Ba wangodödögö fangombakha ”turia somuso dödö” ba ”ngawalö soi, ba ngawalö li, ba bangawalö mado”, mafazökhi mbuku ba zi töra 750 ngawalö li. (Famaʼeleʼö 14:6) Hewisa wamalua halöwö sabua andre? Börö wanolo moroi khö ndra talifusö si no toʼölö ba wanura ba zi sagörö ulidanö hegöi si sambua orahua si tobali samoʼeluaha—fefu ira Samaduhuʼö Yehowa.

Si oföna la sura ba li Inggris. Satua Sangai Halöwö lafaigi-faigi halöwö Zanura ba gödo sebua ba zi sagörö ulidanö. Yaʼira andre la bagi-bagi halöwö ndra talifusö sanura si so ba gödo sebua hegöi gödo si so ba soi böʼö. Börö me ato ndra talifusö moroi ba ngawalö soi zanura andre, tola mafatunö ngawalö zi toʼölö ba zi sambua-sambua banua irege buku nifazökhima ato zomasi mombaso.

Si no lasura ba li inggris no mege, lafaʼoheʼö khö ndra samoʼeluaha. Me no aefa latehegö ba lafaʼanö, awena lafaʼoheʼö khö ndra talifusö samoʼeluaha ba zi sagörö ulidanö, ba samoʼeluaha göi lafareso wehede ba ngawalö li si tefaudu. Laʼodödögö wangalui ”wehede omasiö” enaʼö tola lafoʼeluaha nösinia moroi ba li inggris ba li niʼilara.​—Zangombakha 12:10.

Börö Komputer daʼö waʼalio. Komputer tebai isalahini zanura ba samoʼeluaha. Hewaʼae simanö tola alio halöwöra börö me laʼogunaʼö buku si so eluaha (kamus), si no tefaʼanö, ba ngawalö lala wangalui si so ba komputer. Ira Samaduhuʼö Yehowa lafazökhi Sistem Penerbitan Elektronik Multibahasa (MEPS), sambua nifaʼanö si tola mangorodugö ngaotu ngawalö li hegöi gambara si so, ba samöfögö naha si tefaudu irege tola mufazökhi.

Hana wa maʼodödögö wamalua daʼa, wamoʼeluaha ngawalö li hewaʼae lö atoto zangogunaʼö yaʼia? Börö meʼomasi Yehowa ”naʼahori teʼorifi fefu niha na dozi lasöndra waʼaboto ba dödö zi duhu”.​—I Timoteo 2:3, 4.

• Hewisa lala ba wanura bukuma?

• Hana wa mafoʼeluaha ba ngawalö li mbuku nifazökhima?

Oya mbuku ba Sura Niʼamoniʼö nifazökhi ero röfi ba gangowuloa ndra Samaduhuʼö Yehowa ba labeʼe ba niha lö laʼandrö gefe. Oya nifazökhi ba nihaogöma Nahia Gorahua Mbanua Lowalangi hegöi gödo si so ba soi böʼö. Ato ndra talifusö ni toloma sohalöwö ba Mbetieli ba nifatenge ba wangombakha, ba matolo göi ndra talifusö si göna abula dödö. Börö daʼö, te manofu dödöu, ’Hezo mahalö gefe ba wanolo yaʼira?’

Lö maʼandrö zi sambua niʼofulu hegöi ameʼela. Hewaʼae ebua gefe niʼogunaʼö ba wamalua halöwö fanuriaigö, lö maʼandrö-andrö gefe ba niha misa. Töra otu fakhe ba zilalö, Menara Pengawal si no mufazökhi imane, yafaduhu dödömi wa itolo ami Yehowa, ba yaʼaga göi ”lö irai maʼandrö-andrö wanolo ba niha” si ndruhu lö irai!​—Mataiʼo 10:8.

Tola tefalua halöwöma börö dolo-tolo si no aoha gölö fameʼe. Ato niha zangandrö saohagölö ba halöwö famahaʼö ba Zura Niʼamoniʼö nifaluama ba labeʼe dolo-tolo si no aoha gölö fameʼe. Ira Samaduhuʼö Yehowa latehegö ginötöra, faʼabölöra, kefera, ba tanö böʼö nasa enaʼö tola alua zomasi Lowalangi ba zi sagörö ulidanö. (I Ngaʼötö 29:9) Yaʼira somasi mameʼe tolo-tolo, tola labeʼe ba naha si no mutatugöi ba Nahia Gorahua Mbanua Lowalangi mazui ba gangowuloa sebua si tölu kali ba zi döfi. Mazui tola laʼogunaʼö situs Web khöma, jw.org ba wameʼe dolo-tolo. Satonia, kefe nitema andre moroi ba niha sitoʼölö manö, fakhili ira simane lakha mbanua ni suno Yesu me ibeʼe zi dombua rimi ba naha si no mutatugöi ba gosali. (Luka 21:1-4) Tobali, gofu haniha manö tola ”ibeʼe yawa maʼifu” si tobali tolo-tolo ”balazi dödö zamösana”.​—I Korindro 16:2; II Korindro 9:7.

Faduhu dödöma wa Yehowa zamarou tödö niha samosumange yaʼia ba wameʼe anaʼara ba wamalua somasi Lowalangi ba halöwö fanuriaigö.​—Gamaedola 3:9.

• Hadia zi faböʼöra gangowuloama ba agama tanö böʼö?

• Hezo laʼogunaʼö dolo-tolo si no aoha gölö fameʼe?

Simane töi si no tesura ba nahia Gorahua Mbanua Lowalangi, nifatunö ba daʼö ha sanandrösa ba Mbanua Lowalangi—tuho nituriaigö Yesu me so ia ba gulidanö.​—Luka 8:1.

Nahia gangowuloa ba wamosumange Lowalangi ba zi sambua banua. Moroi ba nahia andre lafatunö ira Samaduhuʼö Yehowa hewisa wanuriaigö Banua Lowalangi. (Mataiʼo 24:14) Faböʼö-böʼö waʼegebua nahia Gorahua Mbanua Lowalangi andre, ba famazökhi yaʼia sitoʼölö manö, ba tenga ha sambua angowuloa zi tola mangogunaʼö. Ba zafuria andre, ngafulu ribu nahia Gorahua Mbanua Lowalangi sawena mafazökhi (si löʼö-löʼönia lima ngawua teʼasiwai ero maʼökhö) börö me tedou waʼato niha ba gangowuloa. Hewisa wa tola mufalua daʼö?​—Mataiʼo 19:26.

Lafazökhi ia moroi ba dolo-tolo. Tolo-tolo daʼa teʼowuloi ia ba gödo si so ba zi sambua soi enaʼö tola laʼogunaʼö ono mbanua Lowalangi ba ginötö lafazökhi ma ba wangehaogö Nahia Gorahua Mbanua Lowalangi.

Lafazökhi ira talifusö si faböʼö-böʼö banua lö lahalö gazira. Ba soi böʼö, so nifotöi Ngenoli Wamazökhi Nahia Gorahua Mbanua Lowalangi. Ira talifusö nituyu ba wohalöwö si lö gazi findra ira ba mbanua tanö böʼö ba zi sambua soi, ba bambanua si gide-ide, ba wamaigi ngawalö halöwö ba bawamomaha ira talifusö si so ba daʼö. Ba soi tanö böʼö, ira talifusö sinangea, lafatenge ira ba wamaigi-maigi samazökhi ma sangehaogö Nahia Gorahua Mbanua Lowalangi ba zi sambua-sambua banua si no latatugöi. Hewaʼae ato zi so nekhe-nekhe danga ba mbanua andrö somasi mohalöwö, tobali sabölö moʼonorogö tödö wohalöwö yaʼia daʼö ira talifusö sangogunaʼö Nahia Gorahua dania. Tola tefalua daʼa fefu börö geheha Yehowa ba fangodödögö moroi ba nono mbanuania.​—Zinunö 127:1; Kolose 3:23.

• Hana wa lafotöi nahia wamosumange andrö orahua Mbanua Lowalangi?

• Hewisa wamazökhi Nahia Gorahua Mbanua Lowalangi ba zi sagörö ulidanö?