Hezo Tola Ösöndra Dötönafö Sindruhu?

NO TEKIKO lozi dangamö ba no mate. Ba ginötö öʼalui lala wangehaogö yaʼia, tola manö oya zinangea öfili. Oya sibai iklan ba wangehaogö lozi danga, ba oi zara labeʼe khöda waʼafaduhu dödö ba no faböʼö-böʼö lala wangehaogöra. Hizaʼi, hewisa na so samösa ndra matua sonekhe si falazi omo khöu samazökhi lozi andrö mato hauga fakhe silalö? Aefa daʼö, lafatunö khömö wa omasi ia wanolo yaʼugö ba lö iʼandrö gefe. Tatu ömane tödöu daʼa gangetula si sökhi.

Iadaʼa, faedogö atö lozi daʼö ba wanötöna niʼokhögöu. Na örasoi wa taya dötönaföu simane nirasoi niha sato ba gulidanö safönu abula dödö andre, hezo möi ndraʼugö ba wangandrö fanolo? Ato niha sangumaʼö wa tola itaögö gabula dödö andrö, hizaʼi tola alangu dödöda börö wanuturu lala soya sibai ba si no faböʼö-böʼö. Na simanö, hadia mbörö wa tenga khö Zomböi faʼauri möi ndraʼugö ba si tola mameʼe khöu fanötöna? Imane Sura Niʼamoniʼö, ”Sindruhunia lö aröu ia khöda zamösana”, ba hasambalö ibeʼe khöda wanolo.​—Halöwö Zinenge 17:27; 1 Fetero 5:7.

Eluaha Wanötöna Sindruhunia

Eluaha wanötöna niwaʼö ba Zura Niʼamoniʼö abölö abakha geluahania moroi ba wanötöna nifaʼema ndra doto, ilmuwan hegöi ira psikolog iadaʼa. Ba Zura Niʼamoniʼö, ngawua wehede ”fanötöna” sindruhunia yaʼia daʼö fombaloi safönu faʼakhari-khari dödö ba mudöna-döna zabölö sökhi. So dombua geluaha wanötöna yaʼia daʼö ohitö dödö wa so zabölö sökhi, ba dane-dane waʼafaduhu dödö wa hasambalö tohare zabölö sökhi. Tenga ha anga-anga dötönafö niwaʼö Zura Niʼamoniʼö. So dane-dane saro ba wanötöna andrö ba sindruhu-ndruhu itörö.

Fanötöna andrö fakhili ia ba wamati, si teʼodane-dane ba waʼaro dödö, tenga ha asala faduhu dödö. (Heberaiʼo 11:1) Hizaʼi, moloʼö Sura Niʼamoniʼö faböʼö wamati moroi ba wanötöna.​—1 Korindro 13:13.

Duma-dumania: Na öʼandrö wanolo khö zi samösa si fahuwu khöu si no öfaduhusi tödö, tola ötötöna wa itolo ndraʼugö. Tenga zi lö dane-dane wanötönamö andrö börö me faduhu dödöu khönia. Aboto ba dödömö haniha ia ba no anehe ndraʼugö gamuatania si sökhi hegöi faʼoböwönia ba zilalö. Faoma moʼamakhaita wamati hegöi tötönafö niʼokhögöu hewaʼae faböʼö geluahania. Hewisa enaʼö simane daʼö wanötönamö khö Lowalangi?

Dane-Dane Wanötöna

Lowalangi andrö umbu wanötöna sindruhu. Ba götö Zura Niʼamoniʼö, mufotöi Yehowa andrö ’tötönafö ndraono Gizaraʼeli’. (Yeremia 14:8) Gofu hadia dötönafö si tola laʼodaligö ono mbanuania, no moroi khönia; daʼö mbörö wa yaʼia dötönaföra. Fanötöna simane daʼö tenga ha fangifi. Ibeʼe khöra dane-dane saro ba wanötönara andrö Lowalangi. Hewaʼae no hauga ngaotu fakhe tobali ira ono mbanuania, fefu zi no ifabuʼu hasambalö ifalua. Imane Yosua ba ndraono Gizaraʼeli, ”No miʼila samösa . . . wa no itörö fefu zi no ifabuʼu Yehowa Lowalangimi khömi. No ahori ifalua. Lö zi lö itörö.”​—Yosua 23:14.

Ba zi hauga ribu fakhe aefa daʼö, moguna nasa khöda zi no musura andrö. Ba Zura Niʼamoniʼö, oya mbuʼusa li Lowalangi sahöli-höli dödö hegöi catatan sejarah sanandrösa ba waʼaluania. Sindruhu-ndruhu tola mufaduhusi tödö mbuʼusa linia sanandrösa ba zi so miföna irege hulö zi no alua me lasura mbuʼusa li daʼö.

Daʼö mbörö wa mufotöi Zura Niʼamoniʼö andrö buku wanötöna. Na öfahaʼö ndraʼugö ba nifalua Lowalangi ba niha gulidanö, itugu aro dane-dane waʼafaduhu dödöu khönia. Imane sinenge sotöi Faulo, ”Fefu hadia ia nisura me föna, tesura ia ba wamahaʼö yaʼita. Nisura andrö zameʼe khöda fondrara dödö enaʼö anau gölöda irege so khöda wanötöna.”​—Roma 15:4.

Hadia Wanötöna Nibeʼe Lowalangi Khöda?

Hawaʼara moguna khöda dötönafö? Hadia tenga ba ginötö alua gabula dödö sebua? Hizaʼi, ba wamaigi niha sato, na alua khöra gabula dödö sebua simane na mate niha niʼomasiʼöra, aetu saʼae wanötönara. Lö hadöi saʼae sangetuʼö fanötönada baero waʼamate. Lö iböhöli wolohi yaʼita. Tola talawa ia ha ba zi sabata hizaʼi lö khöda faʼabölö ba wolawa lua-luania. Andrö wa tefaudu na iwaʼö Sura Niʼamoniʼö faʼamate andrö ”udu safuria”.​—1 Korindro 15:26.

Na simanö, hewisa enaʼö so khöda dötönafö na alua waʼamate? Ayati ba Zura Niʼamoniʼö sanötöi wa faʼamate andrö udu safuria, itohugö göi wangumaʼö wa ’teheta’ dania nudu andrö. Abölö nasa Yehowa moroi ba waʼamate. No oya iforomaʼö dandra ba zilalö. Hadia nifaluania? Isusugi niha si no mate. So siwa ngawalö waö-waö wanusugi nifalua Lowalangi ba wangogunaʼö faʼabölönia ba wanusugi niha si no mate.

Ba zi sambua inötö, ibeʼe waʼabölönia Yehowa khö Nononia Yesu ba wanusugi niha si fahuwu ba niʼomasiʼönia sotöi Lazaro hewaʼae no öfa hari mate ia. Lö ibiniʼö wamalua daʼö Yesu, ato zangila me luo daʼö.​—Yohane 11:38-​48, 53; 12:​9, 10.

Te manofu-nofu ndraʼugö, ’Hana wa lasusugi niha si no mate? Hadia lö ifuli atua ira aefa daʼö mate?’ Atulö daʼö. Hewaʼae simanö, börö waö-waö wanusugi si no tesura ba Zura Niʼamoniʼö, tenga ha faʼedöna niʼokhögöda wa ifuli tesusugi niha niʼomasiʼöda, hizaʼi so dane-dane saro irege faduhu dödöda wa ifuli auri ira. Eluahania taʼokhögö dötönafö sindruhu.

Imane Yesu, ”Yaʼodo wemaoso ba faʼauri.” (Yohane 11:25) Yaʼia niʼogunaʼö Yehowa ba no ibeʼe khönia waʼabölö ba wanusugi niha sato ba zi sagörö ulidanö. Imane Yesu, ”Irugi inötö dania larongo linia dozi si so ba lewatö ba möi ira yawa.” (Yohane 5:​28, 29) Dozi niha si mörö ba lewatö tesusugi ira ba gulidanö Faradaiso.

Ifaʼeleʼö Yesaya hewisa dania wanusugi andrö, ”Ifuli auri niha si no mate andrö khöu. Tesusugi mboto nono mbanuagu si no mate. Mifaoso ba miʼomusoiʼö dödömi, yaʼami si no ibalugö tanö! Hulö namo ba zihulö wongi namo andrö khöu, ba itehegö tanö andrö enaʼö ifuli auri niha si no mate.”​—Yesaya 26:19.

Hadia lö terara dödöu ba nifabuʼu andrö? Tola takhalaigö wa niha si no mate amaedola ba nahia sahono dödö so ia, simane ono si so ba dalu ninania. Sindruhu wa no ihaogö itöngöni Lowalangi Fondrege Zabölö döi niha si so ba lewatö. (Luka 20:37, 38) Ba zi lö ara tö, ifuli tesusugi ira ba gulidanö safönu faʼohahau dödö ba latemaʼö ira simane ono sawuyu sawena tumbu ba zi sambua omo safönu faʼomasi! Börö daʼö, lö tebulö wanötönada hewaʼae so waʼamate.

Hadia Lua-Lua Wanötöna Andrö Khöu

Oya wamahaʼö nibeʼe Waulo khöda sanandrösa ba wanötöna. Fanötöna andrö amaedola fakake ba wamati yaʼia daʼö takula ba högö. (1 Tesalonika 5:8) Hadia geluahania? Ba götö Zura Niʼamoniʼö, iʼogunaʼö dakula moroi ba loga si samösa saradadu na möi ia fasuwö, sasesenia tanö yawa mbalu-balu högö labeʼe ia. Börö wolumöʼö moroi ba dakula andrö, lö göna högönia ba mangandrauli furi nono wana andrö. Hadia niwaʼö Waulo ba daʼa? Simane takula si tola molumöʼö högöda, tola göi irorogö wangera-ngerada tötönafö andrö hegöi ba wangai angetula. Na öʼokhögö dötönafö saro sanandrösa ba gohitö dödö Lowalangi, lö tebulö so khöu waʼahono dödö hewaʼae afönu gulidanö andre faʼalösökhi. Haniha moroi ba gotaluada zi lö omasi mangokhögö takula simane daʼö?

Iʼogunaʼö gamaedola tanö böʼö Faulo sanandrösa ba wanötöna soʼamakhaita ba gohitö dödö Lowalangi. Imane, ”Fanötöna andre no amaedola zao ba waʼaurida.” (Heberaiʼo 6:​19) Börö me no hauga kali ahöndrö göfa nitörö Waulo, andrö wa aboto ba dödönia wa moguna sibai zao andrö. Labeʼe zao si tou ira si fagai ba ginötö ibözi ira bade. Na ofeta zao andrö ba doyo nasi, lö iʼoloiʼö ira angi sabölö-bölö ba lö latandru gara.

Simanö göi nifabuʼu Lowalangi sanandrösa ba wanötöna, hasambalö alua ba aro ia khöda. Tola itolo ita fanötöna andrö ba wanaögö ngawalö mbade ba ginötö iadaʼa. No ifabuʼu Yehowa wa irugi inötönia dania lö saʼae ataʼu niha börö wasuwöta, faʼalösökhi, faʼabu dödö mazui faʼamate. (Faigi kotak ba ngaʼörö si 10.) Na aro ita ba wololohe fanötöna andrö, tola tetolo ita ba ngawalö gabula dödö, tefarou ita ba woloʼö goi-goi Lowalangi moroi na adöni dödöda ba woloʼö amuata wohorö salua ba gulidanö si lö sökhi andre.

Farahu göi ndraʼugö ba dötönafö niwaʼö Yehowa andrö. Omasi sibai ia na tasöndra waʼohahau dödö simane somasi ia. Ohitö dödönia yaʼia daʼö ”enaʼö teʼorifi fefu niha ba lasöndra waʼaboto ba dödö si tefaudu sanandrösa ba zindruhu”. (1 Timoteo 2:4) Ifarou ndraʼugö samazökhi buku andre enaʼö öʼokhögö waʼaboto ba dödö sameʼe khöu faʼauri yaʼia daʼö faʼaboto ba dödö sanandrösa ba Daromali Lowalangi. Abölö ebua mböli wanötöna niʼamualagö Lowalangi moroi ba wanötöna nisöndrau ba gulidanö andre.

Me so wanötöna simane daʼö, tenga saʼae si lö faʼabölö ndraʼugö, börö me ibeʼe khöu waʼabölö Lowalangi ba wogamö ohitö dödö gofu hadia ia zi tefaudu ba zomasi ia. (2 Korindro 4:7; Filifi 4:​13) Hadia tenga fanötöna simane daʼö zomasi ndraʼugö? Börö daʼö, na moguna khöu wanötöna, na öʼalu-alui ia, taha ua dödöu. No ahatö wanötöna andrö. Hasambalö ösöndra ia!

[Kotak/Gambara]

Tola Taʼokhögö Wanötöna. Hadia Mbörö?

Nisura ba Zura Niʼamoniʼö andre, tola itolo ndraʼugö ba wangokhögö fanötöna:

◼ Ifabuʼu Lowalangi waʼauri sohahau tödö ba zi so miföna.

Taromalinia zangumaʼö wa ibaliʼö dania faradaiso zi sagörö ulidanö andre, ba niha si toröi ba daʼö larasoi waʼomuso dödö ba fahasara dödö.​—Sinunö 37:11, 29; Yesaya 25:8; Famaʼeleʼö 21:​3, 4.

◼ Lö irai falimo Lowalangi.

Fatuwu ia ba walimosa, gofu hadia ia daʼö. Niʼamoniʼö Yehowa andrö ba lö taʼunö, andrö wa lö irai falimo ia.​—Amaedola 6:​16-​19; Yesaya 6:​2, 3; Tito 1:2; Heberaiʼo 6:​18.

◼ Fahöna waʼabölö Lowalangi.

Ha Yehowa Wondrege Zabölö. Lö si tola manaha yaʼia ba wamalua buʼusa linia.​—2 Moze 15:11; Yesaya 40:25, 26.

◼ Omasi Lowalangi na öʼokhögö waʼauri sagötö faʼara.

​—Yohane 3:​16; 1 Timoteo 2:​3, 4.

◼ Ifaigi ita Lowalangi safönu fanötöna.

Iʼosambuaʼö dödönia ba mbua-bua si sökhi hegöi famorege nifaluada, tenga ba zala mazui si tebai tafalua. (Sinunö 103:12-​14; 130:3; Heberaiʼo 6:​10) Itötöna enaʼö tafalua zatulö ba omuso dödönia na tafalua daʼö.​—Amaedola 27:11.

◼ Ifabuʼu Lowalangi wa itolo ndraʼugö ba wogamö ohitö dödö satulö.

Böi so ba dödö nono mbanuania wa lö faʼabölöra. Lö atali Lowalangi ba wameʼe ehehania niʼamoniʼö, yaʼia daʼö faʼabölö fondrege zebua ba wanolo yaʼita.​—Filifi 4:​13.

◼ Lö irai teʼailasi niha sanötöna khö Lowalangi.

Börö me tola muʼodaligö ba mufaduhusi tödö ia, lö irai iʼailasi ndraʼugö.​—Sinunö 25:3.

[Gambara]

Simane takula solumöʼö högöda, fanötöna andrö ilumöʼö wangera-ngerada

[Gambara]

Simane sao, na aro dane-dane dötönaföda lö awuwu ita na so gabula dödö

[Credit Line]

Courtesy René Seindal/Su concessione del Museo Archeologico Regionale A. Salinas di Palermo