. Hewisa wamaʼanöda yaʼita ba wanaögö folohi?
Iʼotarai iadaʼa, dataʼaroʼö wamatida khö Yehowa. Databeʼe ginötöda ero maʼökhö ba wangandrö hegöi ba wombaso Taromalinia. Baero daʼö, böi böhöli weʼamöi ba gangowuloa. Daʼö fefu zanolo yaʼugö enaʼö lö khöu faʼataʼu ba wanaögö folohi hewaʼae na moroi ba nösi nomou daʼö. Imane sinenge sotöi Faulo, sasese göna folohi me mböröta, ”Yehowa zanolo yaʼo, lö ataʼu ndraʼo.”—Heberaiʼo 13:6.
Tola itugu barani ita na owölö-ölö ita weʼamöi manuriaigö. Na möi ita manuriaigö, tafahaʼö ita enaʼö faduhu dödöda khö Yehowa ba lö khöda faʼataʼu ba nawöda niha. (Amaedola 29:25) Na taforege iʼotarai iadaʼa weʼamöi manuriaigö, lö dania khöda faʼataʼu na lö latehegö ira samatörö halöwö nifaluada.—1 Tesalonika 2:2.
3. Hadia gunania na anau gölöda hewaʼae so wolohi?
Sindruhu wa abu dödöda na göna ita folohi, hizaʼi na anau gölöda ba ginötö so wolohi itugu aro wamatida. Tola göi itugu aro wahuwusada khö Yehowa börö me tarasoi samösa hewisa wanolonia yaʼita me aetu wanötönada ba me lö khöda faʼabölö. (Baso Yakobo 1:2-4.) Abu sibai dödö Yehowa na iʼila tefakao ita, hizaʼi omuso sibai dödönia na lö awuwu ita. Imane Sura Niʼamoniʼö, ”Na mitaögö wamakao börö wamalua si sökhi, iʼomasiʼö ami Lowalangi.” (1 Fetero 2:20) Na lö faröi ita khö Yehowa, hasambalö ibeʼe khöda waʼauri si lö aetu ba gulidanö si bohou. Lö hadöi saʼae dania ba daʼö niha samakao ono mbanua Yehowa.—Mataiʼo 24:13.
ODÖDÖGÖ NASA WANGALUI
Tatutunö dania hana wa faduhu dödöu wa tola örorogö waʼalöfaröimö khö Yehowa hewaʼae göna ndraʼugö folohi. Tafatunö göi, hana wa faduhu dödöu wa hasambalö ifahowuʼö ndraʼugö Yehowa.
4. Tola anau gölöu hewaʼae so wolohi moroi ba nösi nomou
Iʼila Yesu wa so ösa nösi nomoda si lö omasi na tahalö gangetula ba wamosumange Yehowa. Baso Mataiʼo 10:34-36, ba beʼe wanema li ba wanofu daʼa:
Na ihalö gangetula si samösa niha ba wamosumange Yehowa, hadia niwaʼö nösi nomonia mazui hadia nifaluara khönia?
Enaʼö öʼila duma-dumania, futa VIDEO, ba beʼe wanema li ba wanofu daʼa:
Hadia nifaluamö na so nösi nomomö mazui si fahuwu khömö sangalui lala enaʼö öböhöli wamosumange Yehowa?
Baso Zinunö 27:10 hegöi Mareko 10:29, 30. Aefa daʼö, beʼe wanema li ba wanofu daʼa na no öbaso ero sambua ayati:
Hewisa wa möi fanolomö nifabuʼu ba ayati daʼa ba wanaögö folohi moroi ba nösi nomomö hegöi si fahuwu khöu?
5. Böi böhöli wamosumange Yehowa hewaʼae so wolohi
Moguna khöda waʼabarani ba wamosumange Yehowa ba ginötö laforege wanaisi yaʼita ba wamalua daʼö. Futa VIDEO, ba beʼe wanema li ba wanofu daʼa:
Hewisa wa tola möi fangaʼaroʼö wamatimö duma-duma si so ba video andrö mege?
Baso Halöwö Zinenge 5:27-29 hegöi Heberaiʼo 10:24, 25. Aefa daʼö, beʼe wanema li ba wanofu daʼa ero öbaso sambua ayati:
Hana wa lö taböhöli wamosumange Yehowa hewaʼae lasaisi ira samatörö halöwö nifaluada?
6. Yehowa zanolo yaʼugö enaʼö anau gölöu
Ira Samaduhuʼö Yehowa ba zi sagörö ulidanö he satua hegöi iraono, lö faröi ira ba wamosumange Yehowa hewaʼae göna ira folohi. Enaʼö öʼila hadia zanolo yaʼira ba wamalua daʼö, futa VIDEO. Aefa daʼö, beʼe wanema li ba wanofu daʼa:
Ba video daʼö, hadia zanolo ira Samaduhuʼö Yehowa andrö enaʼö anau gölöra?
Baso Roma 8:35, 37-39 hegöi Filifi 4:13. Aefa daʼö, beʼe wanema li ba wanofu daʼa ero öbaso sambua ayati:
Hewisa wa tola möi fangaro dödöu ayati daʼa enaʼö so khöu waʼanau gölö ba wanaögö ngawalö gabula dödö?
Baso Mataiʼo 5:10-12, ba beʼe wanema li ba wanofu daʼa:
Hana wa lö tebulö waʼomuso dödöu hewaʼae so wolohi?
Zuta waʼato nono mbanua Yehowa sanau ölö hewaʼae göna ira folohi. Tola göi öfalua zimane daʼö!
SO ZANGUMAʼÖ: ”Lö sagu khögu wanaögö folohi.”
Hadia ayati niʼogunaʼömö enaʼö so khöra waʼabarani?
RAHU-RAHU WAMAHAʼÖ
Iʼameʼegö tödö Yehowa nifaluada ba wamosumange yaʼia hewaʼae göna ita folohi. Börö wanolo moroi khönia wa tola anau gölöda!
Hadia Wamahaʼö si Tola Öhalö?
Hana wa lö ahöli-höli dödö ndra niha Keriso na göna ira folohi?
Hadia zi tola öfalua iʼotarai iadaʼa enaʼö anau gölöu na göna ndraʼugö folohi?
Hana wa faduhu dödöu wa tola anau gölöu ba wamosumange Yehowa hewaʼae so gabula dödö salua?
ALUI NASA DANÖ BÖʼÖ
Faigi hewisa Yehowa wanolo talifusöda si bohou ebua irege lö faröi ia me labeʼe ia ba gurunga börö me lö faʼawö dambai ia.
Hadia zanolo si sambua fongambatö irege lö faröi ira ba wamosumange Yehowa ba zi hauga wulu fakhe hewaʼae göna ira folohi?
Hewisa wamaʼanöda yaʼita enaʼö lö khöda faʼataʼu na göna ita folohi?
”Faʼanö Ndraʼugö Iadaʼa ba Wanaögö Folohi” (Manuriaigö, Baŵa si Fitu 2019)
Hewisa enaʼö taʼokhögö wangera-ngera satulö na göna ita folohi moroi ba nösi nomoda? Hadia zi tola tafalua enaʼö tola tataögö daʼö?
-