BUKU sabölö oya faza bakha ba Zura Niʼamoniʼö yaʼia daʼö buku zinunö Dawido. Faʼara wanura yaʼia arakhagö 1.000 fakhe. Si no tesura ba mbuku Zinunö Dawido andre daʼö zimöi fondrouʼö wamatida börö me no ladunö-dunö waʼafaduhu dödöra. Oya zi no larasoi nidunö-dunöra, simane, faʼomuso dödö, fanunora Lowalangi, fangandrö saohagölö, faʼabu dödö si no lataögö, ba famalalini era-era. Sanura buku zinunö andre fahuwu ba mamati ira khö Lowalangi. Faigi duho-tuho moroi ba zinunö si no lasura.

Aro Wamatörö Yehowa, sinangea nifosumange ia ba nisuno. ”Wa no ha yaʼugö zotöi Yehowa, wa ha yaʼugö Wondrege zalaŵa ba gulidanö maʼasagörö,” daʼö niwaʼö ba zura Zinunö 83:19. So zinunö sanuno Yehowa börö niwöwöi dangania, simane döfi ba dalu mbanua, faʼauri si so ba gulidanö, mazui famazökhinia niha sahöli-höli dödö. (Zinunö 8, 19, 139, 148) Tanö böʼönia, lasuno Yehowa börö me no ibeʼe wangorifi, ba me no ilumöʼö niha si lö faröi khönia. (Zinunö 18, 97, 138) Tanö böʼö göi, lasuno ia börö me Lowalangi satulö, sangefaʼö niha ba wamakao, ba sanguhuku niha si lö sökhi.​—Zinunö 11, 68, 146.

Yehowa zanolo ba sondrara tödö niha sangomasiʼö Yaʼia. Tola manö, ha Zinunö 23 zabölö laʼila niha, börö me ba daʼö isura Dawido wa Yehowa andrö no amaedola Gubalo sebua faʼomasi, sanuturu lala, solumöʼö, ba sondrorogö biri-birinia. Ba zura Zinunö 65:3 iʼombakhaʼö khöda wa Lowalangi Yehowa ”Samondrongo fangandrö”. Ato niha si no mamalua horö, terara dödöra me labaso Zinunö 39 ba 51, börö me ba daʼö tesura hewisa wamalalini Dawido era-erania ba horö si no ifalua, awö waʼafaduhu dödönia wa iʼefaʼö horönia Yehowa. Ba Zinunö 55:23 so wamarou dödö enaʼö manötöna ita khö Yehowa ba tabeʼe khönia noro dödöda.

Ibohouni gulidanö Yehowa, iʼodela Wamatörö Mesia. Oya ayati ba mbuku Zinunö saekhu khö Mesia, Razo si no tefaʼeleʼö. Ba Zinunö 2 no tefaʼeleʼö, wa Razo andre zangohori ngawalö soi si lö sökhi solawa yaʼia. Ba Zinunö 72 iʼombakhaʼö wa Razo andre dania zangeheta lofo, fa lö atulö, ba famakao. Moloʼö Zinunö 46:10, iʼodela Wamatörö Mesia Lowalangi ba wangeheta fasuwöta, ifakiko fefu fakake ba wasuwöta. Ba Zinunö 37, tabaso ba daʼö wa tehori niha si lö sökhi, tobali niha satulö tödö auri ira ba gulidanö sagötö faʼara, so khöra waʼomuso dödö ba fahasara dödö.

​—Teʼodane-dane ba mbuku Zinunö Dawido.

HADIA Samatörö satua-tua Yehowa andrö? Tesöndra wanema li daʼö ba mene-mene si no ibeʼe. Hadia sökhi mene-menenia andrö? Hadia sökhi lala waʼaurida na tafalua ia? Ngaotu gamaedola nisura Razo Selomo. Fefu gamaedola daʼa moʼamakhaita ia ba waʼaurida. Faigi duma-duma andre.

Döna-döna khö Lowalangi. Fanötöna, no sambua lala wangaʼaroʼö fahuwusada khö Yehowa, imane Selomo, ”Döna-döna khö Yehowa, moroi siʼaikö ba dödöu, ba böi abeʼe dödöu ba waʼonekheu. Böi aefa dödöu khönia, gofu hadia ia lala khöu ba yaʼia zangadölö töröwau.” (Gamaedola 3:5, 6) Foloʼö ba fanötöna khö Yehowa, fangalui fanuturu lala khönia, daʼö zameʼe mofozu lala waʼauri. Na tafalua zimane daʼö omuso dödö Yehowa, ba tola itema li zanandrawaisi yaʼia, Afökha.​—Gamaedola 27:11.

Yaʼatua-tua ndraʼugö na fariawö ba niha böʼö. Abölö moguna iadaʼa mene-mene Lowalangi ba zi no mongambatö ba ba ndraono moroi meföna. Iʼamenesi woʼomo ira matua Lowalangi, ”Enaʼö omuso dödöu ndraʼalaweu me ono matua ndraʼugö,” eluahania lö faröi ia khö woʼomonia ira alawe. (Gamaedola 5:18-20) Ba mbuku Gamaedola, ira alawe si no mangowalu satua-tua, tola lasöndra wehede famarou dödö moroi khö ngambatönia ba moroi ba ndraononia. (Gamaedola faza 31) So göi mene-mene ba ndraono enaʼö laʼoʼö li zatuara. (Gamaedola 6:20) Ba mbuku Gamaedola andre oroma khöda wa moguna sibai na fahuwu ita ba niha, börö niha sangoniagö yaʼia ha somasi ia iʼalui. (Gamaedola 18:1) Si fahuwu khöda, tola idönisi ita ba zi sökhi mazui ba zi lö sökhi, andrö wa moguna atua-tua ita wangalui haniha zinangea fahuwu khöda.​—Gamaedola 13:20; 17:17.

Yaʼatua-tua ndraʼugö ba wondrorogö botou samösa. Iʼamenesi göi ita buku Gamaedola andre enaʼö taʼaröuʼö ita ba wamadu-madu tuo, enaʼö so waʼebolo dödö, böi alio mofönu, ba owölö-ölö ba wohalöwö. (Gamaedola 6:6; 14:30; 20:1) Ifangelama ita buku andre na tafaduhusi tödö wehede niha si lö tefaudu ba zomasi Lowalangi, tola teʼala ita. (Gamaedola 14:12) Iʼoʼou ita ba wondrorogö tödöda side-ide moroi ba ngawalö zi möi famakiko faʼauri, börö me ”moroi ba dödö iʼotarai faʼauri”.​—Gamaedola 4:23.

Ato niha ba gulidanö sohahau tödö me no lafalua mene-mene si so ba mbuku Gamaedola. Daʼö mbörö wa latemaʼö Yehowa tobali Samatörö yaʼira.

​—Teʼodane-dane ba mbuku Gamaedola.