Ogunaʼö Lektur si Teʼodane-dane ba Zura Niʼamoniʼö si Fao Faʼatua-tua

Imane Yesu, ”Lö nibeʼemi böli, ba böi göi mihalö mböli.” (Mat 10:8) Taʼoʼö wanuturu lala daʼa. Lö taʼandrö mböli Zura Niʼamoniʼö mazui lektur nibeʼeda. (IIKor 2:17) Hizaʼi, fefu nösi lektur andre teʼodane-dane ba Daromali Lowalangi. Ebua sibai gefe niʼogunaʼö ba wamazökhi hegöi ba wamaʼoheʼö lektur ba mbanua niha Keriso ba zi sagörö ulidanö. Börö daʼö, moguna na ha soguna khöda yaʼi nihalöda.

Ogunaʼö waʼatua-tua na öbeʼe lektur ba niha böʼö, simanö göi na manuriaigö ba nahia sato niha. (Mat 7:6) Moroi na ha asala tabeʼe lektur ba niha sanörö lala, sökhi na fahuhuo ita khöra enaʼö taʼila hadia zadöni dödöra. Hadia tola öbeʼe wanema li si löʼö-löʼönia sambua moroi ba wanofu si so ba kotak? Na lö adöni dödönia, abölö sökhi na ha risalah öbeʼe khönia. Tatu manö, na so wanofu-nofunia sanandrösa ba majalah mazui publikasi tanö böʼö, tola tabeʼe khönia mbuku.​—Gamd 3:27, 28.