Si Bohou Ebua Yalö Awuwu Ami ba Wolawa Afökha

1, 2. (a) Hadia mbörö wa tola lakalaisi Zatana hegöi ira malaʼika si lö sökhi ira niha Keriso si bohou ebua? (Faigi gambara ba wamobörö wamahaʼö.) (b) Hadia nitutunöda ba wamahaʼö daʼa?

IFAGÖLÖSI niha Keriso sinenge sotöi Faulo simane saradadu. Fasuwö ita ba sindruhu-ndruhu so nududa! Tenga ba niha gulidanö fasuwö ita, hizaʼi khö Zatana hegöi khö ndra malaʼikania si lö sökhi. No hauga ribu fakhe tobali ira saradadu ba onekhe ira fasuwö. Na mufaigi hulö tebai möna ita ba wolawa yaʼira, mendrua manö na yaʼita si bohou ebua. Hadia tola möna ndra si bohou ebua ba wolawa udu sabölö andrö? Tola, ba hasambalö möna ira! Hadia mbörö? Börö me latema waʼabölö moroi khö Yehowa. Simane saradadu si no toʼölö fasuwö, ’laʼogunaʼö fefu wangöna ba wasuwöta moroi khö Lowalangi’ irege no tefaʼanö ira ba wasuwöta.​—Baso Efeso 6:10-12.

² Ba ginötö ibeʼe gamaedola daʼa Faulo, te ikhalaigö wangöna niʼogunaʼö zaradadu Romawi. (Halöwö Zinenge 28:16) Ba wamahaʼö daʼa, tatutunö gamaedola si sökhi andrö. Tatutunö göi hadia niwaʼö ndra si bohou ebua ösa sanandrösa ba wolohi hegöi bua nitemara me laʼogunaʼö fefu wangönada ba wasuwöta ba wamati.

’BÖBÖ LÖWI ZINDRUHU’

3, 4. Hana wa muʼamaedolagö zindruhu moroi ba Zura Niʼamoniʼö simane böbö löwi zaradadu Romawi?

³ Baso Efeso 6:14. Ba mböbö löwi niʼogunaʼö zaradadu Romawi, so ngaʼörö-ngaʼörö logam solumöʼö löwi-löwinia hegöi ba wanaha faʼabua mbaru siʼöli. Tola lasaembugö wöda hegöi rosö ba mböbö löwi andrö. Na no aro mböbö löwi zi samösa saradadu, no tefaʼanö ia ba wasuwöta.

⁴ Faʼaboto ba dödö sindruhu si no tasöndra ba Daromali Lowalangi tola muʼamaedolagö ia simane mböbö löwi, börö me tola ilumöʼö ita ba wamahaʼö faya. (Yohane 8:31, 32; 1 Yohane 4:1) Na itugu taʼomasiʼö zindruhu moroi ba Daromali Lowalangi, aoha khöda woloʼö nifakhoi Lowalangi mazui ba wangogunaʼö ”baru siʼöli”. (Zinunö 111:7, 8; 1 Yohane 5:3) Aefa daʼö, na itugu aboto ba dödöda zindruhu, tola tabeʼe wanema li na so zanofu khöda.​—1 Fetero 3:15.

5. Hadia mbörö wa böi taböhöli wangumaʼö sindruhu?

⁵ Börö moguna sibai khöda zindruhu andrö moroi ba Daromali Lowalangi, daʼö mbörö wa taʼoʼö niwaʼö Zura Niʼamoniʼö ba lö aetu tafatunö zindruhu. Falimosa no sambua wangöna si tefaudu niʼogunaʼö Zatana. Na falimo ita, tola taʼafökhöiʼö dödöda samösa hegöi niha si faduhu tödö ba walimosada andrö. (Yohane 8:44) Hewaʼae lö moʼahonoa ita, moguna taforege enaʼö lö falimo ita. (Efeso 4:25) Tatu abua wamalua daʼa. Imane Abigail si 18 fakhe, ”Itaria, hulö rugi ita na tawaʼö zindruhu, mendrua manö na aheta gabula dödöda ba ginötö falimo ita.” Andrö, hadia mbörö wa lö aetu iwaʼö zindruhu? Imane, ”Na lö falimo ndraʼo, uʼokhögö dödö side-ide si lö sinegu föna Yehowa. Laʼila göi ira satuagu hegöi ira awögu wa tola lafaduhusi tödö ndraʼo.” Imane Victoria si 23 fakhe, ”Tola manö laʼoʼaya ita na tawaʼö zindruhu ba taʼoʼawögö zi no tafaduhusi tödö. Hizaʼi ebua sibai mbuania. Lö khöda faʼataʼu, itugu ahatö ita khö Yehowa ba laʼameʼegö tödö ita niha sangomasiʼö yaʼita.” Ba daʼa oroma wa moguna sibai taʼogunaʼö ”mböbö löwi sindruhu” ero inötö.

”BARU SIʼÖLI WAʼATULÖ DÖDÖ”

6, 7. Hana wa tola mufaomagö waʼatulö dödö andrö ba mbaru siʼöli?

⁶ Baru siʼöli niʼogunaʼö zaradadu Romawi sasesenia tefazökhi moroi ba ngaʼörö-ngaʼörö ziʼöli sanau. Mufaliʼö ba dötöʼa ba wamasa yaʼia. Balö faföfö moroi ba ngaʼörö ziʼöli andrö lafakhai faoma logam hegöi tali nifazökhi moroi ba guli gurifö. Tebalugö göi galisinia börö ngaʼörö-ngaʼörö ziʼöli andrö si no lafakhai faoma uli gurifö. Saradadu sangogunaʼö baru daʼa lö oya zi tola ifalua ba moguna ifaigi-faigi enaʼö lö todege mazui aefa. Hizaʼi, baru siʼöli andrö möi folumöʼö dödö hegöi ndroto-ndroto tanö böʼö moroi ba wöda ba ono wana!

⁷ Simane baru siʼöli, amakhoita Yehowa sanandrösa ba waʼatulö dödö möi folumöʼö ’dödöda’, mazui niha bakha andrö. (Gamaedola 4:23) Samösa saradadu, tatu lö itukari mbaru solumöʼö tötöʼania nifazökhi moroi ba ziʼöli saro faoma logam sambö baga. Simanö göi, lö tatukari gamakhoita Yehowa sanandrösa ba zatulö faoma faʼatua-tuada samösa. Ambö faʼatua-tuada ba wondrorogö tödöda samösa. (Gamaedola 3:5, 6) Börö daʼö, böi mamalö-malö tafaigi hadia lö aetu irorogö dödöda ”baru siʼöli” andrö.

8. Hana wa moguna taʼoʼö goi-goi Yehowa?

⁸ Hadia itaria tobali noro dödöu nifakhoi Yehowa mazui tebai öfalua zomasi-masi dödöu? Imane Daniel si 21 fakhe, ”Laʼoʼaya ndraʼo ira gurugu hegöi ira awögu börö me uʼoʼö nifakhoi Zura Niʼamoniʼö. No irai so khögu waʼaombö dödö hegöi faʼide-ide dödö.” Hadia nirasoinia iadaʼa? Imane, ”Ba gafuriata, aboto ba dödögu wa so mbuania na muʼoʼö nifakhoi Yehowa. So ösa ndra awögu sangogunaʼö narkoba, ba so göi niʼefasi moroi ba zekola. Abu sibai dödögu me uʼila zalua ba waʼaurira andrö. Sindruhu-ndruhu wa irorogö ita Yehowa.” Imane Madison si 15 fakhe, ”Uforege ba woloʼö goi-goi Yehowa ba lö faodo khö ndra awögu ba wamalua somasi-masi dödöra.” Hadia nifaluania? ”Lö irai uʼolifugö wa no uʼotöigö döi Yehowa, ba fefu wondrönisi dödö salua khögu no fangala moroi khö Zatana. So khögu waʼahono dödö ba ginötö utimbagö daʼö fefu.”

’BADAGAHE TANDRA WA NO MIFAʼANÖ AMI BA WANURIAIGÖ TURIA SOMUSO DÖDÖ SANANDRÖSA BA WAʼATULÖ’

9-11. (a) Hadia niʼamaedolagö mbadagahe niʼogunaʼö niha Keriso? (b) Hadia zanolo yaʼita enaʼö itugu barani ba wanuriaigö?

⁹ Baso Efeso 6:15. Tebai möi fasuwö zaradadu Romawi na lö iʼogunaʼö mbadagahe. Aro sibai mbadagahera börö me tölu ngaʼörö lafalaete wamazökhi yaʼia moroi ba guli gurifö. Hizaʼi, ohahau sibai dödöra wangogunaʼö mbadagahe daʼö irege tola mofanö ndra saradadu andrö ba lö ahele.

¹⁰ Badagahe niʼogunaʼö ndra saradadu Romawi, möi fanolora irege möna ira ba wasuwöta. Badagahe niʼogunaʼöda ha nifoʼamaedola ba wanolo yaʼita ba ”wanuriaigö turia somuso dödö sanandrösa ba waʼatulö”. (Yesaya 52:7; Roma 10:15) Hewaʼae simanö, itaria moguna khöda waʼabarani ba wanuriaigö. Imane Bo si 20 fakhe, ”Me föna, ataʼudo wanuriaigö khö ndra awögu ba kelas, te börö me so khögu waʼaila. Na ufuli uʼangeragö, sindruhunia lö moguna so khögu dödö simane daʼö. Iadaʼa, omuso dödögu wanuriaigö khö ndra awögu.”

¹¹ Ato niha Keriso si bohou ebua sangokhögö faʼabarani ba wanuriaigö börö me no lafaʼanö ira. Hewisa enaʼö tola öfaʼanö ndraʼugö? Imane Julia si 16 fakhe, ”Ufaʼanö publikasi ba tasigu sekola, ba ufondrondrongo na so ndra awögu ba kelas semeʼe mbua gera-era hegöi nifaduhusira tödö. Aefa daʼö, uʼangeragö hadia zi tola manolo yaʼira. Börö me no ufaʼanödo, tola ututunö khöra hadia manö zi moguna khöra.” Imane Makenzie si 23 fakhe, ”Na sökhi laguda ba tahaogö wamondrondrongo yaʼira, tola taʼila hadia zalua khöra. Ubaso fefu zi no mufazökhi soguna khö ndra si bohou ebua. Buania, tola uforomaʼö ayati Zura Niʼamoniʼö mazui si so ba jw.org si tobali fanolo khö ndra awögu.” Na tahaogö wamaʼanö yaʼita fatua lö manuriaigö, tola lafagölösi daʼa na taʼogunaʼö ”mbadagahe” si tefaudu khöda.

’BALUSE SEBUA YAʼIA DAʼÖ FAMATI’

12, 13. Hadia ”nono wana soʼalitö” andrö moroi khö Zatana?

¹² Baso Efeso 6:16. Si toʼölönia, laʼohe mbaluse sebua ira saradadu Romawi sombalugö alisira irugi mbalöduhi. Möi folumöʼöra daʼa moroi ba wöda, toho hegöi, ono wana.

¹³ Hadia ”nono wana soʼalitö” nifaudugö Zatana khöu? Te ilimo ndraʼugö sanandrösa khö Yehowa. Omasi Zatana na so ba dödömö wa lö iʼomasiʼö ndraʼugö Yehowa ba lö iʼameʼegö tödö ndraʼugö. Imane Ida si 19 fakhe, ”Asese urasoi wa lö ahatö Yehowa khögu ba lö omasi ia na tobali ndraʼo si Fahuwu khönia.” Hadia nifaluania na tumbu ba wangera-ngerania zimane daʼö? ”Feʼamöigu ba gangowuloa zangaroʼö famatigu. Me mböröta ha so dadao ndraʼo ba lö ubeʼe mbua gera-eragu. Umane tödögu, lö hadöi somasi mamondrongo bua gera-eragu. Iadaʼa, ufaʼanö ndraʼo fatua lö möido ba gangowuloa ba uʼodödögö wameʼe bua gera-eragu dua mazui tölu kali. Hewaʼae abua, hizaʼi möi fangomusoiʼö dödögu. Lafarou göi ndraʼo ira talifusöda. Ero na mangawulido ba gangowuloa, urasoi wa iʼomasiʼö ndraʼo Yehowa.”

14. Hadia wamahaʼö si tola tahalö moroi ba zalua khö Ida?

¹⁴ Tebai tebulö waʼebua mbaluse niʼokhögö zi samösa saradadu. Hizaʼi, simane si no taʼila ba zalua khö Ida, tenga simane daʼö wamatida. Tola tedou mazui alö wamatida, itugu aro mazui awuwu. Fefu daʼö, mangawuli khöda samösa. (Mataiʼo 14:31; 2 Tesalonika 1:3) Enaʼö ilumöʼö ita ’baluse sebua yaʼia daʼö famati’, moguna tadouʼö ba taʼaroʼö wamatida!

’TAKULA SIʼÖLI FANGORIFI’

15, 16. Hadia mbörö wa muʼamaedolagö dötönafö andrö simane takula?

¹⁵ Baso Efeso 6:17. Takula niʼokhögö zi samösa saradadu Romawi tola möi folumöʼö högö, bagi, hegöi bawara. Itaria so naha danga ba dakula andrö irege aoha khö zaradadu ba wolohe yaʼia.

¹⁶ Simane takula si tola molumöʼö uto zi samösa saradadu, ”tötönafö ba wangorifi” möi folumöʼö wangera-ngerada. (1 Tesalonika 5:8; Gamaedola 3:21) Börö me taʼokhögö dötönafö, tola taʼosambuaʼö wangera-ngerada ba zi no ifabuʼu Lowalangi ba lö khöda faʼide-ide dödö na göna ita abula dödö. (Zinunö 27:1, 14; Halöwö Zinenge 24:15) Hizaʼi, enaʼö töla möi folumöʼöda dötönafö andrö, moguna oroma ia khöda. Moguna tabeʼe ”dakula” andrö ba högöda, tenga ha asala taʼohe-ohe!

17, 18. (a) Hadia lala niʼogunaʼö Zatana enaʼö tola taʼefasi dakulada? (b) Hewisa wangoromaʼöda wa lö telimo ita ba walimosa Zatana?

¹⁷ Hadia lala niʼogunaʼö Zatana enaʼö tola taʼefasi dakulada? Angeragö hewisa me itandraigö Yesu. Iʼila Satana wa mamatörö Yesu dania ba niha gulidanö. Hizaʼi, fatua lö alua daʼö hasambalö itaögö wamakao ba faʼamate Yesu. Aefa daʼö, ibaloi ginötö moroi khö Yehowa hawaʼara tobali ia Razo. Börö daʼö, ibeʼe khönia ginötö Satana enaʼö tobali ia samatörö ba waʼalio. Ifabuʼu Satana khö Yesu wa hasambalö tobali Yesu samatörö ba gulidanö na mangalulu ia khö Zatana hewaʼae ha sakali. (Luka 4:5-7) Aboto göi ba dödö Zatana wa oya howu-howu si no ifabuʼu Yehowa khöda ba gulidanö si bohou. Hizaʼi, moguna tabaloi irege aʼozu zi no ifabuʼu andrö, ba gasa-gasa daʼö oya göi gabula dödö nitaögöda. Börö daʼö, ibeʼe khöda ginötö Satana enaʼö taʼokhögö waʼasana ba waʼauri. Omasi ia na taʼofönaiʼö zomasi-masi dödöda moroi na taʼofönaiʼö Wamatörö Lowalangi.​—Mataiʼo 6:31-33.

¹⁸ Ato niha Keriso si bohou ebua si lö telimo khö Zatana. Duma-dumania, imane Kiana si 12 fakhe, ”Aboto ba dödögu wa ha Famatörö Lowalangi zi tola mangeheta fefu abula dödöda.” Hadia lua-lua dötönafö andrö ba lala wangera-ngera hegöi ba waʼaurinia? Daʼa zanolo yaʼia enaʼö lö iʼolifugö wa fefu hadia ia zi so ba gulidanö andre ha sabata. Andrö, iʼogunaʼö ginötö hegöi faʼabölönia Kiana ba wamosumange Yehowa, tenga ba wolohi halöwö sebua ba gulidanö andre.

’FÖDA EHEHA, YAʼIA DAʼÖ TAROMALI LOWALANGI’

19, 20. Hewisa enaʼö monönö waʼonekheda ba wangogunaʼö Taromali Lowalangi?

¹⁹ Laʼokhögö wöda sanau ira saradadu Romawi te mato 50 sentimeter. Onekhe ira ba wangogunöʼö föda börö me no lafahaʼö ira ero maʼökhö.

²⁰ Iwaʼö Faulo wa Taromali Lowalangi hulö simane föda si no ibeʼe khöda Yehowa. Hizaʼi, moguna tafahaʼö ita enaʼö onekhe ba wangogunaʼö yaʼia irege tola taʼoʼawögö nifaduhusida tödö mazui tafaudugö lala wangera-ngerada. (2 Korindro 10:4, 5; 2 Timoteo 2:15) Hewisa enaʼö monönö waʼonekheda? Imane Sebastian si 21 fakhe, ”Na no aefa ubaso Zura Niʼamoniʼö, usura sambua ayati ero sambua faza. Ufaʼanö ayati somasido.” Tobali fanolo khönia daʼa ba wangiʼila lala wangera-ngera Yehowa. Imane göi Daniel si no mutötöi moroi yawa, ”Ba ginötö ubaso Zura Niʼamoniʼö, uʼalui ayati si tobali fanolo ba niha ba ginötö möi ndraʼo manuriaigö. Na laʼila niha wa so khöda waʼowölö-ölö ba wanutunö Sura Niʼamoniʼö ba taforege ba wanolo yaʼira, tola sökhi wanemaʼöra yaʼita.”

21. Hana wa lö moguna ataʼu ita khö Zatana hegöi khö ndra malaʼikania si lö sökhi?

²¹ Simane duma-duma ndra si bohou ebua si no mututunö ba wamahaʼö daʼa, lö moguna ataʼu ita khö Zatana hegöi khö ndra malaʼikania si lö sökhi. Sindruhu sa wa so khöra waʼabölö, hizaʼi tebai lalawa waʼabölö Yehowa. Ba tenga sagötö faʼara auri ira. Lakuru ira ba tebai lafakao niha sagötö Wamatörö Keriso si Saribu Fakhe, ba aefa daʼö tehori ira. (Famaʼeleʼö 20:1-3, 7-10) No aboto ba dödöda haniha nududa, hadia dandrawa nibeʼenia, ba hadia gohitö dödönia. Tola talawa ira börö wanolo moroi khö Yehowa!