Böi Böhöli Wasöndrata ba Wanema Howu-Howu moroi khö Yehowa

1, 2. Hadia zinangea laforege lafalua ira ono mbanua Yehowa?

FEFU nono mbanua Lowalangi si lö faröi, iʼotarai Habeli niha satulö tödö irugi niha si lö faröi iadaʼa, lö laböhöli ba wotimbagö zi lö sökhi. Itutunö Faulo ba niha Keriso ba Heberaiʼo, ”mitaögö fasöndrata famakao andrö” enaʼö omuso dödö Yehowa ba tefahowuʼö ira. (Heb. 10:32-34) Ifagölösi Waulo famorege nifalua niha Keriso simane nifalua niha si fatandri ba Yunani somasi möna ba olahraga fagohi, fatako, hegöi fatezu. (Heb. 12:1, 4) Iadaʼa, so ita ba watandrisa ba wogamö faʼauri. Hizaʼi, so nudu somasi mangoloiʼö fangera-ngerada ba enaʼö taya waʼowua-wua dödöda ba lö tatema howu-howu ba zi so föna.

² Famorege, mazui ”fasöndrata” sabua sibai khöda yaʼia daʼö ba wolawa Satana hegöi ulidanönia. (Ef. 6:12) Andrö, moguna tatimbagö fondrönisi moroi ba wamahaʼö gulidanö andre, fangera-ngera niha, mazui gamuata si lö sökhi simane famalua horö, foroko, faʼamabu-mabu, mazui fangogunaʼö narkoba. Moguna göi taforege ba wotimbagö faʼide-ide dödö mazui zoʼamböta moroi khöda samösa.​—II Kor. 10:3-6; Kol. 3:5-9.

3. Hewisa wamahaʼö Lowalangi ita ba wolawa nududa?

³ Hadia tola möna ita ba wolawa nudu sagabölö andrö? Tola, hizaʼi moguna taforege! Ifagölösi ia Faulo simane niha si fatezu me imane, ”Si fasöndra ndraʼo, ba tenga ba dalu mbanua manö.” (I Kor. 9:26) Simane samösa si fatezu solawa si fatezu tanö böʼö, moguna göi talawa nududa. Itolo ba ifahaʼö ita Yehowa ba wamalua daʼö. Ifahaʼö ita moroi ba Zura Niʼamoniʼö, publikasi si teʼodane-dane ba Zura Niʼamoniʼö, gangowuloa niha Keriso, kebaktian wilayah mazui ba kebaktian regional. Hadia öʼogunaʼö wanuturu lala si no ötema? Na lö mufaluamö daʼö, lö muforegemö wolawa nudu, ba hulö simane si fasöndra ba dalu mbanua ndraʼugö.

4. Hewisa wotimbagöda enaʼö lö ifatörö ita si lö sökhi?

⁴ Moguna tafaʼanö ita ero inötö. Hadia mbörö? Tola manö ibözi ita nududa ba ginötö si lö tadöna-döna mazui ba ginötö ambö faʼabölöda. Ifamangelama ba ifarou ita Zura Niʼamoniʼö imane, ”Böi ilaŵa ndraʼugö si lö sökhi, beʼe folaŵa zi lö sökhi zi sökhi.” (Rom. 12:21) Na lö taböhöli wolawa si lö sökhi, tola möna ita! Hizaʼi, Na lö mangelama ita ba tabato fasöndrata, tola ikalaisi ita Satana, ulidanönia hegöi zoʼamböta moroi khöda samösa. Andrö, böi irai awuwu ndraʼugö. Böi ide-ide dödöu mazui ötehegö adada dangamö!​—I Fet. 5:9.

5. (a) Hadia zinangea tatörö tödöda enaʼö omuso dödö Lowalangi khöda ba ifahowuʼö ita? (b) Duma-duma haniha ba Zura Niʼamoniʼö nitutunöda?

⁵ Enaʼö tola möna ita, moguna tatörö tödöda hadia mbörö wa taforege. Börö me omasi ita na omuso dödö Lowalangi khöda ba ifahowuʼö ita. Imane ba Heberaiʼo 11:6, ’sangondrasi Lowalangi enaʼö ba löʼö sa tola lö mamati ia, so Lowalangi, ba ifoluo zamorege zangalui yaʼia andrö’. Ngawua wehede zamorege zangalui Yehowa eluahania taforomaʼö famorege soroi ba dödö enaʼö omuso dödönia khöda. (Hal. 15:17) Ato ndra matua hegöi ira alawe si tobali duma-duma si sökhi samalua daʼö ba Zura Niʼamoniʼö. Yakobo, Rakhela, Yosefo, hegöi Faulo no lataögö ngawalö zameʼe afatö dödö hegöi sangohorigö faʼabölöra. Hizaʼi, tola lataögö daʼö. Duma-dumara andre zangoromaʼö wa na taforege, tola tatema howu-howu moroi khö Yehowa. Datatutunö hewisa lalania.

ÖTEMA HOWU-HOWU NA LÖ AWUWU NDRAʼUGÖ

6. Hadia zanolo Yakobo enaʼö anau gölönia, ba hadia luonia? (Faigi gambara ba wamobörö wamahaʼö.)

⁶ No iforege Yakobo, niha samati enaʼö lö awuwu ia börö me iʼomasiʼö Yehowa ba iʼameʼegö tödö wahuwusara. Mamati sibai ia ba nifabuʼu Yehowa wa ifahowuʼö ngaʼötönia. (I Moz. 28:3, 4) Omasi sibai ia na ifahowuʼö ia Lowalangi irege fasöndra ia khö malaʼika hewaʼae no 100 fakhe ndröfinia. (Baso I Moze 32:25-29.) Hadia sindruhu-ndruhu abölö Yakobo me fasöndra ia khö malaʼika sabölö? Tatu manö löʼö! Hizaʼi, so khö Yakobo waʼafaduhu dödö saro ba iforege ba wanema howu-howu! Ifahowuʼö ngaʼötö Yakobo Yehowa ba ibeʼe döinia Gizaraʼeli, eluahania ”Niha si Fasöndra khö Lowalangi.” Itema Yakobo luonia, yaʼia daʼö omuso dödö Yehowa khönia ba tefahowuʼö ia. Omasi ita göi simane daʼö.

7. (a) Hadia zameʼe ide-ide dödö Rakhela? (b) Hadia nifalua Rakhela, ba hadia howu-howu nitemania?

⁷ Rakhela, foʼomo niʼomasiö Yakobo, omasi sibai iʼila hewisa waʼalua nifabuʼu Yehowa khö woʼomonia. Hizaʼi, so sambua gabula dödö. Tebai moʼono Rakhela. Daʼa gabula dödö sabua ba ndraʼalawe me götö Zura Niʼamoniʼö. Hadia nifalua Rakhela ba wolawa faʼide-ide dödönia? Lö irai awuwu wanötönania. Hizaʼi, iforege ba iʼaseseʼö mangandrö khö Yehowa. Ba Ifondro-ndrongo wangandrö Rakhela soroi ba dödö, tefahowuʼö ia irege ba gafuriata tola moʼono ia. Andrö wa imane, ”No fasöndra ndraʼo . . . ba no abölö ndraʼo!”​—I Moz. 30:8, 20-24.

8. Hadia gabula dödö nitaögö Yosefo, ba hewisa tola tobali ia duma-duma si sökhi khöda?

⁸ Molua-lua wamati Yakobo hegöi Rakhela khö nonora Yosefo ba daʼö zanolo yaʼia ba ginötö itaögö wanandraigö ba waʼaurinia. Me 17 fakhe ndröfi Yosefo, sindruhu-ndruhu tebulö waʼaurinia. Afökhö dödö ndra talifusönia khönia ba lafamawa ia tobali sawuyu. Ba gafuriata, labeʼe ia ba gurunga ba zi hauga fakhe ba Miserai hewaʼae lö hadöi zalania. (I Moz. 37:23-28; 39:7-9, 20, 21) Hizaʼi, lö ide-ide dödö Yosefo mazui abao dödönia, ba lö irai tumbu ba dödönia wosulöni zi lö sökhi. Hadia mbörö? Börö me iʼameʼegö tödö ba lö iböhöli woʼangeraigö wahuwusania khö Yehowa soroi ba dödö. (III Moz. 19:18; Rom. 12:17-21) Duma-duma Yosefo andre tobali fanolo khöda iadaʼa. Hewaʼae afönu gabula dödö me ide-ide ita, mazui hulö zi lö fanötöna waʼaurida iadaʼa, moguna böi aetu tatimbagö ba böi faroi ita. Na tafalua daʼö, tola faduhu dödöda wa ifahowuʼö ita Yehowa.​—Baso I Moze 39:21-23.

9. Hewisa woloʼöda nifalua Yakobo, Rakhela hegöi Yosefo?

⁹ Iadaʼa, tola manö tataögö gabula dödö sabua. Duma-dumania, laböbögö khömö zi lö duhu, manufa dödöra, laʼoʼaya, mazui te so zafökhö tödö khömö. Moroi na ide-ide dödömö, törö tödöu hadia zanolo Yakobo, Rakhela, hegöi Yosefo ba wamosumange Yehowa si fao faʼomuso dödö. Iʼaroʼö ba ifahowuʼö ira Lowalangi börö me laʼameʼegö tödö sibai wahuwusa khönia. Lö laböhöli wamorege mazui wasöndrata ba wamalua simane si no laʼohe ba wangandrö. Börö me auri ita ba götö safuria, moguna tarorogö dötö naföda ba zi so föna! Hadia omasi ndraʼugö fasöndra mazui öforege enaʼö omuso dödö Yehowa khömö?

FASÖNDRA BA WANEMA HOWU-HOWU

10, 11. (a) Hana wa moguna fasöndra ita ba wanema howu-howu Lowalangi? (b) Hadia zanolo yaʼita ba wangai angetula satulö?

¹⁰ Hadia mbörö wa fasöndra ita ba wanema howu-howu Lowalangi? Sambua mbörönia yaʼia daʼö me lö moʼahonoa ita, moguna taforege ba wolawa gisö-isö zi fasala. So ösa zamorege ba wangokhögö fangera-ngera satulö ba wanuriaigö, so göi danö böʼö zamorege ba wanaögö fökhö mazui tödö si hasamö-samösa. Tanö böʼönia, abua khöra ba wangefaʼö zala niha zangafökhöiʼö dödöra. Tenga dali hauga fakhe no tafosumange Yehowa, fefu ita moguna taforege ba wolawa ngawalö zameʼe abua khöda ba wamosumange Lowalangi, sangaʼasogö howu-howu ba niha si lö faröi.

¹¹ Sindruhunia, abua ba wangai angetula si sökhi hegöi enaʼö tobali niha Keriso, mendrua manö ba ginötö taforege ba wolawa gisö-isö zi fasala. (Yer. 17:9) Na simane daʼö nirasoimö, angandrö khö Yehowa, andrö geheha niʼamoniʼö moroi khönia. Fangandrö hegöi eheha niʼamoniʼö zanolo yaʼugö ba wamalua satulö, ba tola ifahowuʼö ndraʼugö Lowalangi. Osambuaʼö dödömö ba wamalua simane si no öʼohe ba wangandrö. Baso Zura Niʼamoniʼö ero maʼökhö ba beʼe ginötömö ba wamahaʼö samösa hegöi ba wamahaʼö yomo ba nomo.​—Baso Zinunö 119:32.

12, 13. Hewisa wa tola tetolo zi darua niha Keriso ba wotimbagö gisö-isö zi fasala?

¹² Oya duma-duma hewisa Daromali Lowalangi, eheha niʼamoniʼö, hegöi publikasida möi fanolo ndra talifusöda ba wamati ba wotimbagö gisö-isö zi fasala. Samösa si bohou ebua ibaso duho ”Bagaimana Anda Dapat Melawan Hasrat yang Salah?” ba Sedarlah! 8 mbaŵa si Felendrua 2003. Hadia nifaluania? Imane, ”Uforege ba wotimbagö fangera-ngera si lö sökhi. Ba duho daʼö so wehede ’ba wamaigi niha sato, abua sibai wolawa gisö-isö zi fasala’. Me ubaso daʼa, urasoi wa no fao ndraʼo ba waʼatalifusö ba zi sagörö ulidanö. Urasoi wa tenga ha samösa-mösa ndraʼo.” Isöndra göi wamahaʼö moroi ba duho ”Gaya Hidup Alternatif—Apakah Diperkenan Allah?” ba Sedarlah! 8 mbaŵa si Fulu 2003. Ba duho daʼö, iʼila wa so niha si lö aetu mamorege, hulö ”zuzumö ba nösi”. (II Kor. 12:7) Hizaʼi, na lö labato ba wamorege wamalua gamuata si sökhi, tola laʼokhögö wanötöna si sökhi ba zi so föna. Imane, ”Börö daʼö, imane tödögu wa tola göi lö faröi ndraʼo ero maʼökhö. Uʼandrö sibai saohagölö khö Yehowa börö me iʼogunaʼö organisasinia ba wanolo yaʼita enaʼö tola tataögö waʼauri ba gulidanö si lö sökhi andre.”

¹³ Datafaigi waö-waö dalifusöda ira alawe si so ba Amerika Serikat. Isura, ”Uʼandrö sibai saohagölö khömi börö me lö miböhöli wameʼe gö ba wamati soguna khöma hegöi ba ginötö si tefaudu. Asese urasoi wa hulö ha khögu samösa lafazökhi duho andrö. Ba zi hauga fakhe, no uforege ba wotimbagö gisö-isö dödö si fatuwu khö Yehowa. Itaria, umane tödögu abölö sökhi na awuwudo ba uböhöli ba wamorege. Uʼila wa sahakhö tödö Yehowa ba sangefaʼö zala. Hizaʼi, börö me lö uʼodödögö ba wamatuwusi gisö-isö zi fasala, hulö tenga sinangea utema wanolo andrö. Famorege nifaluagu andre molua-lua ba waʼaurigu. . . . Me no aefa ubaso ’Apakah Saudara Memiliki ”Hati untuk Mengenal” Yehuwa?’ ba Menara Pengawal 15 mbaŵa si Tölu 2013. Sinduruhu-ndruhu urasoi wa omasi Yehowa ba wanolo yaʼo.”

14. (a) Hewisa nirasoi Waulo sanandrösa ba wamoregenia? (b) Hewisa tola möna ita ba wolawa zoʼamböta moroi khöda?

¹⁴ Baso Roma 7:21-25. Irasoi samösa Faulo wa abua sibai ba wotimbagö zoʼamböta hegöi gisö-isö zi fasala. Hizaʼi, faduhu dödönia wa tola möna ia na mangandrö ia khö Yehowa, mangodaligö yaʼia ba wangandrö fanolo, hegöi mamati ia ba höli Yesu. Hewisa göi ita? Hadia tola möna ita ba wolawa zoʼamböta moroi khöda? Tola, na taʼoʼö simane nifalua Waulo, ba wangodaligö Yehowa soroi ba dödö tenga faʼabölöda samösa hegöi mamati ita ba höli.

15. Hewisa wanolo Yehowa enaʼö lö faröi ita ba lö awuwu ba ginötö so gabula dödö?

¹⁵ Itaria, omasi Lowalangi na taforomaʼö hadia nifaluada na so gabula dödö. Duma-dumania, na laböbögö khöda zi lö sökhi mazui na mofökhö ita hegöi ösi nomoda, hadia zinangea tafalua? Na sindruhu-ndruhu faduhu dödöda khö Yehowa, taʼandrö khönia enaʼö ibeʼe khöda waʼabölö irege lö faröi ita, lö aetu owua-wua dödöda ba aro wahuwusada khönia. (Fil. 4:13) Duma-duma moroi ba niha Keriso si föföna hegöi iadaʼa, zangoromaʼö wa fangandrö tola mangaʼaroʼö yaʼita hegöi ibeʼe khöda waʼabarani irege lö faröi ita.

BÖI BÖHÖLI FASÖNDRATA BA WANEMA HOWU-HOWU YEHOWA

16, 17. Hadia zinangea öfalua?

¹⁶ Tatu omasi Gafökha na ide-ide dödöda, awuwu ba tabato wamorege. Andrö, osambuaʼö dödöu ’ba wangai si sökhi.’ (I Tes. 5:21) Tola möna ndraʼugö ba wolawa Satana, ulidanönia si lö sökhi hegöi gisö-isö si fasala! Tola möna ndraʼugö na sindruhu-ndruhu faduhu dödömö wa iʼaroʼö ba itolo ndraʼugö Lowalangi.​—II Kor. 4:7-9; Gal. 6:9.

¹⁷ Andrö, böi aetu öforege. Böi bato wasöndrata. Böi awuwu ndraʼugö. Böi aetu anau gölömö. Tola sindruhu-ndruhu faduhu dödöu wa Yehowa ’zamaduwa howu-howu khömi, irege zi no fahöna.’​—Mal. 3:10.