7. Abölö sökhi huku hegöi amakhoita ba Wamatörö Lowalangi

Lafazökhi huku ira samatörö hegöi amakhoita soguna ba niha sato enaʼö telumöʼö nono mbanuara. So göi huku ba Wamatörö Lowalangi awö gamakhoita si lö tola löʼö laʼoʼö iraono mbanuania. Baso 1 Korindro 6:9-11, ba beʼe wanema li ba wanofu-nofu daʼa:

• Moloʼö yaʼugö, hewisa gulidanö andre na fefu niha laʼoʼö huku hegöi amakhoita nibeʼe Lowalangi?a

• Moloʼö yaʼugö, hadia sinangea na iʼandrö Yehowa ba nono mbanuania enaʼö laʼoʼö huku hegöi amakhoita nibeʼenia? Hana wa öwaʼö zimanö?

• Hadia dandra sangoromaʼö wa tola tebulö niha si lö moloʼö huku hegöi amakhoita nibeʼe Lowalangi?—Faigi ayati 11.

Ato niha si lö omasi na ladunö-dunö sanandrösa ba waʼorudu. Ba ginötö itutunö Sura Niʼamoniʼö sanandrösa ba waʼorudu, ihaogö izara-zara wangombakha, hizaʼi tenga si möi fangaila. So gunania khöda niwaʼö Zura Niʼamoniʼö andre börö me moroi khö Yehowa Zura Niʼamoniʼö. Yehowa Zomböi yaʼita ba aboto ba dödönia hadia zabölö sökhi khöda. Ifatunö khöda hadia zinangea tafalua ba wangomusoiʼö tödönia ba hadia zanolo yaʼita enaʼö tasöndra waʼohahau dödö sagötö faʼara.

1. Hewisa wamaigi Yehowa sanandrösa ba waʼorudu?

Faʼorudu andrö buala moroi khö Yehowa. Omasi ia na lasöndra waʼomuso dödö ba waʼorudu si samösa ira matua hegöi ira alawe si no tefaböbö ba wangowalu. Börö mbuala andre wa tola mongaʼötö zi sambua fongambatö. Hizaʼi, moguna laforomaʼö waʼomasira ba lala si tefaudu ba sinangea, irege tola tobali fangomuso dödöra daʼö. Andrö imane Taromali Lowalangi, ”Yaʼomuso dödöu khö woʼomou ira alawe nihalöu me awuyu-wuyu ndraʼugö.” (Amaedola 5:18, 19) Iʼandrö Yehowa ba niha Keriso enaʼö lö faröi ira khö ngambatöra. Na laʼoʼö daʼö, lö lafalua waʼorudu ba zi tenga foʼomora.—Baso Heberaiʼo 13:4.

2. Hadia gamuata fohorö andrö?

Imane Sura Niʼamoniʼö, ”Niha sohorö . . . tebai tefaʼamöi ba Wamatörö Lowalangi.” (1 Korindro 6:9, 10) Ngawua wehede Yunani niʼogunaʼö ndra sanura Sura Niʼamoniʼö sanandrösa ba gamuata wohorö, yaʼia daʼö porneia. Eluahania (1) faʼorudua ndra matua hegöi ira alawe si lö sangowalu, (2) faʼorudu ndra matua khö nawönia ira matua, ira alawe khö nawönia ira alawe, ba (3) faʼorudu ba gurifö. Na taʼaröuʼö ita ba ”gamuata wohorö”, no taʼomusoiʼö dödö Yehowa ba tatema howu-howu.—1 Tesalonika 4:3.

ODÖDÖGÖ NASA WANGALUI

3. Miʼaliokö wanimba amuata wohorö

Samösa nono mbanua Lowalangi sotöi Yosefo, itimbagö wondrönisi dödö nifalua ndra alawe sedöna orudu khönia. Baso 1 Moze 39:1-12, ba beʼe wanema li ba wanofu-nofu daʼa:

• Hadia mbörö wa moloi Yosefo moroi khö ndra alawe daʼö?—Faigi ayati 9.

• Moloʼö yaʼugö, hadia tefaudu gangetula nihalö Yosefo andrö? Hana wa öwaʼö zimanö?

VIDEO: Timbagö Gamuata Wohorö (5:06)

Omasi Yehowa na tatimbagö gamuata wohorö. Baso 1 Korindro 6:18, ba beʼe wanema li ba wanofu-nofu daʼa:

• Hadia manö ginötö si möi börö wa tola ifalua gamuata wohorö si samösa niha?

• Hadia nifaluamö enaʼö öʼila ötimbagö gamuata wohorö?

4. Tola ölawa wondrönisi dödö

VIDEO: Tola Ölawa Wondrönisi Dödö na Öbaso Zura Niʼamoniʼö (3:02)

• Ba video andrö mege, hadia nifalua dalifusöda ira matua me iʼokhögö wangera-ngera hegöi amuata si tola möi börö waʼafaröinia khö woʼomonia?

Itaria abua ba niha Keriso si lö faröi ba wondrorogö fangera-ngerara enaʼö lö raʼiö. Hadia manö zinangea öfalua enaʼö lö öʼera-era gamuata wohorö? Baso Wilifi 4:8, ba beʼe wanema li ba wanofu-nofu daʼa:

• Hadia manö zinangea taʼangeragö?

• Na asese tabaso Zura Niʼamoniʼö ba möi ita manuriaigö, hadia mbörö wa möi fanolo khöda daʼö ba wolawa fondrönisi dödö?

5. Moguna khöda goi-goi Yehowa

VIDEO: Si Lö Tödö (9:31)

• Hewisa wa tola tedönisi dödö nono matua daʼö?—Faigi Gamaedola 7:8, 9.

• Moloʼö sura Gamaedola 7:23, 26, amuata wohorö tola iʼasogö khöda ngawalö gabula dödö si lö sökhi. Na lö raʼiö ita ba wangera-ngera hegöi ba gamuatada, hadia manö gabula dödö si lö alua khöda?

• Na lö raʼiö ita ba wangera-ngera hegöi ba gamuata, hana wa tola tasöndra waʼohahau dödö sagötö faʼara?

So zangumaʼö wa fehede Zura Niʼamoniʼö sanandrösa ba waʼorudu ndra matua khö nawönia ira matua, ira alawe khö nawönia ira alawe, no amakhoita si lö faʼomasi. Hizaʼi, Yehowa andrö Lowalangi sebua faʼomasi ba omasi ia na dozi niha lasöndra waʼohahau dödö sagötö faʼara. Enaʼö tola tasöndra waʼauri simane daʼö, moguna taʼoʼö goi-goi Yehowa. Baso 1 Korindro 6:9-11, ba beʼe wanema li ba wanofu daʼa:

• Hadia ha faʼomasi ba waʼorudu ndra matua khö nawönia ira matua mazui faʼorudu ndra alawe khö nawönia ira alawe zi fatuwu khö Lowalangi?

Enaʼö tola taʼomusoiʼö dödö Lowalangi, so zinangea tabulöʼö. Na taforege wamalua daʼö, hadia so mbuania khöda? Baso Zinunö 19:8, 11, ba beʼe wanema li ba wanofu-nofu daʼa:

• Moloʼö yaʼugö, hadia tola taʼoʼö goi-goi Yehowa sanandrösa ba gamuata? Hana wa öwaʼö zimanö?

RAHU-RAHU WAMAHAʼÖ

Faʼorudu no sambua buala moroi khö Yehowa enaʼö tola lasöndra waʼomuso dödö si sambua fongambatö.

Hadia Wamahaʼö si Tola Öhalö?

• Hadia manö zi farahu ba gamuata wohorö andrö?

• Hadia manö zi tola manolo yaʼita ba wanimbagö amuata wohorö?

• Hadia gunania khöda na taʼoʼö goi-goi Yehowa sanandrösa ba gamuata?

ALUI NASA DANÖ BÖʼÖ

Baso hewisa wamaigi Lowalangi niha sorudu ba zi sambua omo fatua lö mangowalu.

”Hadia Niwaʼö Zura Niʼamoniʼö ba Niha Sorudu ba zi Sambua Omo Fatua Lö Mangowalu?” (Artikel web)

Hewaʼae lö nitehegö Zura Niʼamoniʼö waʼorudu ndra matua khö nawönia ira matua mazui ira alawe khö nawönia ira alawe, hizaʼi tenga daʼö geluahania wa fatuwu ita ba niha samalua daʼö. Baso hadia mbörö.

”Hadia Fasala Homoseksualitas Andrö?” (Artikel web)

Hewisa wa möi folumöʼöda goroisa Lowalangi sanandrösa ba waʼorudu?

”Hadia Seks Oral Fagölö Ira Zamalua Faʼorudu?” (Artikel web)

Baso hadia mbörö wa tebulö zi samösa ira matua sorudu khö nawönia ira matua me mböröta, hizaʼi ba gafuriata tola iʼomusoiʼö dödö Lowalangi. Tuhonia ”Urasoi Wa Laʼameʼegö Tödö Ndraʼo.”

”Sura Niʼamoniʼö Zombulöʼö Faʼauri” (Menara Pengawal, 1 Mbaŵa si Öfa 2011)

Hewaʼae na no öʼomasiʼö Yehowa, ba sindruhu-ndruhu öforege enaʼö lö öfalua zi möi fangafökhö dödönia, hizaʼi itaria öfalua zala. So zala sabölö ebua moroi ba zala tanö böʼö. (1 Korindro 6:9, 10) Na no öfalua horö sebua, törö tödöu wa iʼomasiʼö nasa ndraʼugö Yehowa. Omasi ia iʼefaʼö zalamö ba itolo ndraʼugö.

1. Hadia zinangea tafalua enaʼö iʼefaʼö zalada Yehowa?

Abu sibai dödö niha sangomasiʼö Yehowa na no ifalua horö sebua. Hizaʼi terara dödönia na itörö tödönia mbuʼusa li Yehowa ba nono mbanuania: ”He no hulö ndro waʼoyo horömi, ba tobali afusi sibai hulö esi.” (Yesaya 1:18) Na sindruhu-ndruhu tafalalini gera-erada, hasambalö iʼefaʼö zalada Yehowa. Hewisa wangoromaʼöda wa no tafalalini gera-erada? Sindruhu-ndruhu taʼandrö waʼebolo dödönia ba zala si no tafalua ba taböhöli wamalua daʼö saʼae. Taʼandrö göi khö Yehowa enaʼö iʼefaʼö zalada. Aefa daʼö, taforege wolawa fangera-ngera hegöi si lö sökhi si toʼölö tafalua samarou yaʼita ba wamalua horö. Taʼodödögö göi woloʼö goi-goi satulö moroi khö Yehowa.—Baso Yesaya 55:6, 7.

2. Hewisa wangogunaʼö Yehowa ira satua sokubaloi ba wanolo yaʼita na no tafalua horö sebua?

Na no tafalua horö sebua, iʼandrö khöda Yehowa enaʼö ’taʼalui ndra satua sokubaloi ba mbanua niha Keriso’. (Baso Yakobo 5:14, 15.) Ira satua sokubaloi andre laʼomasiʼö Yehowa hegöi biri-birinia. No tebeʼe khöra wanuturu lala si tobali fanoloda enaʼö ifuli teʼatulöʼö wahuwusada khö Yehowa.—Galatia 6:1.

Hewisa ndra satua sokubaloi ba wanolo yaʼita na no tafalua horö sebua? So darua mazui datölu ndra satua sokubaloi, laʼogunaʼö ayati moroi ba Zura Niʼamoniʼö sangoromaʼö hadia mbörö wa fasala nifaluada andrö. Labeʼe göi wanuturu lala hegöi mene-mene enaʼö lö ifuli tafalua zala andrö. Na so zamalua horö sebua si lö mamalalini era-era, laheta ia ba mbanua niha Keriso ira satua sokubaloi enaʼö telumöʼö mbanua niha Keriso moroi ba gamuatania si lö sökhi andrö.

ODÖDÖGÖ NASA WANGALUI

3. Moguna tafatunö horö si no tafalua

Gofu hadia horö nifaluada, möi fangafökhö dödö Yehowa daʼö. Börö daʼö, moguna tafatunö khönia horö si no tafalua. Baso Zinunö 32:1-5, ba beʼe wanema li ba wanofu daʼa:

• Na tafatunö khö Yehowa horö si no tafalua ba lö taforege waminiʼö horö andrö, hadia mbuania khöda?

VIDEO: ”Iʼotuʼö Niha Niʼomasiʼönia Yehowa” (3:01)

• Ba video andrö, hewisa ndra satua sokubaloi ba wanolo Canon enaʼö mangawuli ia khö Yehowa?

Latolo ita ira satua sokubaloi. Börö daʼö, na fahuhuo ita khöra enaʼö soroi ba dödö ba böi tabiniʼö khöra zala si no tafalua. Baso Yakobo 5:16, ba beʼe wanema li ba wanofu daʼa:

• Na lö falimo ita ba ginötö fahuhuo ita khö ndra satua sokubaloi, hadia mbörö wa aoha khöra ba wameʼe khöda fanolo?

4. Iforomaʼö waʼahakhö dödö Yehowa ba niha samalua horö

Na so zamalua horö sebua ba lö omasi ia iʼoʼö goi-goi Yehowa, muheta ia moroi ba mbanua niha Keriso ba lö saʼae fariawö ita khönia. Baso 1 Korindro 5:6, 11, ba beʼe wanema li ba wanofu daʼa:

• Hulö simane ragi nifaruka ba hamo darigu, hadia lua-luania na fariawö niha si lö mamalalini era-era ba mbanua niha Keriso?

Moroi ba nifalua Yehowa ba niha samalua horö, hezo oroma wa no iforomaʼö waʼahakhö dödö, falöfatandro, hegöi faʼomasi?

5. Iʼefaʼö zalada Yehowa na tafalalini gera-erada

So sambua gamaedola nitutunö Yesu sanolo yaʼita enaʼö taʼila hewisa dödö Yehowa ba ginötö ifalalini gera-erania si samösa niha. Baso Luka 15:1-7, ba beʼe wanema li ba wanofu daʼa:

• Moroi ba gamaedola daʼö, hadia wamahaʼönia khöu sanandrösa khö Yehowa?

Baso Hezekieli 33:11, ba beʼe wanema li ba wanofu daʼa:

• Hadia zi lö tola löʼö tafalua sangoromaʼö wa no tafalalini gera-erada?

RAHU-RAHU WAMAHAʼÖ

Na no tafalua horö sebua, hizaʼi sindruhu-ndruhu maniasa ita ba tahalö gangetula wa lö saʼae tafalua zi lö sökhi andrö, hasambalö wa iʼefaʼö horöda Yehowa.

Hadia Wamahaʼö si Tola Öhalö?

• Hadia mbuania na tafatunö khö Yehowa horö si no tafalua?

• Hadia zinangea tafalua enaʼö teʼefaʼö horöda?

• Na no tafalua horö sebua, hadia mbörö wa taʼandrö wanolo khö ndra satua sokubaloi?

ALUI NASA DANÖ BÖʼÖ

Faigi hewisa zi samösa ira matua wanemaʼönia faʼahakhö dödö Yehowa simane niwaʼö ba Yesaya 1:18.

Lö Aombö Dödögu ba Waʼahakhö Dödö Yehowa (5:02)

Hadia gunania gamakhoita sanandrösa ba wangefasi?

”Mangoromaʼö Faʼomasi hegöi Faʼahakhö Dödö ba Niha Samalua Horö” (Manuriaigö, Baŵa si Walu 2024)

Baso atö hewisa wangoromaʼö faʼomasi hegöi faʼahakhö dödö ba niha samalua horö si lö mamalalini era-era

”Fanolo ba Niha Niheta ba Mbanua Niha Keriso” (Manuriaigö, Baŵa si Walu 2024)

Baso hewisa zi samösa ira matua si no mondröi sindruhu irasoi wa hulö no ifuli idöni ia Yehowa, tuhonia ”Hasambalö Ufuli Ndraʼo khö Yehowa”.

”Sura Niʼamoniʼö Zombulöʼö Faʼauri” (Menara Pengawal, 1 Mbaŵa si Öfa 2012)