Hadia Duria Somuso Dödö Andrö?

1. Hadia duria somuso dödö siʼotarai Lowalangi?

Omasi Lowalangi naʼohahau dödö niha ba gulidanö. Waʼifazökhi gulidanö awö nösinia maʼafefu, börö waʼomasinia niha gulidanö. Ba zi lö aratö, ibeʼe waʼohahau dödö ba niha. Iheta wamakao ba fangarö-ngarö ba gulidanö.​—Baso Yeremia 29:11.

Lö hadöi famatörö si tola mangeheta faʼalösökhi, fökhö, ba faʼamate. Ba hiza, so duria somuso dödöda. Ba zi lö aratö, igati wamatörö niha gulidanö Lowalangi faoma famatörönia. Lö abula dödö nono mbanuania. Owua-wua dödöra sagötö faʼara.​—Baso Yesaya 25:8; 33:24; Danieli 2:44.

2. Hana wa moguna sibai duria somuso dödö andrö?

Aheta gabula dödö na no ihori niha si lö sökhi ba gulidanö Lowalangi. (Zefania 2:3) Hawaʼara alua daö? No tefaʼeleʼö ba Zura Niʼamoniʼö fefu zi lö sökhi awö wamakao salua ba ginötö andre. Daʼa zangoromaʼö wa lö aratö ifalua gohitö dödönia Lowalangi.​—Baso II Timoteo 3:1-5.

3. Hadia zinangea tafalua?

Moguna tafahaʼö ita moroi ba Daromali Lowalangi. Sura Niʼamoniʼö andre, amaedola sagörö sura nifaʼoheʼö zatua khö nononia. Sura Niʼamoniʼö zangombakha khöda hewisa lala enaʼö sökhi waʼaurida iadaʼa, ba hewisa enaʼö tasöndra waʼauri si lö aetu ba gulidanö dania. Tola manö so niha si lö omasi na so zanolo yaʼuga enaʼö aboto ba dödöu Daromali Lowalangi. Alimagö sibai na lö taʼogunaʼö ginötö iadaʼa ba wangalui enaʼö tasöndra waʼauri si lö aetu ba zi so föna.​—Baso Gamaedola 29:25; Famaʼeleʼö 14:6, 7.