Lala Enaʼö Tola Öfahaʼö Ndraʼugö Waʼaboto ba Dödö Lowalangi

Tola öfahaʼö ndraʼugö waʼaboto ba dödö Yehowa na öbaso Zura Niʼamoniʼö. Ba ginötö silalö no itutuyu Lowalangi hadauga niha ba wanura ösi gera-erania. Fefu nisura andrö latötöi ia Sura Niʼamoniʼö. Iadaʼa, tafahaʼö ita waʼaboto ba dödö Lowalangi na tabaso Zura Niʼamoniʼö. Börö me Sura Niʼamoniʼö andrö ösinia taromali, ma turia moroi khö Yehowa, Sura Niʼamoniʼö göi latötöi ia Taromali Lowalangi. Tola faduhu dödöda hadia niwaʼö Zura Niʼamoniʼö börö me Yehowa lö irai falimo. ”Tebai mofaya Lowalangi.” (Heberaiʼo 6:18) Ösi Daromali Lowalangi sindruhu.​—Yohane 17:17.

Sura Niʼamoniʼö no sambua buala Lowalangi fondrege zebua böli nibeʼenia khöda. Sura Niʼamoniʼö hulö zura moroi khö nama si fahöna faʼomasi ba ndraononia. Sura Niʼamoniʼö zangombakhaʼö khöda nifabuʼu Lowalangi wa ibaliʼö gulidanö andre sambua naha si sökhi ba sahöli-höli dödö—sambua faradaiso. Sura Niʼamoniʼö iʼombakhaʼö khöda hadia zi no ifalua, nifaluania iadaʼa, ba nifaluania dania ba ndraononia si lö faröi. Sura Niʼamoniʼö göi itolo ita wameʼe lala na so gabula dödö ba lala ba wanöndra faʼowua-wua dödö.​—2 Timoteo 3:16, 17.

Yaʼira Samaduhuʼö Yehowa ba no si fahuwu khö Lowalangi; latolo ndraʼugö enaʼö aboto ba dödö hadia nifahaʼö Zura Niʼamoniʼö. Böi alawö ndraʼugö wangombakha khöra wa omasi öfahaʼö ndraʼugö ba Zura Niʼamoniʼö. Lö laʼandrö gameʼela ba daʼö. (Mataiʼo 10:8) Baero daʼö tola göi möi ndraʼugö ba gangowuloa niha Keriso. Laʼasogö ia ba zi sambua naha nifotöi Balai Mbanua Lowalangi. Na möi Ndraʼugö ba gangowuloa niha Keriso, alio monönö waʼaboto ba dödöu Lowalangi.

Tola öfahaʼö ndraʼugö waʼaboto ba dödö Lowalangi moroi ba ngawalö nifazökhinia. Duma-dumania, Sura Niʼamoniʼö zangumaʼö, ”Ifazökhi Lowalangi mbanua si yawa awö danö.” (1 Moze 1:1) Me ifazökhi Yehowa ”mbanua si yawa”, ifazökhi luo. Hadia zaboto ba dödöda khö Lowalangi moroi ba halöwönia andre? Daʼa iʼombakhaʼö khöda wa Yehowa ebua sibai waʼabölönia. Ha yaʼia zi tola mamazökhi luo sahöli-höli dödöda. Daʼa göi iʼombakhaʼö khöda wa Yehowa andrö si fahöna faʼatua-tua, börö ha si fahöna faʼatua-tua zi tola mamazökhi luo, si so faʼaukhunia ba hagania si lö irai ahori akhozi.

Ba nifazökhi Yehowa teʼoromaʼö khöda wa iʼomasiʼö ita. Angeraigö wa oya ngawalö mbua geu si so ba gulidanö. Tola manö iʼasogö Yehowa ha sambua geu sowua niʼogunaʼöda—ba mazui lö hadöi bua geu. Hizaʼi, Yehowa ibeʼe oya ngawalö mbua geu ba ngawalö khala-khalania, ngawalö waʼebua, ngawalö laʼa-laʼa ba ngawalö waʼaminia. Ba daʼa iʼoromaʼö khöda wa Yehowa andrö ba no Lowalangi si fahöna faʼomasi, oböwö sibai göi ia, so ba dödönia ita, ba sökhi sibai dödönia.​—Zinunö 104:24.