Ba Wamalua Bongi Watomesa Zoʼaya, Hana Wa Faböʼö Nifalua Ndra Samaduhuʼö Yehowa moroi ba Agama Tanö Böʼö?

Mafalua wanörö tödö Femanga Gö Niʼamoniʼö mazui Bongi Watomesa Zoʼaya ba lala si tefaudu molo’ö Sura Niʼamoniʼö. Femanga Gö Niʼamoniʼö mufotöi göi ia Femanga Safuria mazui Fanörö Tödö faʼamate Yesu. (1 Korindro 11:20) Oya gereja samalua fanörö tödö andre, hizaʼi lö tefaudu lala nifaluara moloʼö Sura Niʼamoniʼö.

Ohitö dödö

Ohitö dödö wa mufalua Mbongi Watomesa Zoʼaya yaʼia daʼö ba wanörö tödö hegöi ba wangandrö saohagölö khö Yesu ba zi no ifalua khöda. (Mataiʼo 20:28; 1 Korindro 11:24) Tenga sambua sakramen daʼa mazui si toʼölö mufalua ba agama enaʼö tefahowuʼö zi samösa niha mazui teʼefaʼö horönia.a Ifahaʼö ita Sura Niʼamoniʼö wa sambua lala enaʼö teʼefaʼö horöda yaʼia daʼö na mamati ita khö Yesu, tenga ba wamalua si toʼölö mufalua ba agama.—Roma 3:25; 1 Yohane 2:1, 2.

Hawaʼasese?

Iwaʼö Yesu khö ndra nifahaʼönia ba wanörö tödö Bongi Watomesa Zoʼaya, hizaʼi lö izara-zara wangombakha hawaʼasese mufalua daʼö. (Luka 22:19) So zangumaʼö wa mufalua ia ero waŵa, ero migu, ero maʼökhö, mato hauga kali ero maʼökhö mazui muʼaseseʼö. Hizaʼi, so mato hauga ngawalö zinangea taʼila.

Ifalua Yesu wanörö tödö Bongi Watomesa Zoʼaya ba tanggal si fagölö me lafalua Gowasa Fasa ira niha Yahudi. Mate göi ia ba ngaluo si fagölö. (Mataiʼo 26:1, 2) Tenga ba zi lö mudöna-döna daʼa. Ifagölösi Sura Niʼamoniʼö höli nibeʼe Yesu ba nono mbiri-biri Wasa. (1 Korindro 5:7, 8) Sakali döfi mufalua Wasa. (2 Moze 12:1-6; 3 Moze 23:5) Börö daʼö, ira niha Keriso me götö siföföna, lafalua wanörö tödö faʼamate Yesu sakali ba zi döfi.b Daʼa göi zi toʼölö si teʼodane-dane ba Zura Niʼamoniʼö niʼoʼö ndra Samaduhuʼö Yehowa.

Tanggal hegöi inötö

Lala wamalua Yesu Bongi Watomesa Zoʼaya tenga ha ba wanolo yaʼita ba wangi’ila hawaʼasese tafalua daʼö, hizaʼi hawaʼara tatörö tödöda ia. Ifalua daʼö me no aekhu luo me tanggal 14 Nisana döfi 33 M, moloʼö kalender ba götö Zura Niʼamoniʼö. (Mataiʼo 26:18-20, 26) Simane niha Keriso me götö siföföna, mafalua göi wanörö tödö andrö ba tanggal 14 Nisana ero röfi.c

Me 33 M, 14 Nisana aekhu ba ngaluo Zumaha. Hizaʼi, tanggal daʼö lö fagölö ngaluonia ero röfi. Enaʼö tola matatugöi tanggal 14 Nisana, maʼogunaʼö lala si fagölö simane niʼogunaʼö ba götö Yesu. Lö maʼoʼö lala niʼogunaʼö kalender Yahudi ba ginötö iadaʼa.d

Roti hegöi agu

Ba wamalua daʼa, iʼogunaʼö roti si lö mufaruka ragi Yesu hegöi agu si toröi moroi ba Gowasa Fasa. (Mataiʼo 26:26-28) Börö daʼö, lö maʼogunaʼö roti si no mubeʼe ragi mazui si no mufaruka ba danö böʼö. Maʼogunaʼö göi zindruhu nagu, tenga jus nagu mazui agu sami si no mubeʼe gulo. Muhaogö wamazökhi tenga agu si no munönö alkohol mazui si no mufaruka ba danö böʼö.

So ösa gereja sangogunaʼö roti si no mufaruka ragi. Hizaʼi, moloʼö Sura Niʼamoniʼö, asese iʼamaedolagö horö simane ragi si möi famakiko. (Luka 12:1; 1 Korindro 5:6-8; Galatia 5:7-9) Börö daʼö, ha roti si lö mufaruka ragi zi tefaudu ba woʼamaedolagö boto Yesu si lö horö. (1 Fetero 2:22) Tanö böʼönia si lö tefaudu ba Zura Niʼamoniʼö yaʼia daʼö lagati zindruhu nagu faoma jus nagu. Daʼö ösa nifalua gereja si lö manehegö ba wangogunaʼö tuo. Hizaʼi, lö nitegu Zura Niʼamoniʼö ba wangogunaʼö tuo.—1 Timoteo 5:23.

Ha amaedola, tenga sindruhu-ndruhu ndro mazui botonia

Roti si lö mufaruka ragi hegöi agu ba wamalua owasa andrö ha amaedola mboto hegöi do Keriso. Lö alua dandra sahöli-höli dödö irege roti hegöi agu tobali boto Yesu hegöi do simane niwaʼö niha ösa. Datafaigi hadia niwaʼö Zura Niʼamoniʼö.

• No ibeʼe goroisa Lowalangi enaʼö böi so zi manga do. (1 Moze 9:4; Halöwö Zinenge 15:28, 29) Na iwaʼö Yesu khö ndra nifahaʼönia ba wamadu donia, eluahania ifarou ira ba wanawö oroisa Lowalangi. Sindruhunia, lö irai ifarou niha Yesu ba wanawö oroisa Lowalangi.—Yohane 8:28, 29.

• Na sindruhu-ndruhu labadu ndro Yesu ira sinengenia, lö iwaʼö Yesu wa ’aduwa dania’ ndronia. Ngawua wehede ”dania” eluahania lö nasa si tobali ia höli me luo daʼö.—Mataiʼo 26:28, Lembaga Alkitab Indonesia.

• Itehegö waʼaurinia Yesu tobali höli ha ”sakali irugi zi lö aetu”. (Heberaiʼo 9:25, 26) Hizaʼi, na tebulö roti hegöi agu tobali do awö nagole ba Mbongi Watomesa Zoʼaya, eluahania no hauga kali lafuli labunu Yesu tobali höli ira niha si manga roti ba samadu agu andrö.

• Tenga daʼö niwaʼö Yesu, ”Böi miböhöli wamalua daʼa ena’ö mibaliʼö ndraʼo sumange nitunu.” Hizaʼi, niwaʼö Yesu, ”Böi miböhöli wamalua daʼa ba wanörö tödö yaʼo.”—1 Korindro 11:24.

Niha si faduhu tödö wa tebulö roti awö nagu tobali nagole hegöi do Yesu, teʼodane-dane wa’afaduhu dödöra ba zi hauga ngawua ayati. Duma-dumania, ba zi hauga famoʼeluaha Zura Niʼamoniʼö, fehede Yesu sanandrösa ba nagu lafoʼeluaha daʼö tobali ”dogu daʼa”. (Mataiʼo 26:28) Hizaʼi, ato niha sogonekhe ba Zura Niʼamoniʼö laʼila wa ambö tefaudu wamoʼeluaha simane daʼö. Satulönia na mufoʼeluaha ngawua wehede Yesu andrö yaʼia daʼö, ”Amaedola ndrogu daʼa”, ”si no hulö ndrogu daʼa”, mazui ”Daʼa fagölö ira ndrogu”.e Aboto ba dödöda wa asese sibai fahuhuo Yesu si fao amaedola.—Mataiʼo 13:34, 35.

Haniha zi manga roti ba agu?

Lö ato zi manga roti ba samadu agu na lafalua Mbongi Watomesa Zoʼaya ira Samaduhuʼö Yehowa. Hadia mbörö?

Do Yesu saduwa, daʼö zangaʼaroʼö ’amabu’ula li si bohou’ si tobali fogati mbuʼusa li Lowalangi Yehowa ba ndraono Gizaraʼeli me mböröta. (Heberaiʼo 8:10-13) Ha ira niha si fao ba mbuʼusa li si bohou andre zinangea manga roti ba samadu agu na mufalua wanörö tödö Bongi Watomesa Zoʼaya, tenga fefu niha Keriso. Mufotöi ira ”niha nikaoni” Lowalangi. (Heberaiʼo 9:15; Luka 22:20) Fao ira khö Keriso tobali samatörö ba zorugo. Ifatunö khöda Sura Niʼamoniʼö wa niha sanema halöwö si tohude andre faʼatora ha 144.000.—Luka 22:28-30; Famaʼeleʼö 5:9, 10; 14:1, 3.

Yaʼira si fao khö Keriso ba wamatörö ba zorugo mufotöi ira ”ngawawa si lö atoto”. Tenga simane yaʼira, satonia ita farahu ba ”ngawawa sato” sanötöna faʼauri si lö aetu ba gulidanö. (Luka 12:32; Famaʼeleʼö 7:9, 10) Sindruhu wa lö taʼa roti ba tabadu nagu ba Mbongi Watomesa Zoʼaya. Hizaʼi, taʼandrö sibai saohagölö khö Yesu me no itehegö waʼaurinia salahida.—1 Yohane 2:2.