Hewisa Na Lahoröni Ndraʼo?

HADIA NIFALUAU?

Lö idöna-döna Anette wa latuliʼö ia irege alabu tou ba danö. Imane wangumaʼö, ”Ufalua zi tolado ba wolawa yaʼia. Ulau muʼao ba lö kalua ligu. Utuliʼö, utifa, ubözi, ba ukhaʼai ia. Ba, ba zi lö udöna-döna ifahödo faoma förögi. Iʼanemaiʼö atata dölagu.”

Na alua khöu zimane daʼö, hadia nifaluau?

BATOGÖ SABATA BA ANGERAIGÖ!

Hewaʼae no öfaʼanö ndraʼugö, hizaʼi tola manö alua zi lö sökhi na mofanö-fanöʼö ba zi bongi. Imane Sura Niʼamoniʼö, ”No tenga ba zalio ahe wagohisa, . . . ba tenga ba zaboto ba dödö waʼebua dödö; no ha sambua ginötö ba no ha sara zi göna ira fefu.”​—Zangombakha 9:11.

So ösa zi bohou ebua, simane annette, lafakao ira niha si lö laʼila. Tanö böʼönia, lafakao ira niha sasese laʼila, mazui soroi yomora. Me fulu fakhe ndröfi Natalie, no irai ihoröni ia ono matua si fasinga omo khönia. Imane wangumaʼö, ”Ataʼudo ba ailado sibai. Andrö wa lö ufatu-fatunö.”

TENGA SALAMÖ DAʼÖ

Isala-salaikö manö ia Annette na itörö tödönia zalua andrö. Imane wangumaʼö, ”Itörö-törö manö tödögu zalua me bongi daʼö. Moguna uforege ba wolawa yaʼia menaʼö. Hizaʼi, me no aefa tefahö ndraʼo, atata dölagu börö waʼataʼu. Lö uʼila hadia zinangea ufalua. Hizaʼi, iwaʼö tödögu wa moguna so nifaluagu.”

Isalaikö ia göi Natalie. ”Si bagania menaʼö, böi alio faduhu dödögu,” itutunö Natalie. ”Lawaʼö ira satuagu wa tebai aröu-röu ndraʼo khö gaʼagu na fawudega baero. Hizaʼi, lö uʼoʼö. Hulö ufolala zi fasinga omo khögu ba wamalua si lö sökhi. Abu sibai dödö zoroi yomogu ba zalua andrö. Umane tödögu wa yaʼo zi sala. Ba, abua sibai daʼa khögu.”

Na so khöu dödö simane Annette ba Natalie, törö tödöu wa tenga börö meʼomasiʼö wa lahoröni ndraʼugö. So zangumaʼö wa simanö sa ndra matua, si toʼölö saʼae na lafalua simane daʼö mazui nihoröni andrö sangandrö-ngandrö enaʼö lafalua khönia zi lö sökhi. Hewaʼae simanö, lö sinangea muhoröni zi samösa niha. Na no irai lafalua khöu zimane daʼö, tenga salamö daʼö!

Tatu manö, asese örongo ngawua wehede ”tenga salamö daʼö”, hizaʼi abua khöu wamaduhusi tödö. So niha sangai angetula wa lö laʼombakhaʼö zalua andrö. Lua-luania, itegu-tegu ira tödöra ba lö khöra faʼowua-wua dödö. Hizaʼi, na ölau zi lö hede-hede, omuso sibai dödö niha samalua khöu zi lö sökhi andrö. Moguna öfatunö ia, börö me daʼa gangetula si sökhi.

TUTUNÖ ZALUA KHÖU

Itutunö Sura Niʼamoniʼö wa no irai alua waʼabu dödö simane daʼö ba ndra matua satulö tödö sotöi Yobi. Irege imane wangumaʼö, ”Humede ndraʼo, ba waʼafökhö bakha dödögu.” (Yobi 10:1) Tola öʼoʼö nifalua Yobi. Na ötutunö zalua ba niha nifaduhusiu tödö, tola aoha khöu wanemaʼö salua andrö ba so khöu waʼahono dödö.

Sindruhu-ndruhu no irasoi daʼa Anette. Imane wangumaʼö, ”Ututunö ba zi fahuwu khögu. Ifarou ndraʼo ba wamatunö khö ndra satua sokubaloi niha Keriso ba gangowuloa khöma. Harazaki manö wa ufatunö. Mato hauga kali möi ira khögu ba nomo ba lawaʼö wa tenga salagu daʼö, no faudu sibai khögu wehedera.”

Ifatunö göi Natalie khö zatuania sanandrösa ba zalua khönia. Imane wangumaʼö, ”Latolodo. Laʼalui lala enaʼö aoha khögu wanutunö yaʼia. Daʼö mbörö wa lö talafo abu dödögu wanemaʼö salua khögu andrö.”

So göi waʼahono dödö khö Natalie me no ilau mangandrö. Imane wangumaʼö, ”Tetolo ndraʼo me fahuhuodo khö Yehowa, mendrua manö na ba ginötö lö uʼila ufaʼema nösi dödögu ba niha böʼö. Na mangandrödo, ufatunö fefu. Ba ahono sibai dödögu.”

Itugu numalö ginötö, lö saʼae khöu faʼataʼu. (Zangombakha 3:3) Moguna örorogö mbotou ba fangera-ngerau. Moguna göi oya ginötöu wolombase. Ba sabölö moguna, odaligö Lowalangi Yehowa, si fahöna fondrara dödö.​—II Korindro 1:3, 4.

NA NO IBÖNÖ NDRÖFIU FAKAWA

Na ono alawe ndraʼugö, ba lafasoʼö wamalua amuata wohorö, böi ataʼufi wangumaʼö, ”Böi lau daʼö!” mazui, ”Böi gohe-gohedo!” Böi lau zi lö hede-hede börö waʼataʼumö na iröiʼö kawamö. Na iʼetuʼö wakawasami ha börö-börö daʼö, tenga ira matua si sökhi ia! Moguna öʼalui niha si sangosinangegö botou ba angetula nihalöu.

TAHÖ-TAHÖ

”Me SMP ndraʼo, so ndraono matua zosöbi-söbi tali behagu ba lawaʼö wehede si lö sökhi, simane hawaʼomuso dödögu na orudu ndraʼo khöra.”​—Coretta.

Moloʼö yaʼugö, nifaluara andrö

1. Ha bude-bude?

2. Ha fondrönisi?

3. No möi fangailasi yaʼia?

”Ba bus, so nono matua sangumaʼö fehede si lö baga khögu ba igohe-gohedo. Ubözi dangania ba ufofanö ia. Hulö niha sowöhö ndraʼo ba wamaiginia.”​—Candice.

Moloʼö yaʼugö, hadia nifalua nono matua andrö khö Candice?

1. Ha bude-bude?

2. Ha fondrönisi?

3. No möi fangailasi yaʼia?

”Me ndröfia, so nono matua si lö aetu-aetu mangumaʼö wa omasi ia khögu ba omasi ia na fakawa ndraʼaga, ba lö irai utemaʼö ia. Itaria iʼomösi-mösi dangagu. Mofönudo ba lö ibeʼe dödönia. Aefa daʼö, me ufabuʼu tali sifatugu, ibözi gogogu.”​—Bethany.

Moloʼö yaʼugö, nifalua nono matua andrö:

1. Ha bude-bude?

2. Ha fondrönisi?

3. No möi fangailasi yaʼia?

Fanema li satulö moroi ba wanofu andrö fefu yaʼia daʼö C.

Hadia gamaehutara wangailasi, bude-bude, mazui fondrönisi?

Ha samösa zohare na so fangailasi ba wohorö. Ba lö aetu-aetu ifalua daʼö hewaʼae no lategu ia.

Tebai niʼaohasi ba dödö nifotöi fangailasi andrö. Börö me tola mofozu ia ba wamalua horö.