Fanofu Zombaso

Isura sinenge sotöi Faulo wa ”lö ibeʼe tetandraigö ami [Yehowa], si tebai mitaha”. (I Korindro 10:13) Hadia daʼö geluahania wa oföna itatugöi Yehowa hadia zi tola tataögö, awena dania ifili hadia wanandraigö nitaögöda?

Na sindruhu simane daʼö, moguna taʼangeraigö hadia lua-luania ba waʼaurida. Duma-dumania, so samösa ndraono samunu yaʼia samösa. Afatö sibai dödö namania. Manofu-nofu dödönia, hadia no iʼila Yehowa wa hasambalö alua daʼa, ba no itatugöi wa tola mataögö gabula dödö sebua andre foʼomogu? Ba gulidanö si so ita andre, ato moroi ba gotaluada zanaögö abula dödö. Andrö, hadia faduhu dödöda wa no itatugöi Yehowa fefu hadia ia zalua ba waʼaurida?

Na tahaogö tafareso I Korindro 10:13, tola taʼila wa lö irai fao dödö Zura Niʼamoniʼö ba wehede sangumaʼö wa no iʼila Yehowa hadia zi tola tataögö ba awena itatugöi hadia wanandraigö nitaögöda. Hana wa tola tawaʼö daʼö? Datatutunö öfa ngawalö si tobali daninia.

Si oföna, ibeʼe Yehowa mbuala ba wangai angetula samösa ba niha. Omasi ia na tahalö samösa gangetula. (V Moze 30:19, 20; Yosua 24:15) Na tahalö gangetula sangomusoiʼö dödö Yehowa, tola faduhu dödöda wa ibeʼe khöda wanuturu lala. (Gamaedola 16:9) Hizaʼi, ba ginötö tahalö gangetula si lö sökhi, tataögö hadia lua-luania. (Galatia 6:7) Andrö, na no itatugöi Yehowa hadia wanandraigö salua khöda, hadia daʼö geluahania wa tola tahalö samösa gangetula?

Si dua, lö ilumöʼö ita Yehowa moroi ba zalua si lö mudöna-döna. (Zangombakha 9:12) Te so niha si göna deʼala börö me so ia ba nahia ba ba ginötö si sala. Itutunö Yesu sanandrösa ba zi 18 niha si mate nilangö malige. Ifatunö wa sindruhu-ndruhu tenga Lowalangi mbörö waʼamatera. (Luka 13:1-5) Andrö wa lö atulö na so ba wangera-ngerada wa no oföna itatugöi Lowalangi haniha zi mate ba sauri, fatua lö alua daʼö.

Si tölu, fefu niha zamösana moguna laforomaʼö waʼalöfaröira khö Yehowa. Imane Satana wa lafosumange Yehowa ira niha samosumange yaʼia börö me ifahowuʼö ira. Iwaʼö Satana wa na göna ita abula dödö, hasambalö faröi ita khö Yehowa. (Yobi 1:9-11; 2:4; Famaʼeleʼö 12:10) Na iheta wanandraigö daʼö fatua lö tataögö ia, hulö na atulö hadia niwaʼö Zatana.

Si öfa, ihalö gangetula Yehowa wa lö omasi ia iʼila fefu hadia zalua khöda ba zi so miföna. Sindruhunia, na omasi Yehowa iʼila hadia zalua ba zi so miföna, tatu tola ifalua daʼö. (Yesaya 46:10) Hizaʼi, iforomaʼö Sura Niʼamoniʼö wa lö asese iʼogunaʼö waʼabölönia daʼö Yehowa. (I Moze 18:20, 21; 22:12) Yehowa no safönu faʼomasi ba faʼatulö, andrö wa iʼameʼegö tödö gofu hadia ia gengetula nihalöda.​—V Moze 32:4; II Korindro 3:17.

Na simanö, hadia geluaha wehede Waulo me iwaʼö wa ”lö ibeʼe tetandraigö ami [Yehowa], si tebai mitaha”? Ba ayati daʼö, nitutunö Waulo yaʼia daʼö hadia nifalua Yehowa ba ginötö göna ita fanandraigö, tenga fatua lö alua daʼö. Na tafaduhusi tödö Yehowa, tola itolo ita ba wanaögö gofu hadia ia wanandraigö salua ba waʼaurida. (Zinunö 55:23) Iadaʼa, datafaigi dombua dani irege iwaʼö wehede daʼö Faulo.

Dani siföföna yaʼia daʼö fanandraigö nitaögöda ”ha fanandraigö ba niha”. Sagötö auri ita ba gulidanö nifatörö Zatana andre, hasambalö oya wanandraigö sabua salua khöda. Hizaʼi, na taʼodaligö Yehowa, tola tataögö fefu hadia ngawalö wanandraigö ba tola lö faröi ita. (I Fetero 5:8, 9) Ba mböröta faza 10 ba zura I Korindro, isura Faulo ngawalö wanandraigö nitaögö ndraono Gizaraʼeli me so ira ba danö si mate. (I Korindro 10:6-11) Niha sangodaligö Yehowa tola lataögö fefu wanandraigö salua. Hizaʼi, so göi ösa ndraono Gizaraʼeli si lö moloʼö niwaʼö Yehowa. Faröi ira khö Yehowa börö me lö laʼodaligö ia.

Dani si dua yaʼia daʼö ”lö faröi Lowalangi”. Hadia geluahania? Na taʼila hewisa wondrorogö Yehowa nono mbanuania iʼotarai me föna irugi iadaʼa, tola taʼila wa lö faröi ia ba wanolo niha ”sangomasiʼö yaʼia ba soloʼö oroisania”. (V Moze 7:9) Taʼila göi wa lö aetu ifalua hadia zi no ifabuʼu. (Yosua 23:14) Tola faduhu dödöda wa (1) lö itehegö Yehowa itugu abua wanandraigö salua khöda irege lö sagu saʼae khöda ba wanaögö yaʼia, ba (2) ”ifaigi göi waʼawai” gabula dödö andrö.

Hewisa ’wamaigi Yehowa lala waʼawai’ gabula dödö andrö ba niha sangodaligö yaʼia? Tola iheta wanandraigö Yehowa. Hizaʼi, moguna tatörö tödöda niwaʼö Waʼulo wa ”ifaigi göi waʼawai [Yehowa], enaʼö tola mitaha”. Iʼaroʼö ita Yehowa enaʼö lö faröi ita. Daʼa lala sasese ifalua ba wanolo yaʼita. Datadunö-dunö lala wamaluania daʼa.

• Yehowa no ”sondrara tödöma, ba waʼafökhö andrö fefu”. (II Korindro 1:3, 4) Tola iʼogunaʼö Zura Niʼamoniʼö, ehehania, sawuyu si lö faröi ba wameʼe khöda faʼohahau dödö, faʼohahau wangera-ngera, hegöi hadia ia nirasoida.​—Mataiʼo 24:45; Yohane 14:16; Roma 15:4.

• Iʼogunaʼö gehehania niʼamoniʼö Yehowa ba wameʼe khöda fanuturu lala. (Yohane 14:26) Eheha niʼamoniʼö zanolo yaʼita enaʼö itörö tödöda waö-waö hegöi goi-goi Zura Niʼamoniʼö irege tola tahalö gangetula si sökhi.

• Tola iʼogunaʼö malaʼikania Yehowa ba wanolo yaʼita.​—Heberaiʼo 1:14.

• Tola iʼogunaʼö ndra talifusöda ba wanolo yaʼita. Tola laʼaroʼö ita ba wehede mazui ba nifaluara.​—Kolose 4:11.

Börö daʼö, hadia wamahaʼö si tola tahalö moroi ba wehede Waulo si so ba I Korindro 10:13? Lö ifili Yehowa hadia wanandraigö salua khöda. Hizaʼi, tola faduhu dödöda wa na taʼodaligö Yehowa, tola tataögö fefu ngawalö gabula dödö salua. Aboto ba dödöda wa hasambalö ibeʼe khöda lala Yehowa irege lö faröi ita khönia.