HANA wa möi Yesu ba gulidanö? Yaʼia samösa zangumaʼö, ”Lö tola lö uturiaigö ba mbanua böʼö göi duria somuso dödö andrö, turia Mbanua Lowalangi andrö, ba daʼö sa tefatenge ndraʼo.” (Luka 4:43) Datafaigi öfa ngawalö nifahaʼö Yesu sanandrösa ba Mbanua Lowalangi andrö, si tobali tuho wanuriaigönia.

1. Lö aratö tobali Razo Yesu. Lö alawö Yesu wangumaʼö wa yaʼia andrö Mesia si no tefaʼeleʼö. (Yohane 4:25, 26) Ifatunö göi wa yaʼia Razo niʼila Danieli ba gangilata. Iʼombakhaʼö Yesu khö ndra nifahaʼönia wa sambua inötö dania mudadao ia ’ba dadaoma lakhömi’ ba mudadao göi ira awönia. (Mataiʼo 19:28) Ifotöi ira ”rorogöfö gubalo si lö atoto”, imane nasa wangumaʼö, so khögu ”mbiri-biri böʼö”, si tenga moroi ba gandra.​—Luka 12:32; Yohane 10:16.

2. Famatörö Lowalangi zamalua faʼatulö si ndruhu. Iʼombakhaʼö Yesu wa famatörönia andrö zangeheta fa lö atulö, sangamoniʼö töi Lowalangi Yehowa, ba sangeheta tandrawa nibeʼe Gafökha iʼotarai ba Kabu Edena meföna. (Mataiʼo 6:9, 10) Oroma ba gamuata Yesu ero maʼökhö wa lö ebua dödönia zambuana, ifahaʼö fefu niha he ira matua hegöi ira alawe, he niha sikayo hegöi niha si tosasa, lö ifaböʼö-böʼöni ira Yesu. Hewaʼae iraono Gizaraʼeli zi oföna ifahaʼö, iʼodödögö göi ba wanolo niha Zamaria si tenga niha Yehuda. Tenga simane sondröniaʼö ba agama ba ginötö daʼö, lö khönia fangenahö dödö mazui lö ebua dödönia zambuana.

3. Famatörö Lowalangi tenga moroi ba gulidanö. Oya zalua si lö sökhi sagötö faʼauri Yesu. Razo böʼö zamatörö ba mbanuara. Hewaʼae simanö, me laʼandrö khönia enaʼö tobali ia razo, ba lö omasi Yesu, ilau mofanö. (Yohane 6:14, 15) Imane khö ndra samatörö, ”Tenga moroi ba gulidanö andre mbanuagu andrö.” (Yohane 18:36) Imane khö ndra nifahaʼönia, ”tenga awö niha gulidanö ami.” (Yohane 15:19) Lö itehegö khöra wangogunaʼö fakake wasuwöta, hewaʼae ba wolumöʼö yaʼia moroi ba niha samunu yaʼia.​—Mataiʼo 26:51, 52.

4. Faʼomasi zi tobali dane-dane ba Wamatörö Yesu. No ifabuʼu Yesu wa iʼalösi noro dödö niha ba gulidanö. (Mataiʼo 11:28-30) Lö olifu ia zi no iwaʼö. Ibeʼe khöra mene-mene si sökhi Yesu hewisa lala ba wangalösi abula dödö, ba wangaʼazökhi amakhaitada ba niha, fondröi faʼomasi ganaʼa, ba lala wanöndra faʼohahau dödö. (Mataiʼo, faza 5-7) Börö me iforomaʼö waʼomasi, ato niha somasi ahatö khönia. Sabölö ato zangondrasi yaʼia, niha si göna famakao, faduhu dödöra wa iʼomasiʼö ira Yesu. Si ndruhu-ndruhu wa Yesu andrö Razo sahöli-höli dödö ba zi so föna!

So lala tanö böʼö nifalua Yesu ba wangombakha turia Mbanua Lowalangi enaʼö adöni dödö zamondrongo. Ifalua dandra sahöli-höli dödö. Hana wa ifalua dandra sahöli-höli dödö? Datafaigi wanema linia.

​—Teʼodane-dane ba mbuku Mataiʼo, Mareko, Luka, ba Yohane.

IBEʼE Lowalangi waʼabölö khö Yesu ba wamalua tandra sahöli-höli dödö si tebai lafalua niha gulidanö. Oya dandra sahöli-höli dödö nifalua Yesu—sasesenia föna niha sato. Tandra sahöli-höli dödö andrö zangoromaʼö faʼabölö Yesu ba wolawa udu ba ba wangeheta sanaisi si tebai laheta niha gulidanö si lö moʼahonoa. Faigi duma-duma andre.

Ibeʼe gö niha ba idanö nibadu. Tandra sahöli-höli dödö si föföna nifalua Yesu, yaʼia daʼö ibaliʼö agu nidanö. Ba ginötö tanö böʼö dua kali ibeʼe gö niha solofo, ngahönö waʼato, ha maʼifu giʼa ba roti. Oya zi töra gö ba zi dua kali ibeʼe gö niha sato.

Ifadöhö wökhö. Ifadöhö Yesu ngawalö wamakao ”ba ngawalö wökhö fefu, awö ngawalö waʼatebai”. (Mataiʼo 4:23) Ifadöhö hörö zauʼa, tögi dalinga zafiso, sobou auri, saniri, sakela-kela ba tanö böʼönia. Lö fökhö si tebai ifadöhö.

Tola ifahono mbade. Me laʼötö nidanö Galilaia awö ndra nifahaʼönia, tohare mbade sabölö-bölö. Ataʼu ndra nifahaʼönia. Ha ifaigi mbade andrö Yesu ba imane, ”Böi hede-hede saʼae!, Honogöʼö!” Ba tebato nangi ba tobali ahono sibai. (Mareko 4:37-39) Ba ginötö tanö böʼö, mowaö-waö ia ba dete nidanö si so bade sabölö-bölö.​—Mataiʼo 14:24-33.

Ifofanö mbekhu. Abölö mbekhu moroi ba niha. Ato niha si tebai mangefaʼö yaʼira moroi ba danga zi faʼudu khö Lowalangi andre. Hizaʼi, tenga ha sakali ifofanö mbekhu Yesu, enaʼö aheta ira ba niha nifakao-kaonia. Lö ataʼu Yesu khöra. Yaʼira zataʼu khö Yesu börö me no laʼila waʼabölönia.

Isusugi zi no mate. Faʼamate lafotöi ia ”safuria zi faʼudu”, börö me faʼamate andrö si faʼudu si tebai lalawa niha gulidanö. (I Korindro 15:26) Hewaʼae simanö, no isusugi zi no mate Yesu, isusugi nono matua ono lakha mbanua, isusugi göi nono alawe ono Yaʼiro. Sabölö ahöli-höli dödöda, me tesusugi Lazaro si fahuwu khö Yesu, ifalua daʼö föna niha sato si no abu tödö, hewaʼae no öfa bongi Lazaro ba lewatö! Si faʼudu khö Yesu lafaduhuʼö wa no ifalua dandra sahöli-höli dödö.​—Yohane 11:38-48; 12:9-11.

Hana wa ifalua Yesu fefu dandra sahöli dödö andrö? Hadia tenga no ahori mate fefu niha nitolonia andrö? Atulö, hizaʼi, moguna dandra sahöli-höli dödö nifalua Yesu andrö ba zi so föna. Daʼö zangoromaʼö wa si ndruhu-ndruhu alua fefu zi no tefaʼeleʼö sanandrösa ba waʼa Razo Mesia. Lö mangiwa dödöda wa Razo si no ifataro Lowalangi tola iheta waʼolofo, fökhö, bade samakiko niha, bekhu, mazui faʼamate. No iforomaʼö wa no ibeʼe khönia waʼabölö Lowalangi ba wamalua daʼö.

​—Teʼodane-dane ba mbuku Mataiʼo, Mareko, Luka, ba Yohane.