Lala Wangeheta hegöi ba Wondröi Amuata si Tohöna

1, 2. Hadia niwaʼö niha sanandrösa khö ndra Samaduhuʼö Yehowa?

ATO niha sangumaʼö wa tohude ndra Samaduhuʼö Yehowa moroi ba niha böʼö. Duma-dumania, samösa sanura sotöi Anton Gill, isuno mbua-bua ndra Samaduhuʼö Yehowa me götö Nazi ba Jerman. Imane, ”Fatuwu niha Nazi khö ndra Samaduhuʼö Yehowa. . . . Me 1939 so 6.000 ba gotaluara nibeʼe ba [kamp konsentrasi].” Imane nasa hewaʼae göna ira fanandraigö sabölö-bölö, laʼila ira niha wa yaʼira niha si tola mufaduhusi tödö, lö lafalalawa hewaʼae lafakao ira, lö faröi ira khö Lowalangira ba so khöra wahasara dödö.

² Barö-barö daʼa, niha si so ba Afrika Selatan laʼila göi wa so zi tohude sanandrösa khö ndra Samaduhuʼö Yehowa. Sambua inötö, lö latehegö falukha ndra Samaduhuʼö si faböʼö uli ba mbanua daʼö. Hizaʼi, me hari Migu, 18 mbaŵa si Felendrua 2011, töra 78.000 ndra Samaduhuʼö moroi ba soi si faböʼö ba Afrika Selatan hegöi soi sahatö ba daʼö, owulo ira ba zi sambua gangowuloa si tohude ba stadion sabölö ebua ba Johannesburg. Imane samösa manajer stadion, ”Lö irai uʼila niha si sökhi amuata simane yaʼira ba stadion daʼa. Sökhi fefu lala wonukhara, ba sökhi sibai wangehaogöra stadion andrö. Ba sabölö tohude, hewaʼae faböʼö-böʼö soira, hizaʼi teʼosambuaʼö ira.”

3. Hadia zameʼe tohude waʼafatalifusötada?

³ Niha si tenga Samaduhuʼö Yehowa, laʼila hewisa waʼatohude waʼafatalifusötada ba zi sagörö ulidanö. (I Fetero 5:9) Hana wa tola faböʼö ita moroi ba organisasi tanö böʼö? Börö wanolo moroi ba Zura Niʼamoniʼö hegöi eheha niʼamoniʼö moroi khö Lowalangi, tola taforege ba wombulöʼö lala waʼaurida si lö mangomusoiʼö tödö Yehowa. ’Taheta niha si tohöna andrö’ ba taʼogunaʼö ’nukha si bohou’.​—Kolose 3:9, 10.

4. Hadia nitutunöda ba wamahaʼö daʼa? Hadia mbörö?

⁴ Na no taheta gamuata si tohöna, moguna taforege ba wondröi yaʼia. Ba wamahaʼö daʼa, si oföna tatutunö yaʼia daʼö hewisa wangeheta gamuata si tohöna ba hana wa moguna sibai daʼö. Ba daʼa dania taʼila wa tola tebulö lala waʼauri si samösa niha hewaʼae no irai ifalua zi lö sökhi. Aefa daʼö, tatutunö göi hadia manö nifalua niha si no ara ba zindruhu ba wondröi gamuata si tohöna. Hana wa moguna tatutunö daʼa? So ösa niha samosumange Yehowa si lö mangelama. Lafuli laʼangeraigö ba lafalua hadia zi no irai lafalua ba zilalö simane fatua lö laʼokhögö waʼaboto ba dödö khö Yehowa. Fefu ita moguna tatörö tödöda wamangelama daʼa, ”Na so zangumaʼö tödönia sizizio ia, ba yamufaigi, faböi alau ia.”​—I Korindro 10:12.

RÖI FEFU GISÖ-ISÖ DÖDÖ SOʼAMAKHAITA BA GAMUATA FOHORÖ

5. (a) Beʼe duma-duma hana wa böi tataha-taha ba wangeheta gamuata si tohöna. (Faigi gambara ba wamobörö wamahaʼö.) (b) Hadia manö gamuata si tohöna nitutunö ba Kolose 3:5-9?

⁵ Hadia nifaluamö na öʼila wa no taʼunö ba aböu nukhamö? Tatu öʼaliokö wangeheta yaʼia ba nösimö. Simanö göi, na taʼila wa no tafalua zi fatuwu khö Yehowa, böi tataha-taha ba wombulöʼö faʼaurida. Imane Faulo sanandrösa ba gamuata si fasala, ”Miböhöli göi daʼö fefu.” Datatutunö dombua ba gotaluania, fohorö hegöi faʼaraʼiö.​—Baso Kolose 3:5-9.

6, 7. (a) Moroi ba wehede Waulo, hezo tola taʼila wa moguna muforege ba wangeheta gamuata si tohöna? (b) Hewisa lala waʼauri Sakura? Hadia zangaʼaroʼö yaʼia ba wombulöʼö faʼaurinia?

⁶ Amuata Fohorö. Ba Zura Niʼamoniʼö, amuata ”fohorö” eluahania faʼorudu ba gotalua niha si tenga foʼomonia moloʼö huku. Imane Faulo wa niha Keriso moguna ’labunu ndroto-ndrotora’ na so ba wangera-ngerara wohorö. Eluahania, moguna taforege ba wangeheta fefu gisö-isö dödöda si fasala. Hewaʼae abua wamalua daʼa, hizaʼi tola tafalua ia!

⁷ Tola taʼila daʼa moroi ba duma-duma dalifusöda ira alawe sotöi Sakura moroi ba Jepang.a (Faigi nisura ba gahe zura.) Me itugu ebua-bua Sakura, irasoi wa lö awö-awö ba abu dödönia. Enaʼö lö irasoi wa lö awö-awö, ibörötaigö ilau mohorö me 15 fakhe ndröfinia. Ifalua wohorö ba niha si faböʼö-böʼö ba no tölu kali idudugö nononia. Imane, ”Ba wamobörö, urasoi waʼahono dödö me ulau gamuata fohorö, urasoi wa moguna ba laʼomasiʼö ndraʼo. Hizaʼi, me no asese ufalua daʼö itugu lö sökhi-sökhi dödögu.” Ifalua gamuata daʼö irugi 23 fakhe ndröfinia. Aefa daʼö, ibörötaigö ifahaʼö ia ba Zura Niʼamoniʼö khö ndra Samaduhuʼö Yehowa ba omasi ia hadia zi no ifahaʼö ia. Itolo ia Yehowa ba wamöhöli gamuata fohorö hegöi ba wanaögö fatahi-tahisa dödö ba faʼaila. Iadaʼa, no tobali perintis biasa Sakura ba lö irasoi saʼae wa lö awö-awö. Imane, ”Omuso sibai dödögu börö me urasoi waʼomasi Yehowa ero maʼökhö.”

LALA WAMÖHÖLI GAMUATA SI RAʼIÖ

8. Hadia manö gamuata si tola mangaʼasogö khöda faʼaraʼiö ba wamaigi Lowalangi?

⁸ Faʼaraʼi-raʼiö. Ba Zura Niʼamoniʼö, tenga ha ba gamuata fohorö moʼamakhaita ngawua wehede ’faʼaraʼi-raʼiö’. Moʼamakhaita göi ia ba woroko mazui ba wangumaʼö fehede hokha. (II Korindro 7:1; Efeso 5:3, 4) Moʼamakhaita göi ia ba ngawalö zi lö sökhi nifalua niha ba zi ha yaʼia, simane ba wamaigi pornografi mazui ba wombaso mbuku si tola mondrönisi yaʼira ba wamalua fohorö. Fefu daʼa tola molua-lua ia ba wamalua gamuata si raʼiö simane masturbasi. (Kolose 3:5)b—Faigi nisura ba gahe zura.

9. Hadia zalua na ibörötaigö adöni dödö zi samösa niha ba ”hokha”?

⁹ Niha sasese mamaigi pornografi itugu adöni dödönia ba ”hokha” ba sandru ia wamalua fohorö. Moloʼö ndra peneliti, faʼasandru ba pornografi fagölö ia ba waʼasandru ba alkohol mazui ba narkoba. Daʼö mbörö wa lö tokea ita na niha sasese mamaigi pornografi larasoi lua-lua si lö sökhi, simane faʼaila, falö mofozu halöwö, lö faʼohahau dödö yomo ba nomo, fabali auri, ba so zamunu yaʼia samösa. Imane samösa ira matua wa tola ifuli iʼameʼegö tödö waʼaurinia me no aefa iböhöli waʼasandrunia ba wamaigi pornografi ba zi döfi.

10. Hewisa wondröi Ribeiro faʼasandrunia ba pornografi?

¹⁰ Ato niha, abua khöra ba wondröi pornografi. Hizaʼi, tola lafalua daʼö. Angeraigö duma-duma Ribeiro moroi ba Brasil. Me awuyu-wuyu ia, iröi nomo ba ilau mohalöwö ba pabrik samuli mamazökhi karate moroi ba garate si no tekiko. Ba daʼö iʼila majalah pornografi. Imane Ribeiro, ”Itugu ara, itugu adöni dödögu. Omasido na alio mofanö ndra alawe si sambua omo khögu enaʼö tola ufaigi video pornografi.” Ba zi sambua inötö ba nahania wohalöwö, iʼila Ribeiro mbuku si no laʼowuloi nifuli muʼehaogö, ba iʼila sambua mbuku tuhonia Rahasia Kebahagiaan Keluarga. Ihalö ba ibaso daʼö. Börö zi no ibaso, andrö wa ifahaʼö ia ba Zura Niʼamoniʼö khö ndra Samaduhuʼö Yehowa. Hizaʼi, ara ginötö niʼogunaʼö Ribeiro ba wamöhöli faʼasandrunia ba pornografi. Hadia zanolo yaʼia? Itutunö, ”Börö wangandrö, famahaʼö ba Zura Niʼamoniʼö, hegöi foʼangerönusi hadia zi no ufahaʼö ndraʼo, itugu uʼameʼegö tödö mbua-bua Lowalangi irege itugu aro waʼomasigu khö Yehowa moroi ba gisö-isö dödögu ba pornografi.” Börö wanolo moroi ba Zura Niʼamoniʼö hegöi eheha niʼamoniʼö moroi khö Lowalangi, tola ibulöʼö lala waʼaurinia Ribeiro, tebayagö ia idanö ba iadaʼa tobali ia satua sokubaloi ba mbanua niha Keriso.

11. Hadia zanolo si samösa niha enaʼö aheta ia ba pornografi?

¹¹ Enaʼö tola iböhöli wamaigi pornografi Ribeiro, tenga ha asala ifahaʼö manö ia ba Zura Niʼamoniʼö. Ihaogö iʼangerönusi hadia zi no ibaso ba itehegö tofakha daʼö ba dödönia. Ilau mangandrö ba iʼandrö wanolo moroi khö Yehowa. Daʼa fefu zanolo Ribeiro irege itugu aro waʼomasinia khö Lowalangi ba tola itimbagö gisö-isö dödönia ba pornografi. Enaʼö aheta ita ba pornografi, moguna sindruhu-ndruhu taʼomasiʼö Yehowa ba taʼogorofi hadia ia zi lö sökhi.​—Baso Zinunö 97:10.

RÖI FEFU WÖNU, FALELESAHEGÖI FALIMOSA

12. Hadia zanolo Stephen ba wondröi fönu hegöi fehede si lö sökhi?

¹² So niha salio mofönu ba iwaʼö wehede sangafökhöiʼö tödö hegöi sangailasi niha böʼö. Lua-luania, tefakao fefu nösi nomora. Samösa ama sotöi Stephen moroi ba Australia, asese ilau fahölu ba alio mofönu ia ba ngawalö zalua side-ide. Imane, ”Yaʼodo hegöi foʼomogu, no tölu kali fasambua ndraʼaga ba mahalö gangetula malau fabali auri.” Hizaʼi, ibörötaigö lafahaʼö ira ba Zura Niʼamoniʼö khö ndra Samaduhuʼö, ba itandraigö ifalua Stephen hadia zi no ifahaʼö ia. Iwaʼö wa fatua lö aboto ba dödönia Yehowa, alio sibai mofönu ia na so zi tetutu ba dödönia hulö simane bom samoka. Hizaʼi, me no iʼoʼö mene-mene moroi ba Zura Niʼamoniʼö itugu sökhi lagunia. Imane, ”Itugu sökhi wongambatöma. Börö wanolo moroi khö Yehowa, urasoi waʼatulö hegöi faʼahono dödö.” Iadaʼa, no tobali enoni sohalöwö Stephen ba no merintis biasa woʼomonia ba zi hauga fakhe. Lamane ira satua sokubaloi ba mbanua niha Keriso si fao Stephen, ”Yaʼia andre niha si lö hede-hede, owölö-ölö ba so khönia wangide-ngideʼö.” Lamane nasa wa lö irai laʼila mofönu ia. Lö irai so ba wangera-ngera Stephen wa börö waʼabölönia samösa wa tola ibulöʼö waʼaurinia. Imane, ”Lö irai urasoi howu-howu ba waʼaurigu na lö utemaʼö wanolo moroi khö Yehowa ba wameʼe khögu lala waʼauri si bohou.”

13. Hana wa möi famaʼala wönu? Hadia wamangelama nibeʼe Zura Niʼamoniʼö khöda sanandrösa ba daʼö?

¹³ Ifangelama ita Sura Niʼamoniʼö enaʼö lö alio mofönu, fagua-gua, ba böi tawaʼö wehede si lö sökhi. (Efeso 4:31) Fefu daʼa molua-lua ia ba waʼudusa. Iadaʼa, ato niha gulidanö sangumaʼö wa fönu no amuata si lö sökhi si no toʼölö. Hizaʼi, amuata daʼa lö möi famosumange Zomböi yaʼita. Ato ndra talifusöda zombulöʼö lala waʼaurira ba laʼogunaʼö gamuata si bohou.​—Baso Zinunö 37:8-11.

14. Hadia tola tobali niha sebolo tödö niha si lö sökhi?

¹⁴ Talifusöda Hans no tobali satua sokubaloi ba mbanua niha Keriso ba Austria. Imane koordinator badan penatua (sondroniaʼö boto zatua sokubaloi) ba mbanua niha Keriso si fao yaʼia, ”Yaʼia samösa dalifusöda si so faʼebolo dödö.” Hizaʼi, tenga iʼotarai me föna so khönia waʼebolo dödö. Me awuyu-wuyu ia, ibörögö ibadu alkohol, ba tobali ia niha safaito. Samuza inötö me mabu ia, mofönu ia irege ibunu kawania. Labeʼe ia ba gurunga 20 fakhe faʼara, hizaʼi lö ibulöʼö nasa lala waʼaurinia. Me iʼandrö mamania khö zatua sokubaloi enaʼö lafalukhaisi Hans, ibörötaigö ifahaʼö ia Hans ba Zura Niʼamoniʼö. Imane, ”Moguna uforege ba wondröi lala waʼaurigu si tohöna. Ayati samarou tödögu yaʼia daʼö Yesaya 55:7 sangumaʼö, ’Sebua horö, ba yamuröi lalania andrö’ hegöi I Korindro 6:11 sanutunö sanandrösa ba niha si no mondröi ngawalö horö, imane ’Ba no simanö ösa ami föna.’ Ba zi hauga fakhe, itolodo Yehowa si fao faʼebolo dödö ba iʼogunaʼö gehehania niʼamoniʼö ba wameʼe khögu gamuata si bohou.” Tebayagö idanö Hans me so ia ba gurunga, ba me no aefa 17 fakhe amatonga lakuru ia, laheta ia ba gurunga. Imane, ”Uʼandrö sibai saohagölö khö Yehowa börö waʼebolo dödönia hegöi fangefaʼönia salagu.”

15. Hadia duma-duma tanö böʼö moroi ba gamuata si tohöna? Hadia niwaʼö Zura Niʼamoniʼö sanandrösa ba daʼö?

¹⁵ Duma-duma tanö böʼö moroi ba gamuata si tohöna yaʼia daʼö falimosa. Duma-dumania, ato niha si falimo enaʼö lö labuʼa pajak mazui enaʼö lö laʼonorogö tödö zala nifaluara. Hizaʼi, Yehowa no Lowalangi sindruhu. (Zinunö 31:6) Andrö wa omasi ia na fefu zamosumange yaʼia ’lawaʼö zindruhu’ ba ’lö falimo’. (Efeso 4:25; Kolose 3:9) Ba daʼa oroma wa moguna tawaʼö zindruhu hewaʼae na abua khöda mazui möi fangailasida daʼö.​—Gamaedola 6:16-19.

LALA NIFALURA ENAʼÖ TOLA MÖNA

16. Hadia zanolo yaʼita enaʼö tola taheta gamuata si tohöna?

¹⁶ Tebai taheta gamuata si tohöna na taʼodaligö waʼabölöda samösa. Sakura, Ribeiro, Stephen, hegöi Hans, no laforege ba wombulöʼö lala waʼaurira si tohöna. Faʼabölö moroi ba Daromali Lowalangi hegöi ehehania niʼamoniʼö zanolo yaʼira. (Luka 11:13; Heberaiʼo 4:12) Enaʼö tatema mbua ba waʼabölö daʼö, moguna tabaso Zura Niʼamoniʼö ero maʼökhö, taʼangerönusi, ba taʼaseseʼö taʼandrö waʼatua-tua hegöi faʼabölö ba wamalua hadia zi no tafahaʼö ita. (Yosua 1:8; Zinunö 119:97; I Tesalonika 5:17) Tola göi tatema mbua moroi ba Daromali Lowalangi hegöi ehehania niʼamoniʼö na tafaʼanö ita ba taʼondrasi gangowuloa mbanua niha Keriso. (Heberaiʼo 10:24, 25) Ba omasi ita taʼogunaʼö ngawalö fakake si no ihenaigö organisasi Yehowa khöda, simane majalah, JW Broadcasting, JW Library, hegöi jw.org.​—Luka 12:42.

17. Hadia nitutunöda ba wamahaʼö aefa daʼa?

¹⁷ No tatutunö gamuata si lö sökhi sinangea laheta ba laröi ira niha Keriso enaʼö tola laʼomusoiʼö dödö Yehowa. Hizaʼi, moguna nasa so nifaluada. Moguna taʼogunaʼö gamuata si bohou sagötö faʼaurida. Ba wamahaʼö aefa daʼa, tatutunö hewisa wamalua yaʼia.