FAMAHAʼÖ 53
Fili Hiburan Sangomusoiʼö Tödö Yehowa
Yehowa andrö ”Lowalangi somuso tödö”. (1 Timoteo 1:11) Omasi ia na tasöndra waʼomuso dödö ba faʼohahau dödö ba waʼauri andre. Omasi göi ia na tasöndra wolombase moroi ba halöwöda. Ba wamahaʼö daʼa, tatutunö hewisa wamaluada ngawalö zomasi dödöda ba ginötö molombase ita, hizaʼi si möi fangomuso dödö Yehowa.
1. Hadia zinangea tatatugöi ba ginötö tafili hiburan?
Hadia zi toʼölö öfalua na molombaseʼö? So zomasi modao-dao manö ba nomo, duma-dumania mombaso buku, mamondrondrongo musik, mamaigi TV mazui mamokai Internet. So göi zomasi fao khö ndra awöra ba weʼamöi manörö-nörö ba zinga nasi, möi molangi mazui famai game. Gofu hadia hiburan nifilida, moguna tatatugöi enaʼö tefaudu daʼö ba ”zomasi Zoʼaya”. (Efeso 5:10) Hana wa moguna daʼa? Börö me ato niha somasi hiburan si fatuwu khö Yehowa simane faʼalösökhi, amuata wohorö mazui fakelemusa. (Baso Zinunö 11:5.) Hadia zanolo yaʼita ba wamili hiburan si fao faʼatua-tua?
Na tafili zi fahuwu khöda sangomasiʼö Yehowa, tola ladönisi dödöda ba wamalua si sökhi irege tola tafili hiburan si fao faʼatua-tua. Simane si no tatutunö ba zilalö, ”niha si fao ba zatua-tua, ba atua-tua ia göi dania”. Hizaʼi, na asese fariawö ita ba niha si lö moloʼö goi-goi Lowalangi, lua-luania ”falukha [ita] wamunu”.—Amaedola 13:20.
2. Hana wa moguna taʼönaigö ginötöda ba wamalua hiburan?
Hewaʼae na tenga hiburan si lö sökhi nifilida, moguna mangelama ita enaʼö lö talafo oya ginötö niʼogunaʼöda ba wamalua hiburan andrö. Na lö taʼönaigö ginötö ba wamalua hiburan, lua-luania lö inötöda ba wamalua sabölö moguna. Ifarou ita Sura Niʼamoniʼö enaʼö ’tahaogö wangogunaʼö inötö’.—Baso Efeso 5:15, 16.
ODÖDÖGÖ NASA WANGALUI
Tatutunö dania hadia manö zi tola öfalua ba wangai angetula si sökhi ba ginötö öfili hiburan.
3. Timbagö hiburan si lö sökhi
Hana wa moguna mangelama ita ba ginötö tafili hiburan? Futa VIDEO, ba beʼe wanema li ba wanofu-nofu daʼa:
Hadia zi fagölö ba watandrisa nifalua ba Roma mböröta moroi ba hiburan nifalua iadaʼa?
Ba video andrö mege, hadia wamahaʼönia khö Danny sanandrösa ba hiburan?
Baso Roma 12:9, ba beʼe wanema li ba wanofu daʼa:
Hewisa ayati daʼa tobali fanoloda ba wamili hiburan si fao faʼatua-tua?
Hadia manö zi fatuwu khö Yehowa? Baso Gamaedola 6:16, 17 hegöi Galatia 5:19-21. Beʼe wanema li ba wanofu daʼa ero öbaso sambua ayati:
Moroi ba ngawalö zi lö sökhi nitutunö ba ayati daʼö, hadia manö zasese so ba hiburan somasi niha sato iadaʼa?
Lala ba wamili hiburan si fao faʼatua-tua
Angeragö wanofu-nofu daʼa:
Hadia? Hadia so ngawalö zi fatuwu khö Yehowa bakha ba hiburan daʼa?
Hawaʼara? Hadia irörö ndraʼo hiburan daʼa irege lö inötögu wamalua sabölö moguna?
Haniha? Hadia asese fariawö ndraʼo ba niha si lö mangomasiʼö Yehowa börö hiburan daʼa?
Lö göna ita abula dödö na tafandrö-ndröu ita moroi ba deʼala. Börö daʼö, moguna tatimbagö hiburan si lö sökhi
4. Haogö wangogunaʼö inötö
Futa VIDEO, ba beʼe wanema li ba wanofu-nofu daʼa:
Hewaʼae na lö fasala hiburan nifaigi dalifusöda andrö, hadia lua-luania börö me talafo oya iʼogunaʼö ginötönia ba wamaigi hiburan?
Baso Wilifi 1:10, ba beʼe wanema li ba wanofu daʼa:
Hewisa ayati daʼö möi fanoloda ba wotatugöi hawaʼoya ginötö niʼogunaʼöda ba wamalua hiburan?
5. Fili hiburan si fao faʼatua-tua
Hewaʼae so hiburan si fatuwu khö Yehowa, hizaʼi oya nasa hiburan tanö böʼö si tola tafili sangomusoiʼö dödönia. Baso Zangombakha 8:15 hegöi Filifi 4:8, ba beʼe wanema li ba wanofu daʼa:
Hadia hiburan somasiʼö si möi fangomuso dödö Yehowa?
Oya hiburan hegöi rekreasi si tola öfili ba si möi fangomuso dödö Yehowa
SO ZANGUMAʼÖ: ”Lö fasala na ufaigi-faigi hiburan soʼamakhaita ba wakelemusa, faʼudusa hegöi amuata wohorö. Fokonia lö ufalua daʼö.”
Hadia öbeʼe fanema li na so zangumaʼö simane daʼö?
RAHU-RAHU WAMAHAʼÖ
Omasi Yehowa na tatatugöi wa hiburan nifilida möi fangomuso dödönia.
Hadia Wamahaʼö si Tola Öhalö?
Hadia hiburan si lö tola löʼö latimbagö ira niha Keriso?
Hana wa moguna taʼönaigö ginötö niʼogunaʼöda ba wamalua hiburan?
Hana wa omasiʼö öfili hiburan si möi fangomuso dödö Yehowa?
ALUI NASA DANÖ BÖʼÖ
Haniha zinangea motatugöi hadia hiburan si tola tafaigi?
”Hadia Tebai Lafaigi Film, Buku mazui Sinunö Ira Samaduhuʼö Yehowa?” (Artikel web)
Baso hewisa enaʼö tola öhalö gangetula si sökhi ba ginötö öfili hiburan hegöi rekreasi.
”Hadia So Gunania Khöu Rekreasi Nifaluamö?” (Menara Pengawal, 15 Mbaŵa si Fulu 2011)
Baso hadia mbörö wa ibulöʼö hiburan nifilinia si samösa ira matua, tuhonia ”Tola Ulawa Wanahö-nahö Tödö”.
”Sura Niʼamoniʼö Zombulöʼö Faʼauri” (Menara Pengawal, 1 Mbaŵa si Dua 2010)
Faigi hewisa zi samösa ina ba wangai angetula si sökhi sanandrösa ba hiburan soʼamakhaita ba wakelemusa.