Alui Mbanua Lowalangi, Tenga Faʼomasi ba Ganaʼa

1. Hadia gamaehutania soguna khöda hegöi isö-isö dödöda?

SINDRUHUNIA, lö oya zinangea taʼokhögö enaʼö auri ita. Duma-dumania, moguna khöda gö, nukha, hegöi omo. Hizaʼi, so so manö nasa gisö-isö dödöda. Ato niha si lö mangila wa sindruhunia gisö-isö dödöra andrö lö hauga moguna ba waʼauri.

2. Hadia manö gisö-isö dödö niha?

² Hadia gisö-isö dödö niha si toröi ba soi si numana faehu sibai ba niha si toröi ba soi si kayo. Ba zi hauga soi, so zomasi mangokhögö HP, hondra, mazui si sagörö tanö. Ba soi böʼö, omasi niha wangokhögö ngawalö nukha sebua böli, omo sebua, mazui moto si maha. Hizaʼi, gofu hezo toröi ita mazui hawaʼoya gefeda, itugu oya gisö-isö dödöda sanandrösa ba wangokhögö gama-gama sambö moguna mazui si lö sagu khöda wowöli.

LUA-LUANIA KHÖDA NA TAʼOMASIʼÖ GANAʼA

3. Hadia wangomasiʼö ganaʼa andrö?

³ Hadia wangomasiʼö ganaʼa andrö? Yaʼia daʼö niha sabölö mangofönaiʼö gisö-isö dödönia ba ganaʼa moroi ba wahuwusania khö Lowalangi. Hewaʼae no tembönökhi zoguna khönia, lö manö nasa ahono dödönia. Niha si numana mazui si lö omasi mowöli gama-gama sebua harago, tola manö so khöra wangomasiʼö ganaʼa. Lua-luania, lö laʼofönaiʼö wangalui Mbanua Lowalangi ba waʼaurira.​—Heberaiʼo 13:5.

4. Hewisa wangogunaʼö Satana ”isö-isö hörö”?

⁴ Omasi Zatana na faduhu dödöda wa tola tasöndra waʼomuso dödö na taʼokhögö gokhöta soya. Iʼogunaʼö gulidanö andre hegöi ”isö-isö hörö”, sondrönisi yaʼita enaʼö taʼokhögö gokhöta soya. (I Yohane 2:15-17; I Moze 3:6; Gamaedola 27:20) Ero maʼökhö, tafaigi ba tarongo iklan zondrönisi dödöda enaʼö taʼöli gama-gama si bohou. Hadia no irai öʼöli gama-gama ha börö me baga ba wamaigiu ba toko mazui börö me tedönisi dödöu ba iklan? Na simanö, samuza inötö tola manö aboto ba dödöu wa sindruhunia lö moguna sibai ia khöu. Na taʼöli gama-gama si lö moguna khöda, tola manö möi fangabu dödöda. Tola mangoloi wangera-ngerada ba wamosumange Yehowa. Duma-dumania, tola manö ambö ginötöda ba wamahaʼö ba Zura Niʼamoniʼö, wamaʼanö weʼamöi ba gangowuloa, hegöi weʼamöi ba wanuriaigö. Törö tödöu hadia niwaʼö sinenge sotöi Yohane, ”Ba si taya nösi gulidanö, awö waʼomasinia andrö.”

5. Hadia lua-luania na taʼogunaʼö waʼabölöda ba wangalui gokhöta soya?

⁵ Omasi Zatana na taʼogunaʼö waʼabölöda ba wangalui kefe hegöi okhöta soya moroi na taʼofönaiʼö khö Yehowa. (Mataiʼo 6:24) Hizaʼi, lö eluaha waʼaurida na arörö ita ba wangalui gokhöta soya. Tola manö möi fangafökhö högöda mazui tosasa ita ba gefe. Ba lua-luania, awuwu wamatida khö Yehowa hegöi ba Mbanuania. (I Timoteo 6:9, 10; Famaʼeleʼö 3:17) Imane Yesu, ”Hadia ia gisö-isö böʼö” tola tobali ia simane ndroi zameʼe tebai mowua zinanö.​—Mareko 4:14, 18, 19.

6. Hadia wamahaʼö nihalöda khö Mbarukhi?

⁶ Angeraigö zalua khö Mbarukhi, sekretaris khö zamaʼeleʼö sotöi Yeremia. Me ibörötaigö iʼalui Mbarukhi hadia ia ”zebua”, ifangelama ia Yehowa wa ba zi lö aratö tehori mbanua Yeruzalema. Hizaʼi, fawuʼuli Yehowa wa ilumöʼö waʼauri Mbarukhi. (Yeremia 45:1-5) Sindruhunia, lö hadöi zi töra moroi ba daʼö nidöna-döna Barukhi. Lö ilumöʼö Yehowa fefu gama-gama niʼokhögö niha. (Yeremia 20:5) Iadaʼa, no so ita ba ngaluo safuria barö wamatörö Zatana. Ba tenga daʼa ginötönia khöda ba wangalui gokhöta soya. Na alua dania wamakao sabölö-bölö, böi tadöna-döna wa tola taʼokhögö gama-gamada hewaʼae na ebua sibai mbölinia ba wamaigida.​—Gamaedola 11:4; Mataiʼo 24:21, 22; Luka 12:15.

7. Hadia wanofu nifatunöda, ba hadia mbörö?

⁷ Hewisa enaʼö tola taʼosambuaʼö dödöda hegöi soroi yomoda ba wangofönaiʼö zabölö moguna ba waʼauri? Hewisa lalada ba wotimbagö fangomasiʼö ganaʼa? Hadia zanolo yaʼita enaʼö böi abu sibai dödöda ba zoguna khöda? Ba Huhuonia ba Hili, ibeʼe khöda Yesu mene-mene si sökhi. (Mataiʼo 6:19-21) Databaso ba tatutunö Mataiʼo 6:25-34. Ayati daʼa, tola ifarou ita enaʼö taʼofönaiʼö wangalui Mbanua Lowalangi, tenga fangomasiʼö ganaʼa.​—Luka 12:31.

IʼASOGÖ YEHOWA ZOGUNA KHÖDA

8, 9. (a) Hana wa moguna enaʼö böi abu sibai dödöda ba zoguna khöda? (b) Hadia niʼila Yesu sanandrösa ba niha hegöi soguna khöra?

⁸ Baso Mataiʼo 6:25. Iʼila Yesu wa aombö dödö ndra nifahaʼönia ba gö niʼara, nibadu, hegöi niʼonukhara. Imane khöra me ifaʼema Huhuonia ba Hili, ”Böi miʼabusi tödö nosomi.” Omasi itolo ira Yesu enaʼö aboto ba dödöra wa sindruhunia lö moguna laʼabusi tödö fefu daʼö. Hewaʼae sindruhu-ndruhu moguna khöra, hizaʼi na abu sibai dödöra, tola olifu ira hadia zabölö moguna ba waʼaurira, aboto ba dödö Yesu fefu daʼö. Iʼomasiʼö sibai ndra nifahaʼönia Yesu. Andrö wa töra öfa kali ifangelama ira ba huhuo nifaʼemania.​—Mataiʼo 6:27, 28, 31, 34.

⁹ Hana wa iwaʼö khöda Yesu enaʼö böi abu dödöda ba niʼa, nibadu, mazui niʼonukhada? Hadia lö moguna khöda gö hegöi nukha? Tatu manö moguna. Na ambö gefeda ba wowöli gama-gama, lö fasala na abu dödöda. Iʼila Yesu daʼö. Iʼila hadia zoguna ba niha gulidanö. Ba iʼila wa ”ba götö safuria”, auri ndra nifahaʼönia ba mbaŵa si lö sökhi. (II Timoteo 3:1) Ba ginötö andre, ato niha si lö manöndra halöwö, ba itugu ebua harago gama-gama. Ba mbanua böʼö, ato niha si numana sambö mbalazo mazui lö hadöi gö niʼara. Hizaʼi, iʼila Yesu wa so zabölö moguna moroi ”ba gö, ba tenga no ebua mboto, moroi ba nukha”.

10. Me ifahaʼö ndra nifahaʼönia Yesu sanandrösa ba wangandrö, hadia zabölö moguna laʼofönaiʼö ba waʼaurira?

¹⁰ Ifahaʼö ndra nifahaʼönia Yesu wa abölö sökhi na latutunö khö Nama ba zorugo hadia manö zoguna khöra ba ginötö mangandrö ira. Tola lamane wangandrö, ”Öma sirugi maʼökhö beʼe khöma maʼökhö andre.” (Mataiʼo 6:11) Ba ginötö böʼö, tola lamane wangandrö, ”Sirugi öma, beʼe khöma ero maʼökhö.” (Luka 11:3) Hizaʼi, tenga daʼö geluahania wa taʼera-era manö hewisa lala enaʼö tembönökhi zoguna khöda. Sindruhunia, itutunö Yesu khö ndra nifahaʼönia wa abölö sökhi na taʼofönaiʼö taʼohe ba wangandrö sanandrösa ba waʼatohare Mbanua Lowalangi moroi ba zoguna khöra. (Mataiʼo 6:10; Luka 11:2) Itolo ndra nifahaʼönia Yesu enaʼö böi aombö dödöra ba zoguna khöra, irara dödöra wa iʼameʼegö tödö Yehowa fefu nifazökhinia.

11, 12. Hadia wamahaʼö khöda sanandrösa woʼameʼegö tödö Yehowa wofo si so ba dalu mbanua? (Faigi gambara ba wamobörö wamahaʼö.)

¹¹ Baso Mataiʼo 6:26. Enaʼö ’tafaigi wofo andrö, ba dalu mbanua’. Hewaʼae no ide-ide wofo andrö, hizaʼi oya manga ira. Na fagölö manö waʼebuara ba niha, abölö oya gö niʼara moroi ba niha. Ö wofo andre yaʼia daʼö bua zinanö, hunö side-ide, hama hegöi elewazi. Hizaʼi, lö moguna latanö zinanö ba labasi. Iʼasogö Yehowa fefu zoguna khöra. (Zinunö 147:9) Tatu manö, lö ibeʼe gö ba mbawara! Hizaʼi, mofanö ira ba laʼalui samösa göra. Ba no teʼasogö fefu daʼö.

¹² Faduhu dödö Yesu, na iʼameʼegö tödö Yehowa wofo ba dalu mbanua, mendrua manö saʼae ba niha.^[1] (Faigi gonönöta.) (I Fetero 5:6, 7) Tatu manö, simane wofo, moguna owölö-ölö ita. Moguna mohalöwö ita, he ba wananö zinanö mazui ba wangalui kefe enaʼö tola taʼöli zoguna khöda. Tola ifahowuʼö Yehowa halöwöda. Na ambö gefeda mazui ambö zoguna khöda, iʼasogö Yehowa fefu daʼö. Duma-dumania, te so dalifusöda si sara lala wamati zameʼe khöda gö. Ibeʼe göi Yehowa nahia niʼoniagö wofo. Ibeʼe khöra waʼatua-tua ba wamazökhi gazuni ba itolo ira ba wamazökhi yaʼia. Simanö göi, itolo ita Yehowa enaʼö tasöndra nahia si sökhi si tola taʼoniagö.

13. Hadia dandra wa no faehu ita ba wofo si so ba dalu mbanua?

¹³ Me no ifasugi ba dödö ndra nifahaʼönia Yesu wa iʼasogö Yehowa gö wofo ba dalu mbanua, isofu khöra, ”Tenga no aröu faehu ami wofo?” (Faigi göi Luka 12:6, 7.) Me iwaʼö khöra wehede andrö, iʼila Yesu wa ba zi lö aratö ibeʼe nosonia si tobali höli ba niha fefu. Tenga ba wofo mazui ba gurifö ibeʼe nosonia Yesu. Hizaʼi, khöda fefu yaʼita niha gulidanö, enaʼö tasöndra waʼauri si lö aetu.​—Mataiʼo 20:28.

14. Hana wa lö moguna abu dödöda?

¹⁴ Baso Mataiʼo 6:27. Hadia geluaha wehede Yesu me iwaʼö wa tebai tanönö waʼanau nosoda sambua siʼu na abu dödöda? Eluahania, tola lö anau nosoda na abu dödöda ba zoguna khöda. Sindruhunia, na abu sibai dödöda tola mofökhö ita mazui tola mate ita.

15, 16. (a) Hadia wamahaʼönia khöda me iʼameʼegö tödö Yehowa ladari mböhö ba danö? (Faigi gambara ba wamobörö wamahaʼö.) (b) Hadia wanofu-nofu sinangea tasofu khöda samösa, ba hadia mbörö?

¹⁵ Baso Mataiʼo 6:28-30. Omuso dödöda na so khöda nukha si baga, mendrua manö na tafake ia ba wanuriaigö, ba gangowuloa, mazui ba kebaktian. Hizaʼi, ”Ba ba nukha, ba hana wa miʼabusi tödö?” Sakalitö, ifangelama ndra nifahaʼönia Yesu wa iʼameʼegö tödö Yehowa fefu nifazökhinia. Iʼogunaʼö Yesu duma-duma yaʼia daʼö ”ladari mböhö andrö ba danö”. ”Ladari mböhö” andre hulö simane bunga gladiol, bakung, iris, mazui tulip. Fefu bunga andrö, lö moguna latagu nukhara. Hizaʼi, no baga-baga sibai ba wamaigida yaʼira, ba iwaʼö Yesu wa ”lö simanö waʼasökhi nukha Zelomo, ba lakhöminia andrö fefu, simane nukha zi sara daʼö”!

¹⁶ Töngöni hadia niwaʼö Yesu, ”Na imanö Lowalangi wamanukha duʼu ba danö . . . , ba tenga mendrua manö imanö khömi, yaʼami sambö famati?” Tatu manö tola! Hizaʼi, moguna ladouʼö wamatira ira nifahaʼö Yesu. (Mataiʼo 8:26; 14:31; 16:8; 17:20) Moguna aboto ba dödöra wa omasi Yehowa ifondro-ndrongö gangandröwara ba sindruhu-ndruhu ifalua daʼö. Hewisa ita? Hadia faduhu dödöda wa iʼameʼegö tödö ita Yehowa?

17. Hadia zi tola mamakiko wahuwusada khö Yehowa?

¹⁷ Baso Mataiʼo 6:31, 32. Ato niha si lö faduhu tödö khö Yehowa, arörö ira ba wangalui kefe hegöi gama-gama. Na tafagölösi ita khöra, tola tekiko wahuwusada khönia. Aboto ba dödöda wa Yehowa andrö Ama sangomasiʼö yaʼita. Faduhu dödöda na tafalua goi-goinia ba taʼofönaiʼö Mbanuania ba waʼaurida, ifahowuʼö ita ba iʼasogö fefu zoguna khöda ba tola töra moroi ba daʼö. Taʼila göi, ohahau dödöda na taʼokhögö wahuwusa si sökhi khö Yehowa, ba daʼö zanolo yaʼita enaʼö ahono dödöda wangokhögö ”mbalazo, awö nukha”.​—I Timoteo 6:6-8.

HADIA MBANUA LOWALANGI NIʼOFÖNAIʼÖMÖ BA WAʼAURI?

18. Hadia niʼila Yehowa sanandrösa khöda samösa, ba hadia nifaluania?

¹⁸ Baso Mataiʼo 6:33. Na taʼofönaiʼö Mbanua Lowalangi ba waʼaurida, iʼasogö fefu zoguna khöda Yehowa. Itutunö Yesu hadia mbörö wa tola faduhu dödöda ba zi no ifabuʼu. Imane: ”Noa sa iʼila Amami andrö, ba zorugo, wa soguna khömi daʼö fefu.” Fatua lö taʼila, no iʼila Yehowa hadia zoguna khöda. (Filifi 4:19) Iʼila hadia nukha zoguna khöda ba zi so föna. Iʼila göi hadia zinangea taʼa. Ba iʼila göi wa moguna miʼokhögö yaʼami zi sambua omo nahia niʼoniagö. Ifabuʼu Yehowa wa iʼasogö fefu hadia ia zoguna khöda.

19. Hana wa moguna lö aombö dödöda ba zi lö alua nasa ba zi so föna?

¹⁹ Baso Mataiʼo 6:34. Ifuli imane Yesu khö ndra nifahaʼönia, ”Böi miʼabusi tödö.” Iʼasogö Yehowa fefu zoguna khöda ero maʼökhö. Sökhi na lö aombö dödöda ba zi lö alua nasa ba zi so föna. Hizaʼi, na aombö dödöda, tola manö taʼodela wangera-ngerada samösa ba tola tekiko wahuwusada khö Yehowa. Hizaʼi, moguna faduhu dödöda khönia.​—Gamaedola 3:5, 6; Filifi 4:6, 7.

NA ÖʼOFÖNAIʼÖ WANGALUI MBANUA LOWALANGI, IROROGÖ NDRAʼUGÖ YEHOWA

20. (a) Hadia gohitö dödöu ba wangai halöwö khö Yehowa? (b) Hadia zi tola öfalua enaʼö ahono dödöu ba zi no so?

²⁰ Alimagö sibai na taʼogunaʼö ginötöda ba wangalui harato soya, irege lö inötöda ba wamosumange Yehowa! Sindruhunia, moguna tabeʼe zabölö sökhi khö Yehowa. Duma-dumania, hadia tola findra ndraʼugö ba mbanua niha Keriso sambö sanuriaigö? Hadia tola merintis ndraʼugö? Mazui, na no merintis ndraʼugö, hadia omasiʼö fao ba Sekolah bagi Penginjil Kerajaan? Hadia tola öʼogunaʼö ginötöu ba zi hauga hari mohalöwö ba Betel mazui RTO? Te tola tobali ndraʼugö Relawan Konstruksi mazui öʼogunaʼö ginötöu ba wolului halöwö wamazökhi Balai Mbanua Lowalangi. Angeraigö hadia zi tola öfalua enaʼö ahono dödöu ba zi no so, irege oya ginötöu hegöi faʼabölöu ba wangai halöwö khö Yehowa. Kotak ”Lala Enaʼö Ahono Dödöu ba zi No So”, ibeʼe khöda lala sinangea tafalua. Angandrö khö Yehowa enaʼö itolo ndraʼugö ba wangai angetula. Aefa daʼö, falua gangetula nihalöu.

21. Hewisa enaʼö itugu aro wahuwusada khö Yehowa?

²¹ Ifahaʼö ita Yesu enaʼö taʼofönaiʼö wangalui Mbanua Lowalangi. Na tafalua daʼö, tola lö abu dödöda ba zoguna khöda. Itugu aro wahuwusada khö Yehowa na faduhu dödöda wa irorogö ita. Moguna so khöda wanaha tödö ba lö taʼöli hadia manö gisö-isö dödöda mazui hadia manö niʼasogö gulidanö andre, hewaʼae na tola taʼöli ia. Na ahono dödöda ba zi no so iadaʼa, daʼö zanolo yaʼita enaʼö lö faröi khö Yehowa ba ifabuʼu khöda wa ’takhamö sindruhu faʼauri andrö’.​—I Timoteo 6:19.