”No Aboto ba Dödömi Daʼa Fefu, ba Abölö Ohahau Dödömi Na Mifalua”

1. Hewisa gamuata niha sangalui tana khöra möi famakiko wangide-ngideʼö niʼokhögöda?

HANA wa abua wamalua hadia zi no tafahaʼö ita ba Daromali Lowalangi? Si oföna, moguna khöda wangide-ngideʼö ba wamalua satulö. Ba ”ngaluo safuria”, abua ba wondrorogö fangide-ngideʼö börö me ato niha ba zi fasuida ”ha tana khöra laʼalui, sangomasiʼö anaʼa, sanuno yaʼira, sangosebua, sangoʼaya” ba ”si lö fanaha tödö”. (2 Timoteo 3:1-3) Yaʼita ono mbanua Lowalangi, taʼila wa lö sökhi gamuata daʼö. Hizaʼi, taʼila wa niha samalua daʼö lasöndra waʼohahau dödö ba mofozu waʼaurira. (Zinunö 37:1; 73:3) Te manofu-nofu ita, ’Hadia sindruhu-ndruhu so mbuania na uʼofönaiʼö zoguna ba niha böʼö moroi ba zoguna khögu samösa? Na so khögu wangide-ngideʼö, hadia laʼosinangegö ndraʼo niha?’ (Luka 9:48) Na tatehegö tedönisi dödöda ba gamuata niha sangalui tana khöra, tola tekiko wahuwusada khö ndra talifusöda ba itugu abua ba niha böʼö ba wangila wa yaʼita niha Keriso. Hizaʼi, na tafahaʼö ita ba taʼoʼö duma-duma nono mbanua Lowalangi sangokhögö fangide-ngideʼö, tola tatema mbua si sökhi.

2. Hadia wamahaʼö nihalöda ba niha samosumange Lowalangi si lö faröi ba götö föna?

² Hadia zanolo niha samosumange Lowalangi si lö faröi ba götö föna enaʼö tobali si fahuwu khönia? Hewisa wangomusoiʼöra tödönia? Hezo lasöndra waʼabölö ba wamalua satulö? Na tabaso duma-dumara ba Zura Niʼamoniʼö ba taʼangerönusi zi no tabaso, tola teʼaroʼö wamatida.

LÖ TEBULÖ ARO WAMATIDA

3, 4. (a) Hewisa wamahaʼö Yehowa ita? (b) Hadia mbörö wa lö ibönö na ha faʼaboto ba dödö niʼokhögöda ba wangaʼaroʼö famatida?

³ No ihenaigö Yehowa zoguna khöda ba wangaʼaroʼö famatida. Tatema wamomaha hegöi mene-mene si sökhi ba Zura Niʼamoniʼö, publikasida, situs Webda, JW Broadcasting, angowuloa hegöi kebaktian. Hizaʼi, itutunö Yesu wa so zabölö moguna moroi ba waʼaboto ba dödö. Imane, ”Daʼö gögu yaʼia wamalua somasi zamatenge yaʼo hegöi ba wangasiwai halöwö nibeʼenia khögu.”​—Yohane 4:34.

⁴ Moloʼö Yesu, no amaedola gö na ifalua zomasi Lowalangi. Na taʼa gö si sökhi, lö mofökhö ita ba ohahau dödöda. Simanö göi na tafalua zomasi Lowalangi, tola ohahau dödöda ba aro wamatida. Duma-dumania, hadia no irai örasoi waʼomuso dödö ba faʼohahau dödö me mangawuliʼö manuriaigö, hewaʼae erege sibai dödömö me öʼondrasi gangowuloa fanuriaigö?

5. Hewisa enaʼö tatema mbua moroi ba waʼatua-tua?

⁵ Na tafalua hadia niʼandrö Yehowa, tasöndra waʼatua-tua. (Zinunö 107:43) Oya zi sökhi salua ba niha sangokhögö faʼatua-tua. ”Fefu ngawalö mbarasi khöu, ba lö fagölö-gölö khönia. . . . Eu sowua fangorifi ia, ba zi olembai yaʼia ba yaʼahowu zi lö mamöhöi.” (Gamaedola 3:13-18) Imane Yesu, ”No aboto ba dödömi daʼa fefu, ba abölö ohahau dödömi na mifalua.” (Yohane 13:17) Larasoi waʼomuso dödö ira nifahaʼönia na lö laböhöli wamalua niwaʼö Yesu khöra. Foloʼö wamahaʼö hegöi duma-dumania, no tobali lala waʼaurira daʼö.

6. Hana wa moguna enaʼö lö mamalö tafalua hadia zi no tafahaʼö ita?

⁶ Iadaʼa, moguna lö mamalö tafalua hadia zi no tafahaʼö ita. Angeragö samösa zangehaogö moto mazui hondra. Onekhe ia, iʼokhögö fakake hegöi ngawalö zoguna ba halöwönia. Na iʼogunaʼö fefu daʼö, itugu onekhe ia ba wangehaogö moto mazui hondra. Te no hauga fakhe ifalua halöwö daʼö, hizaʼi enaʼö lö taya waʼonekhenia moguna lö mamalö ifalua hadia zi no ifahaʼö ia. Simanö göi, na awena tafahaʼö ita ba zindruhu, omuso dödöda börö me tafalua hadia zi no tabaso ba Zura Niʼamoniʼö. Hizaʼi enaʼö lö taya waʼomuso dödöda, moguna tafalua ero maʼökhö hadia zi no ifahaʼö ita Yehowa.

7. Hadia zinangea tafalua enaʼö tola tahalö wamahaʼö moroi ba duma-duma Zura Niʼamoniʼö?

⁷ Ba wamahaʼö daʼa, tatutunö hadia zalua irege abua khöda ba wondrorogö fangide-ngideʼö. Tafahaʼö ita hewisa niha si lö faröi ba götö föna larorogö wangide-ngideʼö. Hizaʼi, lö ibönö na ha tabaso ia. Moguna taʼangeragö ba tafalua ia ba waʼaurida.

BÖI EBUA DÖDÖ ZAMBUANA WAMAIGIMÖ NIHA

8, 9. Hadia wamahaʼö nihalöda ba wangide-ngideʼö Waulo nitutunö ba Halöwö Zinenge 14:8-15? (Faigi gambara ba wamobörö wamahaʼö.)

⁸ Omasi Lowalangi enaʼö ”teʼorifi fefu niha ba lasöndra waʼaboto ba dödö si tefaudu sanandrösa ba zindruhu”. (1 Timoteo 2:4) Hewisa wamaigimö fefu niha si lö mangokhögö faʼaboto ba dödö sindruhu? Manuriaigö zinenge sotöi Faulo ba niha Yahudi somasi mangokhögö faʼaboto ba dödö sanandrösa khö Yehowa. Hizaʼi, manuriaigö göi ia ba niha samosumange lowalangi faya. Möi fanandraigö wangide-ngideʼönia daʼö. Hadia mbörö?

⁹ Me ifalua halöwö utusan injilnia si oföna Faulo, fao khönia Baranaba ba mbanua Lisitera. Niha Likaonia si so ba daʼö, labaliʼö Waulo hegöi Baranaba tobali sangefaʼö yaʼira ba lakaoni ira moloʼö töi lowalangira, Zeo ba Heremesi. Hadia omuso dödö Waulo hegöi Baranaba? Ba wamaigira, hadia no sambua fombulöʼö sangomusoiʼö tödöra daʼa moroi ba wamakao nitemara ba zi dombua banua si no laʼondrasi? Hadia so ba wangera-ngerara wa fefu nifalua khöra andre möi fanolo enaʼö itugu ato niha samondrondrongo turia somuso dödö? Löʼö! Mofönu ira ba lalau muʼao, ”Hana wa mifalua daʼa? Yaʼaga göi niha si lö moʼahonoa simane yaʼami.”​—Halöwö Zinenge 14:8-15.

10. Hana wa lö hadöi ba dödö Waulo hegöi Baranaba wa tohude ira moroi ba niha Likaonia?

¹⁰ Me iwaʼö Faulo hegöi Baranaba wa yaʼira andrö niha, eluahania lafaduhuʼö wa lö moʼahonoa ira. Hizaʼi, tenga daʼö geluahania wa fagölö lala wamosumangera simane nifalua niha Likaonia. Lowalangi zamatenge Faulo hegöi Baranaba tobali utusan injil. (Halöwö Zinenge 13:2) No tebayoini ira eheha niʼamoniʼö ba laʼokhögö wanötöna sahöli-höli dödö. Hizaʼi, lö hadöi ba dödöra wa tohude ira. Laʼila wa tola göi latema niha böʼö wanötöna ba zorugo na latemaʼö duria somuso dödö.

11. Hewisa enaʼö so khöda wangide-ngideʼö simane Faulo ba ginötö möi ita manuriaigö?

¹¹ Daʼa sambua lala ba wangoromaʼöda fangide-ngideʼö simane Faulo. Böi irai so ba dödöda wa tohude ita börö halöwö fanuriaigö nifaluada mazui börö me no itolo ita Yehowa irege mofozu nifaluada. Tola tasofu khöda samösa, ’Hewisa dödögu ba niha si so ba mbanuagu? Hadia so khögu wanahö-nahö tödö ba zi sambua ngawawa?’ Ba zi sagörö ulidanö, ira Samaduhuʼö Yehowa laʼalui niha somasi mamondrondrongo turia somuso dödö. So ösa zamorege wamahaʼö yaʼira ba li hegöi ba zi toʼölö lafalua niha sambö laʼosinangegö. Hizaʼi, lö irai so ba dödöra wa abölö tohude ira moroi ba niha nituriaigöra. Omasi ira laʼila haniha niha nifalukhaisira, enaʼö itugu ato niha zi tola latolo ba wanemaʼö turia Wamatörö Lowalangi.

TÖTÖI DÖI NIHA NIʼOHEMÖ BA WANGANDRÖ

12. Hewisa wangoromaʼö Efafera wa sindruhu-ndruhu iʼameʼegö tödö niha böʼö?

¹² Lala tanö böʼö ba wangoromaʼö fangide-ngideʼö yaʼia daʼö mangandrö ita salahi ndra talifusöda, ’sangokhögö famati sebua böli simane niʼokhögöda’. (2 Fetero 1:1) Daʼa nifalua Efafera. Ha tölu kali itötöi ia Sura Niʼamoniʼö. Me lakuru Waulo ba nomonia ba Roma, isura zura ba niha Keriso si so ba Golose, imane sanandrösa khö Efafera, ”Iforege wangandrö salahimi.” (Kolose 4:12) Iʼila Efafera sanandrösa khö ndra talifusö ba iʼameʼegö tödö sibai ira. Ifotöi ia Faulo ”awögu nikuru”, ba daʼö taʼila wa so göi gabula dödö Efafera. (Filemo 23) Hizaʼi, lö mamalö iʼameʼegö tödö zoguna ba niha böʼö ba itolo ira. Mangandrö Efafera salahi ndra talifusö, ba itötöi döira. Tola göi tafalua daʼö. Mofaʼabölö wangandrö simane daʼö.​—2 Korindro 1:11; Yakobo 5:16.

13. Hewisa woloʼömö Efafera ba ginötö ölau mangandrö?

¹³ Angeragö samösa niha somasi ötötöi döinia ba wangandrömö. Te so nawö-awömö ba mbanua niha Keriso mazui ösi nomomö si göna abula dödö. Tola manö so gangetula sabua sinangea lahalö mazui so gisö-isö dödö sinangea lalawa. Tola göi öʼohe ba wangandrö ndra talifusö si no musura döira ba artikel jw.org ”Saksi-Saksi Yehuwa yang Dipenjarakan Karena Iman Mereka”. (Faigi RUANG BERITA > BERITA HUKUM.) Tola göi öʼohe ba wangandrö niha si göna abula dödö börö me no mate niha niʼomasiʼöra, niha sauri moroi ba bencana mazui ba wasuwöta salua barö-barö daʼa, hegöi sambö zoguna. Ato ndra talifusöda sinangea taʼohe ba wangandrö! Na mangandrö ita salahira, no taforomaʼö wa tenga ha soguna khöda niʼangeragöda, hizaʼi taʼangeragö göi zoguna ba niha böʼö. (Filifi 2:4) Ifondrondrongo Yehowa wangandrö simane daʼö.

”YAMUʼALIOʼÖ WAMONDRONGO”

14. Hewisa wangoromaʼö Yehowa wa yaʼia samondrondrongo fondrege zi sökhi?

¹⁴ Lala tanö böʼö ba wangoromaʼö fangide-ngideʼö yaʼia daʼö tobali ita samondrondrongo si sökhi. Ifarou ita Yakobo 1:19, ”Yamuʼalioʼö wamondrongo.” Yehowa, no samondrondrongo fondrege zi sökhi. (1 Moze 18:32; Yosua 10:14) Duma-dumania, baso wahuhuosa si so ba 2 Moze 32:11-14. (Baso.) Hewaʼae na lö moguna khönia mbua gera-era Moze, hizaʼi itehegö Yehowa khö Moze ba wanutunö nösi dödönia. Hadia öfondrondrongo si fao faʼebolo dödö niwaʼö niha si no irai mamalua sala ba öʼoʼö niwaʼönia? Si fao faʼebolo dödö ifondrondrongo Yehowa wangandrö niha samati.

15. Hewisa lala woloʼöda Yehowa ba wamosumange niha böʼö?

¹⁵ Sofu khöu samösa, ’Na ifondrondrongo Yehowa si fao fangide-ngideʼö hadia niwaʼö niha gulidanö simane nifaluania khö Gaberahamo, Rakhela, Moze, Yosua, Manoa, Elia, hegöi Hizikia, hadia tola göi ufalua daʼö? Hadia ufosumange fefu ndra talifusögu ba ginötö ufondrondrongo niwaʼöra ba uʼoʼö daʼö na tola? Hadia so zinangea abölö uʼameʼegö tödö ba mbanua niha Keriso si fao ndraʼo mazui ba nösi nomogu? Hadia zinangea ufalua?’​—1 Moze 30:6; Zanguhuku 13:9; 1 Razo 17:22; 2 Ngaʼötö 30:20.

”MAʼATÖ INEHEGÖ WAMAKAOGU ANDRE YEHOWA”

16. Hadia nifalua Razo Dawido me ifalua khönia zi lö sökhi Simeʼi?

¹⁶ Fangide-ngideʼö zanolo yaʼita ba wangoromaʼö fanaha tödö na lafalua khöda zi lö sökhi. (Efeso 4:2) So duma-duma si sökhi ba 2 Zamueli 16:5-13. (Baso.) Simeʼi, ösi nomo Razo Saulo, iʼoʼaya ba ilawa Dawido hegöi enoninia. Tola ilau mbalönia Dawido, hizaʼi si fao faʼebolo dödö itaögö wangoʼaya Zimeʼi. Hewisa wa tola iʼokhögö wanaha tödö Dawido? Tola taʼila daʼö na tafareso Zinunö si tölu.

17. Hadia zanolo Dawido ba wangokhögö fanaha tödö, ba hewisa lala woloʼöda yaʼia?

¹⁷ Isura Zinunö si tölu Dawido me itandraigö ibunu ia ononia Abisalomi. Ba ginötö daʼö ilawa ia Simeʼi, hizaʼi isöndra waʼabölö Dawido ba wondrorogö fanaha tödö. Hadia mbörö? Ba Zinunö 3:5 tabaso wehede Dawido, ”Muʼaodo khö Yehowa, ba no itema ligu, moroi ba hili niʼamoniʼö andrö khönia.” Na lafalua khöda zi lö sökhi, moguna mangandrö ita simane nifalua Dawido. Ibeʼe khöda Yehowa gehehania niʼamoniʼö enaʼö tola anau gölöda. Hadia öʼokhögö wanaha tödö mazui öʼefaʼö zala niha samalua khömö si lö sökhi? Hadia faduhu dödömö wa iʼameʼegö tödö Yehowa wamakao nitaögömö ba hasambalö itolo ba ifahowuʼö ndraʼugö?

”DAʼÖ MBÖRÖTA WAʼATUA-TUA”

18. Hewisa enaʼö tatema mbua na tafalua wanuturu lala moroi khö Yehowa?

¹⁸ Na tafalua zatulö, taʼokhögö waʼatua-tua ba ifahowuʼö ita Yehowa. Imane Sura Niʼamoniʼö ba Gamaedola 4:7, ”Daʼö mböröta waʼatua-tua.” Hewaʼae teʼodane-dane waʼatua-tua ba waʼaboto ba dödö, hizaʼi tenga ha faʼaboto ba dödö zi tefarahu ba daʼö. Moʼamakhaita göi waʼatua-tua ba gangetula nihalöda. Sikhö, laforomaʼö waʼatua-atua, lahöna mbalazora soguna na baŵa deu. (Gamaedola 30:24, 25) Keriso, nifotöi ”faʼatua-tua Lowalangi”, lö mamalö ifalua zomasi Namania. (1 Korindro 1:24; Yohane 8:29) Ifahowuʼö ita Lowalangi na lö mamalö taʼokhögö wangide-ngideʼö ba taforomaʼö waʼatua-tua ba ginötö tafili ba wamalua hadia zatulö. (Baso Mataiʼo 7:21-23.) Andrö, moguna taforege enaʼö fefu niha ba mbanua niha Keriso tola lafosumange Yehowa si fao fangide-ngideʼö. Moguna ginötö hegöi faʼebolo dödö ba wamalua satulö. Hizaʼi, na tafalua daʼö no taforomaʼö wangide-ngideʼö, ba fangide-ngideʼö zameʼe khöda faʼomuso dödö iadaʼa hegöi sagötö faʼara.