Hadia Aboto ba Dödöu Wa Moguna Tedou Ndraʼugö ba Wamati?
”Böi bato wombaso sura, ba böi bato wamarou tödö ba famahaʼö.”—I TIMOTEO 4:13.
1, 2. (a) Hewisa Yesaya 60:22 alua ba götö safuria andre? (b) Hadia manö zoguna ba organisasi Yehowa ba gulidanö?
”FONDREGE zide-ide, ba tobali hönö, ba fondrege tou, ba tobali soi sabölö.” (Yesaya 60:22) Alua wehede daʼa ba götö safuria. Me döfi 2015, so 8.220.105 nono mbanua Yehowa sanuriaigö turia somuso dödö sanandrösa ba Mbanua Lowalangi ba zi sagörö ulidanö! Sanandrösa ba waʼatedou andre, imane Lowalangi, ”Yaʼodo Yehowa zamangaösö dania, na baŵania!” Itugu ara, itugu oya halöwö sinangea tafalua. Hadia no taforege ba wamalua halöwö wanuriaigö hegöi wamahaʼö niha ba duria somuso dödö? Ato ndra talifusöda si no tobali perintis biasa mazui perintis ekstra. So göi zi findra ba mbanua böʼö ba wolului halöwö fanuriaigö. Tanö böʼönia, laforege ba wangehaogö Balai Mbanua Lowalangi.
2 Ero röfi, so 2.000 mbanua niha Keriso si bohou. Börö daʼö moguna so satua sokubaloi hegöi enoni. Ero röfi so ngahönö genoni si tobali satua sokubaloi, ba ngahönö ndra matua tanö böʼö sinangea tobali enoni. Andrö, ”yaʼaʼoi so khömi wangai halöwö Zoʼaya andrö”, tenga ha khö dalifusöda ira matua manö daʼa, hizaʼi ba ndraʼalawe göi.—I Korindro 15:58.
HADIA ZINANGEA TAFALUA ENAʼÖ TEDOU BA WAMATI?
3, 4. Moloʼö yaʼugö, hadia zinangea lafalua enaʼö tedou ba wamati?
3 Baso I Timoteo 3:1. Isuno Faulo dalifusö ira matua ”zangalui halöwö” tobali satua. Na so nihalöda si lö ikhamö dangada, moguna taforege ba wangoroʼö dangada. Khalaigö samösa dalifusöda somasi tobali enoni. Aboto ba dödönia wa moguna iforege wondrouʼö wamalua mbua-bua niha Keriso. Ba me no lafataro ia tobali enoni, iforege göi enaʼö tola tobali ia satua.
4 So dalifusöda zobulöʼö lala waʼaurira enaʼö itugu oya zi tola lafalua ba halöwö khö Yehowa. Duma-dumania, so zomasi merintis, mohalöwö ba Mbetieli mazui fao ba wangehaogö Balai Mbanua Lowalangi. Datatutunö hewisa Zura Niʼamoniʼö ba wanolo yaʼita enaʼö tedou ba wamati.
BÖI BÖHÖLI BA WONDROUʼÖ FAMATI
5. Hewisa laʼogunaʼö waʼabölöra si bohou ebua ba wohalöwö khö Yehowa?
5 Ira si bohou ebua, abölö oya zi tola lafalua ba halöwö khö Yehowa, börö me abölö ba lö mofökhö ira. (Baso Gamaedola 20:29.) So ösa zi bohou ebua sohalöwö ba Mbetieli ba wamazökhi hegöi menjilid mbuku mazui Zura Niʼamoniʼö. Ato dalifusöda si bohou ebua samazökhi hegöi sangehaogö Balai Mbanua Lowalangi. So göi zomasi wolului ba ginötö so gabula dödö simane nduru danö ba tanö böʼönia. Ba ato perintis si bohou ebua samahaʼö yaʼira ba li tanö böʼö, mazui si findra ba mbanua böʼö ba wanuriaigö turia somuso dödö.
6-8. (a) Hadia zobulöʼö fangera-ngera samösa ndra matua si bohou ebua sanandrösa ba halöwö khö Lowalangi, ba hadia lua-luania? (b) Hewisa tola ’tatandra ba tafaigi, wa no sebua tödö Yehowa’?
6 Börö me taʼomasiʼö Yehowa, omasi ita tabeʼe zabölö sökhi khönia. Hewaʼae simanö, tola manö fagölö nirasoida simane nirasoi Aaron. Omasi ia wamosumange Lowalangi, hizaʼi lö owua-wua dödönia. Hewaʼae iʼotarai me ide-ide no fao Aaron weʼamöi ba gangowuloa hegöi manuriaigö, hizaʼi imane, ”Afölido wamalua daʼö fefu.” Hadia nifaluania?
7 Iforege Aaron ba wombaso Zura Niʼamoniʼö ero maʼökhö, ihenaigö göi ia fatua lö möi ba gangowuloa, ba ibeʼe mbua gera-erania. Iʼaseseʼö mangandrö. Fefu nifaluania andre zanolo yaʼia enaʼö tedou ba wamati. Itugu aboto ba dödönia ba iʼomasiʼö Yehowa. Lua-luania, owua-wua dödö Aaron. Merintis ia, itolo niha si göna abula dödö simane nduru danö ba manuriaigö ia ba mbanua böʼö. Iadaʼa, no tobali ia satua sokubaloi ba mohalöwö ia ba Mbetieli. Hewisa dödönia? Imane Aaron, ”No ’utandra ba ufaigi, wa no sebua tödö Yehowa’. Börö howu-howunia khögu, hulö moʼömö ndraʼo khönia ba omasido na itugu oya nifaluagu ba halöwö fanuriaigö. Ba gafuriata, abölö oya utema howu-howu.”
8 Imane sanura sinunö, ”Mitandra ba mifaigi, wa no sebua tödö Yehowa.” Imane nasa, ”Ba zangalui Yehowa, ba lö ambö, fefu gofu hadia.” (Baso Zinunö 34:9-11.) Na tabeʼe zabölö sökhi khö Yehowa, sindruhu-ndruhu wa owua-wua dödöda börö me taʼila wa no taʼomusoiʼö dödönia. Ba irorogö ita simane si no ifabuʼu.
BÖI AWUWU
9, 10. Hana wa moguna khömö ’wombaloi’?
9 Te omasi ita na oya tafalua halöwö khö Yehowa. Hizaʼi, hewisa na no ara tabalo-baloi enaʼö labeʼe khöda halöwö sebua ba mbanua niha Keriso mazui hewisa na lö nasa tebulö waʼaurida? Moguna so khöda wombaloi. (Mikha 7:7) Tola manö itehegö alua daʼa Yehowa, hizaʼi faduhu dödöda wa lö ibato ba wanolo yaʼita. Tola tafahaʼö ita moroi khö Gaberahamo. Fabuʼu li Yehowa wa tumbu khönia ndraono. Hizaʼi, ara ibalo-baloi daʼö Gaberahamo fatua lö tumbu khönia Gizaʼaki. Ba ginötö daʼö, lö aetu-aetu manötöna Gaberahamo ba mamati ia khö Yehowa.—I Moze 15:3, 4; 21:5; Heberaiʼo 6:12-15.
10 Tatu manö, lö aoha wombaloi. (Gamaedola 13:12) Hizaʼi, na taʼangera-ngeraigö manö zalua khöda mazui faʼafatö dödöda, tola manö ide-ide dödöda. Abölö sökhi na taʼogunaʼö ginötö daʼö ba wangehaogö mbua-buada ba wangai halöwö ba mbanua niha Keriso.
Na taʼangerönusi zi no tabaso ba Zura Niʼamoniʼö, tola tafahaʼö ita enaʼö atua-tua ba wangai gangetula si sökhi
11. Hadia mbua-bua zinangea tadouʼö, ba hana wa moguna daʼö?
11 Douʼö mbua-bua ba faʼatua-tua zoguna khömö. Na öbaso ba öʼangerönusi Zura Niʼamoniʼö, tola atua-tua ndraʼugö ba tola öʼokhögö fangera-ngera satulö hegöi ba wangai gangetula si sökhi. Sindruhunia, moguna khö ndra matua mbua-bua hegöi faʼatua-tua daʼa ba wangai halöwö ba mbanua niha Keriso. (Gamaedola 1:1-4; Tito 1:7-9) Na tafahaʼö ita ba Zura Niʼamoniʼö, tola aboto ba dödöda hewisa dödö Yehowa ba ngawalö zalua. Aefa daʼö, tola taʼogunaʼö zi no tafahaʼö ita ba wangai gangetula sangomusoiʼö dödö Yehowa ero maʼökhö. Duma-dumania, taʼila hewisa lala wamaluada niha böʼö, wangogunaʼö kefe, hegöi ba wamili hiburan mazui niʼonukhada.
12. Hewisa lalania enaʼö tobali ita niha nifaduhusi tödö ba mbanua niha Keriso?
12 Odödögö wamalua fefu ngawalö halöwö nibeʼe khöu. Ba ginötö lahaogö nomo Lowalangi ira ono mbanuania, moguna khö Nehemia ndra matua si tola mamalua ngawalö halöwö. Ifili niha sangokhögö töi si sökhi. Aboto ba dödönia wa laʼomasiʼö Yehowa ba laforege wamalua hadia manö halöwö nibeʼe khöra. (Nehemia 7:2; 13:12, 13) Iadaʼa, niha si lö faröi ba sowölö-ölö, laʼokhögö döi si sökhi ba itugu oya halöwö nibeʼe khöra. (I Korindro 4:2) Andrö, he talifusöda ira matua ba ira alawe, moguna tahaogö wamalua fefu halöwö nibeʼe khöda.—Baso I Timoteo 5:25.
13. Hewisa duma-duma Yosefo tola manolo ndraʼugö na laböbögö khöu zi lö duhu?
13 Odaligö Yehowa. Hewisa na laböbögö khöu zi lö duhu? Tola öfatunö khöra waʼafatö dödömö. Hizaʼi, na öʼosatulö manö ndraʼugö, tola itugu abölö-bölö gabula dödö andrö. Moguna tahalö wamahaʼö moroi khö Yosefo. Lafalua khönia zi lö sökhi ira talifusönia. Ba laböbögö khönia zi lö duhu, irege labeʼe ia ba gurunga hewaʼae lö ifalua zala. Hizaʼi, iʼodaligö Yehowa Yosefo. Iʼangeraigö fefu zi no ifabuʼu Yehowa ba lö faröi ia. (Zinunö 105:19) Ba ginötö si tosasa andrö, idouʼö mbua-bua si sökhi si tola iʼogunaʼö ba gafuriata ba wamalua halöwö si tohude. (I Moze 41:37-44; 45:4-8) Na laböbögö khöu zi lö duhu, andrö waʼatua-tua khö Yehowa. Itolo ndraʼugö enaʼö ahono dödöu ba tola tefaudu ba ginötö öfatunö khöra waʼafatö dödömö.—Baso I Fetero 5:10.
DOUʼÖ WAʼATUA-TUA BA WANURIAIGÖ
14, 15. (a) Hadia mbörö wa moguna ’tafaigi’ lala na möi ita manuriaigö? (b) Hewisa tola öfaudugö ndraʼugö na faböʼö zalua ba zokhö omo? (Faigi gambara ba wamobörö wamahaʼö hegöi kotak ”Hadia Omasi Öfalua Lala Tanö Böʼö?”)
14 Ifarou Timoteo Faulo enaʼö itugu idouʼö waʼatua-tuania ba wangogunaʼö Daromali. Imane Faulo, ”Faigi-faigi hewisa ndraʼugö, ba hewisa wamahaö andrö.” (I Timoteo 4:13, 16) No ara manuriaigö Timoteo. Hizaʼi, hana wa moguna nasa idouʼö waʼatua-tuania? Aboto ba dödö Timoteo wa tola manö tebulö dödö niha mazui zalua khöra. Omasi ia na lafondro-ndrongo niwaʼönia, andrö wa moguna ifaudugö lala wamahaʼönia ba zoguna khöra. Moguna göi tafalua zimane daʼö ba wanuriaigö.
15 Ba ginötö manuriaigö ita ba nomo misa, so ösa nomo zi lö hadöi niha yomo. Ba nahia böʼö, tola manö so ira ba nomo, hizaʼi tebai tafalukhaisi ira börö me so zanaro ba zi fasui nomora. Na so zimane daʼö ba mbanua si so yaʼugö, hadia tola öfalua lala tanö böʼö ba wamalukhaisi yaʼira?
16. Hewisa enaʼö tola mofozu na manuriagö ba nahia sato niha?
16 Ato dalifusöda somasi manuriaigö ba nahia sato niha. Duma-dumania, tola lafalukhaisi niha sato simane ba stasiun kereta api, terminal, ba fasa mazui ba zinga nasi. Samösa Samaduhuʼö tola fahuhuo ia ba niha sanandrösa ba duria zawena alua. Mazui tola isuno nono niha nifalukhasinia mazui isofu sanandrösa ba halöwönia. Na itema li ba wanofu andrö, tola itutunö khönia sanuriaigö sambua duho moroi ba Zura Niʼamoniʼö. Sasesenia, omasi niha na oya laʼila sanandrösa ba Zura Niʼamoniʼö.
17, 18. (a) Hewisa enaʼö lö ataʼu ndraʼugö na manuriagö ba nahia sato niha? (b) Hadia zi tola tahalö wamahaʼö moroi ba wangandrö Dawido khö Yehowa ba ginötö manuriaigö ita?
17 Te abua khöu wamörögö fahuhuosa ba niha si lö öʼila föna niha sato. Simane nirasoi Eddie, samösa perintis ba New York City. Hizaʼi, isöndra lala enaʼö lö ataʼu ia. Imane, ”Ba ginötö bongi wamahaʼö yomo ba nomo, yaʼo faoma woʼomogu ira alawe, maʼalui hewisa lala ba wameʼe fanema li na so zi lö omasi mamondro-ndrongo mazui ba ginötö labeʼe wanema li. Maʼandrö tolo göi khö ndra Samaduhuʼö tanö böʼö.” Iadaʼa omasi sibai Eddie manuriaigö ba nahia sato niha.
18 Na itugu owua-wua dödöda ba wanuriaigö hegöi na itugu onekhe ita fahuhuo ba niha sanandrösa ba turia somuso dödö tola oroma wamatida. (Baso I Timoteo 4:15.) Tola göi tatolo niha tobali samosumange Yehowa. Imane Dawido, ”Usuno Yehowa, si lö mamalö-malö, böi yatebulö ba mbewegu wanuno yaʼia. Yamusuno ia tödögu, ba khö Yehowa, ya larongo si numana, ba yaʼomuso dödöra.”—Zinunö 34:2, 3.
NA TEDOU BA WAMATI TOLA LÖ ÖBÖHÖLI WAMOSUMANGE YEHOWA
19. Hana wa tola owua-wua dödö ono mbanua Yehowa si lö faröi hewaʼae moʼamböta waʼaurira?
19 Imane Dawido, ”Lasuno ndraʼugö Yehowa, fefu niwöwöimö andrö, ba satulö tödö andrö khöu, ba manunö khöu. Lafatunö lakhömi waʼasalawamö andrö, ba itörö lira waʼabölöu. Ba wameʼe ba dödö niha folaumö andrö, folau zabölö, awö waʼebua lakhömi waʼasalawamö andrö.” (Zinunö 145:10-12) Fefu niha zangomasiʼö Yehowa ba si lö faröi khönia, omasi sibai ira latutunö ba niha sanandrösa khönia. Hizaʼi, hewisa na tebai oya öʼogunaʼö ginötömö ba wanuriaigö ba nomo misa börö me mofökhö mazui me no alawa ndröfiu? Törö tödöu wa tola ösuno Yehowa ero ötutunö ba niha sanandrösa khönia ba niha si so ba zi fasui ndraʼugö, simane khö ndra sondrorogö mazui doto. Na labeʼe ndraʼugö ba gurunga börö wamatimö, tola göi ötutunö ba niha böʼö sanandrösa khö Yehowa ba tola möi fangomusoiʼö dödönia daʼö. (Gamaedola 27:11) Omasi göi Yehowa na lö öböhöli wamosumange yaʼia hewaʼae lö fao khöu nösi nomou. (I Fetero 3:1-4) Hewaʼae abua zalua khöu, tola öfosumange Yehowa, itugu fahuwu ndraʼugö khönia ba tedou ba wamati.
20, 21. Na labeʼe khöu halöwö ba organisasi Yehowa, hewisa tola tobali ndraʼugö howu-howu ba niha böʼö?
20 Ifahowuʼö ndraʼugö Yehowa na itugu aro wahuwusamö khönia ba na öʼbeʼe zabölö sökhi ba wamosumange yaʼia. Na öʼbulöʼö lala halöwö mazui lala waʼaurimö, tola ötolo niha böʼö ba wamahaʼö yaʼira sanandrösa ba gamabuʼula li Lowalangi sahöli-höli dödö. Tola itugu oya zi tola öfalua ba wanolo dalifusö ba wamati. Ba abölö laʼomasiʼö ndraʼugö börö me laʼila wa öforege wohalöwö ba mbanua niha Keriso!
21 Tenga dali hawaʼara no tafosumange Yehowa, fefu ita tola itugu ahatö khönia hegöi tedou ba wamati. Ba wamahaʼö ba migu fönada, tatutunö hewisa lala ba wanolo niha böʼö enaʼö tedou ira göi.