FAMAHAʼÖ 37
Hadia Niwaʼö Zura Niʼamoniʼö Sanandrösa ba Halöwö hegöi ba Wangalui Kefe?
Hadia no irai so khöu waʼaombö-aombö dödö sanandrösa ba halöwö hegöi ba gefe? Itaria abua ba wombönökhi soguna khöda bongi maʼökhö hegöi ba wameʼe sabölö sökhi ba wamosumange Yehowa. Hizaʼi, ibeʼe khöda mene-mene si sökhi Sura Niʼamoniʼö si tola manolo yaʼita.
1. Hadia niwaʼö Zura Niʼamoniʼö sanandrösa ba halöwö?
Omasi Lowalangi na tasöndra waʼomuso dödö ba halöwöda. Imane Sura Niʼamoniʼö, ”Sabölö sökhi ba niha yaʼia daʼö . . . iʼomusoiʼö dödönia ba zerege dödönia.” (Sangombakha 2:24) Lö ibato wohalöwö Yehowa. Na owölö-ölö ita wohalöwö simane yaʼia, no taʼomusoiʼö dödönia ba tarasoi göi waʼomuso dödö.
Moguna mohalöwö ita. Hizaʼi, böi abölö taʼofönaiʼö daʼö moroi ba wamosumangeda Yehowa. (Yohane 6:27) Na taʼofönaiʼö wamosumange Yehowa ba waʼaurida, no ifabuʼu wa ibönökhi fefu zoguna khöda.
2. Hewisa zatulönia wangera-ngerada sanandrösa ba gefe?
Ifatunö khöda Sura Niʼamoniʼö wa ’kefe andrö tobali folumöʼö’. Hizaʼi, ifangelama ita wa tenga daʼö sibai zi möi fangomuso dödöda. (Sangombakha 7:12) Daʼö mbörö wa iwaʼö khöda Sura Niʼamoniʼö enaʼö böi taʼomasiʼö gefe, hizaʼi ’datahonogö dödöda ba zi no so’. (Baso Heberaiʼo 13:5.) Na ahono dödöda ba zi no so, lö taʼisö zoya ngawalö. Buania, lö tefakao waʼaurida ba lö ikabi ita foʼömö. (Amaedola 22:7) Baero daʼö, teʼefaʼö ita ba gabula dödö börö lua-lua wamaisa ba lö göi telimo ita na so zameʼe khöda lala halöwö enaʼö alio tasöndra waʼakayo.
3. Hewisa ita wangogunaʼö kefe ba wangoromaʼö faʼoböwö?
Yehowa andrö Lowalangi fondrege zoböwö. Na ’oböwö ita ba lö atali’, no taʼoʼö ia. (1 Timoteo 6:18) Tola taʼogunaʼö gefeda ba wanolo banua niha Keriso hegöi niha si tosasa, mendrua manö ndra talifusöda si sara lala wamati. Sabölö sökhi ba wamaigi Yehowa tenga dali hawaʼebua nibeʼeda andrö, hizaʼi hadia mbörö wa tafalua daʼö. Na oböwö ita ba tafalua ia soroi ba dödö, omuso dödöda ba no göi taʼomusoiʼö dödö Yehowa.—Baso Halöwö Zinenge 20:35.
ODÖDÖGÖ NASA WANGALUI
Tatutunö nasa dania hadia manö mbua nitemada na taʼoʼö lala wangera-ngera Yehowa sanandrösa ba halöwö. Tafatunö göi hadia mbuania na so khöda waʼahono dödö ba zi no so.
4. Tafolakhömi Yehowa ba lala halöwöda
Na fahuwu ita khö Yehowa, tobali ita sohalöwö si sökhi ba si lö falimo, ba taforege wangomusoiʼö tödönia. Futa VIDEO, ba beʼe wanema li ba wanofu-nofu daʼa:
Ba video andrö mege, hadia mbörö wa adöni dödöu ba gamuata Jason hegöi nifaluania ba nahania wohalöwö?
Hadia nifalua Jason enaʼö tenga halöwö zabölö iʼofönaiʼö ba waʼaurinia?
Baso Kolose 3:23, 24, ba beʼe wanema li ba wanofu daʼa:
Hadia mbörö wa moguna tafalua halöwöda soroi ba dödö?
Moguna sibai mohalöwö ita. Hizaʼi, böi abölö taʼofönaiʼö daʼö moroi ba wamosumangeda Yehowa
5. Buania khöda na taʼokhögö waʼahono dödö ba zi no so
Ato niha samorege ba wangalui kefe sebua, hizaʼi hewisa moloʼö Sura Niʼamoniʼö? Baso 1 Timoteo 6:6-8, ba beʼe wanema li ba wanofu daʼa:
Moloʼö Sura Niʼamoniʼö, hadia gamuata sinangea taʼokhögö?
Hewaʼae na lö ebua gefeda, tola nasa tarasoi waʼomuso dödö. Futa VIDEO, ba beʼe wanema li ba wanofu daʼa:
Hewaʼae na lö ebua gefera, hadia mbörö wa larasoi waʼomuso dödö yaʼira si hadauga fongambatö andrö mege?
Hewisa na lö khöda faʼahono dödö ba zi no so hewaʼae no obönö zoguna khöda? So sambua gamaedola nibeʼe Yesu sangoromaʼö hadia lua-luania na taʼokhögö lala wangera-ngera simane daʼö. Baso Luka 12:15-21, ba beʼe wanema li ba wanofu daʼa:
Hadia wamahaʼö si tola öhalö moroi ba gamaedola Yesu andrö?—Faigi ayati 15.
Baso ba faigi hadia gamaehutania Gamaedola 10:22 hegöi 1 Timoteo 6:10. Aefa daʼö, beʼe wanema li ba wanofu-nofu daʼa:
Moloʼö yaʼugö hezo zabölö moguna, fahuwusa khö Yehowa mazui kefe sebua? Hana wa öwaʼö zimanö?
Hadia lua-luania na taforege wangalui kefe sebua?
6. Ibönökhi zoguna khöda Yehowa
Abula dödö ba halöwö hegöi ba wangalui kefe, tola möi fanandraigö wamatida daʼö khö Yehowa. Futa VIDEO ba wamaigi hadia zi tola tafalua na göna ita abula dödö simane daʼö. Aefa daʼö, beʼe wanema li ba wanofu-nofu daʼa:
Hadia manö gabula dödö salua khö dalifusöda ba video andrö?
Hewisa wangasiwainia abula dödö andrö?
Baso Mataiʼo 6:25-34, ba beʼe wanema li ba wanofu daʼa:
Na taʼofönaiʼö Yehowa ba waʼaurida, hadia nifabuʼunia khöda?
SO ZANGUMAʼÖ: ”Uforege wohalöwö ba wombönökhi soguna ba nösi nomogu. Andrö wa lö molalado weʼamöi ba gangowuloa ero migu.”
Hadia ayati sameʼe khöu faʼafaduhu dödö wa no angetula si sökhi na öʼofönaiʼö wamosumange Yehowa ba waʼaurimö?
RAHU-RAHU WAMAHAʼÖ
Halöwö hegöi kefe fagölö-gölö moguna. Hizaʼi, böi taʼofönaiʼö daʼö moroi ba wamosumangeda Yehowa.
Hadia Wamahaʼö si Tola Öhalö?
Hadia zanolo yaʼugö enaʼö öʼokhögö lala wangera-ngera satulö sanandrösa ba halöwö?
Hadia mbuania khöu na ahono dödömö ba zi no so?
Hewisa wangoromaʼöu faʼafaduhu dödö ba mbuʼusa li Yehowa wa hasambalö ibönökhi zoguna ba nono mbanuania?
ALUI NASA DANÖ BÖʼÖ
Hadia no iwaʼö Sura Niʼamoniʼö wa lö sökhi gefe andrö?
”Hadia Kefe Andrö Waʼa ba Ngawalö zi Lö Sökhi?” (Artikel web)
Baso hewisa lala wangogunaʼöda kefe enaʼö tobali fangomuso dödö Lowalangi.
”Hadia Niwaʼö Zura Niʼamoniʼö Sanandrösa ba Wameʼe?” (Artikel web)
Hadia famaisa andrö ha fondrara dödö si lö möi famaʼala?
”Famaisa—Hewisa Moloʼö Sura Niʼamoniʼö?” (Sadarlah! Baŵa si Tölu 2015)
Hadia mbörö wa ibulöʼö waʼaurinia si samösa niha si famai ba sorabu-rabu niha?
”Tebai Ubato Fakudo” (Menara Pengawal, 1 Mbaŵa si Felezara 2011)