Ba zi sagörö ulidanö, no faböʼö-böʼö wangera-ngera niha sanandrösa ba wamadu tuo. So zamadu tuo ba ginötö owulo ia khö ndra awö-awönia. So göi zi lö omasi mamadu tuo. Hizaʼi, so niha samadu tuo irege mabu. Hadia niwaʼö Zura Niʼamoniʼö sanandrösa ba wamadu tuo?

1. Hadia fasala na tabadu duo?

Lö nitegu Zura Niʼamoniʼö ita ba wamadu tuo. Hezo tola taʼila? Me itutunö Sura Niʼamoniʼö sanandrösa ba ngawalö zi sökhi nibeʼe Lowalangi khöda, itötöi göi wa ’agu andrö möi fangomuso dödö niha’. (Sinunö 104:14, 15) Baero daʼö, so göi ösa nono mbanua Lowalangi nitutunö ba Zura Niʼamoniʼö si no irai mamadu tuo.—1 Timoteo 5:23.

2. Hadia mene-mene nibeʼe Zura Niʼamoniʼö ba niha samadu tuo?

Lö omasi Yehowa na mabu ita mazui na taduhugö wamadu tuo. (Galatia 5:21) Imane Taromalinia, ”Böi forudu ndraʼugö ba gotalua niha soya mamadu agu.” (Amaedola 23:20) Börö daʼö, tebai oya tabadu duo hewaʼae na ha yaʼita. Na talafo oya tabadu duo, lua-luania lö khöda fangera-ngera si sökhi ba lö taʼila tazago wehede hegöi nifaluada. Tola manö göi mofökhö ita. Na lö khöda fanaha tödö, abölö sökhi na lö tabadu duo.

3. Hewisa enaʼö taʼameʼegö tödö gangetula niha böʼö sanandrösa ba wamadu tuo?

Dozi niha moguna lahalö gangetula hadia labadu duo mazui löʼö. Tebai tahuku na so niha samadu tuo maʼifu ba tebai göi tafaso zi samösa niha na lö omasi ia wamadu tuo. (Roma 14:10) Na taʼila so dalifusöda si tetutu tödö na tabadu duo, abölö sökhi lö tabadu ia. (Baso Roma 14:21.) ’Böi ha soguna khöda samösa taʼangeragö, hizaʼi soguna ba niha böʼö.’—Baso 1 Korindro 10:23, 24.

ODÖDÖGÖ NASA WANGALUI

4. Halö gangetula hadia öbadu duo mazui löʼö

Hadia niwaʼö Yesu sanandrösa ba wamadu tuo? Enaʼö öʼila wanema linia, datatutunö dandra sahöli-höli dödö siföföna nifalua Yesu. Baso Yohane 2:1-11, ba beʼe wanema li ba wanofu-nofu daʼa:

• Moroi ba dandra sahöli-höli dödö andrö, no taʼila hewisa lala wangera-ngera Yesu sanandrösa ba duo hegöi niha samadu tuo. Na simanö, hadia wamahaʼönia khöda?

• Börö me lö nitegu Yesu ita ba wamadu tuo, hewisa wangera-ngerada yaʼita niha Keriso na so niha somasi mamadu tuo?

Hewaʼae tola tabadu duo, hizaʼi moguna taʼangeragö hadia angetula si sökhi daʼö mazui tenga. Baso Gamaedola 22:3, ba angeragö hewisa zalua andre so lua-luania ba gangetula nihalömö:

• Molohe moto ndraʼugö, hondra mazui öfofanö mesin.

• Manabina ndraʼugö.

• Itegu ndraʼugö doto enaʼö lö öbadu duo.

• Lö khöu fanaha tödö ba wamadu tuo.

• So gamakhoita ba mbanua si toröi yaʼugö wa tebai mamadu tuo.

• Na fao ndraʼugö ba niha si no mangai angetula wa lö saʼae ibadu duo börö me daʼö zi toʼölö ifalua ba zilalö.

Hewisa na öhalö gangetula ba wameʼe tuo na alua walöwa mazui na so gowasa tanö böʼö? Enaʼö öʼila hadia zi tola manolo yaʼugö ba wangai angetula, futa VIDEO.

VIDEO: Hadia Ubeʼe Duo mazui Löʼö? (2:41)

Baso Roma 13:13 hegöi 1 Korindro 10:31, 32. Aefa daʼö, beʼe wanema li ba wanofu daʼa na no öbaso ero sambua ayati:

• Hewisa goi-goi si so ba ayati daʼa möi fanolomö ba wangai angetula sangomusoiʼö tödö Yehowa?

5. Tatugöi hawaʼoya öbadu duo

Na öhalö gangetula ba wamadu tuo, törö tödöu daʼa: Hewaʼae lö itegu ita Yehowa ba wamadu tuo, hizaʼi lö omasi ia na taduhugö wamadu tuo. Hadia mbörö? Baso Hosea 4:11, 18, ba beʼe wanema li ba wanofu daʼa:

• Hadia manö zi tola alua ba zi samösa niha na talafo oya ibadu duo?

Hewisa enaʼö lö oya tabadu duo? Moguna aboto ba dödöda wa so ndrege waʼabölöda. Baso Gamaedola 11:2, ba beʼe wanema li ba wanofu daʼa:

• Hana wa moguna ötatugöi hawaʼoya duo si tola öbadu?

6. Tola öböhöli wamadu-madu tuo

VIDEO: ’Alangu Dödögu Waʼaurigu’ (6:32)

• Ba video andrö mege, hadia nifalua Dmitry na no mabu ia?

• Hadia tola iʼanemaiʼö iböhöli wamadu-madu tuo?

• Hewisa wa tola iböhöli ba gafuriata wamadu-madu tuo?

Baso 1 Korindro 6:10, 11, ba beʼe wanema li ba wanofu-nofu daʼa:

• Hadia niwaʼö Zura Niʼamoniʼö sanandrösa ba wemabu-mabu?

• Hadia zangoromaʼö wa tola iböhöli si samösa niha wamadu-madu tuo?

Baso Mataiʼo 5:30, ba beʼe wanema li ba wanofu daʼa:

• Ba ayati daʼö, fanaba tanga eluahania so nitehegöda enaʼö tola taʼomusoiʼö dödö Yehowa. Na simanö, hadia zi tola öfalua na omasiʼö öböhöli wamadu-madu tuo?a

Baso 1 Korindro 15:33, ba beʼe wanema li ba wanofu daʼa:

• Hadia lua-luania na fariawö ndraʼugö ba niha samadu-madu tuo?

RAHU-RAHU WAMAHAʼÖ

No iʼamualagö khöda duo Yehowa enaʼö tasöndra waʼomuso dödö. Hizaʼi, lö omasi ia na mabu ita mazui na talafo oya tabadu duo.

Hadia Wamahaʼö si Tola Öhalö?

• Hewisa moloʼö Sura Niʼamoniʼö sanandrösa ba duo?

• Hadia manö lua-luania na talafo oya tabadu duo?

• Hewisa enaʼö tola taʼameʼegö tödö gangetula niha böʼö sanandrösa ba wamadu tuo?

ALUI NASA DANÖ BÖʼÖ

Hewisa ndra si bohou ebua ba wangai angetula si sökhi sanandrösa ba wamadu tuo?

Angeragö Fatua Lö Öbadu (2:31)

Hadia manö lala si tola öfalua enaʼö öböhöli wamadu-madu tuo?

”Rorogö Wangera-ngera Satulö Sanandrösa ba Wamadu Tuo” (Menara Pengawal, 1 Mbaŵa si Sara 2010)

Na labadu duo ira niha Keriso, hadia tola lafatiti galasira?

”Fanofu Zombaso” (Menara Pengawal, 15 Mbaŵa si Dua 2007)

Baso hewisa zi samösa ira matua samadu-madu tuo tola ibulöʼö waʼaurinia. Tuhonia ”Yaʼodo Andre Embe Satöla”.

”Sura Niʼamoniʼö Zombulöʼö Faʼauri” (Menara Pengawal, 1 Mbaŵa si Lima 2012)

Fefu ita no faböʼö-böʼö zomasi ita zamösana sanandrösa ba wonukha hegöi fangehao mboto. So goi-goi Zura Niʼamoniʼö si tola manolo yaʼita ba wangai angetula si sökhi sanandrösa ba wonukha somasi ita, hizaʼi tola möi fangomuso dödö Yehowa. Datafatunö hadia manö goi-goinia andrö moroi ba Zura Niʼamoniʼö.

1. Hadia goi-goi Zura Niʼamoniʼö si tobali fanoloda ba wotatugöi fonukha hegöi fangehao mboto?

Moguna tahaogö wamili ’nukha soadu ba sinangea, lö fayawa ba tahaogö wamatimbaisi’. Moguna göi tatatugöi irege laʼila niha wa yaʼita andre ”sangataʼufi Lowalangi”. (1 Timoteo 2:9, 10) Angeragö goi-goi si öfa ngawalö andre: (1) Fonukhada enaʼö ”soadu ba sinangea”. Ba gangowuloa, ba daʼö öʼila wa no faböʼö-böʼö zomasi nono mbanua Yehowa, hizaʼi lagu wonukha hegöi model mbura, daʼö zangoromaʼö wa laʼataʼufi Lowalangi nifosumangera. (2) Taʼogunaʼö nukha ’si lö fayawasa’. Eluahania, lö tafake nukha si tola mondrönisi fangera-ngera niha ba wamalua horö mazui enaʼö adöni dödöra wamaigi yaʼita. (3) Taforomaʼö wa no ’tahaogö wamatimbaisi’, yaʼia na lö tagoʼö-goʼö lagu wonukha hegöi fangehao mboto somasi-masi niha iadaʼa. (4) Moroi ba lagu wonukha hegöi fangehaogöda botoda, daʼö zangoromaʼö wa yaʼita andre ”sangataʼufi Lowalangi” irege laʼila niha sato wa Lowalangi sindruhu nifosumangeda.—1 Korindro 10:31.

2. Hana wa moguna taʼangeragö ndra talifusöda na tafili nukhada?

Yaʼita zangai angetula hadia nukha somasi ita tafake, hizaʼi moguna tahaogö taʼangeragö hewisa lagu wonukhada faböi alangu dödö zamaigi. Moguna göi taforege enaʼö lö tobali fangala ba niha böʼö. Omasi ita ’taʼomusoiʼö dödö nawöda ba tafalua zi sökhi ba wamarou tödöra’.—Baso Roma 15:1, 2.

3. Hewisa lagu wonukhada möi fondrönisi dödö niha böʼö enaʼö lafahaʼö ira sanandrösa khö Yehowa?

Omasi ita na sökhi ba moadu lagu wonukhada ero inötö. Hizaʼi, moguna taʼameʼegö tödö hewisa lagu wonukhada na möi ita ba gangowuloa hegöi na möi ita manuriaigö turia somuso dödö. Lö omasi ita na mangoloi dödöra ha börö lagu wonukhada irege lö laʼameʼegö tödö duria nifaʼemada. Hizaʼi, omasi ita na ”tefolakhömi wamahaʼö Lowalangi Sangorifi yaʼita” ba adöni dödö niha böʼö ba wamahaʼö yaʼira ba zindruhu.—Tito 2:10.

ODÖDÖGÖ NASA WANGALUI

4. Fonukha si sökhi daʼö zangoromaʼö wa Yehowa nifosumangeda

Hadia sibai mbörö wa tahaogö wonukha hegöi botoda? Baso Zinunö 47:2, ba beʼe wanema li ba wanofu-nofu daʼa:

• Na lö olifu ita wa tola teʼoʼaya döi Yehowa ba lagu wonukhada, hadia nukha sinangea tafili?

• Moloʼö yaʼugö, hadia moguna taʼameʼegö tödö lagu wonukhada na möi ita ba gangowuloa hegöi na manuriaigö turia somuso dödö? Hadia mbörö?

5. Hewisa enaʼö sökhi gangetula nihalöda sanandrösa ba wonukha hegöi fangehao mboto?

Futa VIDEO.

VIDEO: ”Gofu Hadia Nifaluami, Mifalua Ia ba Wamolakhömi Lowalangi” (10:18)

He na maha mböli nukhada mazui mura, sabölö moguna yaʼia daʼö lö taʼunö ba tefaudu ba halöwö nifaluada. Baso 1 Korindro 10:24 hegöi 1 Timoteo 2:9, 10. Aefa daʼö, tutunö hadia mbörö wa lö taʼogunaʼö . . .

• nukha si no agasika-sika mazui si no tekörö-körö.

• nukha sagadogo-dogo, si fandroli-ndroli, irege tedönisi dödö niha ba wamalua horö.

Hewaʼae na tenga barö mbawa Goroisa Moze so niha Keriso, tobali fanoloda goroisa andrö enaʼö taʼila hewisa dödö Yehowa. Baso 5 Moze 22:5, ba beʼe wanema li ba wanofu daʼa:

• Hadia mbörö wa tebai tafake nukha hegöi fangehao mboto irege hulö ndra alawe ndra matua, ba simanö göi hulö ndra matua ndra alawe?

Baso 1 Korindro 10:32, 33 hegöi 1 Yohane 2:15, 16, ba beʼe wanema li ba wanofu-nofu daʼa:

• Hadia mbörö wa tahaogö lagu wonukhada faböi tobali fangala ba niha böʼö hegöi khö ndra talifusöda ba mbanua niha Keriso?

• Hadia lagu wonukha hegöi fangehao mboto si toʼölö lafake niha ba mbanua si toröi yaʼugö?

• Moroi ba lagu wonukha hegöi fangehao mboto andrö, hadia so zi lö tefaudu ba niha Keriso? Hadia mbörö wa öwaʼö zimanö?

RAHU-RAHU WAMAHAʼÖ

Na tahalö gangetula si sökhi ba lagu wonukhada hegöi ba wangehao boto, no taforomaʼö wa tafosumange Yehowa hegöi niha böʼö.

Hadia Wamahaʼö si Tola Öhalö?

• Hadia mbörö wa iʼameʼegö tödö sibai Yehowa lagu wonukhada hegöi fangehao mboto?

• Hadia goi-goi sanolo yaʼita ba wangai angetula sanandrösa ba wonukha hegöi fangehao mboto?

• Hewisa lagu wonukhada tola möi fangoʼaya mazui tobali fondrönisi dödö niha ba wamosumange satulö?

ALUI NASA DANÖ BÖʼÖ

Baso hadia niwaʼö niha na laʼila lagu wonukhamö.

”Hewisa Lagu Wonukhagu?” (Artikel web)

Fatua lö ötato mbotomö, hadia mbörö wa moguna öhaogö öʼangeragö lua-luania?

”Hadia Niwaʼö Zura Niʼamoniʼö Sanandrösa ba Tato?” (Artikel web)

Baso goi-goi tanö böʼö si tola manolo yaʼugö ba wangai angetula si sökhi sanandrösa ba wonukha.

”Hadia Möi Famolakhömi Lowalangi Lala Wonukhamö?” (Manuriaigö, Baŵa si Siwa 2016)

Hewisa zi samösa ira alawe, ba gafuriata itemaʼö nifili niha böʼö sanandrösa ba lagu wonukha?

”No Irai Tobali Taha-Taha Khögu Lagu Wonukha hegöi Fangehao Mboto” (Sedarlah! 22 Mbaŵa si Felendrua 2003)